31
Yaaq'ub Lavanıke hexvana
1 Yaaq'ubık'le Lavanne dixbışe inva eyhe g'ayxhiyn: «Yişde dekkın gırgın kar Yaaq'ubın ıxha. Mang'vee cun gırgın kar yişde dekkıne karake hı'ı».
2 Yaaq'ubık'le Lavan cuka ögilyna xhinnee dexhay g'ece.
3 Rəbbee Yaaq'ubık'le eyhen:
– Dekkaaşine cigabışeeqa, vuşde ebanbışisqa sak'le. Zınar vaka ixhes.
4 Yaaq'ubee insan g'axuvu, Raahileyiy Lea çoleeqa cun syurıbınane cigeeqa qoot'al.
5 Yaaq'ubee manbışik'le eyhen:
– Zak'le vuşda dek zaka ögilyna xhinnee dexhay g'ece. Yizde dekkee ı'bəədat ha'ana Allahmee zaka vor.
6 Şok'lecad ats'an, zı vuşde dekkıs vonne gucuka iş hav'iy.
7 Mang'veeme zas horbı hı'ı, yits'ne yəqqees yizda hək' badal hav'u. Allaheeme mang'usqa zas pisın ha'as hassır deş.
8 Mang'vee «K'udanan həyvanar yiğna hək' vuxhesva» uvhumee, gırgıne syurununcad k'udanan həyvanar uxu. «Yiğna hək' xornan həyvanar ixhesva» uvhumeeme, syuruneene gırgıne həyvanaaşe xornan həyvanar uxu.
9 Məxüd Allahee, vuşde dekkıke çavra-vəq'ə g'ayşu, zasqa quvu.
10 I'mra vüqqəne gahıl zak'le nyak' g'acu: zı vuk'ul ooqa qav'umee, zak'le g'acuyn, ı'mra ablyaa'an q'ınabı xornaniy k'udanan, xalbınanbıvud.
11 Nik'ek Allahne malaaikın zalqa onuiyn: «Yaaq'ub!» Zı «Hooyvava!» alidghıniy quvu.
12 Mang'vee uvhuyn: «Zak'le Lavanee vak hı'iyn g'acuyn. Həşde vuk'ul ooqa qee'e, ilekke, syurunee ı'mra ablyaa'an q'ınabı, xornanbı, k'udananbı, xalbınanbı vod.
13 Zı Bet-El vas gyaguna Allah vor. Ğu maa'ab Zasva g'aye givxhu, çilqa q'ış qadğu, Zas k'ınniy g'aysır. Həşde suğotsu, ine cigabışeençe hoora, yedike ıxhane cigabışeeqa sak'le».
14 Rahileeyiy Leayee mang'us alidghıniy qele:
– Dekkıne karake şalqa gexhan vodunne?
15 Mana şaka mebınbışika xhinnee eyxhe. Mang'vee şi massa huvu, şake ıxhayn pılıd əfasaf hı'iyn.
16 Mançil-allad Allahee yişde dekkıke g'ayşuyn gırgın kar yişiniy yişde uşaxaaşin vod. Həşde ğunad Allahee eyhen gırgın he'e.
17 Manke Yaaq'ub oza qıxha, cun uşaxariy xhunaşşer devabışilqa gyaa'a.
18 Gırgın syurud, vucee Paddan-Aramee hı'iyn gırgın karıd alyaat'u, mana Kana'anne cigabışeeqa dekkıne, I'saq'ıne, k'anyaqa yəqqı'l gexha.
19 Manbı əlyhəəne gahıl Lavan xaa ıxha deş, mana vəq'əbı qoşşarasva ark'ın ıxha. Raahileeyid dekkıne xaadın byutbı qöqənbı.
20 Yaaq'ubee Aramğançene Lavanıs horbı ha'a, vuc hexvava uvhu deş.
21 Məxür mana cun gırgın kar alyaat'u, hexvana. Mana Feratne damayle ılğeç'u, Gileadne suvabınane suralqa ayk'an.
Lavan Yaaq'ubıqar qihna girxhu
22 Yaaq'ubın hixuy Lavanık'le xhebıd'esde yiğıl eyhe.
23 Mang'vee cun xınıbı qopt'ul, Yaaq'ubıqa qihna gexha. Yighıd'esde yiğıl Gilead eyhene suvabınane cigee mana avayq'arna.
24 Xəmde Allah Aramğançene Lavanıs gyagu, eyhen:
– Ğucar ğu aqqe, Yaaq'ubık vuççud hıma'a.
25 Lavan Yaaq'ubıqa avayq'arna. Yaaq'ubee suvabınane cigee çadır güvxü vuxha. Lavaneeyib cune xınıbışka Gileadne suvabınane cigee çadır giviyxə.
26 Lavanee Yaaq'ubık'le eyhen:
– Ğu in hı'iyn hucoona? Ğu zas horbı hı'ı, yizın yişbıb dəv'ee avquynbı xhinnee quvku.
27 Nya'a ğu zale dyugulenra hixu? Ğu nya'a man zak'le ittevhu? Zı ğu mə'niybı qədəqqə, şadra dafiy lira ilyviyxəniy yəqqı'l ha'as.
28 Zasqa nevabışisiy yişbışis ubba ha'as hassır deş. Ğu ək'el deşiyvalla hav'u.
29 Zasse şos qəlasın ha'as əxəyiy. Sanıxha xəmdemee yiğne dekkee ı'bəədat hı'ıne Allahee zak'le uvhuyn: «Ğucar ğu aqqe, Yaaq'ubık vuççud hıma'a».
30 Zak'le g'ecen, ğu həşde dekkın xav g'aces üdöörəxəva qığeç'u əlyhəə. Nya'a manke yizın byutbı qöqü qıkkekka?
31 Yaaq'ubee Lavanıs alidghıniy qele:
– Zı qərq'ı'n fıkreeqa qadıyn, yiğın yişşar zasse gucuka g'ooşeva.
32 Yiğın byutbı şavusnee aveykee, mana gik'asda. Xınıbışde ögiyl zasnee yiğın hucoo aveykee, vas aleet'e.
Yaaq'ubık'le, Raahilee manbı qöqüva, ats'a deşdiy.
33 Lavan Yaaq'ubne, Leayne, q'öne həmbal içiyne çadıreeqa ikkeç'u, byutbı aveykı deş. Mana Leayne çadıreençe qığeç'u, Raahileyne çadıreeqa ikkeç'e.
34 Raahilee xaan byutbı alyaat'u, deval giviy'arne palanbışeeqa gixhxhı, çil oğa giy'ır yeexhe. Lavan çadıree gırgınəəng'ə ilyakkeeyir, manbı iveeke deş.
35 Raahile dekkık'le eyhen:
– Yizda dek, yiğne ögiyl oza qiyxhes deexheva qəl mooxhe, zak yadaaşik eyxhenbı ıxha vod.
Mang'vee nəxüd t'abal he'eeyid, byutbı iveeke deş.
36 Yaaq'ubıs qəl vuxha, mana Lavanıka cuvabılqa arayle. Mang'vee Lavanık'le eyhen:
– Yizda bınahiy taxsir hucoona, ğu zaqar qihna məxür girxhu?
37 Gırgıne karaka ilyakkına, yiğın hucoome aveykinne? Aveykiyn kar yizdeyiy yiğne xınıbışde ögiylqa gixhxhe, hasre manbışe eyhecen yişda nenayiy qorkura.
38 G'alle (20) senna zı vas iş hav'u, yiğne ts'e'bışeyiy vəq'əbışe hatt'uyn balabı hı'ı deş. Zı yiğne syuruneençe vəq'əbı deş otxhun.
39 Ç'alagne həyvanaaşe qodu-sodıyn vəq'əbı zı vasqa adaylenbı deşdiy, mançina hək' zıcabniy vas qoolena. Miç'eebe, exhalee qööqüna həyvan ğu zakeniy qooqqana.
40 Yiğıne pıralin, xəmdiyne mık'aalin zakın ha'anniy, zı ulyub gyabaxana deşdiy.
41 Zı g'alle senna yiğne xaa axu: yiğne q'öne yişşenemee yıts'ıyoq'vad (14) sen, syurunnemeeyib yixhılle senna zı vas iş hav'u. Ğume yizda hək' yits'ne yəqqee badal hav'una.
42 Yizde dekkaaşe, İbrıhımeeyiy I'saq'ee, ı'bəədat hı'ına Allah zaka dexhanaxhiy, həşde ğu zı xıl q'ərarniy yəqqı'l ha'as. Allahık'le yizda əq'üba, yizde xılena zəhmət g'avcuna, Mang'vee sanıxha xəmde Vuc yizde sural ıxhay valqa hixhar hı'iyn.
43 Lavanee Yaaq'ubıs alidghıniy qele:
– Yişbı – yizın yişbı vob, uşaxar – yizın uşaxar vob, syurıbı – yizın syurıbı vod. Ğu hı'iyn gırgın karıd yizın vod. G'iyna zasse yişbışik, manbışe uxooxuyne uşaxaaşik hucoo ha'as əxəyee?
44 Qora, həşde zınayiy ğu cuvab g'ats'ak'vanas, manıd yizdeyiy yiğne yı'q'nee şahad ixhecen.
45 Yaaq'ubee sa g'aye alyapt'ı, mana dirak xhinne ulyoozar haa'a.
46 Mang'vee cune xınıbışik'le eyhen:
– G'aye see'e.
Manbışe g'ayebı adı anbareeqa sa'a. Qiyğab mane anbarne k'ane otxhun-ulyoğan.
47 Lavanee mançin do Yegar-Sahaduta giyxhe, Yaaq'ubeeme mançik'le Gal-Edva eyhe.
48 Lavanee eyhen:
– İna g'ayeyna anbar yizdeyiy yiğne yı'q'nee şahaadat vobna.
Mançil-allad mançin do Gal-Ed vod.
49 Mançik'le sayıd Mitspavaniy (ilyaakan ciga) eyhe, Lavanee inəxüd uvhuynçil-alla:
– Şak'le sana-sanbı g'udyoocemee, havasre Rəbbina ul zalib, valib vuxhecen.
50 Yik'el aqqe, yizdeyiy yiğne yı'q'nee insan deş, Allah şahad vorna. Zak'le ğu qiyğa g'ıdecveeyir, yizde yişbışika yugra ixhe, manbışil ooqa xhunaşşe himee'e.
51 Lavanee meed Yaaq'ubık'le eyhen:
– İlekke, haane sı'iyn g'ayebıyiy dirak xhinne ulyoozar hav'una g'aye, mana zı yişde yı'q'nee ulyoozar hav'u!
52 İn sı'iyn g'ayebıyiy dirak xhinne ulyoozar hav'una g'aye şahad ixhecen: zı yiğne suralqa, mane sı'iyne g'ayebışde şene aq'valqa pisvalla haa'as ılğeç'es deş. Ğunar zas pisvalla haa'asva mane dirak xhinne ulyoozar hav'uyne g'ayeyneyiy sı'iyne g'ayebışde ine aq'valqa ılğeç'es deş.
53 Hasre yişde dekkaaşe: İbrıhımee ı'bəədat ha'ane Allaheeyiy Naxoree ı'bəədat ha'ane allahee şas hökum hevlecen.
Yaaq'ubee cune dekkee, I'saq'ee, ı'bəədat ha'ane Allahılqa k'ın g'iysar.
54 Qiyğa Yaaq'ubee mane suval q'urban givk'u, xınıbı gıney oxhanas qoot'al. Manbışe gıneybı otxhun, suval xəm g'aaha.
55 Lavan miç'eer çakra oza qıxha, yişbışisiy nevabışis ubbabı hı'ı, manbışis xayir-düəbı hele. Mançer cune xaaqa siyk'al.