☰ Yəhye 1
Yəhyee yuşan hav'una yugna xabar
Uvhuybışis sik'ı in kitab Yəhyee otk'un. Mana I'says geer ıkkana yits'ıq'vəne telebayna sa ıxhava otk'un. Aalimaaşine uvhiyn in kitab Yəhyee Efes eyhene şaharee 90-niyiy 95-esde senbışe otk'un ixhesva eyhe. Geeb insanaaşisse qətqəs əxecenva, mang'vee in kitab yunanne mizel otk'un.
Yəhyee man kitab otk'unin I'sa Masixh vorva hagvas. Mang'us insanaaşe mançil inyam hı'ı ikkiykın. İne kitabee Allahne hək'eedın dağamın geed fıkırbı vod. Yəhyee I'sayne vuk'lelqa qadıyn gırgın otk'un deş. Mang'vee mane kitabee I'see haguyn yighılle əlaamat otk'un. Mane əlaamatbışed I'sa Masixh ıxhay hagva.
Yəhyee mane kitabee inekke geed I'see yuşan hı'iynbı otk'un. Yəhyee otk'unne karbışin geedınbı I'see k'anene telebabışis yuşan hı'iynbı vod.
1
I'sa dyunyelqa Allahın Cuvab xhinne qarı
1 Ts'etta Cuvab ıxha.
Cuvab Allahıka sacigee ıxha.
Cuvabcad Allah ıxha.
2 Man Cuvab ts'ettacad Allahıka ıxha.
3 Gırgın kar
Mançile ğana itxhın,
itxhınne karbışin
nencad Man dena itxhın deş.
4 I'mı'r Mançeeniy vob,
mane ı'mı'rınıb insanaaşis Nurniy hele.
5 Nurun miç'axiyvalee işixniy gyayhe,
man miç'axiyvalisse höğəs əxə deş.
6 Allahee Yəhye donana insan g'ıxele. 7 Mana şahad xhinne qarı, Nurune hək'ee yuşan ha'asva, gırgıng'veeyib mang'ule ğana inyam he'ecenva. 8 Mana vuc Nur deş ıxha, Nurune hək'ee yuşan ha'as qarı.
9 Hək'en Nur dyunyelqa qadı.
Mane Nuren gırgıne insanaaşilqa işixniy gyayhe.
10 Nurun in dyunye itxhın.
Man Nur ine dyunyelqa qadeeyid,
ine dyunyeyk'le Man qıvaats'a deş.
11 Mana Cunbışisqar qareene,
manbışe Mana k'ane qı'ı deş.
12 Mana k'ane qı'ıyne gırgınbışis,
Mang'une doyulqa inyam hı'iynbışis,
Manbışis Mang'vee Allahın uşaxar vuxhes vəvxüy huvu.
13 Manbı insanıke,
insanne xuruşuke
vuxhaynbı deş vob.
Manbı Allahıke vuxhaynbı vob.
14 Cuvabıke İnsan qıxha,
Mang'un xav yişde yı'q'nee ıxha.
Şak'le Mang'un Nur g'acuyn,
Mane vorne-deşde Dixes Dekkee man Nur huvu.
Mana Dix hək'ene yugvalin gyatsts'ı ıxha.
15 Yəhyee Mang'une hək'ee axtıda yuşan ha'a ıxha:
– Zı Mang'une hək'ee eyhe ıxha: «Zale qiyğa Qalesda, zaler ögee ıxha. Mançil-allar Mana zaler xərna vor».
16 Yişde gırgıng'vee, Mang'une g'ıdyabat'ane yugvalil-alla
çiçiqad qihna xayir-düəbı alyaat'u.
17 Q'aanun Mısayle ğana huvu,
hək'ena yugvallab I'sa Masixhıle* ğana qabı.
18 Allah neng'uk'lecar, mısacar g'acu deş.
Mana saccu şak'le vorne-deşde Cune Dixee hagu.
Mana Dix Dekkıne yik'eesnee vor.
Xhineeqa k'yooq'ane Yəhyeyna I'sayne hək'eena şahaadat
19 İna Yəhyeyna I'sayne hək'eena şahaadat vobna. Yahudeeşine ç'ak'ınbışe Yəhyeyke «Ğu vuşuneva?» qidghın ha'asdemee İyerusalimğançe kaahinariy Leviyke g'abıynbı† mang'une k'anyaqa g'uxoole. 20 Mane gahıl Yəhyee manbışike dyugul hidi'ı, qotkun uvhuyn:
– Zı Masixh deş vorna.
21 Manbışe Yəhyeyke qiyghınin:
– Manke ğu vuşune vor? Deşxhee İlyas peyğambarne?
Yəhyee, «De'eş, zı mana deş vornava» eyhe.
– Manke ğu Mısee eyhena peyğambarne?
Yəhyee «De'eşva» eyhe.
22 – Manke ğu vuşune? Şi g'axuvuynbışik'le şi hucoovana eyhe? Ğu yiğne hək'ee şas hucoona yuşan ha'as?
23 Yəhyee manbışis alidghıniy qele:
– Yeşaya peyğambaree in yizde hək'ee uvhu:
«„Rəbbis yəq qopku qee'eva“
Zı sahree ts'ir haa'ang'un ses vod.»
24 G'axuvuynbı fariseyaaşinbı‡ vuxha. 25 Manbışe Yəhyeyke qiyghanan:
– Ğu Masixhır deşxhee, İlyasır deşxhee, qalesda peyğambarır deşxhee, nya'a ğu xhineeqa k'yooq'u, gicərxı'ybı alyaat'a'a?
26 Yəhyee manbışis inəxdın alidghıniy qele:
– Zı xhinekacad gicərxı'iy alyaat'a'a. Vuşdeme yı'q'nee Sa vor, şok'le dyats'ana, 27 Mana zale qiyğa qalesda vor. Zı Mang'une çarıxbışin baağarıd aaqas kara idyayle.
28 İn yuşan ha'an gırgın kar, İordanne damayne şene aq'val, Bet-Anyee ıxha. Maab Yəhyee xhineeqa k'yooq'u, gicəpxı'ybı alyaat'a'a ıxha.
Allahna Urg
29 Qinne yiğıl Yəhyeyk'le I'sa cune suralqana qöö g'acu, eyhen:
– Dyunyeyna bınah Culqa alyapt'asda Allahna Urg§ haane! 30 Zı Mang'une hək'eeniy eyhe: «Zale qiyğa qööna zaler xərna vor, Mana zaler ögee ıxhal-alla». 31 Zak'ler Mana ıxhay ats'a deşdiy. Mana İzrailyne milletık'le qıvaats'ecenva, zı insanar xhineeqa k'yooq'u gicəpxı'ybıniy alyaat'a'as qarı.
32 Yəhyee I'sayne hək'ee şahaadatiyvalla hav'u, eyhen:
– Zak'le, Allahın Rı'h xəənçe qı'nerke xhinne qadı, Mang'ulqa gixu, axva g'acuyn. 33 Zak'ler Mana ıxhay ats'a deşdiy. Zı xhineeqa k'yooq'u gicəpxı'ıybı alyaat'as G'axuvuyng'vee Vucee zak'le uvhu: «Rı'h şavulqayiy gexa, Mang'ulyud axu vak'le g'acveene, ats'axhxhe, Muq'addasne Rı'hı'ka gicəpxı'ybı alyaat'a'ana Mana vor». 34 Zak'led man g'acu «Allahna Dix Mana vorva» şahaadat hav'u.
I'sayn ts'eppiyn telebabı
35 Qinne yiğıl Yəhye meer cune q'öne telebayka ulyorzuliy. 36 I'sa yəqqı'le ı'lğəəmee, Yəhye Mang'uqa ilyakkı, eyhen:
– Allahna Urg haane!
37 Mane q'öne telebayk'le, man eyhen g'ayxhı, I'sayqa qihna avayk'an. 38 I'sayk'le manbı Cuqab qihna qöö g'avcu, qiyghanan:
– Şos hucoona ıkkan?
Manbışe I'sayke qiyghanan:
– Ravvi, Ğu nyaane axva?
(Ravvi mə'əllim eyhen vodun.) 39 I'see manbışik'le eyhen:
– Zaqab qihna qudoora, şok'lecad g'acesın.
Manbıb hapk'ın Mana nyaayiy axvava ilyaakanbı. Manke sə'ət yoq'uble vuxha. Mane yiğıl manbı exhalqamee Mang'usne giviy'ar.
40 Yəhyee eyhenbı g'ayxhı, I'sayne qihna apk'ınne q'öng'una sa Andrey ıxha. Mana Şimon-Pyoturna çoc eyxhe ıxha. 41 Qiyğa mang'vee cuna çoc Şimon t'abal hı'ı, «Şak'le Masixh avaykınava» eyhe. (Masixh g'əyxı'nava, q'ış qadğunava eyhen vodun.)
42 Andreyee Şimon I'sayne k'anyaqa ıkkekka. I'sa Şimonuqa ilyakkı, eyhen:
– Ğu Yuhanna dix Şimonur, yic vak'le g'iyniyke şaqa Kefa eyhes.
(Kefa ganz eyhen vodun. Ganzıd yunanne mizel Pyotur eyhen vodun.)
43 Qinne yiğıl I'says Galileyeeqa ı'qqəs ıkkiykan. Mang'vee Filipp t'abal hı'ı, «Zaqar qihna qorava» eyhe. 44 Filippır Andreyiy Pyotur xhinne Bet-Tsayda eyhene şahareençe eyxhe. 45 Filippeeyir Natanael t'abal hı'ı, mang'uk'le uvhuyn:
– Şak'le Mısayne Q'aanune ork'unna, peyğambaraaşer uvhuna İnsan, Yusufna dix Nazaretğançena I'sa aveykı.
46 Natanaelee eyhen:
– Nazaretğançe yugun kar qığeç'eye?
Filippeeme mang'uk'le eyhen:
– Arı ğucar ilekke.
47 I'sayk'le Natanael Cune suralqana qöö g'acu, eyhen:
– İna hək'erar yik'ee bicvalla deşda İzrailyğançenavur.
48 Natanaelee Mang'uk'le eyhen:
– Vak'le zı nençena ats'a?
I'see mang'us inəxdın alidghıniy qele:
– Filippee ğu qot'alassecar, Zak'le ğu inciliyne yivek avurniy g'acu.
49 Natanaelee Mang'uk'le eyhen:
– Mə'əllim, Ğu hək'erar Allahna Dixır*, İzrailynar Paççahır!
50 I'see eyhen:
– Zak'le ğu inciliyne yivek avur g'acuva, uvhuvane ğu Zas inyam hı'ı? Vak'le mançiled ç'ak'ın karbı g'aces. 51 Zı şok'le hək'edacad eyhe, xəybı q'öna qeedaxhe, Allahın malaaikar İnsanne Dixesqa† gəə-ı'lqəə şok'le g'aces.
* 1:17 Masixh: man cuvab «q'ış qadğuna» eyhen vodun. Avaala İzrailil məxdın ədat ıxha, kaahinaaşine, paççahaaşineyiy peyğambaraaşine vuk'lelqa q'ış qadağva ıxha. Man q'öd'esın I'sayn do Allahee Mana g'əyxı'nava eyhen vod. İzrailybışik'le peyğambaraaşe uvhuynbı ats'a ıxhal-alla, manbışe Masixh qarı cun millet duşmanaaşike g'attixhan hı'ı, dyunyeys xəbvalla hav'uy gozet ha'a ıxha. † 1:19 Leviyke g'abıynbı: İzrailyne yits'ıq'vəne (12) nasılen sabı vooxhe. Allahee manbı Cune Xaa kaahinaaşis kumag he'ecenva g'əvxü. ‡ 1:24 Fariseyar: Manbı I'sayne gahılin dindarar vuxha. Manbışik'le Allahna Q'aanun yugba vaats'a vuxhal-alla, manbı milletın ç'ak'ınbı vuxha. § 1:29 Allahna Urg: Peesax bayram ixhesnang'a, cühüt'yaaşe sa seniyn urgbıniy q'urbanna allya'anbı. Mane q'urbanbışe Allahee g'attivxhan hav'u vuxhay yik'el qalya'a ıxha. * 1:49 Allahna Dix: Avaala Allahna dixva, İzrailyne paççahaaşik'le eyhe ıxha (Davud, Sıleyman). Sayid manva insanar g'attivxhan haa'asva qalesde paççah Masixhık'le eyhe ıxha. Natanaelee I'sa Allahna Dixva eyheng'a, Mana Allahee g'əyxı'na, Allahıs nekke k'anena vorva hagvasdemee eyhe. † 1:51 İnsanna Dix: I'see geedne nəqqee Cuk'le İnsanna Dixva uvhu. Məxür Daniyal peyğambaree qalesde Paççah Masixhık'le eyhe. Yəhye peyğambarık'le malaaikar gəə-ı'lqəən nyak' ögilycadniy g'acu. Mane cigayk'le mang'vee Allahın Xavva uvhu. I'says Vuc Allahın Xav xhinee vorva eyhes ıkkan.
☰