9
Allahee insanaaşika cuvab g'ats'ayk'van
1 Allahee Nühüsiy Nühüne dixbışis xayir-düə huvu, manbışik'le uvhuyn:
– Vuxooxu geeb qeepxha ç'iyeyn aq'va gyatsts'e'e.
2 Ç'iyeylin gırgın həyvanar, xəədın şit'yar, hadağvanbı, deryahbışeedın baluğar şole qəq'ənasınbı, manbı vuşde xıleqa quvu.
3 Nafas ileşşen gırgınbı şos oxhanas ixhecen. Nəxüdiy Zı şos şenke ç'iyel alyadıyn oxhanas huvu, həşded manbı hele.
4 Saccu mançin çuru ebaka umoyxhan, mançee rı'h vodun.
5 Şavaayiy vuşda eb k'yav'u, şu ı'mreke hav'u, mana həyvan vuxheeyib, insan ixheeyir Zı hı'sab qeqqasın.
6 Şavaayiy insanna eb k'yav'u,
Mang'unab eb insanne xıleke k'yavaak'anas.
Allahee insan Cune k'op'yel irxhınil-alla.
7 G'abı geeb qeepxhe. Ç'iyene aq'valqa avkke, hexxeepxhe.
8 Qiyğa Allahee Nühük'leyiy cune dixbışik'le uvhuyn:
9-10 – Şoqab, şole qihniyne vuşde nasılıqab, gameençe qığeç'uyne gırgıne nafas ileşşençika: şit'yaaşika, çavra-vəq'əyka, çolune həyvanaaşika Zı mugaavile haa'a.
11 Zı şoka inəxübna mugaavile haa'a: sayid inçile qiyğa q'ıfrımıka qadıyne xhyanın ç'iyeyne aq'vayka sacigee nafas ileşşenbı hakkal ha'as deş.
12-13 Allahee uvhuyn:
– Yizda şokana, şoka ıxhayne gırgıne nafas helençika hav'uyne gırgıne gahbışisde mugaavileyn işaara in ixhes: xəybışeeqa gyuvxhuna Yizda xənevur.
14 Zı xəybışeeqa buludbı qali'iyng'a, buludıka sacigee xənevur g'yavaales,
15 manke Zı şokayiy, gırgıne nafas helençika hav'une mugaavileyna fıkır ooxhanas. Sayid nafas ileşşenbı hakkal ha'asın q'ıfrımıka xhyan qales deş.
16 Mısayiy xənevur qığevç'u, Zı mançiqa ilyakkı, ç'iyene aq'val nafas helene gırgınçika hav'una gırgıne gahbışisda mugaavile yik'el qavaalyaa'asda.
17 Allahee Nühük'le meed eyhen:
– Yizın ç'iyeyne aq'val gırgıne nafas helençika hav'uyne mugaavileyna işaara haane.
Nühün dixbı
18 Nüh cune dixbışika, Samıka, Yafəsıka, Hamıka gameençe qığeç'una (Kana'an Hamna dixniy vor).
19 Mana xhebırsana Nühün dixbıniy vob. Ç'iyeyne aq'valqa ipxhınin gırgın insanar manbışike g'abı.
20 Nüh giyğalna man cigabı eza. Qiyğa mang'vee maqa t'ımılen bağ adaççe.
21 Mang'vee çaxır ulyodğu, p'iyan qıxha, cune çadıree ts'eler g'ılexha.
22 Kana'anne dekkık'le Hamık'le mana ts'eler g'acu, g'aqa qığeç'u, mançine hək'ee q'öne cune çocuk'le eyhen.
23 Sameeyiy Yafəsee tanalqan kar alyaat'u, cone mıgabışilqa atçu, yı'q'ı'hiyna aqa ikkeepç'ı, dekkıne ts'elene tanalqa adaççe. Manbışe aq'vabı menne suralqa sak'al hı'ı ıxha, dek ts'eler g'ımececeva.
24 Nüh culqa qarımee, k'ınne dixee hı'iyn ats'axhxha, eyhen:
25 – Kana'annıs bed-düə vuxhena,
cune xınıbışde həmbalaaşis həmbal ixhena.
26 Mang'vee meed eyhen:
– Rəbbis, Samıne Allahıs, şukur vuxhena,
Kana'an Samıs həmbal ixhena.
27 Allahee Yafəsın cigabı geed qa'anbı,
cune çocune Samıne çadırbışee axvana.
Kana'anır Yafəsıs həmbal ixhena.
28 Nühee q'ıfrımıle qiyğa xhebıd vəşşe xhots'al (350) sen ha'a.
29 Nühee yüç'üd vəşşe xhots'al (950) sen hı'ı, qek'a.