26
अग्रिपासयि धुनला पावल
1 अग्रिपासयि पावलला नाइसोङ, “ख्योएला रेँ छहला नायापयि आङ होतो।” तेहि रेँ लाक्पा क्याङदे पावल राङला क्योपयापला नाला छेलसोङ:
2 “हे क्यालबो अग्रिपास, यहुदिबे ङाला ला क्याक्याइबि दोष पोरोयि भारेला तिरिङ ख्युइ धुनला तिरिङ ङा राङला क्योपयापला नायाप खुँखुँबाला ङा ङारि ङा राङला सोरे होएता ठानि किन होए।”
3 यहुदिबे ताम पोरोयि लुलाम राङ नारे कियाप पोरोला ख्योए खा क्याइरे ङोस्येस्येबाति, ङाहि खुँलुँ सिरिया क्याइरे ङ्यान रो कि नाइरे ङा स्युवा क्याकिन होए।
4 “ङाहि मितेबे उइला राङ यरुश्लेमला ताङलाने राङ बिताइ क्याक्याइबि ङाहि स्यारायि अवस्थाने राङ ङाहि मिजे क्योङ ता यहुदिबाला छ्या होतो।”
5 लेइराङ भेलाने हतिबाला छ्या होएते ताम राङ ना, कि ङाहि धर्मि पोरोले क्योङस्युवा पाटि ङ तुमयि ङाहि फरिसि च्युङदे ङाहि मिजे क्याक्याङा होतो। हतिबे चाहि क्याइना धि तामयि साछि तेर ङ्युइकिन
6 कजसुबायि रेँ ताङबुइ मिला क्याक्याइबि ना क्याक्यालातेला ङाहि आशा पोपोरि चाला तिरिङ ङा धि मुद्दाला लाँलाँबा होए।
7 ङि च्युनङिगार क्यालिक्युइयि धि आशा खुयापला ङिन छान मेता सम चि च्युङदे आराधाना क्याइसोङ, राङ हति आशायि चाला, हे क्यालबो, यहुदिबे ङाला दोष लाइ क्याइसोङ।
8 कजसुबे स्यिस्यियातेबाला सोम्बो सुन नाङन ताम झि खेला चिला हिछे माच्युङसुइ?
9 नासरतयि येशुयि विरोधला लेइराङ कारबाइ किकोइहुन नाङान ङा ङाराङला याङ लेइराङ हिछे होतो।
10 ङाहि यरुश्लेमला हति च्वरा राङ क्याइरे, राङ घोबा पुजारितेबाने आङ खुँरे लेइराङ कजसुबायि मिला ङाहि झ्याल्ला च्युच्युका मात्रा माना, हिन्नाङ हतिबाला सोतितुइना हतिबे विरोधला राङ ङाहि ङारि भोट याङ च्युक्ते।
11 तेहि पोरो यहुदि झोमसि खिमला हतिबाला लोलाइलोलाइ किनकिन ङेबा पिन्दे हतिबाला हिछे तोङयापयि कर याङ क्याइरे। हतिबे विरोधला स्येताङयि ठा खोल्दे फियि भाजरला याङ ङाहि हतिबाला तुरि पिन्दे।
12 “हति च्वरा क्याइरे घोबा पुजारिने आङ राङ आदेश पत्र खुँरे ङा दमस्कसला पुते।
13 हे क्यालबो, ङिमा झाराना माला ङाहि तेङलाने ङिमाले केना साल्बो होए थोङसोङ, काङते ङा राङ ङा ङ्याबो ढुल किङानतेबे फाला छुलो पोरोला होए भारिन त्येतु।
14 जब ङे पोरो साला घेघेला होतो, तेहि हिब्रु क्येला ङाला जु नानाइबा क्ये ङाहि थोइसोङ, ‘शाउल, शाउल, ख्योए ङाला चिला तुरि तेरिन? खापला तोति क्याकितुइना ख्योए राङला आया क्याकिन।’
15 तेहि ङाहि नाइरे, ‘हे प्रभु, ख्योए सु ना?’ प्रभुयि ङाला नाइसोङ, ‘ङा येशु ना, सुला ख्योए तुरि तेरिन्दु।’
16 हिन्नाङ ल्हँ राङ रेँ काङबाला लाँरे त्योए, चिचालानाना ङाला ख्युइ थोथोङा राङ ङाहि ख्योएला तोनयापयि तामयि चाला स्यापच्यि राङ साछि धामङान उदेश्ययि ङा ख्युइ तेहा थोथोङा ना।
17 ङा ख्योएला ख्योए ख्युरि मि राङ यहुदि मान्ते मितेबेने छुटकारा तेर च्याइ, सुइ तेहा ङा ख्योएला चोङज्याइ,
18 कि ख्युइ हतिबे मि फे, राङ हतिबा मुन्नाने होए यहला, राङ तुइयि शक्तिने कजसुबा यहला लहोङ। हति च्वरा क्याइरे तिक्पि माप खुङान ना राङ ङाहि थोला हिछेयि लाम्ला पवित्र आत्मा होएतायि सा हतिबाला लाङ खुङान ना।
19 “हतिचाला हे क्यालबो अग्रिपास, तेङलायि थोङयापयि थोला ङा नानाइबा च्वरा माच्युङसोङ।
20 हिन्नाङ ताङला दमस्कसला, तेहि यरुश्लेमला राङ यहुदिया देश काङ त्योएङानतेबाला, राङ यहुदि मान्ते मितेबाला याङ घ्योप्पा क्याइरे कजसुबा यहला लह राङ रेँ घ्योप्पा क्याक्याइबा चोमयि लाइ कि नाइरे ङाहि टाइक्ये क्याइरे।
21 हतिचाला यहुदिबे ङाला मोनलाम क्यासि खिमला सुङदे सोएयापयि कर क्याइसोङ।
22 तिरिङयि ङिन थु कजसुबाने ङाला रुवा खुँखुँबा होतो। धि छेया छुवा ङिकारला साछि तेरिन ङोन्सेखिलङान राङ मोशायि नानाइबि वचन तेम्बा पुरा होङान ना ताम अर्थात ङाहि स्यान च्याङ नानाइबा मेता।
23 हतिबे नाइसोङ कि ख्रिष्टयि तुरि ङ्योङकोइराङ हुन, राङ स्यिस्यियाने सोम्बो च्युच्युङा ताङस्युवा हिनाति ख्युइ रेँ मि राङ यहुदि मान्ते मितेबाला होएयि घोषाणा किङान ना।”
24 ख्युइ रेँ क्योपयापयि धि तामतेबा नेन ताताताला राङ फेस्तसयि क्ये छेया क्याइरे नाइसोङ। “ए पावल, ख्योए ङ्योमबा हिनाइ, ख्युइ छोइ माहाति ख्योएला ङ्योमबा सोइदु।”
25 हिन्नाङ पावलयि नाइसोङ, “लेइराङ मान्निय फेस्तस, ङा ङ्योमबा माना, हिन्नाङ तेम्बा राङ योदानयि तामतेबा नेन।
26 चिचालानाना क्यालबो खोराङयि धि तामयि भारेला हा:कुन, सुइ धुनला ङा ढुक्क किङगा ताम नेन। चिचालानाना धि तामबा पोरो खोने भाभाइबा मेता, चिचालानाना धि ताम फा:ला क्याक्याइबा माना।
27 क्यालबो अग्रिपास, च्हि ख्युइ ङोन्सेखिलङानबे थोला हिछे किनाइ? ङाला छ्या होतो, ख्योए हिछे किन तोम।”
28 अग्रिपासयि पावलला नाइसोङ, “च्हि टिझि भेलायि चाला ख्योए ङाला ख्रिष्टियान सोसोम होतोइ?”
29 पावलयि जवाक पिन्सोङ, “टिझिला होस याङ महाला धि च्यालताबा ताङदे, ख्योए मात्रा माना हिन्नाङ तिरिङ ङाहि ताम ङ्यानङानबा पोरो ङा च्वरा होङवार सअ नाइरे ङा कजसुबाला मोनलाम क्याकच्याइ।”
30 तेहि क्यालबो, हाकिम, बरनिकि राङ हतिया होएता पोरो लाँसोङ।
31 तेहि हतिबा थोन्छारते च्येला रेँ नाङला जु नेन राङ ताम नाला छेलसोङ, “धि मिला सोएयापयि ङेबा अथवा कैदला ढोयापयि माफिकयि च्याङ लाइ माक्याइबा।”
32 अग्रिपासयि फेस्तसला नाइसोङ, “धि कैसरयि तेहा स्युवा माक्याइबा नाना त धि मिला ताङनाङ हुवा।”