១៣
សារ វគ័ ម៉ូសេ ប៉្រើ ពូ ឡាំ ហៃ ប៉ាថេត កាណាន
១ ប៉្រ័ះ ប៊កកាតយ័ រ៉ះ កា វគ័ ម៉ូសេ ផា
២ «ហគ់ អីស ប៉្រើ ពូ ឡាំ ហៃ ប៉ាថេត កាណាន ឡាក់ អាញ់ មប អន់ កា ប៉ាសុន អ៊ីស្រាអ៊ែល ណោះ ពិ ត្រគ់ អ្យក់ កាណុង ម៉ោញ ផូង័ ម៉ោញ ដូវ ត្រគ់ អ្យក់ ប៉ាណូស បក់ ប៉្រគ័ ម៉ៃគ ណាំផា ពូ»។
៣ វគ័ ម៉ូសេ កា ប៉្រើ ពូ ឡាំ ឡឹង ស៊្រែ តីស ប៉ារ៉ាន ពួយ ឡាក់ កា ប៉្រ័ះ ប៊កកាតយ័ ប៉្រើ ណោះ ហង មួត កាម៉ាក័ បក់ ឡាំ ណោះ ស៊ុត កា ម៉ៃគ ណាំផា សុនសាត អ៊ីស្រាអ៊ែល។
៤ សិច អន់ឌែ ណោះ ទី ឡាក់ កា អា៖
ឡឹង ផូង័ រូបេន សិច សាមួ ឡាក់ គន វគ័ សាគើរ
៥ ឡឹង ផូង័ ស៊ីមៀន សិច សាផាត ឡាក់ គន វគ័ ហូរី
៦ ឡឹង ផូង័ យូដា សិច កាលែប ឡាក់ គន វគ័ យេភូនេ
៧ ឡឹង ផូង័ អ៊ីសាខារ សិច យីកាល់ ឡាក់ គន វគ័ យូស៊ែប
៨ ឡឹង ផូង័ អេប៉្រាអ៊ីម សិច ហូសេ ឡាក់ គន វគ័ នូន
៩ ឡឹង ផូង័ បេនយ៉ាមីន សិច ប៉ាល់ធី ឡាក់ គន វគ័ រ៉ាភូ
១០ ឡឹង ផូង័ សេប៊ូលុន សិច កាឌៀល ឡាក់ គន វគ័ ស៊ូឌី
១១ ឡឹង ផូង័ ម៉ាណាសេ ឡាក់ គន សោ វគ័ យូស៊ែប សិច កាឌី ឡាក់ គន វគ័ ស៊ូស៊ី
១២ ឡឹង ផូង័ ដាន់ សិច អាមៀល ឡាក់ គន វគ័ កេម៉ាលី
១៣ ឡឹង ផូង័ អាស៊ើរ សិច សេធើរ ឡាក់ គន វគ័ មីគែល
១៤ ឡឹង ផូង័ ណាប់ថាលី សិច ណាប៊ី ឡាក់ គន វគ័ វ៉ុបស៊ី
១៥ ឡឹង ផូង័ កាត សិច កេអួល ឡាក់ គន វគ័ ម៉ាគី។
១៦ អា ហង សិច មួត បក់ វគ័ ម៉ូសេ ប៉្រើ ឡាំ ហៃ ប៉ាថេត ណោះ។ គន វគ័ នូន សិច ហូសេ ហះកា វគ័ ម៉ូសេ អន់ សិច ផា យូស្វេ ឡគ។
១៧ វគ័ ម៉ូសេ ប៉្រើ អន់ឌែ ឡាំ ហៃ ប៉ាថេត កេះណោះ អន់តគ់ រ៉ះ ផា «ហគ់ ប៉ាណាំ គួប អន់ដីស ចាក ឡឹង ស៊្រែ ណេកិប អា ចាក ហាវ ទ្រង ព្រី ប៉ានឹម តោ។
១៨ ហគ់ ហៃៗ នីចម័ ប៉ាថេត ណោះ ដាគ់ ដេល ប ? ប៉ាណូស អ្វៃ កាណុង ណោះ សាងុំ ញ៉ា អូ សាងុំ ? អន់ឌែ ណោះ ទី កាំឡាំង អៀង ដូវ ញ៉ា ប៊ែត ដូវ ?
១៩ ប៉ាថេត អន់ឌែ អ្វៃ ណោះ ដាគ់ ញ៉ា អូ ដាគ់ ? គ្រឹប ចារ អន់ឌែ អ្វៃ ណោះ ស្រុក ដោច ញ៉ា មឿង តីស ឡាក់ ទី ប៉ាន់ទៀយ កាចាប័ ?
២០ តេះ កាណុង ប៉ាថេត ណោះ ដាគ់ សាណា ញ៉ា អូ ដាគ់ ? ទី តើម អ៊្លង ញ៉ា អូ ទី ? អន់ដីស ត្រគ់ ទី ពុត ខឹន លូ អ្យក់ សឹត សាណា ឡឹង ប៉ាថេត ណោះ»។ ផះ រ៉ាំងវ៉ាង ណោះ ត្រគ់ ពឹង ថុន ប៉្លៃ អង់កាច ទុំ។
២១ អន់ឌែ កា ចាក ឡាំ ហៃ ប៉ាថេត ណោះ ឡឹង ស៊្រែ តីស ស៊ីន លើយ ទឹល ស្រុក រេហូប ឡាក់ អ្វៃ ក្យាម័ ចារ ឡេបូ ហាម៉ាត់។
២២ អន់ឌែ ឡាំ ប៉ាគ់ ស៊្រែ ណេកិប ចាក ឡាំ ទឹល ប៉ាគ់ មឿង ហេប្រូន អ្វៃ ពឹង មឿង ណោះ ទី គន សោ វគ័ អាណាក់ អន់ដា ទី សិច ឡាក់ កា អាហ៊ីម៉ាន សេសាយ លូ តាល់ម៉ាយ។ ពូ ប៉្រគ័ មឿង ហេប្រូន ណោះ អន់ទ្រួល ឡឹង ប៉្រគ័ មឿង សូអាន ពឹង ប៉ាថេត អ៊ីស៊ីប តាំប៉ើះ សាណាំ។
២៣ អន់ឌែ ចាក ទឹល ប៉ាគ់ តាចាង័ អេសាកុល។ ហះ ចារ ណោះ អន់ឌែ កាសិត តាំងកង់ ប៉្លៃ អង់កាច ម៉ោញ រ៉ាំប៉ឹល អន់ កា គួប អន់ឌែ ពៀរ ដូវ តូង័ អន់ឌែ កា អ្លេះ ប៉្លៃ ទទឹម លូ ប៉្លៃ ហ្រា អន់ដា ដេល។
២៤ ពូ អន់ សិច ចារ ណោះ ផា អេសាកុល ខង ហះ ចារ ណោះ សុនសាត អ៊ីស្រាអ៊ែល អន់ឌែ កាសិត តាំងកង់ ប៉្លៃ អង់កាច ម៉ោញ រ៉ាំប៉ឹល។
២៥ អន់ឌែ ឡាំ ហៃ ប៉ាថេត ណោះ ទុញ ៤០ ដារ់ កេះ អន់ឌែ កា សឹត ហង។
២៦ ទឹល ប៉ាគ់ ចារ រ៉ាណើះ កេះ អន់ឌែ កា ឡាំ ប៉ាគ់ វគ័ ម៉ូសេ លូ វគ័ អារ៉ុន ទឹប ប៉ាសុន អ៊ីស្រាអ៊ែល ទិឌូ ឡាក់ អ្វៃ ពឹង ចារ កាដេះ កាណុង ស៊្រែ តីស ប៉ារ៉ាន ណោះ ហង កេះណោះ រ៉ះ សារ អន់ឌែ ឡាំ ហៃ ប៉ាថេត ណោះ កា វគ័ ម៉ូសេ លូ វគ័ អារ៉ុន ទឹប កា ប៉ាសុន អ៊ីស្រាអ៊ែល ទិឌូ លូ តាំបាង ប៉្លៃ ឡាក់ អន់ឌែ អ្លេះ អ្យក់ សឹត ឡឹង ណោះ ដេល។
២៧ អន់ឌែ រ៉ះ កា វគ័ ម៉ូសេ នីអៀ «ញឹន ឡាំ ទឹល ប៉ាគ់ ប៉ាថេត ឡាក់ អីស ប៉្រើ ឡាំ ហៃ ពែ កេះ ពឹង ប៉ាថេត ណោះ ទី ទៀក តុះ រ៉ក់ លូ ទៀក សុត អៀង តាទឹច ហង អីស ហៃ ប៉្លៃ ញឹន អ្លេះ អ្យក់ សឹត អា។
២៨ ហះកា ប៉ាណូស បក់ អ្វៃ ពឹង ប៉ាថេត ណោះ ស៊ុត កា ប៉ាណូស សាងុំ កេង ខាក់ មឿង អន់ឌែ កា តីស ទឹប ទី ប៉ាន់ទៀយ កាចាប័។ ញឹន ប៉ប័ គន សោ វគ័ អាណាក់ អន់ឌែ អ្វៃ ពឹង ណោះ ដេល។
២៩ សុនសាត អាម៉ាឡេក អ្វៃ ពឹង ស៊្រែ ណេកិប។ សុនសាត ហេត សុនសាត យេប៊ូស លូ សុនសាត អាម៉ូរី អន់ឌែ អ្វៃ ពឹង ព្រី ប៉ានឹម។ កាប៉ាច់ សុនសាត កាណាន អន់ឌែ អ្វៃ រហាង ទៀក សាឡីគ សាឡាយ លូ រហាង ទៀក ទ្រូង យដាន់»។
៣០ មួត ប៉ាសុន ប៉ាណាំ គួប ណាំង សារ លូ វគ័ ម៉ូសេ ហះកា កាលែប ទឹប អន់ឌែ ផា «អ្វៃ រ៉ាង៉ាប់» លូ កាប ផា «ពិ ពិន ឡាំ តាប៉ីត អ្យក់ ប៉ាថេត ណោះ ខង ចឹង ទី ទ្រង ពិន ឡូត»។
៣១ ហះកា មួត បក់ ឡាំ ហៃ ប៉ាថេត អន់ឌូ លូ អ៊ែ ណោះ កាប ផា «ពិន ចឹង ឡាំ តាកូះ លូ អន់ឌែ អូ ដាម័ អុះ ខង អន់ឌែ សាងុំ កេង ឡឹង ពិន»។
៣២ អន់ឌែ រ៉ះ ផា ប៉ាថេត អន់ឌែ ឡាំ ហៃ ណោះ អូ ដាគ់ អុះ លូ រ៉ះ កា ប៉ាសុន អ៊ីស្រាអ៊ែល ផា «ប៉ាថេត ញឹន ឡាំ ហៃ ណោះ ឃឺ ប៉ាថេត ថាំឡាយ មួត ប៉ាសុន។ ញឹន ប៉ប័ ប៉ាណូស អ្វៃ ពឹង ប៉ាថេត ណោះ ស៊ុត កា តីស ចាំងហីគ។
៣៣ ញឹន ប៉ប័ ប៉ាណូស រ៉ាតីស ឃឺ គន សោ វគ័ អាណាក់។ ផះ ញឹន ហៃ អន់ឌែ ញឹន ពៀប ឡាក់ កា ឡៃប អន់ឌែ កា កាប ដេល ផា "អន់ដីស ឡាក់ កា ឡៃប"»។