6
Natetenged Tung Mga Pasais Ang Dapat Usuyun Yang Mga Tumatalig Ang Mga Kirepen (6:1-2)
1 Kung natetenged tung mga tumatalig asan ang binuat dang mga kirepen, kaministiran ang yang pagpabetang nira tung mga ag̱alen nira bag̱ay ang garalangen nira ta ustu. Ay kung alimbawa indi galangen nira, asan da nga durug̱as yang kadengeg̱an yang Dios pati yang nag̱itulduk ta natetenged tung ni Jesu-Cristo, ya ka.
2 Yang may mga ag̱alen nirang mga tumatalig ka, dapat ang indi maglaum ang kumus magputul da tanira tung ni Ginuu ta, anda ray baling indi ra manggalang ta matinlu. Kung indi, dapat ngani ang yay pagpakirepenan nira ta mas pang maderep kay tung sasang ag̱alen ang belag̱an tumatalig. Ay kipurki yang ag̱alen nirang atiang pagpakinaw̱ang tung panirbian nira sasang masigkatumatalig nirang maal nira.
Kapurisu yang mga nag̱iurdinung atia tung nuyu, itulduk mu tung mga kaputulan ta asan ang nunut da ka ta pagpaktel mu tung mga isip nirang magtuman.
Yang Nag̱ipagpaaman Na Si Sigun Tung Mga Manigtulduk Ta Kabuklian (6:3-11)
3-4 Kung tinu pa asan ay pagturuldukun ta balaw̱ag tung kamatuuran, indi kang lag̱ing pagpauyun tung ipinagtulduk ni Ginuu tang Jesu-Cristong yay pulidung pisan. Pati yang nag̱itulduk ta ang asan da ngaeyangay yang mga putul ta ta ipag̱usuy nirang ustu tung kalelyag̱an yang Dios, indi ka nira risibien. Yang taung maning tia, yang kulu na masyadu ra yang pagdakul na. Kanisip na tanya mataku, piru anda enged ay naerem na tung kamatuuran. Masyadug kaginamenen tung pakigsug̱a nang pagpakigdiskusiun natetenged tung duma-rumang bitala kung unu pay nag̱adapatan nira. Anday dumang dangaten na, tanya pati yang pamati tung anya, asan da mamagluang marainggit, mapinagsuay, mapinagduminar, ig masyadung mag̱erena-enaen ta malain tung masigkatau nira.
5 Anday katapusan yang pagpakigkuntra nira. Ay ya pa ag̱ari, nagkadiw̱ul da yang kinaisipan nira ig nawaraan da ka ta ipag̱intindi nirang ustu tung kamatuuran. Yang pagturuldukun nira ya ra ka ilem ay panielan nirang pagpaseen ang tanira pag̱usuy tung kalelyag̱an yang Dios buat. Kalaum nira ang yay sasa kang mabintaan nirang mangita.
6 Matuud ka man ang durug kabintaa ang ita mag̱usuy tung kalelyag̱an yang Dios basta kuntintu tung isip ta yang kumpurming nag̱ipakdul na tung yaten.
7 Tutal atiing pag̱ingtau ta taa tung kaliw̱utan ang naa, andang pisan ay ekel ta ig kung manliitita ra nganing, anda ka.
8 Mintras taawita pa, basta may mapangan ta, may pag̱aw̱el ta, may matiniran ta, asanita ra ilem nga kuntintu.
9 Yang mga taung mga maning tiang durung kalelyag nirang magmanggad, indi maimung indi matuksung magbuat ta kasalanan. Anday dumang pakaw̱utun na, katulad tung sasang ayep ang nasied dang indi ra mapuklut, indi ra ka mapuklut tung pagburuaten nira ta kasalanan. Ay dereeg̱en da ta sari-saring kalelyag̱an nira tung mga bag̱ay ang anday kuinta ig ikarangga ka ilem nira ang asan da ka nga gakday nira ta pinitinsia.
10 Talagang matuud tia ay kipurki naang kaamluk tung kuarta, yay pinangapunglan ta sari-saring mga malalain ang pagburuaten ta mga tau. Yang dumang mga tumatalig, kumus indi ra temegka ang indi nira ra maeklan yang nag̱atingwa nira, duun da natalang tung kamatuuran ang asta indi ra pag̱usuy. Purisu belag̱an da ilem gesye yang kunsimisiun ang nag̱agmaan nira.
Yang Pagpaktel Na Tung Isip Ni Timoteo Ang Magtuman Yang Tanan Ang Nag̱iurdin Na (6:11-17)
11 Piru ta yawang panirbian da tung Dios, ya rag lilingay mu yang pag̱amluk ta kuarta may yang tanan ang pag̱urubraen ta mga malalain ang asan maniel. Kung indi, yang sikaren mung paderepan ang yawa pirming magbuat yang magkatama, pirmi kang bilug yang isip mu tung nag̱auyunan yang Dios, ig pirmi kang mabaked yang pagtaralig̱en mu tung anya. Asta yang mga kaarumanan mu, gegmaan mu ka ta ustu ang durua kag kaamumu tung nira. Patentenen mu ka yang isip mung mag̱agwanta tung mga kaliwag̱an ang mapasaran mu.
12 Maskin maliwag ka man yang magpasaran mu, belag yawag pagpaluntug, yawag pagprusigir ka enged ang pagkereng ta ustu tung kamatuuran ang naang nag̱apananged ta. Magpaitaa ang ta yawa may pagpangabui mu rang baklung klasi ang uyun tung kalelyag̱an yang Dios ang ya ra kay pagnatisan mung asta tung sampa. Ya ra kang lag̱i ay katuyuan nang nagbeteng tung isip mu atiing primirung pagtalig mu. Ang pagkatapus yang pagtalig mung atii tung ni Jesu-Cristo, ya ra kay pinapruibaan mu tung katalungaan yang dakeleng mga taung nangasistigus atiing pag̱ubligar mung tedek ang pisan tung isip mu ang anda ray dumang may kalalangan tung nuyu, ultimu ra ilem ti Ginuung Jesu-Cristo.
13 Numaan, Timoteo, nag̱aingalukana ra yeen ang magpangakua ra tung katalungaan mismu yang Dios ang yay pagpakdul yang kabui mu, durua ni Jesu-Cristo ang atiing pagpabista na tung ni Gubirnadur Poncio Pilato, indi nagpatalaw ang nagpaingmatuud tung anya natetenged tung pagkabetang na, maskin ya ray puiding magakdan na ta malain.
14 Yang pangakuan mu tung anya ang yawa magtumana ra ta pulidu yang tanan ang atiang nag̱iurdinu ang napabtang tung sulat ang atia ang andang pisan ay mabangdan tung nuyu ang asta ra ilem kaw̱utun da yang uras ang magpaita ra ka enged ti Ginuu tang Jesu-Cristo.
15-16 Anday dumang magpabistu tung anya tung uras ang may tipu na kang lag̱i, kung indi, ya ra yang Ampuan tang Dios.
Yay may kasadyaan na kang lag̱ing andang pisan ay pagkakulang na,
Ultimu ilem tanyay makagag̱aem tung tanan,
Yay may kagaeman tung tanan ang paggaem,
Yay may kalalangan tung tanan ang pagkalalangan,
Ultimu ilem tanya ang indig suituen ta kamatayen,
Yang pag̱atiniran na durung pisan agkasusulaw ang inding pisan malengtan ta tau,
Andang pisan ay taung naita tung pirsunal na,
Anda kay taung masarang ang mag̱agwantang magteleng tung anya,
Purisu magkabag̱ay ang pisan tung pagkadios na ang yay dayawen tang asta tung sampa,
Bag̱ay kang pisan tung anyang maggaraemen ang anda enged ang pisan ay katapus-tapusan na.
Magkamaningan da ka man tia!
Yang Dapat Ang Ipagpadapat Ni Timoteo Tung Mga Tumatalig Ang Mga Manggaranen (6:17-19)
17 Kung natetenged tung mga tumatalig ang mga manggaranen asan, paamanen mu ang indi enged magralamkuen tung mga kaarumanan nira. Indi ka enged panalig̱an nira yang manggad nirang kalpes da ka ilem ang maplek, kung indi, dapat ang anday dumang pag̱ineteg̱an enged yang mga isip nira, ultimu ra ilem yang Dios ang yay durug kasalama. Kumpurming unu pay nag̱abtang tung pudir ta, ya ray ipinakdul na tung yaten ug̱ud asanita ra ka nga sadyaay.
18 Panganingen mu ka ang yang paderepan nira, ya ra yang mga ubra-ubrang ikaayen ta duma may ruma. Bilang mag̱ing manggaranen da tung mga pag̱urubraen ang matitinlu ang tanira durug kasalamang mamarti-parti tung mga kaarumanan nirang may mga kaministiran.
19 Kipurki yang kaalimbawaan yang mga pag̱urubraen nirang mga maning tia, ya ra yang ultimung manggad ang maning pa tung nag̱iluug nira ang ya ray mabaked ang panielan nira tung uras ang panalungaan ug̱ud asan da nga bag̱asay nirang mas pa yang ultimung klasi ta pagpangabui ang uyun ang pisan tung pinalanu yang Dios.
Yang Ultimung Nag̱ipatuman Ni Pablo Tung Ni Timoteo Ang Ya Enged Ay Pinakaisi Yang Intirung Isinulat Na (6:20-21a)
20 Buinu Timoteo, kumus pinagpiarana ra ka man yang Dios ang magparakaw̱utun yang kamatuuran natetenged tung ni Jesu-Cristo, amlig̱an mung pirmi ang saktung pisan tung pinag̱aralan mung atiing primiru ang para indi enged malaktan ta dumang nag̱itulduk. Likayan mu enged yang nag̱itulduk yang duma ang yang kamtangan na pangkaliw̱utan ka ilem ang anda enged ay kakuinta-kuinta na. Ya ray nag̱agamit yang dumang pagpakigkuntra tung kamatuuran ang duun ag̱ipatielay nira tung pagkamatakung naeklan nira tung sikritu ang indi unu nag̱askean ta kadaklan.
21 Ay kipurki may duma nganing ang pagpailala ra ang yang pagkamatakung atia ya ray nag̱usuyun nira ang pagkatapus duun da natalang tung ultimung kamatuuran ang pinananged da rin nira.
Yang Pagtapusan Yang Sulat (6:21b)
Kapurisu, Timoteo, yang nag̱ipag̱ampuu para tung numyung tanan ang mga tumatalig asan ang mas pang maispirinsiaan mi yang kaneeman yang Dios ang pagpadag̱en-dag̱en tung numyu.
Ya ra ilem tia ay masulatu tung nuyu,
Pablo