49
Jacob tjl̈õkwo l̈ono beno pjl̈ú ba wapga kong
1 E irgo ga Jacob, ba wapga rokara uunkong tek ba shwoy, ga tjl̈ẽ ba kong ga «L̇l̇ëye wen bomi kong l̇l̇ono l̈i l̈ër bomi kong, miydëmi wl̈o.
2 Pjãy tek l̈öng bor zl̈ong bäng. Tja kuzĩa. Pjãy bor wapga, pjãy uunkong kjweni. Tja bomi data Israel.
3 »Rubén, pja bor wa domer bäm ĩyo.
Pja bukshko ga tja dwl̈as l̈ë jã.
Pja tjwl̈õ ara, dbo ara, bop l̈ëmga kjinmo.
4 Gueniyo pja domer tjëkso l̇l̇ëm, kä l̇l̇ëm wl̈eniyo.
Pja pono bor boy obl̈ë tjokshko ga
tja iorop beno sök l̈ökshko.
E kjĩshko ga pja tjwl̈õ bop l̈ëmga kjinmo ame.
5 »Simeón, Leví, pjãy epenga döe.
Pjãy wotjl̈ĩk no barwë erä.
6 Pjãy ëng töng l̈anshko ga
tja tön woydë bomi tjok l̇l̇ëme.
Pjãy iirkonoshko ga
no zrömi äe.
Öng dre kjyungyo zëmi
l̇l̇ë kjĩshko l̇l̇ëme.
7 Pjãy iir ara.
Pjãy iir äya kjl̈oshko so wl̈eni.
E kjĩshko ga pjãy äyoshtër.
Eni ga bomi tjëyo tek ber bomi irgo l̈i
ber l̈öng kjok drete.
Epga shdär ber l̈öng Israel tjëyoga tjrëko.
8 »Judá, bop moskwoga zam song erä.
E kjĩshko ga pja poshrëya bop pjeyogarë.
Epga kjök tok, kjujong bokdo kjl̈ay kl̈ung go bop kong.
9 Dbong dl̈i shano, uara pjir ga
bojong iröng woshtë ba shtoshko.
Dbo ara kjĩshko ga
barwaga ërë l̇l̇ëme.
Judá, pja dbong wl̈eni.
10 Pja dbo kjaga ërë l̇l̇ëm,
bop kjë döga ërë l̇l̇ëm,
ba sogo shrono om go guing.
Era kol̈e tjëyoga uunkongdë.
11 Pja ber sök dl̈i ara, opzang ĩ,
bop kjor bo pjl̈úyo twëp bop öng kong.
Pja ää ara anmoyõ,
shwong kwoshkwëp e go ga
pjir l̇l̇ëm, ber obie.
12 Pja bok ro srëzrën,
pja ää ara kjĩshko.
Pja kowo pjl̈ubl̈ún,
pja öng nä dyo ara kjĩshko.
13 »Zabulónda ber sök dl̈ung kjako,
kjyong këskës tjwe tjyëshko.
Ba kjok worbo äär jong Sidón kjokyo go.
14 »Isacarda öng l̇l̇ëbo shgaga dbo ara
woshtë sök ba l̇l̇ëbo tjok wl̈eni.
15 Ĩya ga woshtozl̈ong pjl̈ú kjĩshko ga
kojono dbo go jek ba l̇l̇ëbo shguë.
Eni ga beno shäng obl̈ë parkagaga tjwl̈ẽk l̈öng pjir wl̈eniyo.
16 »Danda ba tjëyo l̇l̇gwek om go,
Israel tjëyoga obl̈ë dik.
17 Dgur buk irbo sor go.
Kwomgl̈a jek ba zl̈ongshko ga
ba dre uakza ga
no sök ba kjing go l̈i l̈on.
Dan, pja bangkjrëba dgur wl̈eni» l̈e.
18 Eshko ga Jacob tjl̈ẽ ga «¡Jehová, tja dözong!» l̈e.
19 Ga tjl̈ẽ ba wapga kong obi ga
«Gadda, moskwoga tjwe ba zrök l̈eshko ga
epga zãya, irpjãya erë shara.
20 »Aserda dl̈i ara, uak pjl̈ú,
pjl̈upga dl̈i dik.
21 »Neftalíra shwl̈ing kjl̈oshko so jek zron oojong,
wapga wol̈ëso wl̈eni.
22 »Joséra, e kjil̇l̇gwo jong diksor go,
bo ara,
l̇l̇iywë shdär äär di dl̈upyo wl̈eni.
23 Ĩywa l̈ok shjiktëng ba moskwogarë,
könkowo dbuya l̈ok ara ba kjing go,
twe l̈ok tjötö ĩyado.
24 Gueniyo ba sböng shaya jl̈õkoyo, wir l̇l̇ëme.
Orkwo ber gol̈ong,
Jacob Sbö dbo ara kjĩshko,
e Israel tjëyoga daga, guëng wl̈eni.
25 Pja kjimte bop data Sbörë.
L̇l̇ëye shärye woydë Sbörë l̈i shärye ga pjl̈úe.
L̇l̇ëbo twe bop kong pjl̈úe.
Shunyo iche shrë kjok dogo dwayo,
diwa iche tur kl̈ung roy dwayo,
pja wapga shdär träk l̇l̇ëm,
bop öng wapga shdär eni bakoe.
26 L̇l̇ëbo weno pjl̈ú bor kong träk l̇l̇ëm,
äär jong kjókshko, dl̈up l̇l̇ë këskës kjinmo.
L̇l̇ëbo pjl̈ú l̈i ber bop kong,
pja bop pjeyo kägäyo kjĩshko.
27 »Benjamínda, e shjiti kjl̈oshko so iir ara wl̈eni.
Kjok shröngto ga ba sëng ue,
kjok sëng ga l̇l̇amo pjl̈orgue» l̈e.
28 Ëre Israel tjëyoga kjringgwo sak kjwara kjingsho pjök (12). Tjl̈õkwo l̈ara ba datarë beno pjl̈ú tjëyo kjrina kjrina kong eni.
Jacob wol̈onoe
29 E irgo ga Jacob tjl̈ẽ ba kong ga «Tja wol̈ontoe. Tja wol̈onoshko ga tja sömi äär ber buk bor pjeyoga iak tjengshko, guëng jong ööng Het tjëyo ko Efrón kjokshko l̈i roshko.
30 E ber buk Macpela kjokyo, Mamré kjokyo gomyo, e Canaán kjokyo obi. Guëng l̈i tjwl̈ẽna Abrahamdë Efrón kong, l̇l̇ëye tjeng eshko l̈i bako, ber buk sak ba pjeyoga kong wl̈o.
31 Abraham, ba boy Sara, Isaac, ba boy Rebeca, e iak tjeng eshko, Lea iak buk eshko bakoe.
32 Kjok buk eshko, guëng jong ööng tjwl̈ẽna Het tjëyoga kong» l̈e.
33 Tjl̈ẽno eni pjir ga opbuno buk töshko, ga wol̈onoe.