3
Tanirang Mga Baw̱ay Dapat Ang Magparanek Tung Mga Kasawa Nira (3:1-6)
1 Ta yamung mga baw̱ay, katulad ka tung nag̱aingaluku nungayna, kaministiran magparanekamu kang pirmi tung mga kasawa mi. Ya ray dapat ang buaten mi ug̱ud maskin yang duma tung nira pagpakuindi ka man tung Matinlung Balita, maskin indi mi tag̱aman ang paintindien, asan da ilem tung mga ug̱ali ming matitinlu manlatay yang mga isip nira ang asta mananged da ka enged ang magtalig.
2 Puiding ya ray mainabu kung maita ra nganing nira ang paggalangamu ta ustu tung nira ig pulus tung matinlu yang mga ubra-ubra ming mga kasawa nira.
3 Luminus ilem ang tung sagpaw ka ilem yang pagpatinlu mi tung mga sadili ming yag bistuay ang katulad ka tung dumang pamusturang subra tung mga bua nira ubin tung pagsuruutun nira ta mga alaas ang mga bulawan ubin mga aw̱el ang mga matitinlu.
4 Kung indi, yang dapat ang papusturaen mi ta mupia ya ra yang tung adalem ang indi nag̱aita, bilang yang nag̱abtang tung mga pupusukun mi ang asan nga mamaladmaray nira tung pagkaamumu mi may tung pagpakalimeng mi ay tia durung pisan agkamaal tung pagterelengen yang Dios. Atia yay kapusturaan ang andang pisan ay kalew̱ad-lew̱aran nang asta tung sampa.
5 Kipurki maning kang pisan tia yang pagpurusturaen yang mga baw̱ay ta namagtukaw ang panimpu ang pirming nagparanek tung mga kasawa nira. Ay bilug yang mga isip nira tung kalelyag̱an yang Dios ang ultimu ilem tanya ay pinag̱ineteg̱an yang mga isip nira.
6 Pariu ra duun tung ni Sara ang pirming nagpananged tung ni Abraham ang kasawa na ang ya ra ag̱aningay nang ag̱alen na. Puidiamu kang aningen ang irinsia na kung masug̱ut mi ka yang ug̱ali nang pagbuat yang matitinlu ig kung indiamu ra ka magpataranta tung maskin unu pang bag̱ayay.
Tanirang Mga Lalii Dapat Kang Mag̱istimar Ta Maayen Tung Mga Kasawa Nira (3:7)
7 Pati yamu kang mga lalii, yang pagkarasawaen ming magkasawa, dapat ang intindien mi yang pagkabetang nirang maluw̱ay ta puirsa kay tung numyu. Pademdeman mi ka ang pati tanira pinaitaan da ka yang Dios yang kaneeman nang tinapnay ang tung uri kasiraanamu ra kang magpakigsapen tung anyang asta tung sampang anday katapus-tapusan. Purisu istimaren ming galangen ta maayen ug̱ud anda ray pagsangkelan yang pag̱arampuen ming magkasawa.
Yang Nag̱aingaluk Na Tung Nira Rang Tanan (3:8-12)
8 Numanyan kung papagbilug̱unu ra yang gustuung ipatuman tung numyu, maning taa. Kaministiran magsarasaanamu rang pirmi ta kinaisipan may kinaisipan, maggeregmaanamu kang magpurutul, magparasunaid-sunairanamu kang mag̱irildaw-ildawan, ig magpararanekanamu.
9 Indiamu enged mangimalesan tung nagbuat ta malain tung numyu. Indiamu ka mag̱insultu tung nag̱insultu tung numyu. Kung indi, anday dumang ibles mi tung nira, ya ingalukay mi tung Dios ang pakaayenen na ta mupia natetenged ya ra ka man ay ipinagbeteng na tung isip mi atiing primiru ang ya ray buaten mi tung mga masigkatau mi ug̱ud asanamu ra ka nga pakaayenay na.
10-12 Talagang impurtanting usuyun mi yang mga ug̱aling mga maning tia ay kipurki may sasang bitala yang Dios ang napabtang tung kasulatan ang maning kang pisan tia yang rumbu na. Mag̱aning,
“Kung tinu pay nag̱alelyag ang magpakasadya taa tung kaliw̱utan
Ang pagkatapus gustu na kang magtinlu yang pagkabetang na,
Tay puis yang nganga na suspindien na tung pagbiw̱italaen na yang mga malalain
Ig indi ra ka magbukli.
Kaministiran kang panalyuran na ra yang tanan ang pagburuaten nang malalain ang para magbuat da ta matitinlu.
Yang paawatan na enged ang sikaren, ang mag̱uruyunan tanira yang mga kaarumanan na tung matinlu.
Kipurki yang nag̱abantayan yang Dios ta mupiang ag̱asikasuen, ya ra yang mga taung pagbuat yang magkatama.
Pirmi na kang agpamatien yang pag̱arampuen nira tung anya.
Piru kung tinu pay pagbuat ta malalain, ya ray kuntraen na,” mag̱aning.
Kaministiran Ang Mamagbuat Ta Matitinlu Maskin Mapasaran Ta Patigbak Ang Katulad Ka Tung Ni Jesu-Cristo (3:13-17)
13 Kung maderepamung magbuat ta matitinlu, indiamu unyen pa yang kadaklan ang mga tau.
14 Piru maskin tigbakenamu pa ka enged natetenged tung pagburuaten mi yang magkatama, durug katinlu yang nag̱abtangan mi. Indiamu ilem mag̱eled tung pagpapinitinsia tung numyu, indiamu ra ka magpataranta.
15 Kung indi, pirming demdemen mi ang ti Jesu-Cristo yay Ginuu ming may kagaeman nang pinakaabwat tung tanan. Pirmiamu ra kang riparasiun ang manuw̱al tung kumpurming magtalimaan tung numyu kung ayw̱at nag̱asiguru mi rang lag̱i ang nag̱aelatanamu ra yang Dios ta sasang kaayenan ang inding pisan mapasiring-siringan.
16 Ug̱aring ilem, kung tumuw̱alamu ra nganing tung nira, kaministiran ang eklan mi tung pulus luay-luay ilem ang pagturuw̱alen ang may pagkaamumu mi ang indiamu ra ka maplekan ta ipanggalang mi ta mupia tung pagtalimaan. Dapat kang anday malain ang ipag̱imasul tung numyu yang mga painu-inu mi ug̱ud kung ay pa tiing agsawayenamu ta duma, duun da ka maeyak yang pagsaway kung maita na ra nganing yang mga pagburuaten ming matitinlu ang ya ray nag̱abuat mi natetenged tung pagkarapulitan mi ni Jesu-Cristo.
17 Kipurki maayen pa ang yang pagburuaten mi yang matitinlu ya pay magakdan mi ta patigbak kung yay lug̱ud tung planu yang Dios tung numyu. Indi ilem ang tigbakenamu natetenged tung binuatan ming malalain.
Kung Ayw̱at Magkabag̱ay Ang Mamagbuat Ta Matitinlu, Maskin Ya Pay Magakdan Nira Ta Patigbak (3:18-22)
18 Ag̱aningenamu ra yeen ta maning tia ay maskin nganing ti Jesu-Cristo pinasaran ta patigbak ang tung minsa ilem nagpakugmatay natetenged ilem tung mga kasalanan ang nagkarabuat ta. Bilang tanyang matinumanen tung kalelyag̱an yang Dios, ya pay pinasaran ta pinitinsiang durug lebat para tung yaten ang malinampasen. Ya ray pinasaran na ug̱ud asanita ra mapaulik na tung Dios ang pinagpaalawiran ta.
Tanya inimatay ra ka man ang ya ray pagtapus yang kabui na taa, piru binui si ka enged ang uman yang Dios ang yang kabui na baklu rang klasi.
19 Pagkabui na si kang uman, dayun dang minangay duun tung mga angil ang yag kukulung ang para ibalita na tung nira ang ekel tung pagkabui na si kang uman, tanira napabtang da tung tarampakan yang kakay na ang tung uri sintinsiaan na ra ka enged tung kalainan ang anday katapusan na.
20 Yang mga angil ang atii, ya ra yang namagbatuk tung Dios atiing tukaw pang timpu pa ni Noe atiing durung pagparurus yang Dios ang pag̱elat tung mga tau ang basi pa ra ilem mamanligna ra tung mga ubra-ubra nirang atiing durung pisan agkalalain. Ya ray uras ang nag̱ipagbuat pa na Noe yang arka ang atiing tapus da, ya ray sinaayan ta pira pa ilem ang bilug ang para mangalibri tung palempan, bilang walu ilem nga tauan.
21 Taa numanyan yang pagtapnay yang Dios tung nira tung palempan ang atii, yay gustuung ipananglitu tung palaksu yang pagtapnay na simanyan tung numyu ang ya ra ka man ay pinananglitan ming nagpabenyag. Ay yang nadapatan na tia, belag̱an ang mag̱aning ang may apiktar na tung mga sadili mi ang buat na pa asan da nakuat yang buling tung mga tinanguni mi ubin asanamu ra ka nga punasay yang Dios tung mga kasalanan mi. Kung indi, asanamu ra nagpailala ang anda rang pisan ay barasulun yang mga painu-inu mi gated atiing pag̱ingaluk mi ta kapatawaran tung Dios, pinatawaramu ra kang lag̱ing anyang pinanusan ang yang kaalimbawaan na, maning pa tung nagkasira-siraanamu ra ka ni Jesu-Cristong nagbungkaras atiing pagpabui si kang uman yang Dios tung anya.
22 Simanyan tanyang nabui si kang uman duun dag kakarung tung tepad yang Dios ampir tung tuu na ang kasiraan da ka tanirang pamaggaraemen. Ay atiing pagpaabwat na duun tung langit, ipinabtang da yang Dios tung pudir na yang tanan ang kinalasi-kalasi ta mga taung indi nag̱aita ang may nira-nirang mga kagaeman.