पतरस की दुसरी चिट्ठी
पतरस की दुसरी चिट्ठी
परिचय
2 पतरस की चिट्ठी मैं कहो गौ है कि जौ प्रेरित पतरस के जरिया लिखी गई रहै, लेकिन आज तमान विद्वान जाकै सच नाय मानथैं। जौ हुई सकथै कि कोई और जाकै पतरस के तरफ से लिखी होबै। और लेखक कहथै कि बौ ईसु की जिंदगी को खास रूप से रूपान्तरड़ कै देखी रहै 1:17-18। अगर पतरस चिट्ठी लिखी रहै, तौ हुई सकथै कि बौ जाकै रोम मैं मसीह के जनम के 65-69 सालन के बीच, मरन से पहले लिखी होबै। पतरस जाकै अपनी दुसरी चिट्ठी भी कहथै 3:1 जो 1 पतरस की चिट्ठी के बाद लिखन की तारीक रखथै। बौ सबै मसीहियन कै चिट्ठी से संबोधित करी।
पतरस जौ चिट्ठी विस्वासिन कै अच्छी जिंदगी जीन के ताहीं प्रोत्साहित करन और झूठे सिक्छकन को अनुसरँड़ ना करन की चितौनी देन के ताहीं लिखी रहै। बौ उनकै बे लोगन की उपेक्छा करन के ताहीं प्रोत्साहित करी जो कह रै हैं कि ईसु कै बापस लौटन मैं भौत समय लग रहो है। जाके बजाय बौ बताई कि परमेस्वर ढीलो नाय है बल्किन चाहथै कि हर कोई बचाओ जाबै 3:8-9। जौ एक अच्छी जिंदगी जीन को बजह है। 3:14
रूपरेखा:
1. पतरस अपनो परिचय देथै और अपने पढ़न बारेन कै संबोधित करथै। 1:1-2
2. फिर बौ उनकै अच्छी जिंदगी जीन कै समकबाथै काहैकि परमेस्वर हमैं काबिल करी है। 1:3-21
3. जाके बाद बौ झूठे सिक्छकन के खिलाप चितौनी देथै और कहथै कि अंत मैं झूठे सिक्छकन को का होगो। 2:1-22
4. बाके बाद पतरस विस्वासिन कै ईसु के दुबारा आन की तैयारी के ताहीं अच्छी जिंदगी जीन के ताहीं प्रोत्साहित करत भै खतम करथै। 3:1-17
1
1 सिमौन पतरस के घाँईं से, जो ईसु मसीह के सेवक और प्रेरित है, बे लोगन के ताहीं जिनकै हमरे परमेस्वर और उद्धारकर्ता ईसु मसीह के न्याय के जरिया हमरे हानी एक कीमती बिस्वास दौ गौ है।
2 परमेस्वर और हमरे प्रभु ईसु के ग्यान के जरिया तुम्हैं अनुग्रह और सांति बहुतायत से बढ़त जाबै।
परमेस्वर को बुलावा और चुननो
3 परमेस्वर की ईस्वरीय सामर्थ्य हमैं बौ सब कुछ दई है जोकी हमैं बाकई मैं धार्मिकता की जिंदगी जीन के ताहीं जरूरत होथै जौ जिंदगी हम बाके ग्यान के ताहीं जी सकथैं जो हमैं अपनी महिमा और अच्छाई मैं साझा करन के ताहीं बुलाई है।
4 जौ तरह से बौ आपन कै दै भै भौतै सानदार और कीमती तोफा वादा के तौर मैं दई, ताकी जे तोफा के जरिया से तुम नास करन बारी वासना से जो दुनिया मैं है बच सकौ, और बाके ईस्वरीय स्वभाव के सहभागी हुई सकौ।
5 जौ तरह से तुम अपनेई बिस्वास मैं अच्छाई जोड़न की पूरी कोसिस करौ; अपने अच्छाई मैं ग्यान जोड़ौ;
6 अपने ग्यान मैं संयम; संयम मैं धीरज जोड़ौ; अपनेई सहनसक्ति से ईस्वर भक्ति जोड़ौ;
7 अपने ईस्वर भक्ति मैं मसीह स्नेह जोड़ौ; और अपने मसीह स्नेह से प्रेम जोड़ौ।
8 जे बे गुन हैं जोकी तुम्हैं जरूरत है, और अगर तुम्हारे पास जाधे मैं है, तौ प्रभु ईसु मसीह हमरे ग्यान मैं तुम्हैं निकम्मो और निस्फल न होन देगो।
9 लेकिन जिनके झोने जे गुन नाय हैं बे इत्ते अंधरा हैं कि बे देख नाय सकथैं और भूल गै हैं कि उन्हैं उनके पिछले पापन से सुद्ध करो गौ है।
10 इसलै, मेरे भईय्यौ, परमेस्वर की बुलाहट और बाकै चुने जानकै सिद्ध करन की भली भाँति कोसिस करत जाबौ; अगर तुम ऐसो करथौ, तौ तुम कहु ठोकर ना खागे।
11 जौ तरह से तुम्हैं हमरे प्रभु और उद्धारकर्ता ईसु मसीह के अनंत राज्य मैं बड़ा आदर के संग घुसन को पूरो हक दौ जागो।
12 और इसलै मैं तुमकै हमेसा जे मामलेन की याद दिबांगो, भलेई तुम उन्हैं पहले से ही जानत होबौ और तुमरे जरिये मिली भइ सच्चाई के ऊपर मजबूती से स्थिर होमैं।
13 मेरे बिचार मैं जबले जौ सरीर तुमरे बीच मैं जिंदी है, ऐसो करनो ठीक समझथौं कि जे बातन की याद दिलात भै तुमरी याद्दास कै उत्तेजित करत रहमौ।
14 मोए मालुम है मैं जल्दिये जौ नासवान सरीर कै छोड़ दुंगो, जैसो कि हमरो प्रभु ईसु मसीह साफ-साफ बताई रहै।
15 मैं ऐसी पूरी कोसिस भी करंगो कि मेरी मौत के बाद तुम कोई भी समय जे बातन कै याद कर सकौ।
मसीह महिमा के चस्मदीद गभा
16 हम तुम्हैं हमरे प्रभु ईसु मसीह के सामर्थ्य से आन के बारे मैं बतान के ताहीं गढ़ी भइ कहानियाँ के भरोसे नाय हैं। खुद की आँखिन से बाकी महानता देखें हैं।
17 जब हम परमेस्वर दऊवा के जरिया उन्हैं आदर और महिमा दै, तौ हम हुँआँ रहैं, तौ परतापी महिमा से अबाज आई, “जौ मेरो प्रिय लौड़ा है, जासे मैं भौत खुस हौं!”
18 हम खुद स्वर्ग से आनबारी जौ अबाज कै सुने, जब हम पवित्र पहाड़ मैं बाके संग रहैं।
19 तभई हम भविस्यवक्ता के जरिया ऐलान करे गै संदेस के बारे मैं जाधे आसस्वस्त हैं। अगर तुम बाकै ध्यान देथौ तौ अच्छी बात है, काहैकि जौ एक अंधियारो जघा मैं चमकन बारी दिया के तराहनी है जबले कि दिन नाय निकरथै और सुबेरे को तारा तुमरे दिल मैं नाय चमकथै।
20 हालाकि, सबन से ऊपर, जौ याद रखौ कि हमसे खुद कोई भी सास्त्र लेख समझाए नाय सकथै।
21 कोई भी सास्त्र मैं लिखो भौ संदेस सिरफ इंसानी इच्छा से नाय आओ रहै, लेकिन लोग पवित्र आत्मा के मार्ग दरसन के जरिये परमेस्वर के घाँईं से बोलत रहैं।