4
Natetenged Tung Ni Abraham Kung Ya Pa Ag̱aring Nausgaran Da Yang Dios Ang Salu Rang Pisan Tung Pagterelengen Na (4:1-8)
1 Abir, pademdeman ta ra kanay ti apung Abraham ang kinaampu yamen ang mga Judio kung ya pa ag̱aring inusgaran yang Dios ang salu rang pisan tung pagterelengen na.
2 Kipurki kung alimbawa tanya inusgaran yang Dios ta maning tia natetenged tung pagburuaten nang matitinlu, intunsis puidi ka rin ang yay ipagpabug̱al na tung mga kaarumanan na, piru tung Dios indi ra ka enged mapuidi tii.
3 Kipurki pademdeman ta ra kanay yang sasang napabtang tung kasulatan ang mag̱aning,
“Ti Abraham nagtalig da tung Dios ang magkereng tung sasang pinangakuan na tung anya, ig natetenged ilem tung pagtalig nang atii, asan da tanya ngaipabtangay yang Dios ang salu rang pisan tung pagterelengen na,” ag̱aaning.
4 Ipabetangu ra kanay tung sasang pananglit. Yang sasang taung pagpatenged, yang suul na, belag̱an kang mag̱aning ang ya ra ka ilem ag̱ipakdulay ta diw̱aldi tung anya, kung indi, ya ray pinatengeran nang nag̱ubra. Yang pisan yang kaalimbawaan yang sasang taung pagbuat ta matinlu ang para tung paglaum na asan da tanya ngausgaray yang Dios. Kung asan din ngausgaray yang Dios ang salu ra, yang pag̱usgad nang atia belag̱an kang mag̱aning ang pakdul na ka ilem ta diw̱aldi tung anya, kung indi, ya ra ka rin ay maning pa tung pinatengeran nang nagbuat ta matinlu.
5 Piru yang taung anday nag̱atalig̱an na tung sadiling pag̱urubraen na ang para asan da rin ngausgaray yang Dios ang salu ra, kung indi, pagtalig da ilem ang bug̱us tung Dios ang yay pag̱usgad tung sasang taung malalain ang salu rang pisan tung pagterelengen na, yang pag̱usgad nang atia tung anya natetenged ilem tung pagtalig na, belag̱an ang mag̱aning ang ya ray maning pa tung sasang pinatengeran na, kung indi, ya ra ka ilem ag̱ipakdulay yang Dios ta diw̱aldi tung anya.
6 Yang bag̱ay ang naa, yang pisan ay nag̱adapatan yang sasang inaning ni Adi David nun tukaw atiing pagkasambit na yang kasadyaan yang sasang tau ang inusgaran da yang Dios ang salu rang pisan, ang yang pag̱usgad na ta maning tia tung anya, andang pisan ay kalalabten yang pagburuaten na yang matitinlu.
7 Kipurki ya ra taa yang inaning nang atii:
“Durung pisan agkatinlu yang nag̱abtangan yang mga taung kumpurming pinatawad da yang Dios tung mga paglalampasen nira tung mga katuw̱ulan na, ang yang mga kasalanan nira linipatan na ra.
8 Talagang durung pisan agkatinlu yang nag̱abtangan yang mga tau ang yang mga kasalanan nira, indi ra nag̱idata yang Dios tung nira,” mag̱aning.
Yang Kasadyaan Ta Sasang Taung Inusgaran Da Yang Dios Ta Maning Tia Puidi Kang Malg̱uran Ta Belag̱an Mga Judio (4:9-12)
9 Yang katinluan ang atiang nabtangan nira, teed ilem basu tung yaten ang mga Judio ang pulus binuatan ta tanda tung mga tinanguni ta? Belag̱an ilem ita, kung indi, pati yang belag̱an mga Judio ang anda kang lag̱i ay tandang binuat tung mga tinanguni nira, lug̱ud da ka asan. Kipurki magpauyunitang tanan siguru tung sasang sinambit tung kasulatan ang natetenged ilem unu tung pagtalig ni Abraham tung Dios, asan da unu ngaipabtangay nang salu rang pisan tung pagterelengen na.
10 Sanu pa w̱asu ngausgaray na ta maning tia? Atiing tanya indi pa nag̱apabuatan ta tanda tung tinanguni na u atiing pinabuatan da? Simpri atiing tanya indi pa nag̱apabuatan.
11 Pagkatapus tung pira pang takun baklu ra lalangay yang Dios ang yang tinanguni na pabuatan da ta tanda. Atia yay sasang sinyalis ilem ang tanya inusgaran da ka man ang lag̱i yang Dios ang salung pisan natetenged ilem tung pagtalig nang bug̱us tung anya. Yang uras ang atii, anda pa nganing ay tandang binuat tung tinanguni na. Yang linuaan na, duun da tanya nagyaring pinamuaran yang tanan ang may pagtalig da ka nira tung Dios ang katulad ka tung pagtalig na ang asan da ka inusgaran nang salu ra maskin anday tandang binuat tung tinanguni na.
12 Belag̱an ilem tanirang anday tanda ay pinamuaran na, kung indi, pati yang may mga tanda ang simanyan belag dang yay panalig̱an nira, kung indi, nagtalig da yang mga sadili nirang bug̱us tung ni Jesu-Cristo ang asan da ka nasug̱ut tung ni Abraham ang kinaampu nira ang yay tukaw ang nagtalig yang sadili nang bug̱us tung Dios, atiing indi pa nganing nag̱apabuatan ta tanda.
Nag̱aulit Na Yang Primirung Katadlengan Na May Yang Yadwa Ang Ya Ray Nag̱ipapanaw Na Tung Dumang Pametang-betang Ta Bitala (4:13-17a)
13 Nag̱askean tang may sasang pinangakuan yang Dios tung ni Abraham ang tung kauri-urian tanya pati yang kumpurming masug̱ut tung pagtalig na yay papaggaemen na tung bilug ang kaliw̱utan. Piru yang ipagkereng yang Dios tung pinangakuan nang atii belag̱an natetenged tung pagturumanen ni Abraham yang mga katuw̱ulan, kung indi, natetenged ilem tung pagtalig nang bug̱us tung anyang talagang magkereng tung pinangakuan na ang duun da tanya ngausgaray nang salu ra.
14 Kipurki kung alimbawa yang pakdulan yang Dios yang pinangakuan nang atii, ya ra ilem yang mga taung pagtuman yang mga katuw̱ulan ang ibinutwan ni Moises, ig disir, anda ka rin ay kapulutan yang pagtalig tang naa tung ni Jesu-Cristo. Pati yang pinangakuan yang Dios tung yaten, anda ka rin ay pakaw̱utun na.
15 Talagang andang pisan ay kalalabten yang pagturumanen ta yang mga katuw̱ulan tung pinangakuan yang Dios ang atii. Ay yang kaaw̱ay yang mga katuw̱ulan parusa. Kung anda galang ay mga katuw̱ulan ang nag̱ipatuman tung yaten ang mga tau, anda ka rin ay malampasan ta, indiita ka rin maparusaan yang Dios.
16 Purisu ya ray natengeran na ang tung pagtalig ta ilem yang mga sadili ta tung ni Jesu-Cristo duunita ra nga pakdulay yang Dios yang kalibrian ang pinangakuan na. Ya ray papanaw na ug̱ud anday dumang patielan nang mag̱usgad tung yaten ta maning tia, kung indi, sulaminti ilem yang kaildaw nang durung pisan agkabew̱ereng ang andang pisan ay natengeran na tung pagturumanen ta. Purisu yang luluaan na, sigurista rang ipakdul yang Dios yang pinangakuan na tung tanan ang mga taung kumpurming masug̱ut tung pagtalig ni Abraham. Yang pamakdulan na belag̱an ilem yang mga tumatalig ang mga Judio ang may surublien nirang mga katuw̱ulan, kung indi, pati yang belag̱an mga Judiong kumpurming pagtalig da ka tung ni Jesu-Cristo ang katulad ka tung pagtalig ni Abraham tung Dios atiing tukaw ang duun da ka man nagyaring pinamuaran tang tanan ang mga tumatalig, maskin unu pang nasyunay.
17 Yang pagbakeran yang inaningung atia, ya ra yang sasang pinangakuan yang Dios tung ni Abraham ang yang ipinagpilik na unu tung anya ay ug̱ud tanya ra unu ay mamuad tung dakeleng mga nasyun.
Yang Primirung Katadlengan Na Nag̱abalikan Nang Nag̱ipapanaw Tung Dumang Palaksu (4:17b-22)
Yang pinangakuan nang atii, durug baked natetenged tung pagkapiadur yang Dios ang napanalig̱an ni Abraham. Ay yay may kagaeman ang magpabui si kang uman tung mga taung nagkarapatay ra ig ya kay pagkalalangan tung indi pa nag̱aeyang ang meyang da.
18 Ti Abraham tanya, maskin midyu anda ra ka rin ay elatan na, nagpadayun da ka enged yang pagtaralig̱en na tung Dios ang nagpakisew̱at ka enged ang tanya mamuad da ka man tung dakeleng mga nasyun ang katulad kang pisan tung pinangakuan yang Dios tung anya ang yang kinadaramelen unu yang mga kanubli na manulad unu tung mga dumakel ang indi ra mabilang-bilang.
19 Atii kanay, kung mademdeman na yang sadiling tinanguni na ang midyu tung patay rang lag̱i sigun ka man tung idad nang mga sanggatus dang takun, pati yang pagkabawas yang kasawa nang ti Sara, belag̱an ang yay pinanluw̱ayan yang pagtaralig̱en na.
20 Belag ya magdua-dua yang isip na ang muya indi ra kegngan yang Dios yang pinangakuan nang atia tung anya, kung indi, ya magbaked yang pagtalig nang ya rag pasalamatay na kang lag̱i tung anya yang sasang ubraen na tung anya.
21 Ay nag̱asiguru na ra ka enged ang pisan ang yang pinangakuan yang Dios ang atia tung anya, talagang kayanan na ka enged ang kegngan.
22 Kapurisu napabtang da ka man tung kasulatan ang natetenged unu tung pagtalig nang atii tung Dios duun da unu ngausgaray nang salu rang pisan tung pagterelengen na.
Nag̱apabilug Na Yang Natetenged Tung Pagtaralig̱en Ni Abraham Kung Unu Pay Linagpakan Na Tung Nirang Tanan (4:23-25)
23-24 Kung papagbilug̱unu ra yang gustuung ianing, yang mga bitalang atiing isinulat natetenged tung pagtalig ni Abraham ang tanya unu duun da ngaipabtangay yang Dios ang salu rang pisan tung pagterelengen na, belag̱an da ilem tung anya nga dapat, kung indi, may nag̱adapatan na ka tung yaten simanyan ang para ya ray pagbakeran yang mga isip tang kumpurming usgaran da ka yang Dios tung maning ka tia. Bilang isinulat para tung yaten ang kumpurming pagtalig yang mga sadili ta tung Dios ang yay nagpabui si kang uman tung ni Ginuu tang Jesus.
25 Tanya ya iintrigaay na tung pudir yang mga tau ang para ipaimatay nira ang anday dumang natengeran na, kung indi, ya ra yang nagkarabuat tang malalain. Pagkatapus binui na si kang uman natetenged gustu nang duun da magpailala tung yaten ang mga tau ang yang pagpakugmatay ni Jesus ang atii rinisibi na ra ang pagkatapus ya ra kay nag̱apatielan nang mag̱usgad tung yaten ang saluita rang pisan tung pagterelengen na.