18
1 I muir sien, o nga pare mi angelo mene ta nga tsour peuk kuvu simi rangit. A nga suvuon mi duis leong, ma man matvinavaso a nga rarangie mi kaber.
2 Ngan mi ien leong a nga koup ven ne,
“E Babilon a te nga kor! Mi taon leong a te nga kor!
Eie a te tsorubeit kegi enamon bu moromoruo tsak,
ma mi korot ian bu moromoruo bita kokouk gi ko oir kouk en,
ma mi korot ian bu suada ma bita ma bu ma minogumiets gi ko oir kouk en.
3 Surie bu vuna enamon kokouk gi nga unumie
mi dangi vain be si ken sinavei tetteririv.
Bu kovakova ka leong simi kaber gi nga tsana mi sinavei tetteririv meie,
ma bu ka ververkuil nge kepineits simi kaber gi te nga tsorubeit suvuram surie ken sinavei tetteririv ian ta kap man ka oiroir.”
4 Samo o nga rongomie mi ien mene kuvu simi rangit ta nga pevien ne,
“Enga kong kulou, nga rovotsour ine simi taon,
terengien va nga ta kap mang suvuon ka potpot si ken sar sinavei tsokor,
terengien va nga ta kap mang suvuon man sar tsienakor leong,
5 surie ken sar sinavei tsokor a te tutuvol nge kien i kur beit simi rangit,
ma e Raban a te vodonomie ken sar sinavei malangiets.
6 Nga ta kulie ngan mi sana tate nga tsana senga.
Nga ta kuil vuluo ngan mi sana tate nga tsana.
Io, nga ta vovous vuluovuluongan ken koi ngan misa ta nga terie.
7 Terie sien mi vinavasor ma mi masitinoiv ian ta leong kokouk meie
ken sinavei nia tienangan eie kesen ma ken sinavei nia pinike tuvuon ngan ken lakep leong nia varese mo ken tino simi pirpir.
Surie a ko vakam ven ne,
‘Eou o mogos malan mi kovakova vevien leong, kap va eou mi vevien naor tate nga mamaet labeit,
ma o ta kap ba buer ta masitinoiv.’
8 Io, i aron mi ra kes mo mi tsienakor leong ta pop vuturungie,
mi miensei, mi masitinoiv, ma mi se leong.
Mi leing leong ta tu vudumutsie,
surie mi Nguts e Raban ese ta vuortie, a ngeisngeis.
9 “Bu kovakova ka leong simi kaber gi ta nga tsana mi sinavei tetteririv meie nge mon meie simi sinavei nia pinike tuvuon ngan kegi lakep leong nia varese mo kegi tino simi pirpir, gi ta ta masitinoiv nge maduo surie ine mi taon sien gi ta dengarie mi kienkou simi leing ian ta tu vudumutsie.
10 Gi ta tuir i pek, simi vunan gi motou va gi ta masi suvuon ine mi vinekikin meie. Gi ta pevien,
“ ‘Mi tsienakor leong! Mi tsienakor leong, Oo, mi taon leong,
Oo, Babilon, evoi mi taon ngeisngeis!
I aron mi aua kes mo, ma vinatoreis a te beit!’
11 “Bu ka ververkuil nge lakep ngan bu kepineits simi kaber gi ta ta masitinoiv nge tengisie simi vunan kap ka mene a ba vorie te buer ken sar kepineits;
12 bu gold, bu silva, bu bira vunavout matmatot, bu vunavout simi kiem, bu banga lavlav ian ta dav nge siksik, ma mereik ngeisngeis, bu suasuada ei saien sosong, bu suasuada kepineits gi ta tsana ngan mi kuruban mi elepant, mi ei man voirvoir ta vaen, mi brons, mi aen, ma mi vunavout mabel,
13 ma bu sinemon, bu kepineits kon sosong, bu kepineits saien sosong, mi turou sosong gi ko tsana ngan mi uiluiltan mi ei, mi dangi vain, mi oel, mi plaua ma bu wit, bu bulumakau, bu sipsip, bu oos ma bu karis, bu petspets, ma mi tino simi ka buer.
14 “Gi ta pevien, ‘Ian mi ei vuovuo e ta pilang rorrois sien, a kap mon te sevoi, ma ke suvuram ma bu kepineits ian ta matmatot a te kapanga gie, ma e ta kap oit nia vorotan te buer.’
15 Bu ka ni verikuil nge lakep ngan bu kepineits ese gi ta nga tsorubeit suvuram surie eie, gi ta tuir i pek sien nge motovan man vinavasor leong. Gi ta ta masitinoiv nge tengisie,
16 ma gi ta pevien,
“ ‘Mi tsienakor leong! Mi tsienakor leong, Oo, mi taon leong.
A te vavaso ngan mi banga lavlav dav ma mereik ngeisngeis,
ma a te vavaso ngan mi gold ta kutsukutsuleip, bu vunavout matmatot, ma bu banga reamon simi kiem!
17 I aron mi aua kes mo, ian mi sinsuv leong a te tsereiv!’
“Bu gonggou sibu mon ma bu mei gi ta ka sien, bu tetelepen, ma bu mei kokouk gi ta tsang lakep i rou, egie kokouk gi ta tuir i pek.
18 Sien gi ta nga dengarie mi kienkou kuvu simi leing ian ta tu vudumutsie, gi ta koup nge pevien, ‘Ese a ba nga pare ka taon leong malan ine?’
19 Ma gi ta sovutan mi puit i kovagie nge ta masitinoiv. Ma gi ta pevien,
“Mi tsienakor leong! Mi tsienakor leong, Oo mi taon leong,
ngan ine mi taon leong egie kokouk ese gi ta nga suvuon bu mon i rou,
gi te nga tsorubeit suvuram ngan ken sar sinsuv!
I aron mi aua kes mo, a te sereir!
20 Oo mi rangit, e ta res surie eie a te sereir!
Enga mi kuoluon e Raban ma bu aposol ma bu propet, nga ta res!
E Raban a te terie sien man vinatoreis surie ken sinavei ta nga tsana senga.”
21 Samo mi angelo ngeisngeis a nga tsuokopie mi vunavout ta nga malan mi vunavout leong nia vamama bu wit ma a nga tomekan simi barateis nge pevien,
“Ngan ken sinavei ian ta per beitsak,
eie ta tomekan mi taon leong e Babilon i rou
ma kap ka mene ta ba oit nia neis vorotan te buer.
22 Mi tienengen mi napa ei ian bu mei gi ta togo, ma bu pout veos ma bu tuvuir gi ta kuvie,
kap ka mene ta ba oit nia rongomie gie i aron ke oiroir.
Ka ka ni tsientsang sibu suada tsientsang,
mi kulou gi ta kap ba buer oit nia vorotan i aron ke oiroir.
Mi tienengen mi vunavout leong nia vamama bu wit,
mi kulou gi ta kap ba buer oit nia rongomie i aron ke oiroir.
23 Mi bember ta kap ba buer oit nia ber i aron ke oiroir.
Mi inaguor mi ka rei vour ma mi vevien rei vour
mi kulou gi ta kap ba buer oit nia rongomie guor i aron ke oiroir.
Ke kulou ni verikuil nge lakep ngan bu kepineits, gi nga asna simi mangmagoso enaenamon.
Ngan ke sar tinepekei, e te tsana va bu vuna enamon kokouk gi tate veis bebeir.
24 I aron ine mi taon mi kulou gi te vorotan mi daragie bu propet ma mi daran mi kuoluon e Raban,
ma mi daran mi kulou ese gi ta nga suoeie mi kiden simi kaber.”