80
Israel Semphatna Dinga Taona.
La lamkaipa henga “Lily ho a Kinoptona” lakaiya sah dia Asaph labol.
 
1 Lungset tah in ngaiyin, O Israel Kelngoiching pa,
nangma Joseph chilhah te gancha hon ho banga puihoija nahi.
O Pathen, Cherub chunga laltouna a toupan,
na loupina vah hoi chu hin kimudoh sah in
2 Ephraim, Benjamin leh Mannaseh chungah hin tahlangin.
Na thahatna gimneitah chu nei musah unlang
neihung huhdoh tauvin!
 
3 O Pathen, nangma kom'ah nei hoilut un.
Na maivah chun neihin salvah un.
Chutengleh bou huhhing kachan diu ahi.
4 O Pakai Van Sepaite Pathen,
phat itih chan geiya kataona sanlou a nakoi ding ham?
5 Nangin lungkhamna a ichan geiya neivah uva
chuleh khon dimset a ka mitlhiu na lonsah ding ham?
6 Nangin heng le kom chidang namdang te taitomna nei chansah tauve.
Ka galmi teuvin totnan einei tauve.
 
7 O Pakai Van Sepaite Pathen, nangma kom neingatsah un.
Namai vah chun nei salvah un
chutengleh bou huhhing kachan diu ahi.
8 Nangin lengpiga twi bangin Egypt a kon'in neihin puidoh un,
nangin chidang namdang ho na delmangna na gamsunga nei puilut u ahi.
 
9 Nangman keiho ding amun nei suhtheng peh un,
chuleh hichea chun keiho kajung khouvin gamsung chu ka dimset tauve.
10 Kale uvin molsang ho akhu jouvin;
kabah houvin Cedar thingphunglen tah-tah ho atom jouve.
11 Keihon kabah hou lhumlam Mediterranean Twikhanglen geijin kathejal'un;
chuleh ka jungun Euphrates Vadung gei kathe jallun ahi.
12 Hinla tunvang, kabangu ipi dinga nei vohlhah peh uva
hilang lampi hin hopa jousen kagau akiguh uhitam?
13 Gammanga kon'in ngalchang hangin avallhum in,
gamlah a gancha hon kivah nan aneiyun ahi.
 
14 Hung kile kit in, O Pakai Van Sepaite Pathen, kahung tao un ahi.
Van'a kon'in neihin veuvin ka hahsat nau neihin vetpeh un.
Hiche lengpi gui hi hin khoukhah in
15 nangma tah in na-na tu ahin,
hiche chapa hi nangma tah in nangma dinga nahin khoukhah ahi.
16 Ajeh chu kagal miteuvin thing banga eitanboh uva eihal lhah u ahitai.
Nangman na vetsah chu amuteng uleh manthah nan jui uhen.
17 Mihem na ngailutna,
cha na deilhen chu hatsah in.
18 Chutengleh keihon itihchan injong na nungsun pouvinge.
Nei suhal kit un chutileh namin avel'a kahin koukit thei diu ahi.
 
19 Nangma komlang nei ngatsah kitnun, O Pakai Van Sepaite Pathen.
Na maivah chun neihin salvah un.
Chutengleh bou huhhing kachan diu ahi.