1 Jon
Nauəuə iətəm Jon təmaupən mətei
Nəghatiən əkuəkɨr rəha nauəuə u 1 Jon
?Pəh təmətei nauəuə u? Aposɨl Jon təmətei nauəuə u. In pia Jemɨs, kəni ilau nətɨ Səpəti mil. In kəti rəha nətəmi tueləf rəha Iesu. Kəni in iətəmi u iətəm Iesu tolkeikei pɨk. In təmətei nauəuə mɨn u: Nanusiən Təuvɨr Iətəm Jon Təmətei, 1 Jon, 2 Jon, 3 Jon, mɨne Nol Əpuiən.
?Təmətei tatuvən kəm pəh? Təmətei nauəuə u tatuvən kəm nətəmimi rəha niməfaki mɨn ikɨn mɨn rəfin. In tolkeikei məmə nətəmimi ikɨn kətiəh kətiəh okotafin, kəni motahli=pən nauəuə u tatuvən e niməfaki mɨn ikɨn pɨsɨn pɨsɨn mɨn.
?Natɨgiən təhro lanu nian təmətei? Nətəmimi nəuvein kotəni məmə Iesu Krɨsto səniəmə in Nətɨ Uhgɨn pəhriən iətəm təmuva iətəmimi pəhriən kəti. Kəutəni məmə narmɨn rəha Krɨsto təmuva e nɨpətɨ suah kəha Iesu nian Jon Bəptais təmol bəptais lan. Kəni narmɨn rəha Krɨsto tiet e nɨpətɨ Iesu, uərisɨg tɨmɨs e nɨgi kəməluau. Mətəu nəgətuniən əha in neiuəiən. Kəni mautəgətun məmə noliən tərah in tɨkə. Ilah nəuvein kotəni məmə təuvɨr əmə məmə nətəmimi okotol əpnapɨn əmə noliən tərah mətəu-inu e rəhalah nəgətuniən, nɨpətɨ iətəmimi in nati əpnapɨn əmə. Nərgɨ nəgətuniən mɨn əha, kətəni məmə “Nostisisɨm.”
?Təmətei nauəuə u o nak? Təmətei nauəuə u məmə otəgətun mɨn nəghatiən iətəm təhruahru, kəni məmə otəni pətɨgəm neiuə mɨniən rəha nəgətun eiuə mɨn. Kəni təməgətun məmə nolkeikeiən in nati asoli. Kəni molkeikei məmə otasiru, kəni mol nəhatətəiən rəha nəfaki mɨn tuva məskasɨk kəni motəhrun vivi məmə Uhgɨn təmosmiəgəh pəhriən ilah, kəni ilah mautos nəmiəgəhiən itulɨn.
1
Nəghatiən Miəgəh
1 Nəghatiən iətəm in Nəukətɨ Nəmiəgəhiən təmaupən matɨg e nətuəuiniən nian, inu, itɨmah iəmotətəu kəni moteruh e nəhmtɨtɨmah əhruahru. Iəmoteh, kəni motek e nəhlmɨtɨmah əhruahru. Inu u, in Nəghatiən iətəm in Nəukətɨ Nəmiəgəhiən iətəm iəutəghati lan, məutəni pətɨgəm.
2 Nəukətɨ Nəmiəgəhiən əha təmietɨgəm=pa; iəmoteruh kəni mautəhtul pətɨgəm o nəni pətɨgəmiən, kəni məutəni=pɨnə kəm təmah məmə in nəmiəgəhiən itulɨn, in təmətatɨg ilau Tatə Uhgɨn kəni təmiet=pa o tɨmah.
3 Iəutəni pətɨgəm kəm təmah natimnati mɨn iətəm iəmoteh kəni motətəu rəkɨs, məmə itəmah mɨn onəkəhuva motol kətiəh kitah min itəmah. Okəhuva kətiəh kitah Tatə Uhgɨn mɨne Nətɨn, Iesu Krɨsto.
4 Iautətei natimnati mɨn u məmə otol nagiəniən e nɨkitɨmah təri məriauəh.
Okotaliuək e nəhagəhagiən
5 Nəghatiən u inu, itɨmah iəmotətəu ohni kəni iəutəni=pɨnə kəm təmah, məmə Uhgɨn in nəhagəhagiən, kəni napinəpuiən tɨkə agɨn lan.
6 Nəmə kitah kotəni məmə kɨnautol kətiəh kitah min, mətəu kitah kəutaliuək əhanəh e napinəpuiən, kəni kitah kəuteiuə, kəni məsotatɨgiən e nɨpəhriəniən.
7 Mətəu in tətatɨg e nəhagəhagiən, kəni nəmə kotaliuək e nəhagəhagiən təhmen lan, kəni kitah kautol kətiəh kitah min, kəni nɨra Nətɨn, Iesu, tətaruətuəh e tah o noliən tərah mɨn rəfin.
8 Nəmə kitah kotəni məmə səniəmə kitah nol təfagə tərah, kitah kauteiuə aru əmə e tah mɨn, kəni nɨpəhriəniən tɨkə e tah.
9 Uhgɨn in iətəm kitah kotəhrun narəriən lan, kəni rəhan noliən in təhruahru əmə. Tol lanəha, nəmə kitah kotəni=pən noliən tərah mɨn rəhatah kəm Uhgɨn, kəni in otafəl itah kəni malu e rəhatah noliən tərah mɨn, kəni maruətuəh rəkɨs e noliən tərah mɨn rəfin rəhatah məmə okotəhruahru e nəhmtɨn.
10 Mətəu nəmə kitah kotəni məmə kəsotol agɨniən noliən tərah, kəni kitah kəutəni məmə Uhgɨn tateiuə, kəni rəhan nəghatiən təsatɨg agɨniən e nəmiəgəhiən rəhatah.