1 Jesu Judah ho Pathen houna in'a achekit leh hichea chun khutlang ngoi khat agamui. 2 Hichu cholngahni ahijeh in amelma ten ahehset theina diuvin achanglhi jing uvin ahi. Khutlang ngoipa chu cholngahnia adamsah a ahileh themmo channa ding tohgon aneiyu ahi. 3 Jesun khutlang ngoipa jah a, “Hungin lang mipi masanga hung dingdoh in,” atitai. 4 Chuin Ama doudal le nelkal ho lang ngan akiheiyin ajah uva, “Cholngahnia thilpha bol ding danthun aphal em ole ase bolna ding nikho ham? Hiche nikho hi hinna huhdoh nikho ham suhmang nikho joh ham?” tia adoh leh amahon adonbut tapouve. 5 Hichun Aman lunghang tah in amaho chu avekim velin alungtah jeh uchun phamo asalheh in ahi. Hichun khutlang ngoipa jah a, “Nakhut lhang in” atin chuin alhang in ahileh, akhut chu adamtan ahi. 6 Chuin Pharisee ho chu apotdoh un Ama suhmang theina ding angaito uvin, Herod solchah ho toh akihou toh tauvin ahi.

7 Jesu aseijuite toh dil lama chun ache uvin, mihon tamtah in ajuiyun ahi. Amaho chu Galilee le Judah gam'a kon, 8 Chule Jerusalem, Idumia, Solam Jordan luigal'a kon, Tyre le Sidon chunglam gam'a kon jong ahiuve. Athil bol kidang thuthanga konin gamlatah tah'a kipan in ahung veuvin ahi. 9 Jesun aseijuite asolin, mihonpin Ama lam ahin phutlouna din kong gotsa a akoi diuvin ahil in ahi.✡ 10 Chuche nikho chun mi tamtah adamsah in, hijeh chun adamlou ho chun Ama atohkhah theina dingun Ama lam chu ahin no tentun jengun ahi. 11 Lhagaoboh vop ho vang chun Ama amu chan un, tolsenan akineiyun, a-ang sunga abohkhup un, “Nangma Pathen Chapa chu nahi!” tin asam jiuve. 12 Ahin Aman lhagao phalou ho jah ah Ama koi ahi aphondoh louna diuvin agih in ahi.

13 Chujouvin Jesu molchunga akaltouvin, alhonpi dinga angaichat chengse chu akouvin, amahon jong ajuiyun ahi. 14 Chuin mi som le ni alhengdoh in, asolchah dingin apansah tan ahi. Amaho chu Ama kilhonpi ding le thuhillhang le asollea pang ding ahiuvin, 15 Chuleh thilha ho nodoh theina thuneina jong apen ahi. 16 Hiche som le ni alhen ho chu: Simon (Aman Peter asahpa chu), 17 James le John (Zebedee chapateni, ahin Jesun Van gin chapate tia asah) 18 Andrew, Philip, Bartholomew, Matthew, Thomas, James (Alphaeus chapa), Thaddaeus, Simon (mi kipum pehpa), 19 Judas Iscariot (Ama johdohpa); hicheng hi ahiuve. 20 Khatvei Jesu in khat a alut leh, mihonpi ahung kikhom kit tauve. Hijeh chun Ama le aseijui ten anneh phat tahbah jong anei thei tapouve. 21 Hichu a-inko ten ajah phat uvin apuidoh dingin ahungui. “Amahi angol a hita hi,” ati tauve. 22 Jerusalem a kon'a hung danthu sunho ma jong chun, “Amahi thilhate lengpa, Satan in avop ahi. Ama a kon'a chu thilhate nodoh theina tha anei ahi,” atiuvin ahi.✡ 23 Chuin Jesun amaho chu akouvin, ahilchetna dingin, Satan in Satan iti anodoh thei ding ham? 24 “Lenggam khat amite kikhentel'a kidouto chu mahthah a lhutei ding ahi. 25 Hibang chun insung kikhentel chu chehchaova dingdoh theilou ding ahi. 26 Satan jong kisepkhen henlang ama le ama kidou taleh iti dingdet thei ding ham? Dingdoh joulouhel ding ahi. 27 Seichenbe inge. Satan tobanga hat mi khat in'a chu koiham thanei tah a galut a chule aneiho gachom ding chu? Ama sanga hatjoa bou chun ama chu akantum'a chutengleh bou athil achom thei ding ahi. 28 Chule tahbeh a ka seipeh nahiuve, itobang chonsetna le kitaitomna hijong le kingaidam thei ding ahi. 29 Amavang koi hileh Lhagaotheng taitom vang chu imatih chan'a ngaidam changlou ding, hichu tonsot geiya ngaidam changlou ding chonsetna ahi,” ati.✡ 30 Hiche ho aseina jeh pentah chu amahon Ama chu, “Lhagao phalouvin avop ahi,” ati jeh u ahi.

31 Chuin anu le asopite ahungun inpoah ading un, Ama ahungdoh a kihoulimpi dingin thu athot un ahi. 32 Hipet chun mihonpi Jesu kimvel'a atou chahkheh un, thupopa chun ajah a, “Nanu le nasopite polamah aumun, nahin hol uve,” ahung tin ahi. 33 Jesun adonbut in, “Koi ham kanu? Koi ham kasopite ho?” ati. 34 Chuin akimvela touho chu avegol in, “Ven, amaho hi kanu le kasopi ho ahiuve,” 35 Koi hileh Pathen lunglama chon ho chu kasopipa, kasopinu chule kanu ahi, ati.