13
Jesun hou'in chim ding asei masah
1 Chuin Jesu houin'a konin apotdoh in, aseijuite khat in aseiyin ajah-ah, “Houhil, vetemin hichea in len thupitah ho hi! Abanga song lentah tah kimang ho khu athupi ngeiye,” ati leh,
2 Jesun adonbut in, “Henge, ven, hiche in lentah ho hung kisuchim sohkei ding ahi. Songkhat jeng jong khat chunga kisethom um louhel ding ahi!” ati.
Gim le da, hesoh kipat
3 Phat chomkhat jouvin Jesu Olive Lhanga Hou-In jon'ah atouvin ahile, Peter, James le John chule Andrew ahenga ahungun, ajah a adongun,
4 “Nei seipeh un, hitobang phat chu itih tengleh hi ding ham? Hitobang ahung lhun ding hettheina ding amelchihna nei seipeh un,” atiuve.
5 Jesun adonbut in, “Koimacha kilheplhah sah hih un,”
6 Ijeh-inem itileh mi tamtah keima minin hungun tin, “Keima Messiah kahi,” tiuvin tin mi tamtah alheplhah dingu ahi.
7 Chule gal kisat thuthang najah diu ahi, ahivangin lunglinglau hih-un. Henge, hitiho chu hung lhung tei ding ahin, ahivangin achaina hiloulai ding ahi.
8 Namkhat le namkhat chule gamkhat le gamkhat kidou ding, leiset chung mun chom choma lingkihot a, kellha ding ahivanga hichu naosonat kipat tobang hinalai bep ding, aban'a jong um ding ahinalaiye.
9 Hitiho chu ahung lhun tengleh, kiging phauvin! Khosung vaipo ho khut'a pehdoh a naum dingu, chuleh houin munho a jep le suhgim'a naum dingu ahi. Keima nungjui nahi jeh uva vaipoho le lengho masanga thutanna anga nadin dingu ahi. Hinla hiche phat chu keima thudol na seipehna diuva phat kijenpet hi ding ahi.
10 Ijeh-inem iti leh Kipana Thupha hi namtin lah'a kihillhang ding ahi.
11 Ahivangin amahon namat uva a angsung uva nadin tengule ipi kasei ding ham tin lungdong masa hih-un. Hitobang phat teng chuleh Pathenin sei dinga napeh chan'u chu sei jengun, ajeh chu aseiya chu nangho hita louva Lhagao Theng joh hi ding ahitai.
12 Chule asopin asopipa, apan acha tha dinga ahin pehdoh ding, chaten anu le apa ahin douva atha diu ahi.
13 Chule kaseijui nahi jeh uva mijousen nahin vetda dingu, ahinlah akhonni geiya thohlhumpa bou chu huhhing'a um ding ahi.
Thoh genthei hahsa tah
14 Thet umtah thil suboh chu adinlouna ding dol mun'a adin, namu nikho'u hung lhung ding ahi. (Asim hon chingthei tah a sim ding!) Chuteng chuleh Judea gama um chengse lhang gamah jamlut hen.
15 Inchunga umho jong athilkeo kilah dingin kumsuh dahen.
16 Koitobang loulaiya um jong avon-ah sangkhol kilah dingin hung kile dahen.
17 Ohe! Chuche phat laitah a naovop le naonoi chepsah ho ada nadiuve!
18 Chuche phat chu phalbi daplai ahilouna dingin taovun. Chutobang gentheina nasatah chu Pathenin leiset asema pat tuni geiyin aum khahih laiye; chuleh umjong umlou ding ahi.
19 Pakaiyin hiche phat chu asuhchomlou hileh ahingah koima umlou ding ahi.
20 Tahbeh a, lhenchomte jal'a anikho chu asuhchom ahitai.
21 Chule koitobang hamkhat in najah uva, Veuvin, hikoma Messiah aume, atia ahilouleh “Khukom'ah aume,” ati jongleh tahsan hih un.
22 Ajeh chu Messiah lhem le themgao lhem hung sohdoh intin melchihna le mu kidang dang ahin vetsah dingu ahin, ahithei le lhenchomte jeng jong lheplhah ding ahin got diu ahi.
23 Nangho vang chingtheiyun, ijakai kahil masah dem nahiuve!
24 Hitobang nikho ho jouteng chule nisa thim intin lha vahta louding,
25 Vanlaijola konin ahsiho pullhan tin, van'a hatnaho chengse kihotling soh ding ahi.
26 Chutah leh mitin in vanlaijola Mihem Chapa chu athuneina le aloupina toh meilom chunga ahung amu diu ahi.
Mihem chapa hungna ding
27 Chuteng tah chule Aman avantil ho asola leiset monga pat van mong geiya kolkimvel lia kon'a alhenchomte alonkhom ding ahi.
28 Tuhin theichang phunga konin kihillun. Abah adon'a, ajih akilhap tengleh nipi anaitai ti naheuve.
29 Chutobangma chun, nanghon jong hicheng chu aguilhun namu tengule, ahungkitna ding anaitai, kotbul ahung geitai ti heuvin.
30 Tahbeh a ka seipeh nahiuve, hichengse aboncha a aguilhun masangsea tulai khang mite hi manglou ding ahi.
31 Van le lei mang ding ahin, keima thu vang manglou ding ahi. Koiman Anikho le Anidan Ahepoi
32 Ahivangin hitobang ahungsona ding chu koi hihen, vanna Vantilte hihen Chapa hijongleh, Pa tailou koiman anikho le anidan tah chu ahepoi.
33 Aphat tah nahetlou jeh un, chingtheiyin kiging jingin umun.
34 Mihem Chapa hungkit nikho hi tekahnan: mi khat in asohten atoh dingu thuneina apeh a, kotngah jong kiging jinga um dinga thu apeh a, a-in dalha a kholgama chemang tobang ahi.
35 Hijeh chun kiging jingin um'un! Ijeh-inem itileh inneipu chu itih a ahung ding nahe pouve, nilhahlam ahim, jankhangkim ahim ahung ding phat nahe pouve.
36 Hung lhung taleh na imut pet u hung tohkhante.
37 Nangho jah a kasei hi mijouse jah a kasei ahi. Kiging jingin umun! ati.