5
Öng Wl̈ẽp Ushko So L̇l̇gwokl̈ë, kjibokwo
1 Eshko ga ĩn ga sök pjl̈u sökkl̈o kjing go l̈i orkwo kël̈ëkong kjibokwo tjeng kjwara, tak pjir kjwo kar kare. Kjibokwo l̈i dira pjir, ga kjarbo smona kjibokwo smokkl̈o go kjwo kjäk (7), roshwing l̇l̇ëm wl̈o.
2 Ga ĩn ga Sbö parkaga kjok dogo so shäng kjl̈ara, dbo ara wl̈eniyo. E tjl̈ẽno dbo go, tjl̈ẽ ga «¿Ëye tjwl̈õ ara, kjibokwo smokkl̈o iak l̈ok kjibokwo kjarbo go l̈i döya wl̈o, kjibokwo l̈i roshwĩya wl̈o?» l̈e.
3-4 Gueniyo ëye tjwl̈õ ara, kjibokwo l̈i roshwĩya, ĩya wl̈o dret, ëye sök kjok dogo eniyo l̇l̇ëm, ëye sök kjok ëre kjing go eniyo l̇l̇ëm, ëye sök kl̈ung ëre dorko eniyo l̇l̇ëm bakoe. E kjĩshko ga tja sl̈ar ëëe.
5 Gueniyo tjl̈apgaga kjok l̇l̇gwega wl̈eniyo kjl̈ara tjl̈ẽ bor kong ga «Pja sl̈ar ame. Judá tjëyo l̈i dbongyo sök kjwe ĩzong. Kjwe David tjëyo. L̇l̇ëbo owa l̈i zana pjire. E kjĩshko ga kjibokwo smokkl̈o iak l̈ok kjibokwo kjarbo kjwe döya ga pjl̈ú, kjibokwo kjwe roshwĩya ga pjl̈ú bakoe» l̈e.
6 Eshko ga ĩn ga Öng Wl̈ẽp Ushko So L̇l̇gwokl̈ë l̈i kojono sök pjl̈u sökkl̈o l̈ishko, äya l̈öng së dogl̈o pkëng (4) l̈i, tjl̈apgaga kjok l̇l̇gwega wl̈eniyo l̈öng l̈i, e tjrëko. Ga ĩn ga zröraba kjoyoe. Öng l̈i sjö kjwang kjäk (7), bokkwo kjwo kjäk (7), e Sbö Sëyaga dogl̈o kjäk (7), ichak kjok kjwang jĩkong l̈i l̈okl̈o.
7 Eshko ga jek pjl̈u sökkl̈o l̈i zl̈ong, ga sök pjl̈u sökkl̈o kjing go l̈i, kjibokwo tjeng ba orkwo kël̈ëkong l̈i kjrara Öng l̈irë ey dwayo.
8 Kjrarashko ga äya l̈öng së dogl̈o pkëng (4) l̈i, tjl̈apgaga kjok l̇l̇gwega wl̈eniyo dogl̈o sak pjök kjingsho pkëng (24) l̈i, e kjök tono tjeng Öng l̈i bokshto. Kjl̈ara kjl̈ara wl̈oshko kjorkwang shäryak jong kjiyo tjok tëy or go wl̈eniyo tjeng kjwara, wl̈oshko di iokl̈o shäryak dbur sho shõyl̈ṍr go tjeng kjwöbö, roshko l̇l̇ëbo l̈õ pjl̈ëbl̈ëe. L̇l̇ëbo l̈õ pjl̈ëbl̈ë l̈i, e Sbö nopga syõ l̈i l̈okl̈o.
9-10 Eshko ga tono l̈ok tëkwo tjagl̈ën, tëkwoyo eni:
«Pja zröraba,
ga bop srëng kwonop l̈i go ga nopga tjwl̈ẽnop Sbö kong.
Nopga tjwl̈ẽnop l̈i tjëyoga obl̈ë obl̈ë uunkong, tjl̈ẽ tjl̈õkwo obl̈ë obl̈ë uunkong, kjok shto obl̈ë obl̈ë uunkong sopga bakoe.
Nopga l̈i iorop beno l̈öng syõshtagaga parkë l̈öng Sbö, borwa pjl̈uyo l̈i kong,
ga ber l̈öng nopga l̈öng kjok ëre kjing go l̈i ichaga ĩyado wl̈o.
E kjĩshko ga pja tjwl̈õ ara,
kjibokwo kjwe kjrëp wl̈o,
kjibokwo smokkl̈o iak l̈ok ba kjarbo go l̈i döp wl̈o bakoe» l̈e.
11 Eshko ga ĩnor jek obi, ga ĩn ga Sbö parkagaga kjok dogo so l̈öng träk l̇l̇ëm, shtëy ga äär l̇l̇ëm wl̈eni. L̈öng pjl̈u sökkl̈o l̈i, äya l̈öng së l̈i, tjl̈apgaga l̈i, e pjl̈or kal̈ëkong pjribrie.
12 Ga tjl̈ẽno l̈ok dbo ara. Tjl̈ẽ ga
«¡Öng zröraba kjwe tjwl̈õ ara,
dbo ara l̈i ber ba kong wl̈o,
l̇l̇ëbo tjwl̈õ ara tjeng kës l̈i ber ba kong wl̈o,
kjok miydë ara l̈i ber ba kong wl̈o,
bangkjrëba wl̈o,
iëba ber kësbang, tjwl̈õ ara wl̈o,
poshrëkoba wl̈o bakoe!» l̈e.
13 Eshko ga l̇l̇ëbo tjeng kës shäryara Sbörë kjok dogo, kjok ëre kjing go, kl̈ung ëre dorko, dl̈ung tjrëko, e tjl̈ẽno l̈ok uunkong bakoe. Tjl̈ẽ ga
«¡Sök pjl̈u sökkl̈o kjing go kjwe, Öng kjwe,
e poshrërwa ĩyado,
bangkjrërwa ĩyado,
iërwa ber l̈öng këskës, tjwl̈õ ara ĩyado,
dbo ara l̈i ber ba kong ĩyado bakoe!» l̈e.
14 Ga äya l̈öng së dogl̈o pkëng (4) l̈i tjl̈ẽ ga «Ber eni» l̈e, ga tjl̈apgaga l̈i kjök tono, ga sök pjl̈u sökkl̈o kjing go l̈i, Öng l̈i, e poshrëra l̈ok.