RUTH
LEKHABU
Ruth Lekhabu Sungthu Umdan
Ruth nikho lai chun thil thum nasatah’in ana doudal in—Hiche phatlai miho chun Numei le chapang ho ana jabol un, hinlah hitobang jabolna chu Ruth ana chang joupoi. Numei chu ajipa chunga kingai ahi-in, hinlah Ruth meithai anahi e. Hiche Nam mite chu kinaicha jeng ahiuvin, hinlah Ruth gamdangmi ahi. Thusim’a kon mudoh chu Pakaiyin gamdangnu hi akithopin chule gim le hesoh akon ahuhdoh ahiti, akichen e. Hijeh chun Ruth Lekhabu nasim’a kon hi, kinepna namu tei ding ahi. Ajeh chu Pathen in panpi ngaite apanpi ti, kicheh tah’a nahetdoh thei ding ahi.
Ruth lekhabu hi ngailutna thusim jeng ahin, khatvei nasim’a kon nasim nom jing ding ahi. Ruth le Naomi hesoh akon ngailutnan alethuhna na-mudoh ding, Pathen panpi’a kon Ruth le Boaz kimuto chule ngailutnan adim lhon tai; hiche ngailutna chun Jewste le Gentilete kichen theina ahungsoh dohtan, Huhhingpu Jesu pending jong avetsah in ahi. Ruth lekhabu hi vaichatna akon haosatna, meithai’a kon Jinei theina, nam dang akon Israelmi sona aphotchet ahi.
Ruth Lekhabu Jihpa Chule Ajih Kum
Israelte pomdan in Samuel jih ahi akitin, hinlah koipen in ajih hetchet ahipoi. Chule hiche lekhabu hi Thutan vaihom ho phat laiya kijih ahin, hichu 1375-1050 BC sung’a kijih ahi.
Koi Henga Ajih Ham
Ruth lekhabu hi Israel mite dinga kijih ahi. Israle miten namdang ahinkhompi thei nadiuva kijih ahi. Ruth lekhabua hin Pathen thuchang seidoh ajao lou vang'in, Pathen natoh hi kicheh tah’a mudoh ahi. Ajeh chu Ruth le Boaz kichenna hi kidang tah Pakai natoh ahin, hiche lungset thusim’a kon hin David chilhahte chule huhhingpu Jesu akon ngailutna avetsah in ahi.
1
Elimelech Leh Ainsung Miten Moab Gam Ajot’u
1 Israelte lah a thutan vaihom hon vai ahoplaijun gamsung’a kel nasatah ahung lhungtan ahi. Hijeh chun Bethlehem akonnin Juda mi khatnin ajinu leh achateni akipuijin Moab gam’ah cheng ding in achetan ahi.
2 Hichepa min chu Elimelech ahin ajinu min chu Naomi ahi. Achateni min chu Mahlon leh Chilion ahi. Amahohi Juda gam Bethlehem’a konna Euphrath mi ahiuvin, Moab mite gam alhun phat’un hichea chun achengtaovin ahi.
3 Hichejou chun Elimelech chun, ajinu Naomi leh achapa teni chu dalhan ana thitan ahi.
4 Achapa teni chun Moab numei akichenpi lhonnin, khatnu minchu Orpah ahin chuleh khatnu chu Ruth ahi. Ahinlah kum som joudon’in,
5 Mahlon leh Chilion chu athilhon tai. Naomi chu ajipa leh acha teni geijin adalha taovin ahi.
Naomi Le Ruth Bethlehem’a Ahung Kile
6 Moab’a aum na a kona chun Pathen in Judah phatthei aboh in, chang leh mim
asuh neng peh kittai tithu Naomi in ajatan ahi. Hijeh chun Naomi in amou teni kipui a Moab dalha a agamlam a kile kit ding in aki gotan ahi.
7 Amou teni chutoh achennao gam'a kona kipat doh a Judah gam lang jon kit ding in ahung kipat doh taovin ahi.
8 Ahinlah lampi achun Naomi in amou teni koma hitin asei jin ahi, “Nainkote kom lang’a kile kit lhon tan naji teni ding leh keima dinga naphatna lhonjeh’in Pakai jin phatthei naboh lhon hen!”
9 “Pakai jin lungmong in najinei sah lhon hen lang phatthei naboh lhon ta hen” ati. Hichun kivailhah nan aki chopto uvin aki ka-uvin achiplha taovin ahi.
10 Ahin amouteni chun adonbutin “Kanompoi, kilhon u hitin namite komlang’a keini jong kahung nomlhon e,” atilhonnin ahi.
11 Ahinlah Naomi in adonbut nin , “Ibola keitoh iche khomdiu ham?” Keiman nangni toh kicheng theiding nao kanei kitthei beh dingham?
12 Hithei ponte kamouteni, nanu napa lhon in'ah kile lhontan, keima hi la jinei kit ding in kateh valtai. Tujan tah jeng jonghin jinei thei kit ding hileng chapa neipai jeng thei ding hijong leng,
13 Midang toh kichen ding nom louvin hiche teni chu ahung letlhon nangahdoh jou lhon nadem? Ahipoi, hithei mong mong lou ding ahi, kamouteni! Nangni ding gelnan kei kalung akham lheh jenge, ajeh chu Pakai amatah in nangni jeh a hi eijeplo ding ahi,” atipeh lhon tan ahi.
14 Hichun avellin akikato kittaove, hichun Orpah chun atehpi chu vailhahnan achop in adalhatai, ahin Ruth vang chun atehpi akolchah den tan ahi.
15 Naomi chun Ruth kom’ah, “Ven, na unu khu a Pathen komleh amite kom’ah akile kittai, nang jong hitia khu naum ding ahi,” ati.
16 Ahin Ruth in adonbutnin, “Nangma kadalha a kinungle ding in neijol jol tahih in, nache na channa kacheding, nachen chenna a kachen ding, namite chu kamite hi ding, na Pathen chu ka Pathen hiding,
17 Nathi thina a kathi ding, nakivuina munna chu kakai vui ding ahi. Thinan eikhen lhon tilouva thildang a kakikhen pi poupouleh Pakaiyin kachunga thutan jeng hen!” ati.
18 Hichun Naomi in, Ruth chun kilhonpi tei ding lunggel dettah anei amudoh phat chun imacha aseitapoi.
19 Hiti chun anilhonnin akipat lhontai. Bethlehem alhun lhon phatnin, khopi miho chu akiling jeng taovin ahi. Anumei teho ho chu akihouvun, “Hiche khu Naomi hilou ham?” akitiuve.
20 Amanun adonbutnin, “Naomi jong neiti tahih uvin, Marah joh neiti jouvin, ajeh chu Hatchungnung Pathen in kahinkho hi khaleuva eikoi ahitai,” ati.
21 “Keima bulhingset na potdoh kahin, ahinlah Pakaiyin ahomkeovin eihinle puilut kittai. Pakaiyin hichan geiya eibolgimta a nanghon Naomi neiti nahlai diu ham? chuleh Hatchungnung Pathenin hichangeija hi hamsetna eilhutkhum hitalou ham?” ati.
22 Hiti chun Naomi chu Moab gamma kon in amounu Moab numei khangthahcha chutoh ahung kile lhon tai. Amani Bethlehem ahung lhun lhon hin sakolchang at akipantai.