Luk
tokbaut laip ane tising blo Zizas
1
Wanem Luk bin raite dis buk po
1 Dia Gabana Tiopalas, plenti pipol i bin trai po raite ol dem stori baut Zizas wanem em bin mekem wen em bin ya wea ert. Ane yu bin lisen dem stori.
2 Dem pipol uda i bin lisen dem stori, prom ol dem pipol uda i bin luk wanem Zizas bin mekem, dempla bin raitem daun ol dem stori wanem ol i bin lisen.
3 So ai bin go po aske ol dem pipol uda i bin de wea Zizas, po spik mi wanem ol i bin luk ane lisenbaut Zizas. Den ai bin raitem daun ane diswan i da trutok baut Zizas Kraist.
4 Ai bin raite dem stori so yu ken sabe i tru wanem yu bin lisenbaut Zizas.
Da einzel bin spik Zon Baptaizman go bon
5 Orait. Dat taim wen Erod bin edman de wea Zudia i bin gad wan Zuwisprist blo da pamlelain blo da prist Abiza. Neim blo em i bin Zakaraia. Em bin maret wan oman blo pamlelain blo Aron, dat bipotaim bosprist. Neim blo dat oman i bin Lizabet.
6 Demtu i bin rait ane stret pipol prant wea God ane demtu bin mata pole ubi blo God. Demtu i bin gibe laip blo demtu po God.
7 Lizabet em kan gad pikinini. So demtu nogad pikinini ane nau demtu i prapa oul.
8-9 I bin kastam blo ol dem prist po suze wan man po bane insens wea Tempol blo God, so dempla i bin suze Zakaraia. Zakaraia i bin go po bane insens de insaid da Tempol blo God.
10 Da seimtaim nau wen em bin go po bane da insens, ol dem pipol uda i bin kam de po wosip, dempla bin stanap de ausaid ane prea.
11 Wail Zakaraia bin bizi de insaid da Tempol, da einzel blo God i bin soe emselp de lo raitsaid blo da olta wea em bin bane da insens.
12 Wen Zakaraia bin luk dat einzel, em bin prapa atzamp ane prait.
13 Bat da einzel i bin spik po em, ‘Ei. Yu no prait. God bin lisen prea blo yu. So nau ai spik yu, Lizabet oman blo yu i go bone boibeibi. Yu mas pute neim blo dat boibeibi, Zon.
14 Yu ane plenti pipol i gobi prapa glad wen da beibi i go bon.
15 Em gobi prapa bigman wea God. Em no lau po dringk wain o eni strongdringk. Da OliSpirit paua i go stap wea em prom da taim wen em go bon.
16 Em go teke plenti pipol wea dis kantri Izrael, ane em go teke yupla kambaigen po God, God blo yupla.
17 Em go go pas po meke redi po da BosLod. Em i gobi prapa strong ane em go gad plenti paua blo God wase da spesilmesizman Ilaiza. Em i go meke ol pamle kambaigen tugeda ane tane ol pipol uda no bin lisen, po kambaik po da raitwei ane go meke dempla redi po da BosLod.’
18 Zakaraia bin spik da einzel, ‘Wiskain? Wiskain ai go sabe diswan i tru? Mitu prapa tu oul po meke beibi!’
19 Da einzel bin ansa em, ‘Mi Geibrel, ai oltaim stanap klostu wea God ane God go elpe “yutu. God bin sane mi kam po spik yutu dis gudniuz.
20 Yu no bilibe mi, bat wanem ai spik po yu i tru. Prom distaim nau, yu gobi dam, kan tok, raitap po da taim wen da beibi i go bon.’
21 Ol dem pipol i bin weit de ausaid da Tempol po Zakaraia. Dempla i bin stat po pazol nau. ‘Kole, wanem longtaim em mekem de insaid lo da Tempol?’
22 Wen em bin kam ausaid, em kan tok. Em bin meke ansain po dem pipol so ol i bin stretwei sabe em bin luk samting wase bizin de insaid lo da Tempol.
23 Wen Zakaraia bin pinis dem wok blo em, em bin go longwei gobaik po aus blo em.
24 Apta nau, Lizabet oman blo em, i bin kam pamle. Em no bin libe aus po paib mant, bikoz em no bin wande nobodi po sabe em pamle.
25 Lizabet bin spik po emselp diskain, ‘God bin gibe mitu samting prapa gud. Em bin tingbaut mitu ane em bin tekemaut sem prom mi bikoz ai nogad pikinini ane nau ai pamle.’
Da einzel bin spik da promis po Meri, dat Zizas gobi bon
26 Wen Lizabet i bin siks mant pamle, God i bin sane einzel Geibrel go po da biliz blo Nazaret wea da smol eria blo Galali.
27 Da einzel i bin go luk wan gel neim Meri. No man bin go wea dis gel. Em bin promis po maret wan man, neim blo em Zosep. Zosep i bin kam prom pamlelain blo King Deibid.
28 Da einzel bin kare mesiz prom God po Meri. Em bin spik diskain po Meri, ‘O o! Wiswei yu? God i go ona yu ane blese yu. Em i ya wea yu. Em bin suze yu prom ol dem nada oman.’
29 Wen Meri i bin luk ane lisen po wanem da einzel i spik, em bin prapa prait. Em bin pazol baut demting wanem da einzel bin spik po em.
30 Da einzel bin spik po em, ‘Yu no prait Meri, bikoz God i prapa kea po yu. Em bin suze yu.
31 Lisen gud! Yu gobi pamle ane yu go gad boibeibi. Yu mas pute da neim blo da boibeibi, Zizas.
32 Em gobi bigman ane ebribodi i go kole em Boi blo da Prapa AntapGod. Da LodGod i go meke em king wase Deibid, dat prapa bigate blo em.
33 Em gobi king oba Izrael, poeba. Em gobi king wea i nogad end.’
34 Den Meri i bin spik baik po dat einzel diskain, ‘Wiskain ai go pamle? Ai no sabe man.’
35 Da einzel ansa em baik, ‘Da OliSpirit go kam insaid wea yu ane da paua blo da Prapa AntapGod go kaba yu. So da pikinini wea i go bon, i gobi Boi blo God.
36 Yu lisen po mi nau. Yu sabe kazen blo yu Lizabet prom mamasaid blo yu. Em nogad pikinini ane em prapa oul. Wel, em siks mant pamle nau.
37 Wa, bikoz i God uda ken meke ebriting.’
38 Meri i bin ansa em baik diskain, ‘Ai wokinggel blo God ane ai mas mekem wanem God i wande mi po mekem, so lete demting wanem yu spik i go kam tru.’ So apta Meri bin spik diskain, da einzel bin go.
Meri go po bizit Lizabet
39 So nau Meri i bin meke redi ane ariapwan go po dat taun wea ilkantri blo Zudia.
40 Seimtaim wen em bin go insaid aus blo Zakaraia, em bin alo po Lizabet.
41 Wen Lizabet i bin lisen da ala blo Meri, dat beibi i bin mub insaid beli blo Lizabet. Ane da OliSpirit i bin kese em strong.
42 Lizabet bin singaut laudwan, ‘God i bin blese yu moden eni nada oman. Ane em bin blese da boibeibi yu karem de insaid wea yu.
43 Ei! Uda mi, dat disting i apen po mi, dat yu, mama blo mai BosLod i kam ya po bizit mi?
44 Meri, wen ai bin lisen yu singaut, da beibi insaid mi i bin zamp prom glad.
45 Yu gobi prapa api ya nau bikoz yu bin bilib da mesiz blo God po yu, i go kam tru.’
Meri sing preiz po God
46 Den Meri i bin spik diskain:
‘At blo mi i singaut preiz po God.
47 Mai at preize God ane kare neim blo em antap.
Spirit blo mi i prapa glad bikoz God em i seibe mi.
48 Em bin tingbaut mi nomata ai prapa louklas gel blo em.
Prom distaim nau ol pipol go kare neim blo mi antap,
bikoz God bin suze mi.
49 Da Strong AntapGod, i bin meke ol prapa bigting po mi.
Neim blo em i Oli.
50 Em soe sorewei po ebriwan uda i ona em ane pole em,
demwan prom bipotaim, demwan ya nau ane demwan uda go kam biain.
51 God bin soe paua blo em po yumpla.
Demwan uda i praud, demwan uda i tingk dempla prapa ai, God spoile ol plan blo dempla.
Em bin puse dempla go ausaid, meke dempla plai ebriwea wea win.
52 Em bin teke ol dem king prom taun blo dempla ane em bin daune dempla.
Em bin liptemap ol louwan go antap.
53 Em bin gibe ol anggre pipol, ol plenti gudting,
bat em bin sane ol riswan gowei, nogad nating.
54-55 Em bin elpe ol wokman blo em wea Izrael,
dem longtaim pamle blo mipla.
Diswan i bin Eibram ane ol pamle blo em. God bin meke dis promis,
em ebritaim go meke gudpasin po dempla.’
56 Meri bin stap de wea Lizabet po tri mant. Den apta tri mant em bin gobaik po aus blo em.
Zon Baptaizman bin bon
57 Wen da taim i bin kam nau po Lizabet po bon, em bin bon boibeibi.
58 Ol pren ane ol pamle blo em i bin lisen da prapa gudting wanem God i bin mekem po Lizabet. So dempla i bin prapa glad po em tu.
59 Eit dei apta da boibeibi i bin bon, dempla i bin meke redi po kate poskin blo em wase dem Mozeslo i spik. Pamle blo em i bin wande neime em Zakaraia apta papa blo em.
60 Lizabet i bin spik, ‘Nono. Neim blo em i Zon.’
61 Dempla spik diskain po Lizabet, ‘Yu nogad no pamle wea i gad dat neim.’
62 Dempla i bin meke ansain po Zakaraia, askem, ‘Wiswei? Wanem neim yu wande kole da boibeibi?’
63 So Zakaraia i bin askem po smol raitingbod ane em bin raitem diskain, ‘Neim blo em, Zon.’ Dempla bin sapraiz.
64 Da seimtaim nau, Zakaraia i bin stat po tok gen ane em bin mata preize God.
65 Wen Zakaraia i bin pinis tok, ol dem pipol i bin prapa atzamp ane niuz i bin spred oloba ilkantri blo Zudia baut da boi blo em.
66 Ebriwan uda bin lisen wanem bin apen, dempla bin tingbaut ane ol bin aske wananada, ‘Wanem dis boibeibi gobi. Ebribodi sabe da paua blo God i stap wea em.’
Zakaraia bin preize God
67 Da OliSpirit blo God i bin tekoba Zakaraia, papa blo Zon, ane em bin spik dis mesiz blo God:
68 ‘Yumpla ebribodi kam preize da LodGod, da God blo Izrael.
Em bin kam po elpe ol pipol blo em ane meke dempla pri.
69 Em bin sane wan prapa strongwan po seibe yumpla.
Da wan uda seibe yumpla, em kam prom da pamlelain blo Deibid, sebant blo God.
70 Prapa mina longtaim de pas,
God i bin promis wea ol dem spesilmesizman blo em,
71 em go seibe yumpla prom ol enami blo yumpla,
ane prom demwan uda i eite yumpla.
72 Em bin spik, em ken meke gudwei ane kipe dat spesil promis
po ol dem longtaim pipol blo em.
73 Diswan da strong griment wea em i bin gibe Eibram, bigate blo yumpla.
74 Em go seibe yumpla prom ol dem enami blo yumpla,
so yumpla ken serbe em ane no prait prom nating.
75 Ane yumpla ken bi oli ane mata pole da raitwei,
raitap po dat taim wen yumpla go ded.
76 ‘Ane yu, boi pikinini blo mi,
ebriwan go kole yu spesilmesizman blo da Prapa AntapGod.
Yu go pas, bipo da BosLod i go kam ane yu go meke da rod redi po em.
77 Yu go spik ol pipol blo em diskain, em go seibe dempla
ane em go pogibe ol sin blo dempla.
78 Bikoz God em gad prapa sorewei po ebriwan
em go sane wan kam po seibe ebribodi.
I gobi wase da elimoning san prom eben go kamap wea yumpla.
79 Em go sane sain prom eben po ebriwan uda stap wea dakples.
Ebriwan uda nogad oup, demwan uda no sabe God ane no pole wei blo em,
em go gaide yumpla wea da rod blo pis.’
80 Da boi Zon i bin gro, ane wen em bin kam man nau, em bin prapa strong wea spirit blo em. Ane da OliSpirit bin gibe em paua. Apta nau, em bin go stap ebritaim wea da dezetples wea i nogad no man, kam raitap nau antil dat taim wen em bin soe emselp po dem pipol blo Izrael.