26
I'sa gik'as ıkkan
1 I'sa yuşan hı'ı ç'əvxhamee, telebabışik'le eyhen:
2 – Şok'le q'öne yiğıle Peesax ixhesva ats'an. İnsanna Dixır çarmıxılqa ts'ıts'e'ecenva mebınbışde xılyaqa qeles.
3 Mane gahıl kaahinaaşin ç'ak'ınbıyiy milletın ağsaqqalar Kayafa donane xərne kaahinne məhleeqa savayle.
4 Manbışe fı'ı'l hav'u I'sa aqqı, gik'asva yuşaneepxha.
5 Manbışe eyhe ıxha:
– Man saccu bayramnang'a hidya'as, sayid millet g'elil qexhe.
Sa zəiyfee I'sayne vuk'lelqa gıranın ətir qadağva
6 I'sa Bet-Anyee maşnan ı'xnabınane Şimonne xaanang'a,
7 Mang'usqa sa zəiyfa ayreele. Mane zəiyfayne xılya'ad geed gıranın ətirnan marmarın g'ab eyxhe. I'see kar otxhanang'a, zəiyfee man ətir I'sayne vuk'lelqa qadağva.
8 Telebabışis mançike qəl vuxha eyhen:
– Hexxan kar nişisne ha'a?
9 Nya'a, man ətir gıranda massa huvu, çike ıxhayn pılıd kar deşinbışis heles ixhesınniy.
10 I'sayk'le manbışe eyhen ats'a-ats'a, manbışik'le eyhen:
– Nya'a şu zəiyfa t'yats'exal hee'e? Məng'ee Yizdemee yugna iş hav'u.
11 Kar deşinbı gırgıne gahbışil şoka vuxhes, Zımee gırgıne gahbışil şoka ixhes deş.
12 Məng'ee Zalqa man ətir qadğu, k'eyxhas ixhesın xhinne qı'ı.
13 Zı şok'le hək'edacad eyhe, dyunyeyne ıkkanne cigee ina yugna xabar mısa yuşan hav'ee, ina zəiyfar yik'el qiyele'esda, yicee hı'iynıd.
Yahudee I'sa massa hele
14 Mane gahıl yits'ıq'vəne (12) telebayke, Kariotğançene Yahuda donane sang'vee, kaahinaaşine ç'ak'ınbışisqa arı eyhen:
15 – Zı Mana vuşde xılyaqa quvee, şu zas hucoona heles?
Manbışed mang'us xhebts'al (30) nuk'rayn pıl hele.
16 Mane yiğıle Yahudee I'sa manbışde xılyaqa qelesda gah t'abal ha'a giyğal.
I'see telebabışika nekke qiyğiyn otxhuniy oyxhan
17 İlydyadıyne gıneybışde bayramne ts'ettiyne yiğıl, telebabışe I'sayke qiyghanan:
– Vasın exhaliysın Peesaxın otxhuniy nyaane he'e?
18 I'see manbışik'le eyhen:
– Şahareeqa hapk'ın inəxrıng'usqa ikkeepç'ı, mang'uk'le eyhe: «Mə'əllimeevud eyhe, Cuna gah hipxhırna, Vucee Cune telebabışika sacigee Peesax yiğne xaa alğahas».
19 Telebabışe I'see uvhuyn gırgın hı'iyle qiyğa, Peesaxısın oxhanasın kar ha'a.
20 Exha qexhemee I'sa Cune yits'ıq'vəne telebayka sufranılqa savayle.
21 Manbışe kar otxhanmee, I'see eyhen:
– Zı şok'le hək'edacad eyhe, vuşde sang'vee Zı merıng'une xılyaqa qeles.
22 Telebabışe aq'vabı qı'ı, Mang'uke sana-sang'uqad qihna qiyghanan:
– Yizda Xərna, zı deş ho'oçee?
23 I'see eyhen:
– Zaka sacigee g'abeeqa xıl k'yoq'uyng'vee, Zı merıng'une xılyaqa qeles.
24 İnsanna Dix Cune hək'ee Muq'addasne Otk'uninçee otk'unin xhinne əlyhəə. İnsanna Dix merıng'une xılyaqa quvuyng'ulqa ver ooxas! Mang'unemee yedike dexhaycadniy yugda ixhes.
25 Manke I'sa merıng'une xılyaqa qeles ıkkanne Yahudeeyid qiyghanan:
– Mə'əllim, zı deş ho'oçee?
I'see mang'uk'le eyhen:
– Manva ğucad uvhu!
26 Manbışe karbı otxhanang'a, I'seeyid gıney alyaat'u, Allahıs şukur hav'u gıney hatq'ur telebabışis huvu eyhen:
– Alyaat'u oxhne, in Yizın can vod.
27 Qiyğa Mang'vee k'ola alyaat'a, mançil-allab Allahıs şukur hav'u, telebabışisqa quvu eyhen:
– Mançeençe gırgıng'vee ulyoğe!
28 İna Yizda eb vob, insanaaşine geebne bınahbışile ılyhepç'esdemee k'yaa'ana. Mana eb mugaavile yugba vuxhecenva k'yapk'ın.
29 Zı şok'le eyhen, Dekkıne Paççahiyvalee şoka sacigee ts'edın ulyoğasde yiğılqamee, Zı sayid t'ımılene ine meyvayke hı'iynçike ulyoğas deş.
30 Manbışe Zabureençen mə'niybı qətqı', Zeytunne suvalqa avayk'an.
31 Qiyğa I'see manbışik'le eyhen:
– G'iyna xəmde vuşde gırgıng'vee Zı g'alerçesdava otk'un:
«Zı Çobanıs ı'xəs,
Syuruneedın vəq'əbıd heetxvasınbı».
32 Zı üç'ür qı'ımeeme, Galileyeeqa əlyhəəs, şu maa'ab gozet haa'as.
33 Pyoturee Mang'us inəxdın alidghıniy qele:
– Gırgıng'veecar Ğu g'alerçveene, zı Ğu mısacar g'alerçes deş!
34 I'see mang'uk'le eyhen:
– Zı vak'le hək'edacad eyhe, g'iyna xəmde dadal hook'asse, vak'le Zı dyats'ava ğu xhebne yəqqees eyhes.
35 Pyoturee Mang'uk'le eyhen:
– Zı Vaka qik'as gyurxheeyir, zı man ha'as deş!
Telebabışde gırgıng'veecad manva eyhe.
I'sayna Getsemanne bağeena düə
36 I'sa manbışika Getsemaniye eyhene cigeeqa qarı, telebabışik'le eyhen:
– Zı hark'ın düə haa'as, şu inyaa gyuv're.
37 Mang'vee Cukasana Pyoturiy Zavdayna q'öyre dix ıkkekka. Mang'un yik' sacuraycad qa'a giyğal.
38 Manke I'see manbışik'le eyhen:
– Yizın rı'h qik'asde xhineene uts'urun gyatsts'ı. İnyaa aaxve, Zakasana muğurba gyuv're.
39 Mana sık'ırra şaqana ark'ın aq'vakkena ç'iyelqa g'alirxhu, düə haa'a:
– Dek Yizda! Hasre eyxhexhee, Zı mane əq'übayne k'oleençe ulydyoğas! Zas ıkkan xhinne deş, hasre, saccu Vas ıkkanan xhinne ixhecen!
40 I'sa telebabışisqa sak'ımee, g'ecen manbı g'alyapk'ı vob. Mang'vee Pyoturulqa onu'ı eyhen:
– Nya'a şosse Zakasana sa sə'ətna xheeyib muğurba gyuv'aras dəəxə?
41 Qopkune yəqqı'le sivmiyk'alcenva muğurba avxu düəbı he'e. Rı'h it'umda, canmee guc deşin vodun.
42 I'sa q'ör'es ark'ın meeb düə haa'a:
– Dek Yizda! Zas mane əq'übayne k'oleençe ulydyoğas dexhexheene, hasre Vas ıkkanan xhinne ixhecen.
43 I'sa sark'ıling'a manbı meeb g'alyapk'ı g'ooce. Manbı geeb obzur vuxhayke uleppı aaqas əxə ıxha deş.
44 Mang'vee manbı g'alyav'u xhebır'es manacab düə ha'as ayk'an.
45 Qiyğa I'sa telebabışisqa sak'ı eyhen:
– Vuşun gırgınbı g'alyapk'ı manzilybıne ha'a? Haane, gah k'ane quvxha, İnsanna Dix bınahnanbışde xılyaqa qele.
46 Oza qeepxhe əlyhəəs. Haane, Zı merıng'une xılyaqa qelesda qöö vor.
I'sa aqqaqqana
47 Yitsıq'vəne telebayna sa eyhena Yahuda qööng'ə, I'sa yuşan ha'acarniy vor. Mang'uka sacigee geeb g'ılıncnanayiy dalnan insanar vooxhe. Manbı kaahinaaşine ç'ak'ınbışeyiy milletne ağsaqqalaaşe g'axuvuynbı vuxha.
48 I'sa manbışde xılyaqa qelesde Yahudee işaara huvu uvhunniy:
– Zı Şavus ubba hee'ene, I'sa Mana vor, Mana aqqe.
49 Mane gahıl mana I'saysqa qıxha «Salam, yizda Mə'əllimva!» uvhu Mang'us ubba ha'a.
50 I'see mang'uk'le eyhen:
– Hambaz, ğu nişisiy arı, man he'e.
Mankecab I'saysqa insanar qeepxha, Mana aqqaqqana.
51 Manke I'saykane sang'vee g'ılınc hı'tdidxı', xərne kaahinne nukarne k'ırıyle k'ena ı'xı', mang'un k'ırı g'a'adaççen.
52 I'see mang'uk'le eyhen:
– G'ılınc cigeeqa gixhxhe. G'ılınc xılyaqa alyaat'uyn gırgınbı g'ılıncikecab hapt'as.
53 Deşxhee, vasqa həməxüdee qöö Zasse Dekkıkee kumag heqqas əxəs dişdiyxan? Zı uvhuynxhiy, Mang'vee Zas mankecad yits'ıq'vəne (12) legionıle geed malaaikarniy g'axıles.
54 İn karbı ixheskaniy deşxhee, nəxüdniy Muq'addasne Otk'uniybışee otk'uniynbı ixhes?
55 Mane gahıl I'see cəmə'ətık'le eyhen:
– Nya'a g'uldurulqa vüqqənbı xhinne g'ılıncbışikayiy dalbışika Zı aqqas abı? Zı yiğıs Allahne Xaane məhlee gyu'ur xət qa'amee, şu Zı aqqı deş.
56 İn gırgın karbı peyğambaraaşine otk'uniybışee, otk'uniynbı ixhecenva eyxhe.
Manke gırgıne telebabışe I'sa g'alerçu, heepxı avayk'ananbı.
I'sa xərne kaahinısqa Kayafısqa ıkkekka
57 I'sa aqqıynbışe Mana xərne kaahinne Kayafayne k'anyaqa qarayle. Q'aanun mə'əllimariy ağsaqqalarıb maqa savayle.
58 Pyotur əq'ənançecar xərne kaahinne məhlaysqamee I'sayqa qihna qarayle. Hucooyiy eyxheva g'acesva, Pyotur məhleeqa ikkeç'u xərne kaahinne g'aravulyçeeşika giy'ar.
59 Kaahinaaşin ç'ak'ınbıyiy Aali Şuureene gırgıng'vee I'sa gik'asdemee horbışika Mang'une aq'val ulyoozarasınbı t'abal haa'a vuxha.
60 Horbışika aq'val ulyoozarasınbı geebbı abeeyib, manbışis ıkkanəxrına iveeke deş. Nekke qiyğa q'öyre insan qığeç'u
61 eyhen:
– Mang'vee «Zasse Allahın xav qukkyok'al hı'ı, xhebne yiğee alya'as əxəva» uvhu.
62 Xərna kaahin suğotsu, I'sayk'le eyhen:
– Manbışe Yiğne hək'ee eyhençis nya'a Ğu cuvabcad qidele?
63 I'see mang'une cuvabısıd vuççud eyhe deş. Xərne kaahinee meed Mang'uke qiyghanan:
– Zı Vake, Vorne Allahne doyule qiyghan: Allahna Dix, Masixh Ğune?
64 I'see mang'uk'le eyhen:
– Ğu qotkuda uvhu. Zımee şok'le mançiled hexxada eyhes, inçile qiyğa şok'le İnsanna Dix, Gırgın Əxəng'une sağne sural gyu'uriy buludbışil qööcar g'aces.
65 Manke xərne kaahinee culyun tanalinbı qıtaxı'ı eyhen:
– Mang'vee kufur hı'ı! İnçile qiyğa şas aq'val ulyoozarasınbı nişisınbıne? Mang'vee hı'iyn kufur şok'led g'ayxhiyn!
66 Şu mançik'le hucoovane eyhe?
Manbışed «Mana taxsirkarır, gik'as eyxheva» eyhe.
67 Mankecabıb giviyğalanbı I'sayne aq'vays xudaariy tyubı ı'xiyxə. Sassanbışe Mang'une aq'veeqa çapalaxbı ı'xiyxə
68 eyhe ıxha:
– Ay Masixh, şas peyğambar xhinne yuşan hı'ı eyhelan, şavaayiy Vas ı'xiyxə?
Pyoturee I'sa cuk'le ats'a deşva eyhe
69 Mane gahıl məhlee gyu'urne Pyoturusqa gulluxçiy zəiyfa qiyxha eyhen:
– Ğunar Galileyeençene I'sayka sacigeeniy vor.
70 Gırgıng'une ögiyl man Pyoturee gardanaqa ilydyaat'u eyhen:
– Ğu hucoome eyhe, zak'le ats'a deş!
71 Qiyğa mana akkabışisqa qarımee, sa menne gulluxçiy zəiyfayk'le g'acu eyhen:
– İna insanır Nazaretğançene I'sayka sacigeeniy vor.
72 Pyoturee meed gardanaqa ilydyaat'u, k'ın g'assır eyhen:
– Zak'le mana İnsan ats'acar deş!
73 Sahavule, şaqana ulyobzuriyn insanar mang'usqa qabı eyhen:
– Hək'erar ğu şenbışda vor. Manva yiğne yuşan hı'iyncadıd eyhe.
74 Pyoturee cuqacad g'arğışbıd hı'ı, k'ınyıd g'assır, eyhen:
– Zak'le mana İnsan ats'a deş!
Mane gahılyıb dadal hook'a.
75 Pyoturuk'le I'see «Dadal hook'asse vak'le Zı dyats'ava ğu xhebne yəqqees eyhesva» uvhiy yik'el qayle. Mana mançe qığeç'u, hülöörəxə geşşe giyğal.