1 Abram chu kum somko le kumko alhinin Pakaiyin ahoulimpi in hitin aseipeh e, “Keima El Shaddai-Pathen chungnung kahi. Hijeh chun lunglhaisel in nei hou jingin lang, chule thenna hinkho mang jingin,” ati. 2 Keiman nangma to ikikah a kitepna nape ingting hichu thonlou hel'a nangma chilhah simsen lou kapeh ding nahi. 3 Hichun Abram in amai tol lang aven hichun Pathenin ahin houvin hitin aseiye, 4 Hiche hi keima le nangma kinoptona ahi, keiman nangma hi nam jouse pa kaso ding nahi, ati. 5 Abanna namin jong kakhel peh ding, Abram nahi tah louding, Abraham na kiti ding ahitai, ajeh chu nangma hi nam jouse dia mipa nahi ding ahitai. ✡ 6 Keiman nangma hatah a kaga sah ding, na lolhin ding na chilhah ten nam tamtah ahin sondoh diu, chule leng thupi tah tah jong amaho lah a hung umdoh ding ahiye. 7 “Keiman athah a nangma to iki noptona chu na chilhahte to kaki tepna avela ka phudoh kit ding nangma nunga na chilhahte a dinga jong, khang le khang kikah ajong, hiche hi atonsot a hi ding, keima na Pathen'u kahi jing ding chule nanam, na chilhahte Pathen jong kahi jing ding ahi. ✡ 8 Keiman Canaan gam pumpi ahin, tua na chenna gam kholjin banga nachen nau hi nason na chilhahte atonsot a goulo dinga kapeh ding, chule amaho dinga jong a Pathen'u kahi jing ding ahi,” ati. ✡ 9 Hichun Pathenin Abraham ahoulimpin, “Nangma tah in jong kinoptona hi najui ding, chule na nunga nason na chilhahte dinga jong akhang lhum kei uva ajui ding'u ahi. 10 Hiche hi ahi kinoptona nangma le na chilhahte jousen ajui cheh ding, nangho lah a pasal jousen chep akitan soh kei ding'u ahi. ✡ 11 Nangman na bollou a hitheilou chu natahsa vunval abohlai chu nachelhah sohkei ding, hichun avetsah chu ahile keima le nangma kikah a kinoptona hijing ding ahi. 12 Hiche hi nangma insung mite seh hilouvin, koi tobang nasoh nakol nangma insunga dinga nachoh doh ho jouse jong ahop tha cheh ding, 13 Abonchauva chep nakitan cheh diu, na tahsauva maha napoh uchu keima toh atonsotna iki nopto na'uva umjing ding ahiye. 14 Koi tobang pasal khat tou hiche kinoptona cheptan hi bollou aum le ama chu kinoptona insunga kon'a paimanga um ding ahi, ajeh chu kinoptona ajuilou jeh ahi. 15 Hichun Pathenin Abraham ahoulimpi'n “Na inneipi Sarai jong Sarai na ti tahlou ding ahi, ijeh inem itile amanu min jong hi tua patna Sarah hi ding ahitai. 16 Keiman amanu hi phatthei kaboh a chujongleh amanu a konna hi chapa khat kapeh ding nahi, hitia chu keiman amanu hi phatthei kaboh a ama jong “Sarah” chitin namtin nu hung hi ding mitin vaipi leng ding ho jeng jong amanu a konna hung peng doh ding ahiuve,” ati. 17 Hichun Abraham jong akun in tol lang aven anui tai, chuin alungthim in ama le ama akihouvin, Keima hi kum jakhat kahi nunga mipa kahi thei ding ham? Chule ka inneipi Sarah jong kum som ko le kum ko ahi jouva naosen iti anei thei ding ham? ati. 18 Abraham'in Pathen heng'a aseijin, “Ahi thei ding le Ishmael hi nangma phatthei bohna noiya um jing tahen.” 19 Hinlah Pathenin adonbut in, “ahipoi Sarah, na inneipi in nangma a dinga chapa khat nahin peh ding, nangman hiche chapang chu amin Isaac nasah ding ahi. Chule keiman ama le ama nunga ason achilhahte dinga kinoptona chu atonsot geiya kinoptona a umjing dinga ka phudoh ding ahi. 20 Ishmael jong chu phatthei kaboh ding nangman nathum ma bang'a ama jeng jong hatah a kapun sah ding, chule ama chilhahte ho jong hatah a pung dingu ahi. 21 Hinlah keima kitepna vang chu Sarah in khovei tulai phat a hi nahin ding Isaac chuto bou ka phudoh ding ahi,” ati. 22 Pathenin thu aseijou phat chun Abraham chu adalhatai. 23 Hichun Abraham'in jong achapa Ishmael ahin, asoh pasal ama insunga peng den hihen, sum a achoh tho hijongleh, Abraham mite lah a pasal jouse chu apuikhom in, Pathenin aseipeh bang bang chun hiche nikho mama chun chep atan peh soh keiyin ahi. 24 Abraham'in chep akitan chun akum kum som ko le kum ko ana lhing tai. 25 Chule achapa Ishmael in chep akitan chun kum som le kum thum ana lhing tan ahi. 26 Ani lhonin Abraham le achapa Ishmael chun nikhat in chep atan gel lhonin ahi. 27 Chule a insunga pasal jouse, insunga pengden hihen lang gam dang mi soh dinga akichoh tho hi jongleh aboncha amatoh thakhat a chep kitan tha cheh ahiuve.