2
Mpikoko
1 Somontsoin-tSaròne iraho,
vare-mañim-bavatàne.
2 Manahake o mañidè am-po’ fatikeo
i kokoakoy amo somondrarao.
Kokoa’e
3 Manahake ty takoko amo hatae añ’alao
ty kokoako amo ajalahio.
Tsy nahay avao iraho te nitoboke
an-talinjo’e eo,
nimamy an-pitsopehañ’aze o voa’eo.
4 Nasese’e mb’añ’anjomban-
tsabadidake mb’eo raho
le nampialofe’e ambanen’
alokalom-pikokoa’e ao.
5 Fahano zizimo iraho,
ampanintsiño an-takoko,
fa nampitoiram-pikokoan-draho.
6 Iondanan-dohako ty fità’e havia,
mamelek’ ahy ty fitàn-kavana’e.
7 Afantoko ama’ areo
ry anak’ampela’ Ierosalaimeo,
ty amo farasio naho o tsakan-kivokeo;
ko tsekafe’ areo
ndra ampibarakaohe’ areo
o fikokoañeo am-para’ te irie’e!
Ambara’ t’i Mpikoko i Kokoa’ey,
Kokoa’e
8 Inao i kokoakoy!
Heheke, mb’ etoan-dre,
mitsamboatsamboañe amo vohitseo,
mbore vokone’e o tambohoo.
Mpikoko
9 Manahake o farasio ndra ty fanaloke tora’e i kokoakoy;
hehe t’ie mijohañe an-kalo’
o kijolin-tikañeo,
mitangirik’ amo lalan-kedeo,
mitilihitse amo tsingarakarakeo.
10 Tinoi’ i kokoakoy iraho ami’ty hoe: Miongaha ry kokoako,
i hatsomerentserekoy, antao:
11 fa nihak’ añe i asotriy,
fa tampetse i orañey, le añe.
12 Misodeha an-tane ey o voñeo,
le fa totsake ty sam-pañetefañe,
vaho fa mivolañe an-tanen-tika atoy
i lovey.
13 Fa somaraveñe o voa’ i sakoañeio,
naho mibotiboty iaby o vaheo,
vaho mampiboele o harifondrifo’eo;
miavota ry kokoako,
ry tsaratseake, misitaha mb’etoa.
Mpikoko
14 O dehoko, an-tseram-batoo:
an-tsifitsifi’ o tevañeo,
ee te ho treako ty tarehe’o,
lonike te hitsanoñe ty feo’o,
ry talango am-peo naho soa vintañeo.
15 Tsepaho ho antika o fanalokeo,
o fanaloke bory mampianto
tanem-baheo,
fa mamòñe i tanem-bahen-tikañey.
Kokoa’e
16 Ahiko i kokoakoy, aze ka iraho:
ie mampiandrazeñe amo vindao.
17 Ampara’ te mitiotioke i àndroy
vaho misomarike o talinjoo, ry kokoako, mitoliha, tsikombeo i farasiy
ndra i fanaloke tora’e
an-tevam-bohitsey.