3
Zon Baptaizman bin pris
(Matiu 3.1-12; Mak 1.1-8; Zon 1.19-28)
1 Diswan nau i bin piptin iya Taibirias i bin da bigking wea da siti blo Rom. Pontis Pailat i bin gabana blo kantri blo Zudia. Erod Antipas i bin edman wea smol kantri blo Galali ane bala blo em Pilip, i bin edman blo smol kantri blo Ituria ane Trakanaitis. Laisania bin edman blo smol kantri blo Abalin.
2 Demtu Anas ane Kaiapas bin teke tan po bi bosprist. Da seimtaim nau, Zon boi blo Zakaraia, i bin de wea da dezetples ane God i bin de tok po Zon.
3 So den Zon i bin goraun ane pris raittru lo dem eria blo Zodan Riba ane em i bin spik po dempla diskain, ‘Yupla sabe yupla mas baptaiz apta yupla bin tan prom ol sin blo yupla, den God i go pogibe sin blo yupla.’
4 Aizaia, da spesilmesizman blo God, i bin raitem diskain baut Zon:
‘I gad sambodi de ala lo ples wea i nogad man.
Em singaut:
“Meke da wei redi po da AntapGod,
meke rod stret po em po wagbaut.
5 Ebri bali, yupla mas pilemapem,
ebri maunten ane il, yupla mas lebelem.
Ol kruket rod, yupla mas mekem stret,
ol dem busrod, yupla mas smudem.
Meke ol demting bipo da BosLod go kam.
6 Ebriwan i go luk
diswan God i bin sanem kam po seibe ebribodi.” ’
7 ‘Plenti pipol i bin kam po Zon so em ken baptaiz dempla. Bat em bin graul dempla prapa strong ane bin spik stret po dempla, ‘Yupla wase ol sneik. Yupla tingk wen yupla go baptaiz, God nogo panse yupla po ol dem rongting wea yupla bin mekem a?’
8 Ai spik yupla nau. Yupla mas tanewei prom ebridem nugudting lo laip blo yupla ane tan po God, so ai go sabe yupla bin tan prom ol sin blo yupla. No spik diskain ya, “Yumpla orait wea God bikoz yumpla kam prom dat seim pamlelain blo bigate Eibram.” Datwan i no min nating. God i ken seinze dem ston ya po pikinini blo Eibram.
9 God i wase man wea i wok lo gadan. Da tamiok blo da zazment blo God i redi po katemdaun ol dem tri ane ol dem rut. Ebri tri uda no sake gudprut, em i go katemdaun ane sakem wea dat bigpaia.’
10 Dem pipol ol i bin aske em, ‘Wanem mipla i go mekem sole God nogo panse mipla?’
11 Em i ansa baigen po dempla, ‘Uda gad tu kaliko mas gibe wan po em uda nogad. Ane uda i gad kaikai mas seremaut po dempla uda nogad.’
12 Sam taksman ol i bin kam po baptaiz ane ol bin aske Zon, ‘Tisa, wanem mipla go mekem?’
13 Zon bin spik po dempla, ‘Yupla no meke pipol pei mo mani den wanem da gabman i askem.’
14 Sam amiman i bin aske Zon tu, ‘Wiswei mipla? Wanem mipla go mekem?’ Em bin ansa dempla, ‘Yupla no puse eniwan po gibe yupla mani. Yupla no bleime man uda no bin meke rong. Yupla mas satispai wea pei blo yupla.’
15 Dem pipol i bin atzamp. Dempla bin tingk samting gud mas go apen. ‘Ei, mait Zon gobi da Promiswan.’
16 Go nau. Zon i bin spik po dempla, ‘Ai baptaiz yupla wea wata, bat i gad sambodi mobig uda i go kam. Ai no gudnap po tekemaut sandol blo em. Em go baptaiz yupla wea da OliSpirit ane wea paia.
17 Em i go zaze ol pipol ane em i go tekemaut ol dem gudpipol wase mipla tekemaut da gudkaikai prom da koknat sel ane sakwei da sel. Ol dem gudpipol, em go kipe dempla wea eben wase mipla kipe da gudkaikai wansaid. Ol dem nugudpipol, em go sake dempla wea dat paia i ban poeba, datwan el. Em go sake dempla de wase yumpla sake ol koknat sel po banem wea paia.’
18 Zon bin prise da gudniuz po elpe demwan uda i sabe da raitwei po God. Em bin tok strong ane em bin trai olkainwei po wone dempla po seinze wei blo dempla.
19 Zon bin graule Erod Antipas, da edman blo Galali. Em i bin spik em stret bikoz Erod i bin maret oman blo bala blo em. Neim blo dat oman Erodias. Ane Erod i bin meke plenti ol nadakain nugudting tu.
20 Den Erod i bin meke nada prapa nugudting gen. Em bin sane ol amiman blo em go po kese Zon ane po putem insaid wea zeilaus.
Zon Baptaizman i baptaiz Zizas
(Matiu 3.13-17; Mak 1.9-11)
21 Apta wen Zon i bin baptaiz ol dem pipol, Zon bin baptaiz Zizas tu. Wail Zizas i bin prea, eben i bin open
22 ane da OliSpirit bin kamdaun antap wea em wase dab. Ane bois bin spik prom eben, ‘Yu mai boi. Ai prapa labe yu ane ai prapa glad ane satispai wea yu.’
Dat bipotaim pamlelain blo Zizas
(Matiu 1.1-17)
23 Orait. Zizas i bin baut 30 iya oul wen em bin stat dat spesil wok blo em.
Ol dem pipol bin tingk em boi blo Zosep.
Dis seim Zosep i da boi blo Elai,
24 Elai i da boi blo Matat.
Matat i da boi blo Libai.
Libai i da boi blo Melki.
Melki i da boi blo Zanai.
Zanai i da boi blo Zosep.
25 Zosep i da boi blo Matatias.
Matatias i da boi blo Amos.
Amos i da boi blo Neiam.
Neiam i da boi blo Esli.
Esli i da boi blo Nagai.
26 Nagai i da boi blo Mat.
Mat i da boi blo Matatias.
Matatias i da boi blo Semein.
Semein i da boi blo Zosak.
Zosak i da boi blo Zoda.
27 Zoda i da boi blo Zoanan.
Zoanan i da boi blo Resa.
Resa i da boi blo Zerubabal.
Zerubabal i da boi blo Salatela.
Salatela i da boi blo Neri.
28 Neri i da boi blo Melki.
Melki i da boi blo Adi.
Adi i da boi blo Kosam.
Kosam i da boi blo Elmadam.
Elmadam i da boi blo Er.
29 Er i da boi blo Zosua.
Zosua i da boi blo Elieza.
Elieza i da boi blo Zorim.
Zorim i da boi blo Matat.
Matat i da boi blo Libai.
30 Libai i da boi blo Simion.
Simion i da boi blo Zuda.
Zuda i da boi blo Zosep.
Zosep i da boi blo Zonam.
Zonam i da boi blo Eliakim.
31 Eliakim i da boi blo Melia.
Melia i da boi blo Mena.
Mena i da boi blo Matata
Matata i da boi blo Natan.
Natan i da boi blo Deibid.
32 Deibid i da boi blo Zesi.
Zesi i da boi blo Obed.
Obed i da boi blo Boaz.
Boaz i da boi blo Salmon.
Salmon i da boi blo Nason.
33 Nason i da boi blo Aminadab.
Aminadab i da boi blo Ram.
Ram i da boi blo Ezron.
Ezron i da boi blo Perez.
Perez i da boi blo Zuda.
34 Zuda i da boi blo Zekop.
Zekop i da boi blo Aizak.
Aizak i da boi blo Eibram.
Eibram i da boi blo Tera.
Tera i da boi blo Nao.
35 Nao i da boi blo Serug.
Serug i da boi blo Riu.
Riu i da boi blo Peleg.
Peleg i da boi blo Eber.
Eber i da boi blo Sela.
36 Sela i da boi blo Kainan.
Kainan i da boi blo Arpaksad
Arpaksad i da boi blo Sem.
Sem i da boi blo Noa.
Noa i da boi blo Lamek.
37 Lamek i da boi blo Metusela.
Metusela i da boi blo Inok.
Inok i da boi blo Zared.
Zared i da boi blo Malalil.
Malalil i da boi blo Kenan.
Kenan i da boi blo Inos.
38 Inos i da boi blo Set.
Set i da boi blo Adam
ane Adam i da boi blo God.
Diswan da pamlelain blo Zizas.