46
Yekka Yaƹqub Maṣar
1 Yegla Yaƹqub enta d tela ennét temda. As yeweḍ taɣremt n Bersabeƹ, iǧa takuté i Messineɣ n tis Isḥaq.
2 Éheḍ wéndɣ yesséwel as Messineɣ. Yeɣre : « Yaƹqub ! Yaƹqub ! » Yenna has Yaƹqub : « Nk deh. »
3 Yenna has Messineɣ : « Nk Messineɣ, Amaɣlol n tik, wr teksoḍed éd tas-d Maṣar, éd key ekfeɣ iheyawen ǎǧǧotnén, déndɣ ad éd umasen ellamet mǎqqeret.
4 Nk a dk éd idawen a hin tawḍed, arreɣ key-d daɣ ǎkal-ennek. Ɣor tǎmettant ennek, Yusef iman ennét a hak éd yehrin téṭṭawén ».
5 Yefel Yaƹqub Bersabeƹ. Egent meddans dɣ elkerwiletén tin Ferƹaon, enta d téḍéḍén-nsn d meddansn.
6 Emhelen éheré nsn d awa elen imda dɣ Kenƹan, eweḍen-in Maṣar hund awén.
7 Awéndɣ a iǧa Yaƹqub ad yaweḍ Maṣar enta d ǎddunet ennét emdan.
Ǎddunet n Yaƹqub
8-15 Awah ǎddunet win Yaƹqub wi osenen Maṣar : meddans d iheyawen-ennét. Awaɣ arrawen wi yekreh Yaƹqub dɣ Léya dɣ ǎkal wan Fadan-Aram : Ruben, wa mǎqqeren dɣ meddans n Yaƹqub. arrawen n Ruben Hénok, Falu, Heṣron d Kermi. Šimƹun, meddans Yemuel, Yamin, Ohad, Yakin, Sohar d Šaul, waɣ ehreyen térewt tǎmǎṭ n Kenƹaniten. Léwi, meddans, Jeršon, Qehat d Merari. Yehuda, meddans Šila, Fareṣ d Zerah. Ila essin eba tn dɣ ǎkal n Kenƹan, Ɣer d Onan. Rurés n Yahuda wan essin s isem ennét Fares ila essin meddans, Hesron d Hamul. Isakar, meddans Tola, Fuwa, Yub d Šimron. Zabulon, meddans Sared, Elon d Yaleel. Ila Yaƹqub dɣ Léya aked tunté teǧat isem Dina. Entenéḍ d meddansn ǎmosen keraḍet temerwén d karaḍ.
16-18 Yekreh Yaƹqub arrawen aked dɣ Zilfa, taklit ta yekfa Laban i yellés Léya, nɣwih : Jad d meddans Sefyun, Haji, Šuni, Esbon, Eri, Arodi d Areli. Ašir d meddan-s Yemna, Išwa, Išwi d Beriƹa, d tǎmeḍrayt nsn Sera. Beriƹa ila essin meddans Heber d Malkiel. Awén meddans d iheyawen n Yaƹqub d Zilfa. Ǎmosen meraw d seḍis.
19 Rašél, hennis Yaƹqub, tekfe essin arrawen : Yusef d Benyamin.
20 Dɣ Maṣar Yusef yekreh essin arrawen dɣ hennis Asnat, welt Foti-fereƹ ǎmǎrabu n aɣrem wan On, isem nsn Mensi d Efraym.
21 Benyamin yekreh meraw arrawen : Béla, Baker, Ašbil, Jira, Naƹman, Ehi, Roš, Mufim, Hufim d Ard.
22 Awah meddans d iheyawen n Yaƹqub d Rašél, ǎmosen meraw d ekkoẓ.
23-25 Yekreh Yaƹqub arrawen aked dɣ Bilha, taklit ta yekfa Laban i yellés Rašél, nɣwih : Dan d rurés Hušim. Neftali d meddans Yasiel, Juni, Yeser d Šilem. Awén meddans d iheyawen n Yaƹqub d Bilha. Ǎmosen essa.
26 Ǎddunet win Yaƹqub wi ekkenen Maṣar ǎmosen seḍiset temerwén d seḍis. Otanet folsn tiḍulén ennét (téḍéḍén n meddans).
27 Windɣ d arrawen win Yusef wi ewenén dɣ Maṣar, eqqalen essahet temerwén.
Yaƹqub dɣ Maṣar
28 Yezmahel Yaƹqub Yehuda éd has yelleɣet i Yusef émér wa hin eyaweḍ Jasen. As deroɣ ewaḍen Yaƹqub d innet Jasen,
29 yezwejjed Yusef elkerwila-ennét, yegla éd dsn imhiyyet. As yeney tis, yeṭṭef-t dɣ ifassen ennét, yeslef as fol eẓer a-d iǧa eket.
30 Yenna has Yaƹqub : « dimaɣ addobeɣ éd emmeteɣ, édét teddared. Enmeneynet téṭṭawén tinnu d tinnek dɣ tameddortin ».
31 Yenna Yusef i ayet-mas d ǎddunet win tis emdan : « éd egleɣ éd elleɣuɣ i Ferƹaon tisit nwn déɣ, kewenéḍ wis kelad tezzaɣem ǎmǎḍal n Kenƹan.
32 Éd has enneɣ in tamosem imeḍanen, teḍḍanem éheré, teweyem-d éheré nwn we ǧezzulen d wa heǧren d awa tlem imda.
33 As kewen yeɣra Ferƹaon, yessesten kewen d elxedmet-nwn,
34 ennét as tamosem imeḍanen, teḍḍanem éheré wa fol meḍriyem ar dimaɣ hund abbaten nwn emdan. Dédih éd kewen yey éd tezzeɣem ǎmǎḍal wa yoǧǧeǧen n Jasen, édét elmesriten ekyaḍen ǎddunet wi eḍḍanen éheré wa ǧezzulen .