Buk bilong
Esta
i kam long tok Grik
Tok i go pas
Buk bilong Esta, em i stori bilong wanpela meri Israel. Esta i stap long taim ol birua i bin kisim ol Israel i go i stap long narapela kantri. Ol i stap yet long dispela kantri na wanpela birua i laik bagarapim ol. Na long dispela taim God i larim Esta i kamap meri bilong king bilong dispela kantri, long wanem, God i laik bai Esta i mas helpim ol Israel. Orait Esta i bihainim laik bilong God na em i no wari long em yet bai i stap gut, o nogat. Em i tingting tasol long helpim ol lain bilong em. Olsem na God i kisim bek ol Israel na ol birua i no bagarapim ol.
Long buk Baibel i gat tupela buk i stori long Esta. Pastaim ol i bin raitim dispela stori long tok Hibru, na bihain ol i bin tanim long tok Grik. Tasol taim ol i tanim long tok Grik, ol i bin senisim sampela hap tok liklik. Na tu ol i bin skruim ol nupela hap tok wantaim.
Dispela buk Esta i kam long tok Grik i gat strongpela tingting long God na long prea. Dispela buk i gat 6-pela sapta i no i stap long buk Esta i kam long tok Hibru. Buk Esta i kam long tok Hibru em i gat 10-pela sapta. Na ol dispela nupela sapta i kam long tok Grik, mipela i bin makim long sapta A i go inap sapta F, na ol i stap namel namel long ol sapta 1 i go 10. Sapta B i stap namel long 3.13 na 3.14, na sapta E i stap namel long 8.12 na 8.13, olsem na sapta 3 na sapta 8 i bruk na i stap long tupela hap bilong buk.
1
Esta i kamap kwin bilong Persia
(Sapta A-2)
Mordekai i driman
1-3 Taim King Nebukatnesar bilong Babilon i kisim Jerusalem, Mor-dekai, wanpela Juda bilong lain bilong Benjamin, i go kalabus wantaim King Jehoiakin bilong Juda. Mordekai em i pikinini bilong Jair, na tumbuna pikinini bilong Simei. Na Simei em i pikinini bilong Kis. Em i go sindaun i stap long taun Susa, em wanpela biktaun bilong kantri Persia. Em i holim wanpela bikpela wok long gavman bilong King Serksis.
Orait long namba 2 yia bilong Serksis i stap king, na long namba wan de bilong mun Nisan, Mordekai i driman.
4 Long driman em i lukim olgeta samting bilong graun i paul nabaut, na i gat bikpela nois na klaut i pairap na graun i guria na ol samting i longlong nabaut.
5 Orait em i lukim tupela traipela snek i kirap na tupela i redi long pait wantaim.
6 Tupela i singaut nogut tru, na olgeta lain man bilong graun i redi long kirapim pait long ol lain stretpela manmeri i save lotu long God.
7 Dispela de em i wanpela de bilong tudak na bilong hevi. Em i de bilong krai na trabel na bagarap.
8 Ol stretpela manmeri bilong God ol i guria nogut tru na ol i pret long ol samting nogut i laik kamap long ol. Ol i redi long i dai,
9 tasol ol i singaut long God bai em i helpim ol. Na long driman Mordekai i lukim olsem God i harim prea bilong ol. Em i lukim wanpela liklik wara i kamap long graun na i go i go na i kamap traipela wara.
10 Em i lukim tulait i kamap na san i go antap, na ol dispela lain manmeri nating i kisim strong, na ol i kirap na ol i pinisim ol birua i hambak tumas.
11 Orait Mordekai i kirap long slip, na long dispela de yet i go inap long tudak, em i wok long tingting long mining bilong ol dispela samting God i laik mekim i kamap.
Mordekai i helpim king na ol man i no kilim em i dai
12 Long wanpela de Mordekai i sindaun malolo i stap insait long banis bilong king. Orait tupela wasman bilong king, em Gabata na Tara, tupela i stap long wok bilong tupela.
13 Mordekai i harim tupela i toktok long mekim samting nogut. Em i putim gut yau na em i harim olsem, tupela i redi nau long kilim king i dai. Olsem na Mordekai i go long King Serksis na em i toksave long king long dispela samting tupela i laik mekim.
14 Taim king i harim kot bilong tupela, tupela i no gat tok. Olsem na em i kilim tupela i dai.
15 King i givim oda bai ol i mas raitim stori bilong dispela samting i bin kamap long buk bilong king. Na Mordekai tu i raitim long buk bilong em yet.
16 Orait na king i makim Mordekai bilong kamap ofisa long haus bilong em, na em i givim planti presen long em, long wanem, em i bin kisim bek laip bilong king, na king i no bin bagarap.
17 Tasol Haman, em pikinini bilong Hamedata na man bilong lain Bugea, em tu i gat namba na biknem long ai bilong king. Na em i laik mekim trabel long Mordekai wantaim ol arapela Juda, long wanem, Mordekai i bin kotim tupela wasman.
Kwin Vasti i bikhet long King Serksis
18-19 Long taim ol dispela samting i kamap, Serksis i stap king long kantri Persia. Em i save sindaun long sia king bilong em long Susa, namba wan biktaun bilong Persia. Na em i bosim ol 127 provins, stat long India na i go inap long Sudan.
20 Long namba 3 yia bilong em i stap king, em i mekim wanpela bikpela kaikai bilong olgeta saveman na ol man i makim ol arapela kantri. Na ol bikman bilong Persia na Midia tu i kam i stap long dispela bikpela kaikai. Na ol hetman bilong ol provins ol tu i stap.
21 Inap long 6-pela mun olgeta, king i soim olgeta mani na olgeta bilas bilong haus bilong em long ol dispela manmeri.
22 Bihain long dispela, king i mekim narapela bikpela kaikai gen insait long banis i raunim haus bilong em. Dispela kaikai i bilong ol man bilong ol arapela lain i stap long taun. Ol i kaikai i stap inap long wanpela wik stret.
23 Dispela banis ol i bilasim long waitpela laplap na ol i pasim long blupela baklain. Na ol i pasim dispela baklain long ol ring silva i hangamap long ol longpela pos ston. Ol i karamapim graun insait long banis long retpela na waitpela na blupela ston, na long ol lalai na wanpela kain ston bilas i olsem glas. Na ol i putim ol sia gol na ol sia silva nabaut nabaut insait long banis. Ol i karamapim ol sia long laplap slika i gat kain kain kala na plaua bilas long en.
24 Ol man i dring long ol kap gol na silva. Na ol i soim wanpela gutpela kap, pe bilong en i antap tru, inap 30,000 kina. Na king i givim planti wain long ol dispela man.
25 I no gat mak long hamas wain ol i ken dring. King i tokim ol wokboi bilong haus bilong em, ol i ken givim dring long ol wan wan man inap long laik bilong ol.
26 Na long dispela taim Kwin Vasti tu i mekim bikpela kaikai long haus bilong king. Dispela kaikai em i bilong ol meri tasol.
27 Long de namba 7 bilong dispela bikpela kaikai, king i spak liklik long wain. Olsem na em i singautim 7-pela hausboi bilong en i kam. Nem bilong ol i olsem, Haman na Basan na Tara na Borase na Satolta na Abatasa na Taraba.
28 Na king i tokim ol long bringim Kwin Vasti i kam. King i laik putim hat bilong kwin long het bilong Vasti. Kwin em i naispela meri tru, olsem na king i laik soim em long olgeta man i bin kam long bikpela kaikai bilong em.
29 Tasol kwin i no laik i kam. Olsem na king i kros nogut tru.
30 Em i tokim ol saveman bilong lo olsem Vasti i bin sakim tok bilong em, na em i askim ol, em i mas mekim wanem samting nau?
31-32 Orait tripela ofisa i poroman bilong king na i stap bikman tru, tripela i kam. Tripela i skulim em long lo na tripela i tokim king long samting em i mas mekim bilong bekim dispela pasin Kwin Vasti i bin mekim. Nem bilong tripela ofisa i olsem, Arkeseus na Sarsateus na Malesear. Tripela i bilong kantri Persia na Midia.
33 Orait king i stori long olgeta ofisa bilong em na long ol hetman bilong Midia na Persia, long dispela pasin kwin i bin mekim bilong sakim tok bilong em. Orait Mukeus i tokim king wantaim ol hetman bilong em olsem, “King, harim. Kwin Vasti i no bin mekim rong long yu wanpela tasol. Nogat. Em i mekim rong long yumi olgeta.
34-35 I no longtaim na olgeta meri bilong yumi bai i harim tok long dispela pasin bilong kwin. Na ol meri bai i bikhet long man bilong ol, long wankain pasin olsem Vasti i bin bikhet long yu.
36 Olsem na king, sapos yu ting dispela tok i gutpela, yu mas salim em i go nabaut long olgeta pipel. Yu mas tok olsem, i tambu long Vasti i kam lukim yu gen. Raitim dispela tok long buk bilong lo bilong ol Persia na Midia. Na yu mas senisim Vasti na kisim wanpela gutpela meri na putim em i stap kwin. Em tasol.
37 Taim dispela tok bilong yu i raun pinis long olgeta ples yu save bosim, orait olgeta meri bai i harim gut tok bilong man bilong ol, maski man i gat nem o em i man nating.”
38 King wantaim ol hetman bilong em ol i laikim dispela tok, na king i mekim olsem Mukeus i tok.
39 Olsem na king i salim pas i go long olgeta provins na em i raitim pas long olgeta tok ples bilong ol manmeri. Em i tok olsem, “Man tasol em i bos bilong famili bilong em.”