MARK
KIPANA THUPHA
Hahsatna dinmun a umho dinga Kipana Thupha
Jesu kineosahna le thaneina hin tahsan le thohhatna asodoh e.
Gospel Mark lekhabu sung thu umdan
Radio le TV station ho hin minute somthum sunga vannoi thu le la ho alhangpin akila khom ho ahin phongdoh theiyin ahi. Hitobang chun, Gospel Mark jong hin Jesu Christa Pathen Lhachapa ahina thudol jong hi thuchomcha ajih sunga hi kihesoh jeng ahi. Thusim kisei lah'a thusim kidang pen: Jesu thuhil, thil kidang abol ho, ahung minchena le Ama dou ahung pun cheh cheh thudol ho akisun sohkeiyin ahi.
Hiche Gospel jihpa hi ngaman a ana pang, Peter toh kivop ahin, Pakai seijui pipuho lah a khat nungjui ahina a Pakai Jesu leiset hinkhoa gunchu tah, panpi ngaicha ho panpina pea chule adamlou ho boldama, kinepna neilouho tilkhouva, sohchang ho lhadoh a chule muthim'a umho vah loupi tah pepa chu ahi.
Lekhabu jihpa
John Mark kiti gollhang khat Jerusalem khopia meithai, amin Mary kitinu chapa ahi. Act 12:12. Mark hi Peter dia akithopi phatah pao ledoh a pang ahin, Jesu chungchang thu kichentah a Peter hin aseipeh ahi. John Mark hi ajih in pang jongleh hiche Gospel hi Gospel Peter (Gospel John kiti tobanga) minvo thei ahi.
Koi henga chule itih kum a ajih ham?
Lekhabu kijih kum hi, Rome khopi kihal jou leh Jerusalem ki suhmang masang hidin ginchat ahijeh in AD 64 don hinte, tihi alhangpia pomdan ahi. Hichu Rome khopia cheng tahsan ho koma ajih ahi. Mark hin tahsan ho gimbol hesoh Rome Gamvaipoa kon'a thoh ahiu chu tilkhouna a ajih ahi.
1
Twilutsah John in thu ahil lhang
1 Hiche hi Messiah Jesu, Pathen Chapa thudola kipana thupha chu ahi.
2 Isaiah Themgaovin anasei: “Veuvin, keiman na masang uva thupole kahin sol e. Aman lampi nagonpeh diu ahi.
3 Ama chu ahi gamthip a aw sam ginga, ‘Pakai hung na ding lampi semtoh-un!'” Amadin lampi sutheng un!’ tia chu,” anati banginahung kipan in ahi.
4 Hiche thupole chu Twilutsah John chu ahi. Ama chu gamthip ah aumin chule mihon achonset kisih nau chule ngaidam channa dia Pathen anga akiheilut nau vetsahna dinga baptize achan diuvin thu ahil in ahi.
5 Juda gam jouse, Jerusalem mite jouse chutoh, John mu ding le thusei ngai dingin ache uvin ahi. Chule amahon achonset nau aphondoh phat un, aman Jordan Luiyah baptize achansah in ahi.
6 Akivonna chu sangongsang mul pon ahin, savun konggah in akong ageh in, chule a anneh chu khaokho le gam khoiju ahi.
7 John'in, “Koi ham khat hungvah ding ahitai, Ama chu keima sanga lenjo kei sanga lenjo cheh hi ding, keima akengchot khao sutlham dinga jong lom kahipoi.
8 Keiman twiya baptize kachansah nahiuvin, ahivangin Ama chun nangho Lhagao Thenga baptize nachansah diu ahi!” ati.
Jesu twilut
9 Nikhat Galilee gamsunga Nazareth khoa konin Jesu ahungin, Jordan vadung'ah John khut a baptize achang tan ahi.
10 Chuin Jesu twi lah a konin ahungdoh in, van akikehson Lhagao Theng vakhu banginachungah ahung chu e.
11 Van'ah aw ahung gingin: “Nangma ka chapa deitah nahi, na chungah kalung alhai tangeiye,” ati.
Jesu lhep patep a aum
12 Chuin Lhagao chun gamthip'a apuimang paiyin,
13 Chua chun ni somli Satan lhep patep in aum in, gamsa ho lah a aumin, vantil hon avekol un ahi.
Jesun Galilee gam a Pathen na atoh patna
14 Phat chomkhat jouvin John songkul'a akhum jou un, Jesu Galilee gamah achen, Kipana Thupha ahil lhanglen,
15 “Pathen phattep ahung lhungtai,” tin asam peh in, “Pathen Lenggam chu anaitai! Chonset na kon kisih unlang, Kipana Thupha hi tahsan un!” atin ahi.
Jesun ngaman pasal li akou
16 Nikhat Jesun Galilee Dillen pang ajotpa na ah ngaman'a kivah le nehhol, Simon le asopipa Andrew chun dillen a ngamatna len anase lhon aga tohkhan ahi.
17 Jesun akou doh in, “Kanung hinjui lhon in, keiman miho matje nahil lhon inge!” atin ahi.
18 Chuin amanin alen adalha lhonin anung ajuipai jeng lhontai.
19 Chuin twipanga kon themkhat ache chon jep leh Jesun Zebedee chapa teni, James le anaopa John chun kong sunga len ana khuiphat pet lhon amun,
20 Amani chu akouvin ahileh, amanin apau Zebedee toh kong sunga um thaloa agoihou chu adalha lhonin ajui lhontai.
21 Jesu le akilhonpiho Capernaum khopiah achelut un ahi. Cholngahni ahung lhun chun houin'ah ache uvin, hia chun thu ahilpan tan ahi.
22 Aman dan thusunho banga hil louva, thunei tah banga ahil jeh in miho chun athuhil chu kidang asa lheh un ahi.
Pasal lhagaoboh voppa
23 Chuin hetlou kah in lhagaoboh vop mikhat houin'ah anaum in, ama chun ahin sampaiyin,
24 “Nazareth Jesu, ipi dinga kalah uva hung kikum nahim? Keiho suchimit dinga hung nahim? Nangma koi nahi kahenai—Pathen Theng chu nahi!” ati.
25 Jesun ama chu aphoh in, “Thip in! Ama a kon chun hungdoh in,” tin thu apen ahi.
26 Chuin lhagaoboh chun mipa chu aheh-in, hapen in apengin ahung potdoh tai.
27 Mijousen kidang asauvin, thilsoh chungchanga chun khat le khat akidong un ahi. “Hiche hi ipi kihilna thu thah hikit hitam? Itobang thuneina hitantem! Lhagaoboh jengin jong athupeh angaiye!” atiuvin ahi.
28 Jesu thu chu Galilee gamsung pumpiah aki thangsoh pai jeng tan ahi.
Jesun Peter jinu anu adamsah
29 Kikhopna in chu Jesun James le John toh adalhah jouvin Simon le Andrew in'ah alut un ahi.
30 Chua chun Simon nupanu chu khosih dammon analum e. Amahon adammo thu chu Jesu ahetsah paiyun ahi.
31 Hichun amanu koma chun achepheiyin akhut in atuh-in, akai thouvin atousah tai. Hichun akhosih chun alha tan, chuin amanu chu amaho neh ding sem in apangtai.
Nilhah lam a Jesun mi tampi adamsah
32 Nilhum jou nilhah in mihon adamlou leh thilhavop ho chu Jesu koma ahin puiyun.
33 Kho mite jouse chu ave din kot khah phunga akitit dimsoh jeng uve.
34 Chuin Aman hivei chom chom veiya damlou mi tamtah adamsah in, chule thilha tamtah ma adeldoh in ahi. Hinla Ama Christa ahi chu thilha hon ahet'u ahijeh in thilha ho chu apaodoh sahpoi.
35 Khovah lhah masang ajing jingkah in Jesu athouvin, apotdoh in gamthip mun'ah achen, chua chun taona agamang in ahi.
36 Chomkhat jouvin Simon le aloiho apotdoh un, chuin aga mudoh tauvin ahi.
37 Amudoh phat un ajah a, “Mijouse hin la Nang nahol cheh un,” atiuvin ahi.
38 Jesun adonbut in “Khopi danga jong kahil lhang le theina din che ute, hiche dinga chu hung kahi,” ati.
39 Chuin Galilee gam sungsea achelen, akikhop nau intin'ah thu ahil lhanglen chule thilha adeldoh peh in ahi.
Jesun miphah khat aboldam
40 Chuin miphah khat Jesu hengah kijen damsah dingin ahungin, adilsun, ajah a, “Nalung ahileh nei damsah a nei suhtheng thei ahi,” ahung titai.
41 Athusei chun alung atohkhah behseh jeh in, Jesun akhut alhaangin athamin, “Kalung ahi,” atitai. Chuin, “Damtheng tan!” ati leh,
42 Apetpet in aphah chu aphapai jengin, adamtheng tai.
43 Chuin amapa chu khamgahna aneiyin asoldoh tai.
44 “Hiche hi koima komah seidoh hih in. Hisang chun thempu koma chen lang gakivetsah in. Mose dan thupehsa dungjuiya phah kijen dam hon maicham thilto apeh ding dol chu choiyin lang gape tan. Hichu nadam thengna mipi het a phondohna hi ding ahi,” tin thupeh aneiyin ahi.
45 Ahivang in amapa apotdoh in, thil umdol chu aseiphong le tan ahi. Hichea kon chun Jesu chu mipin aum kimvelle jeng tan, hijeh chun lhangphong in khopi sunga alut thei tapoi. Hichun munthip thip lah a aumjo tan, ahijeng vang'in muntina konin mipin ahin jonlut jing nalaiyun ahi.