☰ 1 Corinto 9
9
Nag̱ipag̱isplikar Ni Pablo Kung Ayw̱at Indi Na Rag Sikaren Yang Rasun Nang Magpasuitu Tung Mga Kaputulan (9:1-18)
1 Kung natetenged tung pagparatug̱ayenu tung rasunu ta maning tia*, kung tung bag̱ay, maskin indi ra ipatug̱ayu yang rasunu, puidi ka rin sigun ka man tung pagkaapustulu. Ay yuu talagang apustulaw ni Ginuu tang Jesu-Cristo gated naitaw ra ka man yang pirsunal na mismu. Pati yamu nganing ang pagtalig da tung anya, yamu maning pa tung sasang burak yang pagkaapustulu tung anya†. 2 Maskin indiaw ka man ag̱ilalaen ta duma ang yuu sasang apustul, piru ta yamu, nag̱ailalaw ra numyu ang yay pagkabetangu. Kipurki yamu mismung sam pundaan asan yay sasang pruibang durug kasanag ang yuu talagang apustulaw anyang matuud gated atiing asanaw pa tung numyu, pinaktelaw ra anyang nagparakaw̱utun tung numyu ang asta nagtalig̱amu ra yang mga sadili mi tung ni Ginuung Jesus ang nagpatapnay.
3 Buinu, ya ra taa yang nag̱ipanuw̱alu tung kumpurming pagdiskumpiar tung yeen ang yuu unu belag̱anaw matuud ang apustul ni Ginuung Jesus. 4 Ayw̱a, anda kay rasunung magpasuitu tung mga kaputulan? Kung tung bag̱ay, maskin yuu, may rasunu ka rin ang magpasuitu tung mga kaputulan. 5 Kung alimbawa, may kasawaw ka rin bilang sasang putulu tung ni Ginuu ta, belag bang may rasunung panuntunu duruami rang magpasuitu ang katulad ka tung pag̱abuat yang kadaklan ang mga apustul may yang mga putul ni Ginuu ta pati nganing ti Pedro‡? 6 Ayw̱a, yami ilem ni Bernabe ang anday rasun yamen ang imbis mandilemami yang pagpangabui yamen, magpasuituami ra ilem tung mga kaputulan sigun tung pagkaapustul yamen§? 7 Tinu pay nag̱aintindian ming sundalung pagsuitu tung sadili na? Tinu pang manigluakay ang indi magpakinaw̱ang tung pruduktu yang mga luak na? Tinu pang manigkamataay ta ayep ang indi manginem yang gatas yang mga ayep ang pag̱akamataan na? 8 Yang nag̱ianingung atia, belag̱an ilem sadiling upinyunu. Belag bang nag̱asambit ka tung sasang katuw̱ulan yang Dios? 9 Kipurki may sasang nabtang tung mga katuw̱ulan ang isinulat ni Moises ang kung may baka unung pag̱apageyek, indi unu pugsungan*. Ta, yang gustu nang ianing tia, yang pagkabetang yang mga baka ya enged ay nag̱amaal yang Dios? 10 Belag, kung indi, ipinasulat na nganing tia ang para ikaayen ta kang mga tau. Kipurki telengan mi ra ilem. Kung mag̱aradu ra nganing yang sasang manig̱aradu, kung mangayeg da nganing yang sasang manig̱ayeg, simpri may nag̱aelatan nirang kaparti nira tung patebas natetenged tung inubraan nira. 11 Katulad ka tung yamen, yang kaalimbawaan yamen, maning pa tung mga manigtakbul ta binik ang anday dumang itinakbul yamen asan tung numyu ya ra yang Matinlung Balita. Numanyan ang may pruduktu na ra yang pinakabedlayan yamen, belag̱an magkabag̱ay w̱asu ang yami maning pa tung mangayeg̱ami kang magpasuitu tung numyu? 12 Kung yang duma ngani may rasun nirang magpasuitu tung numyu, belag yami mas pang may rasun?
Piru maskin nag̱apangatadlenganaw ra ta maning tia, indiami ra ka enged pagsikad yang rasun yamen ang atia. Kung indi, pag̱agwantaami ra ilem tung tanan ang mga kaliwag̱an ug̱ud andang pisan ay maita tung yamen ang sarang mapadatelan ta duma may ruma ang muya ya ray pag̱enteran yang mga isip nirang mag̱intindi tung Matinlung Balita natetenged tung ni Jesu-Cristo†. 13 Simpri nag̱askean mi ra ka ang yang mga paring mga Judiong pamanirbian duun tung pagtuuan ang pinakalusu, duun da ka ilem tung pag̱urubraen nira agpangkelay nira yang pangabuian nira. Bilang duun tung may midyu lamisaan ang darasag̱an nira ta mga ayep, duun da ka ilem agpamagpaparti tung karni‡. 14 Maning ka tia yang palaksu yang tuyun ni Ginuu ta natetenged tung mga manigparakaw̱utun yang Matinlung Balita ang magkabag̱ay ang duun tung pagparakaw̱utun nira nga pangkelay nira yang mga kaministiran nira§. 15 Piru yuu, maskin may rasunu ka man ang maning ka tia, indiaw ka enged pagsikad ang para yuu magpasuitu ra rin tung mga kaputulan. Ig indi ra ka nganing isinulatu tia ang para suituenaw ra ilem din numyu. Maayen pang mapatayaw ra ilem kay tung---talagang yang nag̱apatielanung naang nag̱ipagpabantug ang indiaw pagpasuitu, indi ra ka enged ipadeeg̱u maskin tung ninu pa. 16 Ay kipurki kung tung pagparakaw̱utunu ilem, anday mapatielanung ipagpabantug asan ay tia belag̱an sadiling patakaranu, kung indi, sasang ubligasyun ang ipinasakan da yang Dios tung yeen. Dakulu yang panuw̱alanu tung Dios kung alimbawa pabaya-w̱ayaanu ra ilem yang ubligasyunung naa ang indiaw ra magpakaw̱ut yang Matinlung Balita. 17 Ay kung alimbawa yang ubrang naang pagparakaw̱utun ya ray pinilikung pinakleran, tay puis magkabag̱ay ra rin ang yuug susuulay. Piru yay sasang ubligasyunung ipiniar tung yeen yang Dios. 18 Purisu unu pa w̱asu ay sirbing suulu numanyan, kung indi, ya ra yang pagkadiw̱aldiu tung ubraung naang pagparakaw̱utun yang Matinlung Balita ang indiaw ra pagsikad yang rasunung magpasuitu tung pamananged tung nag̱ipagpakaw̱utu.
Yang Nag̱ipasanag Ni Pablo Kung Ayw̱a Mag̱uman-umanen Na Yang Mga Pasais Nang Pagpakignunut Tung Duma-rumang Klasi Ta Mga Tau (9:19-23)
19 Talagang magkatama yang pag̱abuatung atia kipurki maskin liw̱ianuaw ka man tung pagkalalangan yang maskin tinu pang tauay gated anday taung pagpasuituanu, maning pa tung nagpakirepenaw ra tung tanan ang mga tau ug̱ud basi pa ra ilem ang mas magdakel tanirang maeklanu yang mga isip nirang mananged tung Matinlung Balitang naang nag̱ipagpakaw̱utu tung nira*. 20 Bilang kada magparakaw̱utunaw ra tung mga masigkanasyunung mga Judio, pagpailalaw ra tung nira ang yuu talagang sasang masigka Judio nira ug̱ud basi pa ra ilem ang duun da ngaeklayu yang mga isip nirang mananged tung bitalaw. Kumus tanira pamagpasuitu pa tung mga katuw̱ulan ang ibinutwan ni Moises tung nasyun yamen, maskin belag̱anaw ra ka man suitu yang mga katuw̱ulan ang atia†, piru yang mga pasaisu ya ra ilem ipausuyayu tung pag̱irintindien nira ang midyu tung suituaw ka ug̱ud basi pa ra ilem ang duun da ngaeklayu yang mga kinaisipan nirang mananged tung nag̱ipagpakaw̱utu tung nira. 21 Pariu kang kada magparakaw̱utunaw ra tung mga taung indi kang lag̱i pamagpasuitu tung mga katuw̱ulan ang atiang nag̱ianingu, yang mga pasaisu ya ra ka ilem ipausuyayu tung pag̱irintindien nira ang midyu indiaw ka pagpasuitu‡ ug̱ud basi pa ra ilem ang duun da ka ngaeklayu yang mga kinaisipan nirang mananged tung nag̱ipagpakaw̱utu tung nira. Piru belag̱an ang mag̱aning ang anday pag̱intindiu tung kalelyag̱an yang Dios, kung indi, ubligaduaung magtuman yang kumpurming nag̱ipatuman ni Jesu-Cristo tung yeen. 22 Maning ka man tia yang pagpakignunutu tung mga aruman tang mga tumatalig ang masyadung matinaklingen ay duru pang nag̱ibawal tung nira yang mga painu-inu nira. Ag̱ipausuyu ra ka ilem yang mga pasaisu tung pag̱irintindien nira ang midyu yuu pariu ka tung nirang matinaklingen§ ug̱ud basi pa ra ilem ang duun da ka ngaeklayu yang mga kinaisipan nira ang asta amat-amat dang magwayang dang magwayang yang pag̱irintindien nira tung kalelyag̱an yang Dios natetenged tung mga bag̱ay ang atia. Purisu maskin unu pang klasiay ta taung nag̱apakaw̱utanu, yang mga pasaisu nag̱ipasaayu ra ilem tung mga pasais nira ang para mauyunanaw ka nira ug̱ud maskin unu pang papanaway ang usuyunu, ang basi pa ra ilem asan da ngaeklayu yang mga kinaisipan yang duma tung nira ang magtalig da ka yang mga sadili nira tung ni Ginuung Jesus ang magpatapnay. 23 Maning tia yang mga pasais ang pag̱ausuyu para tung mas magtinlu yang palaksu yang balitang naang nag̱ipagpakaw̱utu tung mga tau ug̱ud magkasira-siraanami ra ka yang kumpurming mananged ang magpakbat tung kaayenan ang inding pisan mapasiring-siringan ang ya ka man ay nag̱adapatan yang balitang naa.
Nag̱apaitaan Tanira Ni Pablo Ta Mulidu Sigun Tung Pagsuruspindien Nira Tung Mga Kalelyag̱an Nira (9:24-27)
24 Telengan mi ra ilem yang mga maniglaksu tung karira*. Siguru nag̱askean mi ra ka ang tanirang tanan pagralaksuan, piru sam bilug ilem tung nira ay mapakdulan ta primyu. Purisu ta yaten, sasa may sasa masigprusigir tung pag̱urusuyun ta tung kalelyag̱an yang Dios ang para balesanita ra ka anya ta maning pa tung sasang primyu ang durung pisan agkatinlu. 25 Kung tinu pay pagsali tung karira, maskin tung pag̱insayu na pa ilem, pagsuspindi rang lag̱i tung mga kalelyag̱an na ang para indi na mabuat yang maskin unu pang bag̱ayay ang muya yay magpaluw̱ay tung pagralaksuen na. Yang pag̱aintris nang pagsuspindi ang para tanya maprimyuan yang nag̱isuklub tung kulu yang kumpurming mandeeg† ang indi ra ka ilem buay madiadu ra ka ilem. Piru ta yaten, anday dumang pag̱aintris tang pagsuspindi tung mga kalelyag̱an ta, ya ra tiang maning pa tung primyung anda enged ang pisan ay karangga-ranggaan nang asta tung sampa. 26 Kapurisu ta yeen, yang kaalimbawaanung pagprusir tung kumpurming nag̱auyunan ni Ginuung Jesus, maning pa tung sasang maniglaksu ang yang nag̱apabilug̱an nang pisan ta isip na ya ra yang pasapungan na enged. Yang pagprusigirung pagsuspindi tung kalelyag̱anu pariu ka tung sasang bugsingiru ang kada sumuntuk, pirming magsapulun na yang kalaban na. 27 Bilang bilug ang pisan tung isipu yang pag̱urusuyunu tung kalelyag̱an ni Ginuu ta. Ya ra nganing ay nag̱ipagbatuku ta mupia tung sadiliung nag̱aigpitan ang para maeklanu tung pulus magkatama tung pagteleng na, ay tung pangamanu ka man ang yuung nagturuldukanen tung duma kung ya pa ag̱aring marisibi nira yang maning pa tung primyung naang nag̱ianingu, muya yuu pay mapisanan.
* 9:1 9:1a Balikan ta yang ianing na tung 8:13. † 9:1 9:1b Nag̱akegngan nganing ni Pablo yang pagkaapustul na gated tung palaksu yang pag̱irisipen nirang maning taa. Kung ti Pablo unu talagang matuud ang apustul ni Jesu-Cristo, dapat da rin unu ang indi na ra ipatug̱ay yang rasun nang pangerengan tung pagkaapustul na, kung indi, dapat da rin unu ang mas pang paktelen na. Purisu ya ray binuat nirang sasang isyu ang para ya ray panielan nirang mamagdiskumpiar tung ni Pablo ang belag̱an unu matuud ang apustul. Purisu anda ra kay bali unu tung nira kung baliwalaen da ka ilem nira yang nag̱ibawal na tung nira ang indi ra mamagpadayun tung pagpakisaru nira tung mga aruman nira tung karning isinag̱ud nira tung sasang bultu (8:9-13; 10:19-22). Purisu yang katadlengan nirang atia, gustu ni Pablong tumpalaken ug̱ud mag̱uman da yang pag̱irisipen nirang maning tia. ‡ 9:5 9:5 Yang mga putul ni Ginuung Jesus ang nag̱aisip na, siguru ya ra ti Santiago, may ti Judas ang parariung nagsulat tung mga tumatalig. § 9:6 9:6 Tung pag̱intindi yang mga tag̱a Corinto, indi ra ka enged magkabag̱ay tung sasang apustul ang magparanek tung pagkabetang nang mandilem ta pangabui na. Purisu asan da nga patielay nira yang katadlengan nira ang kumus ti Pablo pandilem, belag̱an unu matuud ang apustul buat. * 9:9 9:9 Deuteronomio 25:4; sinambit ka ni Pablo tung 1 Timoteo 5:18. † 9:12 9:12 Muya ti Pablo mabangdanan ta duma ang pagpaseen da ilem ang pagparakaw̱utun ang para mag̱inguarta ra ilem. ‡ 9:13 9:13 Levitico 14:14-18; Deuteronomio 18:1-5 § 9:14 9:14 Mateo 10:10; Lucas 10:4, 7-8 * 9:19 9:19 Naa sasang ipinanuw̱al na tung nirang nagpakusalak tung anya natetenged tung pagpakignunut na tung mga tau ang yang mga pasais ang nag̱agamit na midyu ya ra ilem ag̱uman-umanay na. Atia unu indi magkabag̱ay tung sasang matuud ang apustul buat. † 9:20 9:20 Yang sam bilug ang bag̱ay ang nadapatan yang mga riglamintung atia ay natetenged tung mga palanganen ang bawal ang panganen yang mga Judio. Yang sam bilug natetenged tung pagburuaten ta tanda ang katulad ka tung binuat ni Pablo tung ni Timoteo (Mga Binuat-buatan 16:3). Yang sam bilug natetenged tung palaksu tung mga pangaku (Mga Binuat-buatan 21:17-26, kapin da enged yang 21:23). ‡ 9:21 9:21 Yang gustu nang ianing, anday palanganen ang dapat liian na, kung indi, maskin unu pang palanganenay ang ag̱ipapaan nira tung anya, risibien na ra ilem ang panganen. § 9:22 9:22 Ikumpalar tung sinambit na tung 8:10 natetenged tung pag̱abuat yang dumang mga tumatalig tung mga aruman nirang masyadung matinaklingen ang para duun da unu mas magdakul yang pag̱irintindien nira buat. * 9:24 9:24-27 Tung sam bulus ang naa, ilinakted ni Pablo yang pangatadlengan na tung sasang prublima duun tung Corinto ang ya ray sinambit nang primiru tung 8:7-13. Yang bag̱ay ang atia natetenged tung pagpakigsaru yang dumang mga tumatalig tung karni ta ayep ang idinasag ang pagkatapus isinag̱ud tung sasang ginuu-ginuu duun mismu tung pagtuuan tung anya. Pagkatapus tung 10:14, 19-33, sinambit na si yang prublimang atia. Bilang yang sam bulus ang naa (9:24-27) binuat ni Pablong maning pa tung sasang latayan ang may pinanliitan na ig may panganingan na. Yang sinikad ni Pablong pinabilug̱an ya ra yang kaministiran nirang magsuspindi tung mga kalelyag̱an nira ay muya, tung masyadung pagsikad nira tung mga diritsyu nira, asan da nga lipatay nira yang pagsuruspindien nira. † 9:25 9:25 Atii kanay, yang isinuklub tung kulu yang nandeeg tung karira mga yesek-yesek ang daunan ang ya ray ibinakurung.
☰