DANIEL
THEMGAO LEKHABU
Daniel Themgao Lekhabu Sung Thu Umdan
Israel Pathen chu, Hatchungnung Lei leh Van sempa, chitin namtin jouse khonung leh khoma abon’a gongtoh’a umsah pa (thunun bolpa) Pathen ahi, ti kiphondohna ahi. Pathen chaten, Pathen hephalou lah’a i-Pathen’u chu lhaso louva tuhdet ding, thichan hijongleh pandet ding, hichu Daniel leh aloi mithum ho hinkho’a muchetna leh phondohna ahi. Amahon leng inpia neh leh don twitah ho neh sang’a, anche me (an neh theng) neh joh ding’a akitep nau, Lengpa sem milim ang’a kunlou ding, semthu pathen houna-a bohkhup louding’a akitep nau, thichan’a ding’a meilhum sung’a akiselut geijuva kitah tah’a akipehdoh nau, hichu chidang namdang ho lah’a Hatchungnung Pathen aloupina aphondoh nau ahi.
Chuin Nebuchadnezzar lengpa alunggimtan, agamsung’a doithemho, ailhim themho, ahsi lekhathem ho, michingho, abon'in akouvin, alunggimna aseijin, hinlah lengpa mang’a thutah kiselguh chu, koima ahedohthei aum tapouvin ahi. Hichu Pathen in amipa Daniel mangchan, leiset miching mithem ho chu ajumson alosam sah in ahi. Pathen in Daniel mangchaa khonung thil hunglhung ding ho, themgao thua aphondoh hin, Israel Pathen chu Hatchungnung ijakai hesoh, musoh chule Ama phasah’a ijakai umsahpa, akiphondohna ahi.
Daniel Themgao Lekhabu Kihop Khen Dan
Daniel lekhabu hi hopnia hopkhen thei ahi. Khatna, bung 1-6 sung hi, alhangpin khang thusim ahi. Hichea hin Daniel amatah chu aseidohpa leh gaothu phongdohpa ahipon, ama chung chang thuho akisun’e. Bung 1 sung’a Daniel hinkho thusim chomcha akimun, amatah chu soh dinga gal hing’a, Babylon gam’a kikaimang ho lah’a khat ahi akicheh’e. Bung 2-5 sung in, Daniel in Pathen atuhdet’a, Pathen in Daniel chung’a athahat aloupina aphon’a, soh hita louva leng inpi thumop vaihom’a ahung pandoh thusim akiseiye. Aman Pathen’a kon chihna leh hetna jal’a, Nebuchadnezzar leh Belshazzar chung’a lhung ding ho analedoh’a, ana phondoh’a, mihon Pathen dihtah amudoh nau akisei jin, hiti chun kum sottah lengho inpia thumop vaihom in apang’e.
Nina – Bung 7-12 sung hin, Pathen in Daniel jangkeija amanchah na akiseije. Daniel chu miho mang-ledoh pa, miho thilmu hilchenpa hita louvin, amatah chu mang neipa leh gaothu seidoh pa, khonung thilsoh ding mumasa pa chuleh aphongdoh pa ahung hitai. Leiset khang thusim’a kikhelna lentah, Babylonte, Persiate, Greekte chuleh Romete lengvaipohna ahung dindoh’a anung lhuh kit diu chuleh ninunung’a leiset khang um ding thu, Pathenin Daniel ana musahin, ana phondoh sahin ahi. Chuleh mihemte lenggam Messiah vaihomna atundoh ding ana phong doh in, vannoi miho ahetsah masat in ahi.
Lekhabu Jihpa Chule Akijih Kum
Daniel hi “Ka Pathen adih’a thutanpa,” tina ahi. Golhang khangdong cha ahipet in Judah gam’a Jehoiakim lengvaipoh kumthum lhinkum’a, Nebuchadnezzar lengpan Judah mi tamtah soh’ a gal hing’a akaimang ho lah’a jao ahi. Judah mi leng phung’a mi ahitoh, ahetna le achihna chuleh amelhoina jal chun, Babylon gam’a Nebuchadnezzar leng inpia vaipo ding kiholna a, ama leh aloi mithum: Shadrach, Meshach, Abednego chu lhendoh tamtah lah’a apang un, lengpa inpia kijilna chom chom kumthum sung anei sah un ahi. Imalam jousea, Daniel chun, midangho akhokhel jeh in, lengpa inpia thumop vaihom in phat sotpi apangin, kum 60 val Babylon gam’a acheng den in ahi. Mi phabep in, hiche lekhabu hi, Daniel hilou midang khat sut hinte tia gelloi aum vang in, Bible Scholar atamjon kitoh tahin, Daniel sut ahimong’e tin pomdetna aneiyun ahi. Ajihna phatsung ahileh 6th century BC ahi.
1
Daniel Leh Agolten Pathen Thu Angaiju
1 Judah lengpa, Jehoiakim lengvaipoh kumthum lhin kumin, Babylon lengpa Nebuchadnezzar chu Jerusalem’a ahungin, khopi chu a-umkimin, a-opkhumden tai.
2 Pakaiyin, Nebuchadnezzar chu, Judah lengpa Jehoiakim chung’a galjona apen, lengpa leh Pathen houin’a thil theng phabep ho jong, akhut’a apedoh tai. Hijeh chun Nebuchadnezzar’in, lengpa ahin, thil achom ho chu ahin, abonin Babylon gam’a apolutin, athil ho jouse chu ama pathen Hou-in’a thil kikholna’a chun akoi tai.
3 Chu-in lengpa’n a sepai lamkai Ashpenaz kiti nukiso ho pipua pangpa jah’a, galhing’a hung kikaiho lah’a, Judah lengte insungmi phabep chuleh adang milen milal ho insungmi phabep , ama leng inpia ahinpuilut dingin thu apetai.
4 Aman golhang melpha, chihna leh hetna bukim, tahsa damthei chuleh leng inpia lolhing tah’a lhacha thei ding, holdoh inlang, amaho chu Babylon gam pao leh chondan lekha hil ding chuleh jilsah ding ahiuve, ati.
5 Lengpa’n amaho ding chun, niseh’a ama neh leh don bang bang, an-neh twitah leh don ding ju twitah, agonpehin ahi. Kumthum sung’a amaho chu, kihilna leh kijilna anei uva chujou tahleh, leng inpi vaihom lhacha ding’a lut ding ahiuve.
6 Judah phung leh nam’a kon’a kilheng doh golhang khangdong mili ho chu Daniel, Hananiah, Mishael chuleh Azariah ahiuve.
7 Nu-kiso ho lamkai pipu chun, amahose chu, Babylonte minthah asempehin, Daniel chu Belteshazzar, Hananiah chu Shadrach, Mishael chu Meshach chuleh Azariah chu Abednego asah tan ahi.
8 Ahivangin, Daniel chun lengpa’a kon anneh twitah leh don ding ju twitah hung kipe chu, neh’a chuleh don’a ama hinna kisuh boh louna dingin, kigellhahna dettah aneitai. Hijeh chun, aman nukiso ho pipu kom’a chun, lengpa’a kon hung kipe neh leh don hochu, nehdateina dingin phalna athum tai.
9 Hichun, Pathenin, nukiso ho pipu pa lungsung’a chun, Daniel hepina leh gelkhohna ahinpe tan ahi.
10 Ahivangin nukiso ho pipu chun, Daniel jah’a, “Nangho ding anneh leh don ding ju, gongtup’a eipansahpa kapu lengpa kakicha lheh e. Ijem-tin, nakibahpi na gol ho sangin namel hung gong hen lang, na tahsa hung lhasam khaleh, nangma jal’a keima lu kitan lo ding ahi, kati aja lheh’e,’’ ati tai.
11 Hichun Danielin, nukiso ho pipu pan amaho chu: Daniel, Hananiah, Mishael chuleh Azariah, vetup ding’a atum’a anganse pa jah’a chun, asei tai.
12 Lungset in, nisom sung nei patepun, kaneh diu anche leh ka don diu twi keoseh bou neipeuvin.
13 Nisom jou tengleh, lengpa’a kon anneh twitah nea chuleh ju twitah don golhang ho chutoh neivet kah’un. Hichea namubang bang chun, keiho chung’a thulhuhna bol jengin, khoh kasa pouve, ati tai.
14 Hichun, Daniel thusei chu, amaho vetup’a pangpan anop pehin, nisom sung apatepin avetai.
15 Nisom lhinin, lengpa anneh twitah leh ju twitah’a kivah golhang ho sangin, Daniel leh aloi mithum ho chu, amel’u ahoijoh’a chuleh atahsa’u jong adamthei joh chu, mudoh ahitauve.
16 Hichun achinguva pangpa chun, amaho ding’a kigong anneh twitah leh ju hochu aladohin, aneh diuvin anche bou apetai.
17 Pathenin hiche golhang li ho chu, midang ho sangin chihna, thepna chuleh ijakai hetna apen ahi. Chuleh adehsetin, Daniel chu, themgao thu leh mang ho hetna leh ledoh theina apen ahi.
18 Akijilnau phatsung alhin tah chun, lengpa thupeh dungyuijin, nukiso ho pipu chun, amaho chu abon’un Nebuchadnezzar lengpa angsung’a ahin pui lut tai.
19 Lengpa’n amaho chu akihoupin ahileh, Daniel, Hananiah, Mishael chuleh Azariah ho chung’a alung lhei bang chun, midang koima chung’a amu tapoi. Hijeh chun, amaho chu leng inpia lhacha vaihom in alut tauvin ahi.
20 Hichun lengpa’n amaho chu, chihna leh hetkhenna pum’a thutan vaihomna thuho adoh’a akihoupina-a chun, alenggam sung pumpia mitpheldoi themho leh ai-lhim themho jouse sangin, ale som in athemjo uve ti amudoh tan ahi.
21 Daniel chu, Cyrus lengpa lengchan kal kumkhat lhingei jin, leng inpi lhacha vaihom in apang in ahi.