GALA Sɛʋɛi Kɛɛwotiiti 22

1 «Kɛ̀ɛni ta kɛ̀ɛleaiti, à woilo nii ma gè bosu ga nà-goozuɠulagi.» 2 Naa mɔta lɛini ʋolu tɔɔntɔɔn, siɛgi zu ti mɛnini la ga Pɔle ɠa ɓɔɛzu ti ʋɔ Alame wooi zu. Pɔle ɠɛni ti ma: 3 «Nɔ̀un, nà ga Zuifui ta, sɔ̀lɔɔgɛ Taalese, Silisi yooi zu, kɛlɛ gè kulasui wogɛ taa wolai nii zu, gè kalagi zɔlɔɔ Gamaliyɛle yeezu, nii a kɛ gè ʋilɛ gi-mɛmɛwolani ta-lɔgi ɠwɛɛgai ʋolu ga ɠiteɠite. Sɛ̀bɛzeɠeni gola GALA ná-fai zu, eɠɛʋelei wo la za. 4 Gè kidaaleʋe ʋele niinɛi nii ma nuiti wɔinzeɠe eyɛsu saai ɗa zeeli tanigaa ma, gè zunuiti ta anzanuiti gili, gè ɗa ti ʋili kasoi ɠa. 5 Zalaɠa ɠula ɠundiɠi wolai ta totuɠɔiti pɛ ta zoo ɠɛɛzu ga nà-zeele. Gè falima zɛʋɛiti sɔlɔɔni vɔlɔ ti ya, ga é ve ade-ɠɛɛlointi Zuifuiti zea, siɛgi zu gè ɠɛni liizu la Damase ga gè naama ɠidaaleʋe nuiti gili, gè ʋa ga tiye Zeeluzalɛme, nii a kɛ gè faa zei ti ma.

6 Tɛi gè ɠɛni pelei ma, màaɓuɠazuʋɛ Damase ʋa, folo gaalɔgai ma ziɛgi zu, gaamago wozakala golai ta ɠulani geeɠɔlɔgi zu, é ɗa volo màaɠoolii zu.› 7 Gè looni zooi ma, gè wooi ta mɛnini, é ɗa ɠɛ mà: ‹Sɔle, Sɔle, lee vaa zu è wɔ̀inzeɠezu?› 8 Gè ɠɛni ma: ‹Ɓɛ ɠa ga ɗe, Màliɠii?› É ɠɛ mà: ‹Nà ɠa gè ga Nazalɛte nui Yesu, nii è wɔ̀inzeɠezu.› 9 Sìɛɲɔɠɔiti ti wozakalagi ɠaani, kɛlɛ ti la ɠɛni naama nui woomɛnisu, nii é ɠɛni ɓɔɛzu pɔ̀. 10 Gè ɠɛni ma: ‹Màliɠii, lee ɠa nà kɛ?› Maliɠii ɠɛ mà: ‹Wuzeɠe, è li Damase, ta naa pɛ bo è ma, nii maanɛai ga è kɛ.› 11 Tɛi wozakalagi naa ma voloi gàazuɠoleni, sìɛɲɔɠɔiti ti sòni zèei ʋa, ti li ga ze Damase.

12 Zunui ta ɠɛni miná, daaseigi ga Ananiase. GALA gaazuluaba nu ɠɛni de, é ɠoloni GALA ná-tɔgi ʋɛ. Zuifuiti kpein ti Damase ti ɠɛni tɔɠɔ ʋagɔi wosu. 13 É ʋaani, é ɠɛ mà: ‹Kɛ̀ɛloun Sɔle, wozaɠa ʋolu!› Gaamago nɔ, gàazuʋɛ zeɠeni ma, gè wɛlɛ ba. 14 É ɠɛni mà: ‹Ade-mɛmɛwolani ta-ƓALAGI yeelogɛ è ʋa kaite ma yeeluɠɔ ga è ziimai ɠwɛɛ, è Telebo Nui ʋɛtɛ, ta è daawooiti mɛni. 15 Ɗa ɠɛɛzu ga ná-zeelei nuɓusɛiti pɛ gaazu, é ʋilɛ naama vai ʋa, nii è kaai ta è mɛnigai. 16 Lee vaa zu mu è nɛkɛsu? Wuzeɠe, è ɓatize, ɗa-ɠotoiti ti gba è ʋa, è ɓɔɠɔ ɠaliva Maliɠii ma.›

17 Naa ʋoluma, siɛgi zu gè ʋaani la ʋolu Zeeluzalɛme, yeeta gè ɠɛni GALA falizu GALA sei ʋɛlɛi wu sùɠili. 18 Gè wɛlɛni, gè Maliɠii ɠa, é ɗa ɠɛ mà: ‹Suvilɛ, è ɠula Zeeluzalɛme ʋa, tɔɔzei nuɓusɛi niiti ti zeini ná, ti la woiloga pɛ ɗa-zeele wooi ma, é ʋilɛ nɔ̀un ba.› 19 Gè gooɠaaʋoteni, gè ɠɛ ma: ‹Màliɠii, ti pɛ ti suɠwɛɛni ga gè ɠɛa liizu GALA dɛbi ʋɛlɛiti bu, gè ɗa naama nuiti pili kasoi ɠa, ta gè ɗa ti loɠa, niiti ti ɠidaaleʋeai è ma. 20 Anɛɛ ɓalaa siɛgi zu ti ɠɛni ɗa-zeelei Etiyɛni ʋaazu la, nà ɓɔɠɔi gè ɠɛni ná, gè vaani bu, nà ɠa gè ɠɛni makɛsu ma nu ʋaa nuiti ta-zeɠeiti ba.› 21 Naazu Maliɠii ɠɛni mà: ‹Li, nà è leʋesu ɠoozama poun zii ɠiligiti pɔ bɛ.› »

Pɔle ʋili fai kasoi ɠa

22 Ti woiloni goo ma, eyɛsu é naama wooi wo. Kɛlɛ naa ʋoluma ti wooɠulani, ti ɠɛ ma: «À nii ɠɛɠala nui ʋaa! Maa la nɛɛni ga wo ʋa zɛ vulua!» 23 Ti ɠɛni kpeei loozu, ti ɗa ta-zeɠeiti pili ya, ti ɗa fufiligi wuzeɠe geezuʋɛ. 24 Kɔɔɠuluɓai devei veeni ga ti lɛ ga Pɔle kɔɔlaɠai zu, ti gaazaɠa ga kpakɔi, nii a kɛ ti kwɛɛ lee vaa zu nuiti ti ɓainsu ɠani tɔun daalɔɠɔma. 25 Tɛi ti ɠɛni gilizu ga ti ʋa doɠa, Pɔle salaʋusu ɠundiɠii ɠaazaɠani, é ɠɛ ma: «Zobo feeʋɛ wo ya ga Wɔlɔme nu loɠa, nii ná-tukpɔi ɠaa la dɛ vɔlɔ leʋeni?» 26 Salaʋusu ɠundiɠii naa mɛnigai ma, é liini é ɠɛ kɔɔɠuluɓai ma: «Lee ɠa è ʋaazu kɛɛzu? Zunui nii ɠa ga Wɔlɔme nu.» 27 Kɔɔɠuluɓai ʋaani, é ɠɛ Pɔle ma: «Bo mà, ɗa ga Wɔlɔme nu ɠiteɠite?» Pɔle ɠɛ ma: «Ungo.» 28 Kɔɔɠuluɓai ɠɛ ma: «Wali wola ɠa nɔ̀un gè kula, gè ʋa ɠɛ ga Wɔlɔme nu.» Pɔle ɠɛ ma: «Nɔ̀un, sɔ̀lɔɔgɛ su.» 29 Zɔiti ti ɠɛni gaazaɠasu ga kpakɔi, naati ti ɓeni ba. Kɔɔɠuluɓai wola luani, é kwɛɛgai ma ga Pɔle ɠa ga Wɔlɔme nu, tama é naa ɠiliai ga yɔlɔɠɔiti.

Pɔle ɠɛni tukpɔɠaaleʋe nuiti kakala

30 Poluma zobui, tɛi kɔɔɠuluɓai ɠɛni pɔ ga é naama vai ɠwɛɛ ɠiteɠite, nii Zuifuiti ti Pɔle ʋeelalazu su, é fieni, é devei ve ga zalaɠa ɠula ɠundiɠiiti ta tukpɔɠaaleʋe nu wolaiti pɛ ti ɠaalɛ ba. Naa ʋoluma é devei veeni ga ti yei ga Pɔle, é naa ʋilɛni ti zaama.