1 Hiche hohi Adam te insung khanggui umdan kijihna lekhabu ahi. Pathen in mihem asem chu ama lim tobang din asem in ahi. ✡ 2 Pathenin numei le pasal ana semdoh in aman amisem doh teni chu phatthei aboh in chuin amani chu mihem asah tai. ✡ 3 Adam chu kum jakhat le kum somthum alhinin ama limle ama mel to kilou cha khat ahing in hichepa chu amin Seth asah tai. 4 Seth apen jou chun Adam chu kum jaget tabang ahin be kit in, chu achun Adam in cha numei le pasal anei be na laiye. 5 Adam chu kum jako le kum somthum ahing nomsel in hiche jou chun ama athi tai. 6 Seth chu kum jakhat le kum nga ahi chun ama chu Enosh pa ahung hi tai. 7 Enosh pen jou chun Seth chu kum jaget le kum sagi ahin be nalai in chu achun aman cha numei le pasal adang ahin be nalaiye. 8 Hichun Seth chu kum jako le kumsom le kumni ahing in hiche jou chun aleiset hinkho abeitai. 9 Enosh chu kum somko ahi chun ama chu Kenan pa ahung hi tai. 10 Kenan pen jou chun, Enosh chu kum jaget le kum som le kum nga ahing na laiyin chujou chun cha numei le cha pasal ahing na laiye. 11 Enosh chu kum jako le kum nga ahing in ama athi tai. 12 Kenan chu kum som sagi alhing in ama chu Mahalalel pa ahung hitai. 13 Mahalalel pen jou chun, Kenan chu kum jaget le kum somli ahing na laiyin, chule aman chapa dang le chanu dang jong anei be nalaiye. 14 Kenan chu kum jako le kum som gei ahing in chuin ama hinkho abeitai. 15 Hichun Mahalalel chu kum somgup le kum nga alhing in ama chu Jared pa ahung hi tai. 16 Jared pen jou chun, Mahalalel chu kum jaget le kum som thum jen ahing nalaiyin chule cha pasal le cha numei tamtah ahin be nalaiye. 17 Hichun Mahalalel kum jaget le kum somko le kum nga gei ahing in hichun ama leiset hinkho abeitai. 18 Jared chu kum jakhat le kum somgup le kum ni alhin in ama chu Enoch pa ahung hitai. 19 Enoch pen jou chun, Jared chu kum jaget gei ahingin, chuban in chapa le chanu dang jong ahing na laiye. 20 Jared chu kum jako le kum som gup le kumni ahing in, hichun ama aleiset hinkho abeitai. 21 Enoch chu kum som gup le kum nga alhin in ama chu Methuselah pa ahung hitai. 22 Methuselah pen jou kum jathum sungin Enoch chu Pathen toh kinai tah in aum jing jeng in chule chapa dangle chanu dang tampi jong ahinbe nalaiye. 23 Hiti chun Enoch chu kum jathum le kum somgup le kum nga ahing in ahi. 24 Pathen toh kingaitah a umjing ahin nikhat chu ama akimu tapon Pathen in akou doh ahi tai. ✡ 25 Methuselah chu kum jakhat le kum somget le kum sagi alhin in, ama chu Lamech pa ahung hitai. 26 Lamech pen jou chun, Methuselah chu kum jasagi le kum somget le kumni ahing in, hichun aman chapa le chanu dang tamtah anei be nalaiyin ahi. 27 Methuselah chu kum jako le kumsom gup le kum ko ahing in hichun ama ahinkho abeitai. 28 Hichun Lamech chu kum jakhat le kum som get le kumni alhinin chapa khat ahing in, 29 Ama min chu Noah asah in hitin aseiye, “Pathen in agaosapsa gim genthei thoh'a ikhut uva i-tohgim nau hiche leiset'a kona ama hin eitha-ol sah ding'u ahi,”ati. 30 Noah pen jou chun, Lamech chu kum ja nga le kum somko le kum nga ahing in hijou chun cha pasal le numei tamtah ahing na laiyin ahi. 31 Lamech chu kum jasagi le kum som sagi le kum sagi ahing in, hichun aleiset hinkho abeitai. 32 Noah chu kum ja nga alhin'in, ama chu Shem, Ham, chule Japheth ahing in ahi.