MOSE LEKHABU LINA NUMBERS
MINBU
Minbu sungthu umdan
Minbu hi, Israelten gamtepgam ajot uva Pathen lamhil anga jinglai u, Sinai Molsang a ahung kondoh a kipat Israel khangthahho gamtepgam alutding kon chan u thusim ahi. Hiche lekhabu isim sung uva hi phunchielna, noplouna thulhuh, dousetna ho lhepna a ina lhahna hou chu ngaiton a, amite atundohkit nading a Pathen in phat ijat alutsah em tiho hi ngaito ding ahi.
Minbu hi Pathen mite Israelte a ding a kijih ahin, kum somli jen gamthip lah a akimanchahna hou kijihlutna ahi. Hiche thusim hin achesa phat ho, phat ahunglhung ding semtoh ahina, Pathen in angailut Israel athohhatna leh akitahna a apuihoina, chule achondihna a chonset thutanna aneiding ho hetsahna ding ahi.
Minbu hi Israel mite gamthip noija avaithamnao le, Sinai molsanga kipat Jordan vadung changei hop thusim ahin, kum somli lhingdeh thusim ahi (hichu kum somthum le kumget leh lhako). Israel mite Egypt gam a kon a ahung potdoh uchun, Mose in thu-hettohsah din Canaan gam a mi asol in ahi. Amaho thu hinlhut chun tahsan na sang in kichatna in alhut in. Hijeh chun niseh in guhtim a Canaan gamkholtoh ding in thu hettohsahho akalsong jing un ahi, akitahlou jeh uchun hilai dinmun a chun kumkhat ana vaitham uvin ahi.(Numbers 14: 33-34).
Lekhbu jihpa chule akijih kum
Minbu hi Mose in kum somli vel lut in anajih in ahi. Hichu 1406 BC a Israel mite Egypt gam a pat ahung kitoldoh uva pat a kisim pan ahi.
1
Israel chate min kilah masat pat
1 Israelten Egypt gamsung ahin dalhah kal u kum khat ahung lhin chun Pathen in Sinai gamthip a houbuh a chun Mose ahoulimpi tan ahi. Hichu alhani channa nikho masapen ni ahin, Pakaiyin hitin asei peh e,
2 “Israel namsung pumpi a kon in aphung cheh uva kon a gal hangsanho leh ainsung mihou min jouseu aumden ding in jihlut cheh in. Pasalho jouse chu jihlut soh hel in.
3 Kum somni apat chunglam gal boltheiho jouse chu Nang le Aaronnin amin u najihlut teitei lhon ding,
4 chuleh hiche phungho jouse lah a kon a chu lamkai khat cheh in nangma nakithopi ding ahi.
5 “Hiche phungho a kon a Lamkai hohi nakithopi dingho chu ahiuve.
Phung(Tribe) Lamkai(Leader)
Reuben Shedeur chapa Elizur
6 Simeon Zurishaddai chapa Shelumiel
7 Judah Anminadab chapa Nahshon
8 Issachar Zuar chapa Nethanael
9 Zebulun Helon chapa Eliab
10 Joseph chapa Ephraim Ammihud chapa Elishama
Joseph chapa Manasseh Pedahzur chapa Gamaliel
11 Benjamin Gideoni chapa Abidan
12 Dan Ammishaddai chapa Ahiezer
13 Asher Ocran chapa Pagiel
14 Gad Deuel chapa Eliasaph
15 Naphtali Enan chapa Ahira
16 Amahohi japilah akon a kilhengdoh lamkai cheh, apu apa phung kailhah a pat lamkaiho chuleh Israelte phung hoa kon a mi upa cheh ahiuve.”
17 Hichun lamkai kilhen doh chengse chu Mose le Aaron in akou khom lhonin,
18 hiche nikho ma ma chun Israelte jalhang pumpin jong akhom tup lhonin ahi. Mipiho jouse chu ama ama phung leh insung cheh kailhah a konin amin akijihlut cheh in ahi. Pathen in Mose athupeh bangin, Israel pasal kum somnia pat chunglamse chu khat khatnin akijihlut in ahi.
19 Hitichun Mose in amaho min jouse Sinai gamthip lai mun a chun anasutup soh keiyin ahi.
20-21 Ama ama phung dungjui cheh a amin u kijihlut bang a pasal kum somnia pat achunglam galsat a konthei amijatho chu hicheng hi ahi.
| Phung | Mijat |
| Reuben (Jacob chapa tahpen) | 46,500 |
|
22-23 Simeon | 59,300 |
|
24-25 Gad | 45,650 |
|
26-27 Judah | 74,600 |
|
28-29 Issachar | 54,400 |
|
30-31 Zebulun | 57,400 |
|
32-33 Ephraim (Joseph chapa) | 40,500 |
|
34-35 Manaseh(Joseph chapa) | 32,200 |
|
36-37 Benjamin | 35,400 |
|
38-39 Dan | 62,700 |
|
40-41 Asher | 41,500 |
|
42-43 Napthali | 53,400 |
44 Israel phung somleni lamkaiho toh Mose le Aaron in akhumlut u pasalho cheng hi abonchauva ama ama phung chilhah dungjui cheh a kikhumlut cheh ahi uve.
45 Amaho chu ama ama insung duijui cheh a kikhumlut ahiuve - Israelte pasal kiti pou kum somni apat chunglam gal bolthei jouse hi abonchauva a insung dung jui'a kijihlut cheh ahiuve.
46 Amaho chu agomma 603,550 ahiuve.
47 Ahinlah hiche kisim khomna a hin Levite vang apang pon ahi,
48 Ajehchu, Pathen in Mose kom hitihin ana seiyin ahi,
49 Min najihlut teng Levite hi najihlut loubeh ding, Israel mite lah a nasim tha loubeh ding ahi.
50 Kikhop khomna ponbuh le aki mangcha thilho aboncha a Levite mopohna napehding, nachena chan uva Ponbuh le aman chah chengse aboncha amahon apoh uva, akimvella ngahmun semtoh thoa alhacha a pang ding ahiuve.
51 Kikhop khomna ngahmun chon phat alhin teng, Levi chapate cheng in aphet lhah diu, hitia chu ngahmun nalhun teng uleh amahon thah sondoh kit diu, ama vang koi hileh phalna beiya kikhop khomna ponbuh ganailut behseh chan chu thiding ahi.
52 Phung jousen ama ama insung ponlap cheh utoh ngahmun akisem diu ahi.
53 Israel pumpi chung a Pakai lunghan louna dinga Levi chapaten vang kitepna ponbuh kimvella ngahmun akisem cheh uva avetsui diu ahi. Hitia chu hiche ponbuh ventupna chu Levite mopohna hiding ahi.
54 Hitichun Pathen in Mose henga athupeh bangtah chun Israel chaten emajouse aboltauvin ahi.