14
येशुयि आके थु ढोयापयि लाम
1 “खि सम तुकि तु। येशुयि हतिबाला नाइसोङ खे कजसुबायि थोला हिछे किन्दु, ङाहि थोला याङ हिछे कि।
2 ङाहि आकि खिमला त्योएसा लेइराङ होतो। हति च्वरा अर्थात ङाहि खेला नेनाइ, कि खि चाला ङा तोएसा तयार सोरु ढुन होए?
3 तेहि खि चाला तोएसा सोइरे ङा याङ लक्ते होङज्याइ, राङ खेला ङा ङाहि तेहा खेरच्याइ, राङ ङा काँहा होतो, हतिया खे याङ होङान ना।
4 ङा काँहा ढुन, खे हाङ हतिया ढोसि लाम हा:कोङान ना।”
5 थोमायि येशुला नाइसोङ, “हे प्रभु, ख्योए काँहा ढुन, ङेला छ्या होतो, तेहि ङाहि लाम च्हिरु क्याइरे ङोस्येच्याइ?”
6 येशुयि हतिबाला नाइसोङ, “लाम, तेम्बा राङ मिजे ङा राङ ना। ङा ने अर्थात आकि तेहा सुवाङ ढोमिङ्युइबा।
7 खि ङाला ङोस्येस्येबा हिन्ना, ङाहि आके लाङ ङोस्येयिन। ताने ङोस्येयिन राङ खोला थोङसोङ।”
8 फिलिपयि खोला नाइसोङ, “हे प्रभु, ङेला आके तोन होचोम च्युङना ङेला हुन।”
9 येशुयि हतिला नाइसोङ, “फिलिप, झोम भेला थु ङा खे ङ्याबो होतो, हचु हिन्नाङ खि ङाला ङोमास्येसोङ? सुइ ङाला थोथोवा होतो, हति आकेला याङ थोथोवा होतो। ख्होए च्हिरु क्याइरे नाङ्युइ किन, ‘ङेला आके तोन?’ ”
10 ङा आकेला, राङ आके ङाला होतो नाङान च्हि फिलिप ख्योए हिछे मिकिताइ? काङ वचन ङा खेला नेन, हति ङारि आङने नानाइबा माना हिन्नाङ ङाला ताताता आकि लाइ क्याक्याइबा ना।
11 ङाला हिछे कि, कि ङा आकेला होतो, राङ आके ङाला। अर्थात धि लाइ यि चाला हिछे कि।
12 “तेम्बारे, ङा खेला नाज्याइ, सुइ ङाला हिछे किन, हति ङाहि क्याक्याइबि लाइ याङ कि ङ्युइकिन, राङ हतिले याङ लाइ छेया किन, चिचालानाना ङा आकि तेहा ढुनहोए।”
13 खि ङाहि मिनला च्हि लाँना याङ पिजाला आकि छे तेतेका होङ नाइरे ङा हति कि च्याइ।
14 खि ङाहि मिनला च्हि लाँ नाङ हति ङा किच्याइ।
पवित्र आत्मायि ना क्याक्याला
15 “खि ङाला करि क्याक्याइबा हिन नाता ङाहि आदेश तेबा ङ्यानकिन।
16 राङ ङा आकेला स्युवा क्याकच्याइ, राङ ख्युइ खेला स्यान टोइकिङान तेरङान ना, राङ खो खे ङ्याबो बारतै त्योएङान ना।
17 धि तेम्बि आत्मा ना, काङला संसारयि हिना नाइरे खाला मिङ्याना, चिचालानाना संसारयि खोला न त थोङिन न त ङोस्येयिन। खि खोला ङोस्येयिन। चिचालानाना खो खे ङ्याबो तोकिन, राङ खो खे ङ्याबो राङ त्योएङान ना।”
18 “ङा खेला चिक्पा टोकिया मिभोर। ङा खि तेहा याङ होङज्याइ।
19 ता टिझि च्येला संसारयि ङाला नामयाङ थोङान माना ना, हिन्नाङ खि ङाला थोङान ना। ङा सोम्बो होतोति, खे याङ सोम्बो त्योएङान ना।
20 हति ङिन खि हा:कोङान ना, कि ङा ङारि आकेला होतो, राङ खे ङाला, राङ ङा खेला होतो।
21 “ङाला करि किङान हति राङ ना सुला ङाहि आदेश होतो राङ हति खाला ङ्यानकिन। तेहि ङाला करि किङानला ङाहि आकि करि किन। ङा हतिला करि किच्याइ, राङ ङा ङाराङला हतिया थोङदु झ्युक च्याइ।”
22 यहुदा (इस्करियोत माना) ख्युइ नाइरेलो, “प्रभु, ख्युइ च्हि नाइरे, ख्योए ख्योएराङला ङाहि तेहा थोङदु झ्युक च्याइ, राङ संसार तेला मानाइ?”
23 येशुयि हतिला जवाक तेरिन राङ नाइसोङ, “सुइ ङाला करि किन, हति ङाहि वचन ङ्यानकिन, राङ ङाहि आकि हतिला करि किन, राङ हु हति तेहा होङान ना, राङ हति तेहा त्योएङान ना।
24 ङाला करि मिकिङानयि ङाहि वचन खाला मिङ्याना। काङ वचनते खे ङ्यान किन, हति ङाहि माना, हिन्नाङ ङाला चोँङान आकि ना।”
25 “धि ताम ङा खे ङ्याबो होतोला राङ नानाइबाना।
26 हिन्नाङ टोइकिङानते, मदलब पवित्र आत्मा, सुला आकि ङाहि मिनला चोँङान ना, ख्युइ खेला ताम पोरो लोप्ङान ना, राङ ङाहि खेला नानाइबि ताम पोरो याका लोङान ना।”
27 किप्पो ङा खे ङ्याबो राङ पोरते ढोज्याइ। ङा ङारि शान्ति खेला तेरच्याइ। संसारयि पिपिना च्वरा ङा खेला मितेर। खि सम मातु राङ माझि।
28 “ङाहि खेला ‘ङा ढुन होए, राङ खि तेहा होङज्याइ’ नानाइबा खि थोइसोए। खि ङाला करि क्याक्याइबा हिन्ना ङा आकि तेहा ढुन होए नानाइबा थोइरे खे काङान ना, चिचालानाना आके ङाले छेना।
29 ता धि होङज्याइले ताङला राङ ङाहि खेला नाइछारते, राङ तेहि धि जब हुन तेहि खि हिछे ङ्युइयोङ।
30 ङा ता खे ङ्याबो ताम मा मिना, चिचालानाना धि संसारयि क्यालबो हुन्दु। हति ङाहि थोला च्याङ शक्ति मेता।
31 हिन्नाङ ङा आकेला करि किन, राङ च्हिरु आकि ङाला आदेश पिन्दे हति अनुसार राङ किन नाइरे संसारयि हा:कोहोङ। ल्हो, हु धि साने ढो।”