याकूब की चिट्ठी
याकूब की चिट्ठी
परिचय
याकूब की किताब याकूब नाओं के कोई आदमी के जरिया लिखी गई रहै। जौ हुई सकथै: ईसु को भईय्या याकूब रहै, जो सुरु की कलीसिया मैं एक अगुवा रहै और यरूसलेम के परिसद को हिस्सा रहै प्रेरितो 15:13। प्रेरित पौलुस बाकै गलातियों 2:9 मैं कलीसिया को खम्मा भी कही। विद्वानन को माननो है कि याकूब की किताब ईसु के जनम के लमसम 50 साल बाद लिखी गई रहै। काहैकि याकूब यरूसलेम की कलीसिया को अगुवा रहै, उनसे जाधेतर हुँआँ रहत भै किताब लिखी रहै। याकूब अपनी किताब कै “गैर यहूदियन मैं बिखरे भै बारह गोत्रन” कै संबोधित करथै 1:1। याकूब के पाठ सबै मसीहियन मैं लागू होथैं लेकिन “बारह गोत्रन” सब्दन के उपयोग से जौ संभव हुई जाथै कि याकूब सीधे यहूदि मसीहियन कै लिखरौ है। काहैकि जौ किताब पढ़न बारे के एक व्यापक समूह ले पहुँचन के ताहीं रहै, जौ तमान विसयन कै संबोधित करी। याकूब बिस्वास और कामन के बीच के संबंध के ऊपर ध्यान केंद्रित करथै। सच्चो बिस्वास कारवाई मैं दिखाओ जागो 2:17। बौ सेठ लोगन के प्रति पक्छपात ना दिखान की चितौनी भी देथै 2:1-4और कहथै कि हम जो कहथैं बासे चहाचीते रहमैं। 3:1-12
रूपरेखा:
1. अपने पढ़न बारेन को अभिवादन करथै। याकूब 1:1
2. जाके बाद बौ मसीहियन कै प्रोत्साहित करथै कि जब बे कस्ट सहमैं तौ दृढ़ बने रहमैं। 1:2-27
3. फिर बौ कहथै कि करमन के जरिया बिस्वास को दिखाई देनो कैसे जरूरी है। 2:1-26
4. जाके बाद बौ कहथै कि सब्द कितने सक्तिसाली हुई सकथैं। 3:1-12
5. तौ याकूब समझाथै कि कैसे परमेस्वर की बुद्धि दुनिया की बुद्धि से अलग है। 3:13–4:10
6. जाके बाद बौ अपने पढ़न बारेन कै घमंडी होन के खिलाप चितौनी देथै। 4:1–5:6
7. याकूब कुछ सामान्य निर्देस दैकै अपनी किताब कै खतम करथै। 5:7-20
1
1 परमेस्वर और प्रभु ईसु मसीह के सेवक याकूब के घाँईं से परमेस्वर के लोगन कै जो पूरी दुनिया मैं फैले भै हैं उनकै नमस्ते।
बिस्वास और बुद्धि
2 मेरे भईय्यौ, जब तुम अलग-अलग परिक्छा मैं पड़ौ तौ जाकै भौत खुसी कि बात समझौ,
3 जौ जानकै कि तुमरे बिस्वास के परखे जान से तुमरो बिस्वास पैदा होथै, तौ नतीजा स्वरूप तुमकै सहन की छमता मिलथै।
4 सुनिस्चित करैं कि तुमरो धीरज बिना कोई असफलता के तुमकै हर तरह से आखरी ले लै जाथै, ताकी तुम सिद्ध और पूरे हुई जाबौ और तुम मैं कोई बात की कमी ना रहबै।
5 लेकिन अगर तुम मैं से कोई कै बुद्धि कि कमी होबै तौ परमेस्वर से प्रार्थना करै, तौ बौ तुमकै देगो; काहैकि परमेस्वर सबन कै उदारता और प्रेम से देथै।
6 लेकिन जब तुम प्रार्थना करथौ, तौ तुमकै बिस्वास करनो चाहिए, और कछु संका ना करनो चाहिए। जो कोई भी संका करथै बौ समुंदर कि लहर के हानी होथै जो ब्यार के जरिये चलथै और उड़ाइ जाथै।
7 अगर तुम ऐसे हौ तौ तुम ऐसो मत समझौ, कि मोकै प्रभु से कछु मिलैगो।
8 ऐसे लोग, अपने मन कै बनान मैं असमर्थ्य हैं, और अपनी सब बातन मैं चंचल हैं।
गरीबी और अमीरी
9 जो मसीह गरीब भईय्या हैं जब परमेस्वर उनकै अच्छी दसा मैं उठाथै, तौ उनकै खुसी होनो चाहिए,
10 और सेठ मसीहियन कै खुसी होनी चाहिए जब परमेस्वर उनकै निचली दसा मैं लाथै। काहैकि सेठ जंगली घाँस के फूल के हानी गुजर जाबैगो।
11 सूरज अपने धधकत भौ घामो के संग निकरथै और घाँस कै जलाए देथै; बाको फूला गिर जाथै, और बाको सुगड़पन खतम हुई जाथै। बैसिये सेठ तभा ही जांगे जबकी बे अपने काम के बारे मैं जानंगे।
परिक्छा और लालच
12 धन्य हैं बे जो परिक्छन ले वफादार रहथैं, काहैकि जब बे ऐसी परिक्छा पास करन मैं कामयाब होथैं, तौ बे अपने इनाम मतलब जिंदगी के मुकुट कै पांगे जो कि परमेस्वर अपने प्रेम करन बारेन से वादा करी है।
13 जब कोई कि परिक्छा होबै, तौ बौ जौ ना कहबै, कि मेरी परिक्छा परमेस्वर के घाँईं से ही रइ है; काहैकि ना तौ बुरी बातन से परमेस्वर मोह रखथै, और ना बौ खुद कोई कि परिक्छा लेथै।
14 लेकिन हर आदमी अपनी अभिलासा मैं खिंचकै, और फसकै परिक्छा मैं पड़थै।
15 फिर अभिलासा पेट से हुईकै पाप कै पैदा करथै और पाप बढ़थै तौ मौत कै पैदा करथै।
16 हे मेरे प्रिय भईय्यौ, और बहेनियौ धोका मत खाबौ।
17 हर एक अच्छो और सई दान ऊपर सेई है, और जोतिन के दऊवा के घाँईं से मिलथै, जोमैं नाय तौ कछु बदलो जाए सकथै, अदल-बदल की बजह से जोमैं ना तौ कोई बदलाव आथै और ना कोई छाईं पड़थै।
18 बौ अपनी ही इच्छा से हमकै सच्चे बचन से पैदा करी, ताकी हम बाकी बनाई भइ चीजन मैं से एक पहले फल होमैं।
सुननो और करनो
19 हे मेरे प्रिय भईय्यौ! जौ बात तुम जानलेबौ, हर एक आदमी सुनन के ताहीं तैयार, बोलन मैं और गुस्सा मैं धीमो होबै।
20 इंसान के गुस्सा से बौ धार्मिकता की जिंदगी जो परमेस्वर चाहथै बौ दिखाई ना दै सकथै।
21 इसलै हर गंदी आदत और सब दुस्ट व्यवहार से छुटकारा पाएकै परमेस्वर कै सौंपौ और बौ बचन कै स्वीकार करौ जो बौ तुमरे मन मैं रोपथै, जो तुमकै बचान मैं काबिल है।
22 लेकिन बचन मैं चलन बारे बनौ, खाली सुनन बारे नाय जो अपनिए आपकै धोका देथैं।
23 काहैकि जो बचन कै सुनन बारो होबै, बामै चलन बारो नाय, तौ बौ बौ आदमी के हानी है जो अपनो मोहों दरपन मैं देखथै।
24 काहैकि बौ अपने आपकै देखकै चलो जाथै, और तुरंत भूल जाथै कि बौ कैसो रहै।
25 पर अगर तुम बौ सिद्ध नियम कै ध्यान से देखैगे जो लोगन कै आजाद करथै, और बाके ऊपर ध्यान देत रहथौ और ना खाली सुनथौ और फिर जाकै भूल जाथौ, बल्कि जाकै व्यवहार मैं लाथौ, तौ तुम जो करथौ बामै धन्य हुईकै परमेस्वर को आर्सिवाद पाबैगे।
26 अगर कोई अपने आपकै धर्मी समझै, और अपनी जीभ मैं लगाम नाय लगाबै, पर अपने दिल कै धोका देबै, तौ बाको धर्म बेकार है।
27 हमरे परमेस्वर और दऊवा के झोने पवित्र और निरमल धर्म जौ है, कि अनाथन और बिधवन के कलेस मैं उनकै याद करै, अपने आपकै दुनिया से निर्दोस रखाबै।