GALATIA
MITE HENGA
PAUL LEKHATHOT
Jalenna thutah Kipana Thupha tuhchah dinga houna
Galatia lekhabu sung thu umdan
Galatia lekhabua kon hin lhagaova damna muchet ahi. Hichu tahsan vanga huhhingna a kon ahi ti, kichen tah in aseiye. Lekhathot kipatna lam ah lemna, phatthei taona chule thangvahna thudol asei masan ahi. Hiche lekhathot hi ajatchom deuvin ahi. Ajeh chu atumbeh a lemna aumin, lungsetna chidang namdang te chule chamna Juda te hichu Greek le Hebrew thusei hoa kon, Paul chun phatthei le taona toh thoa ajuipeh ahi. Paul chun angailut Galatia mite chu Kipana Thupha dihlouva konin ana huhdoh in ahi.
Galatia lekhabu hin Gospel itilam dol'a nakisan ham ti, nahin geldohsah ding chule niseh na lhagao hinkhoa iti naman chah ding ham, tijong na hetdoh ding ahi. Paul chun Galatia mite kihen-ohna tampi adih louva konin gospel chamlhatna achun ahinle puiyin ahi. Hiche bang chun eiho jong kihen-ohna tampia kon Christa a chamlhatna dihtah chun eihin lepui tauhen.
Lekhathot jihpa chule ajih kum
Solchah Paul in akhat channa Missionary ache jouva ajih ahi. Hichu AD 48, Jerusalem Council masang ahi.
Koi henga ajih ham?
Galatia mun'a Christa tahsan ho hichu Rome gam vaipohna mun lailung tua Turkey, Houbung sunga adih louva kihilna ho suhdihna dinga ajih ahi.
1
Lemna thu
1 Hiche lekhathot hi solchah Paul, mihem lhen le mihem thuneina vanga hilou, Jesu Christa Ama tah le Jesu athia konna kaithouva Pa Pathen pansah pa, a kon ahi.
2 Hikoma sopi teho jouse panna a Galatia houbung ho henga lemna thu kahin thot nahiuve.
3 I-Pau Pathen le Pakai Jesu Christa chun lungset le cham-lungmon napeuhen.
4 Ichennau vannoi gitlouna a konna huhdoh ichan theina ding uvin, Pa Pathen lunggon dungjuiyin, Jesun ahinna eiho chonset jal'in ahungpe tan ahi.
5 Atonsot tonsot a dingin loupina chu Pathen a hijing tahen! Amen.
Kipana Thupha dang umlou
6 Nangho Christa ngailutna khotona a konna, Ama a dinga nakoupau Pathen a konna nakihei mang loi jengu hi kahin datmo lheh jeng nahiuvin ahi. Nangho hin lampi achombeh najuiyu ahitai.
7 Hinlah Kipana Thupha tahbeh chu ahi tapoi. Christa chung chang thua thudih heikoi hon nangho na ngol bolu ahitai.
8 Keihon nangho henga Pathen Thu kahung seiphongu kalvala Kipana Thupha chom dang khat seiya auma ahileh keiho hiuving ting ahilouleh van'a konna vantil khattou hijongleh Pathen gaosapna achunga umhen.
9 Keihon kaseisau kavelsei kit ahi. Nanghon nanajopsau kalvala Kipana Thupha achom seiphonga aum leh ama chu gaosap chang hen.
10 Mitmua miho seiphat hol a kahipoi, Pathen a kon joh chu kahol ahi. Miho lunglhaisah ding chu kalunggon ana hitaleh keima Christa soh hilou kahi ding ahitai.
Paul solchah a apanna jeh
11 Sopi deitahte, keiman nangho kahetchen sah nomu chu Kipana Thupha thudol kaseiphong hi mihem lunggel ngaitoa kingam'a ahipoi.
12 Keiman kathupohle hi mihem a kon ahipon, koiman eihil ahipoi. Chusanga, keiman Jesu Christan kahenga aphondoh hoa konna bou kamu ahiye.
13 Juda mite hou lama itobang loma katompan a Pathen houbung chu keiman kana bolset hitam ti naheuve. Keiman hichu suhmanghel kana got ahi.
14 Kapu kapaten achepiu houlam chonna lamdol a keima Judah mi kachan khompi ho sanga gamchenga chung nung joa kana hi ahi.
15 Hinlah keima kapen masang jenga jong, Pathen'in eilhendoh a, chule Alungsetna kidangtah a chu eikou ahi. Ajeh chu hichun Ama alung lhaisah ahi.
16 Keiman Kipana Thupha Jesu thu chu chidang namdang ho koma ka phondohna dinga Achapa chu kahenga aphondoh ahi. Hichu ahung hi phat in, keiman mihem khattou to kihoutohna dingin kakimoh no jengpon ahi.
17 Chule keima masanga solchah himasaho to kihoutohna dingin Jerusalem'a kakaltou dehpoi. Chusangin, keima Arabia gam lama kache mangin chule khonungin Damascus khopia kahung kinungle kit in ahi.
18 Chujou kum thum alhinin, Peter to kiheto dingin Jerusalem'a kaga chetouvin, chule amato chun ni som le nga kaum khomin ahi.
19 Hiche pet a chu seijui dang kakimupi khat chu Pakai sopipa Jacob chu ahi bouve.
20 Keiman Pathen masanga naheng uva kahinjih a ka phondoh ho hi jou apangpoi.
21 Hiche kagavil jou chun keima sahlam Syria le Cilicia gamsunga kagalut in ahi.
22 Chule hiche pet a chu Judea gam'a houbung ho chun keima eina hetchen loulaiyu ahi.
23 Ama hon miho seinaa ahet u chu, “Eiho eigimbol hesoh pau chun asuhmang got tahsan chu tun aseiphong tai” tin aseiyuve.
24 Chule ama hon keima jal'in Pathen avahchoiyun ahi.