៩៥
១ ចុះ ពិន ប៉ានេ កា ប៉្រ័ះ ប៊កកាតយ័
អ៊ែ ពៀប ឡាក់ កា អំហ្មោ ទឹប ឡាក់ កា បក់ តង័ ពិន។
២ ពិន ម៉ុត ឡាំ ប៉ាគ់ ប៉្រ័ះ ប៊កកាតយ័ ពិ
ទឹប ហោក រ៉គ់ លូ ចាជែ យ៉ិល។
៣ ខង ប៉្រ័ះ ប៊កកាតយ័ ឡាក់ សាដាច់
លូ តីស ហ៊្លត ឡឹង ប៉្រ័ះ អន់ទៀគៗ។
៤ ប៉្រ័ះ ប៊កកាតយ័ រ៉ាំងហៃ កាណាគ័ ញ៉ាៗ ទិណោ័ះ
កាក់ ឡឹង អង់កក់ តេះ ទឹប ប៉ានឹម ចាំងហីគ។
៥ សាឡីគ សាឡាយ លូ អង់កក់ តេះ កា ម៉ះ ប៉្រ័ះ ប៊កកាតយ័
ខង អ៊ែ ឡាក់ តាំងឡា ប៉ាំងកើត។
៦ ពិ ពិន ប៉ាណាំ គួប កុប កល់ សាំប៉័ះ កា ប៉្រ័ះ ប៊កកាតយ័
ខង អ៊ែ ឡាក់ តាំងឡា ប៉ាំងកើត ពិន។
៧ ខង ប៉្រ័ះ ប៊កកាតយ័ ឡាក់ ប៉្រ័ះ ពិន
ពិន ឡាក់ ប៉ាសុន អ៊ែ
អ៊ែ រ៉ាំងហៃ ពិន ឡាក់ ពូ រ៉ាំងហៃ ចៀម
ដារ់ អា ហង ពិន កាតាំង ប៉ានឹរ អ៊ែ។
៨ អន់ដីស ជែ កាង័ កល់ ឡាក់ កា អន់ដីស ប៉ាសាំង ប៉ាគ់ មេរីបា
លើ ឡាក់ កា សាគ់ លួង ប៉្រ័ះ ប៉ាគ់ ស៊្រែ តីស ម៉ាសា ពែ។
៩ វគ័ យ៉ាក អន់ដីស អន់ឌែ សាគ់ លួង អាញ់
យ៉័ះ អន់ឌែ ប៉ប័ ង៉ារ អំរ៉ាញ អឺញ ឡាក់ អាញ់ ប៉្រគ័ កាតាម។
១០ រ៉ាំងវ៉ាង ៤០ សាណាំ ប៉ាណូស ផះ រ៉ាំងហាវ ណោះ ប៉្រគ័ អន់ អាញ់ ស្រាប់ ខាក់
ណោះ ហង អាញ់ កាប ផា៖
«ពុត ប៉ាសុន អា វ៉ឹល វ៉ើង
អន់ឌែ អូ អ្លុ ទ្រង អាញ់ អុះ»។
១១ អាញ់ អឺក ខាក់ ទឹប កាប ផា៖
«អូ អន់ អន់ឌែ ម៉ុត រ៉ាឡូវ អន់ឌូ លូ អាញ់ ឡូត»។