6
Allahne ulele g'a'aytxhuyn dyunye
1 İnsanar ç'iyeyne aq'val geeb qeebaxheng'a, manbışis yişbı vuxooxa,
2 manbışde yişbışda micagiyvalla malaaikaaşik'le g'oocena. Cone yik'es yikkanna nenayiy məng'ı'ke xhunaşşe hee'e.
3 Rəbbee eyhen:
– Yizın Rı'h insanee gırgıne gahbışis deş vod. Manbıb gırgıne gahbışisınbı deş vob. Manbışis huvuna ı'mı'r vəşşe g'ane (120) senıle hexxaba vuxhes deş.
4 Malaaikaaşe insanaaşin yişbı haa'ane gahılib, mançile qiyğiyne dövurbışilib məxbın ç'ak'ın insanar ç'iyeyne aq'valqa vuxooxa vuxha. Manbı avaalıyne dövrun kuşdukurar, qıvaats'an insanar vuxha.
5 Rəbbik'le g'ecen, ç'iyeyne aq'valyne insanaaşine ək'lee, fıkree pisvalla hav'uy vob.
6 Mang'vee aq'va gyavaxan ha'a. Ç'iyeyne aq'valqa insanar ipxhınva, mang'un yik' gyoyxhan.
7 Rəbbee eyhen:
– İpxhınin insanar ç'iyeyne aq'vayle havaakal haa'asınbı. Man insanaaşika sacigee həyvanaşined, ç'iyeyl hadağvançined, şit'yaaşined vuk'lelqa qalya'asın. Manbı ipxhınva Yizın yik' gyotxhan.
8 Saccu sa Nüh Rəbbine ulen aqqaqqa.
9 Nühün taarix inəxüd vod:
Nüh qorkuna, məttın yik'nana cune nasılee insan ıxha. Mana Allahne yəqqı'lyniy vor.
10 Nühüqa xhebiyre dix eyxhe: Sam, Ham, Yafəs.
11 Allahne ulele dyunye g'e'exhxhan, pisvalin gyayts'e.
12 Gırgın insanar qopkune yəqqı'le qığeepç'iynbı. Allahık'le g'ecen, dyunye badalxha vod.
13 Allahee Nühük'le uvhuyn:
– Yizde ək'elee gırgınçin q'omıd hitxhır. Dyunye manbışde pisvalika gyatsts'ı. Mançil-allab Zı manbı ç'iyeyne aq'vayka sacigee havaakal haa'as.
14 Vas goferne yiveke sa gamı he'e. Ad gozeer hı'ı, adğançed, g'adğançed yivena mızla qabğvee.
15 Gamı inəxüd he'e: mançina xıliyvalla xhebıd vəş (300) xılekkum, əq'valla xhots'al (50) xılekkum, axtıvallab xhebts'al (30) xılekkum vuxhecen.
16 Gamıyne ooğançe sa xılekkum avud g'uly he'e. Mıgleked akka gixhxhe. Gamıyka avubna, yı'q'nekna, oona mərtaba vuxhecen.
17 Zı ç'iyeyn aq'va q'ıfrımıka qadıyne xhineka alyaat'asın. Xəək avudun nafas alyaat'an gırgın kar hakkal ha'asın. Ç'iyeyne aq'valin gırgın kar qik'asın.
18 Zı mugaavile saccu vaka ha'a: ğu dixbışika, xhunaşşeyka, sossaaşika sacigee gameeqa ılqeç'e.
19 Vaka üç'üdda axvecenva, gırgıne həyvanaaşike nafas helenemeene karbışike q'öblena, vughulyna-xhuvulyna, gameeqa aleet'e.
20 Q'öblena gırgıne şit'yaaşike, həyvanaaşike, ç'iyeyl hadağvançike vasqa qales, üç'üdda axvecenva.
21 Vasqa oxhanas eyxhençike vasınıd, çisınıd se'e.
22 Nühee gırgın kar Allahee uvhuyn xhinne ha'a.