1 Chuin Pakaijin Mose henga hiti hin aseijin, 2 “Israel mipi henga seijin, ama hon tenggol som le ni hin kisem uhen, insung leh aphungkhai cheh uvin khat cheh kisem uhenlang, aphung lamkai min cheh hin kisut sohkei uhen. 3 Phung lamkai khat min cheh chu kijihlut ding ahijeh in Aaron min chu Levi te phung lamkai ding chun sunin. 4 Hiche tenggol ho hi Houbuh sunga Kitepna songpheng ho kikoina Thingkhong masanga ikimutona mun a chun koijin. 5 Keiman kalhen mipa Tenggol chunga chu ajihdon hung um ding ahi. Chuteng na chunga mipi kiphinna le phunchelna chu achaina kahisah ding ahitai. 6 Hichun Mose’n Israel mipi chu hilchahna aneijin chule Israel phungsom le ni lamkai ho jouse jong chu Aaron tenggol jong chu ahin choiyun ahi. 7 Pakai umpina Houbuh sunga Kitepna achun Mosen tenggol ho chu akoitai. 8 Mose chu ajingin Houbuh sung’a chun agalut a ahileh Levi te insung thakhel dia Aaron tenggol chu ana dondoh in, amum aum in, apahlha in, Jonmot ga minsa ana um tai! ✡ 9 Mose’n tenggol jouse chu Pakai masanga ahin choidoh cheh in, aman hiche ho jouse chu mipi ho chu avetsah sohkeiye. Mijousen ama-ama phungkhai tenggol chu akilah cheh uvin ahi. 10 Chule Pakaijin Mose jah ah: Aaron tenggol chu Kitepna Thingkhong chung’a chu a-itih a natun jing ding ahi, Hiche chu miphalou ho hilna a pang’a, Pakai douna a akiphin’u ajom ngam tahlouna diu leh a thilhamji nauva kon ahoidohna diuva hettohsah a pang jing ding ahi, ati. 11 Chuti chun Mose’n jong Pakaijin ahil bang-bang chun aboltan ahi. 12 Israel mipi ten Mose kom'a hitin asei uvin: “Ven, keiho pihi amang thah ding bep a um kahi tauve. Keiho athisa kahi tauve, keiho akichai gam ding kahi tauve! 13 Koihileh Pakai maicham nailut chan athi, athi chai ding bep kahiu hitam? ati tauve.