☰ Lepelesin 2
2
God binɨb ne pelpel apnan gɨpal taun Epesus ak kɨlop takaw agak
1 + Bɨ anɨb ak takaw ogɨnap sek agɨl agak, Pen ensel ne Epesus binɨb God yɨl mɨdebal okok kɨlop kod mɨdep ak,* takaw agɨnɨgebin ak ensel ak nop kɨl tɨkɨnɨmɨn agak. Bɨ gap anep kugul ak ñɨn yɨpɨd kɨd ne adek ak dɨ mɨdɨlɨg, lam gol dɨl gɨlak anep kugul nab okok ajup ak, takaw nɨm ak agyokeb agak. 2 + Okok tap nɨbi gɨpɨm ak, wog kɨles gɨl, gɨ dad amɨl koslam mɨdɨl, pen yɨlɨk ma nepɨm ak, nepin agak. Bɨ tɨmel gɨpal okok kɨlop nɨgem, nɨbop tep ma gup agak. Bɨ ogɨnap anɨgɨl apal, Chɨn bɨ Jisas takaw nop dad ameb okok mɨdobun apal agak. Pen mel ak, kɨli anɨgɨl ma mɨdebal agak. Takaw kɨlop yɨgɨlɨl nepɨm, bɨ takaw yepɨs agep okok agak. 3 + Yad nepin, yɨp chɨgem binɨb kɨli nɨbop mɨŋel ñel, yɨlɨk ma nɨŋɨd yɨp chɨgɨl yɨbɨl mɨdebɨm agak.
4 Pen takaw olap mɨdeb agak. Yɨp ned chɨgɨl mapen yɨbɨl lelɨgɨpɨm adek ak, dam yokɨpɨm akal agak? 5 + Yɨp Bɨawl chɨn agɨl mapen lelɨgɨpɨm mɨñ tep anɨb ak, taynen kelɨgɨpun agɨl tepayaŋ ak dɨl, mɨdtep gelɨgɨpɨm tek yenɨmɨb agak. Mel ak, yad ap lam nɨbop ak pɨlɨg dɨnɨgayn agak.
6 + Pen adek olap gɨtep gɨpɨm ak, yɨp tep gup agak. Binɨb Nikolas nop takaw tɨmel ne ak dɨl, tɨmel adek ak gel yɨp tep ma gup tek, nɨbop abe gup agak.
7 + Nɨbi binɨb tɨmud sek ak, God Kawnan ak, ne binɨb pelpel apnan gɨpal man awl keke okok kɨlop takaw agup ak nɨgɨnɨmɨb agak. Bɨ an kɨles tɨmel yɨbɨl penpen gɨnɨgab ak, nop agen, mab mɨdup olap dɨl ñɨbɨl, pel pelnep yenɨgab agak. Mab anɨb ak, God man ne alaŋ wog nab ne ak mɨdeb agak.
God binɨb ne pelpel apnan gɨpal taun Simena ak kɨlop takaw agak
8 + Bɨ anɨb ak takaw ogɨnap sek agɨl agak, Pen ensel ne Simena binɨb God yɨl mɨdebal okok kɨlop kod mɨdep ak, takaw agɨnɨgebin ak ensel ak nop kɨl tɨkɨnɨmɨn agak. Bɨ ned yɨbɨl mɨdɨl, mɨd dad amɨl, kɨdek mɨd nep yenɨgab ak, ned kumnek ak pen tɨkjakɨl koŋɨm mɨdeb ak, takaw nɨm ak agyokeb agak. 9 + Yad nepin, binɨb yokɨp ogɨnap nɨbop gɨ tɨmel gel, nɨbi binɨb yɨmgeptek mɨdebɨm ak pen, yad nɨgen bin gɨn bɨ gɨn yɨbɨl mɨdebɨm agak. Pen Juda ogɨnap, chɨn Juda yɨpɨd gɨl mɨdobun apal ak pen, Satan binɨb ne mɨdɨl nɨbop takaw dɨlɨg mɨdebal ak, yad abe nepin agak.
10 + Nɨbi yul awl yɨbɨl dɨnɨgebɨm ak, gos awl ma nɨgɨnɨmɨb agak. Nɨgɨm. Wulep mɨdeb, Satan ne kɨli God nop chɨg tep gɨnɨgabal akaŋ apyap pakɨnɨgabal agɨl, ne gek, nɨbop ogɨnap dɨ nag lɨnɨgabal agak. Pen yɨp yɨl mɨdebɨm ak nɨŋɨd, nɨbop ñɨn anep wajɨlem ak tek, gɨ tɨmel gɨlɨg yenɨgabal agak. Pen nɨbop tɨtay dɨnɨgel akaŋ, pɨsnep paklɨnɨg gel, gos awl anɨb ak ma nɨgɨnɨmɨb agak. Yɨp chɨgɨl nep mɨdem nɨbop paklenɨgabal, tap teplep yɨbɨl nɨbop ñɨnɨgayn agak. Tap teplep anɨb ak anɨgɨl mɨdeb, nɨbi pel pelnep yenɨgabɨm agak.
11 + Nɨbi binɨb tɨmud sek ak, God Kawnan ak, ne binɨb pelpel apnan gɨpal man awl keke okok kɨlop takaw agup ak nɨgɨnɨmɨb agak. Bɨ an kɨles tɨmel yɨbɨl penpen gɨnɨgab ak, tepayaŋ kumɨl yul awl dɨpal ak ma dɨnɨgab agak.
God binɨb ne pelpel apnan gɨpal taun Pegamum ak kɨlop takaw agak
12 + Bɨ anɨb ak takaw ogɨnap sek agɨl agak, Pen ensel ne Pegamum binɨb God yɨl mɨdebal okok kɨlop kod mɨdep ak, takaw agɨnɨgebin ak ensel ak nop kɨl tɨkɨnɨmɨn agak. Bɨ baynat ne kɨd pɨspɨs gak ak, takaw nɨm ak agyokeb agak.
13 + Yad nepin, nɨb koslam yɨbɨl mɨdebɨm agak. Taun nɨbi mɨdebɨm nab ak, Satan kod mɨdeb agak. Pen nɨbi yɨp chɨg tep gɨl, yɨp nokom gos lɨnepɨm ak, gos yɨp ak nɨbi ma we gɨpɨm agak. Man awl Satan pel mɨdeb anɨb ak, bɨyad Adipas ne wog ma kelɨgɨl takaw yad pel agñek, nop ñagɨlak ak pen yɨp ma kelɨgɨpek agak. 14 + Pen takaw ogɨnap mɨdeb agak. Binɨb nɨbi ogɨnap, Balam takaw agñolɨgup ak dɨl kɨdek gebal agak. Bɨ Balam anɨb ak, bɨ Balak nop tɨmud wukek nɨm, am yepɨs gek, Yislel binɨb okok apyap pakɨlɨlak agak. Tap ñɨŋeb tap yokɨp sɨbogɨlak okok ñɨbɨlɨg, bin si bɨ si gɨlɨg gɨlak agak.
15 Ak pen nɨbi ogɨnap bɨ Nikolas takaw tɨmel ne ak dɨl, tɨmel adek nop ak kɨdek gɨl, gem amub agak. 16 + Anɨb ak, chɨn taynen anɨgɨpun agɨl kelɨgɨnɨmɨb agak. Pen ma kelɨgɨnɨgabɨm ak, sɨkol won olap mɨdɨl yad nɨbop yɨl ownɨgayn agak. Apɨl, baynat meg mɨgan yad ayaŋ nɨb aplan jakup ak mɨdeb, binɨb anɨgɨpal okok ayɨp penpen gɨnɨgayn agak.
17 + Nɨbi binɨb tɨmud sek ak, God Kawnan ak, ne binɨb pelpel apnan gɨpal man awl keke okok kɨlop takaw agup ak nɨgɨnɨmɨb agak. Bɨ an kɨles tɨmel yɨbɨl penpen gɨnɨgab ak, tap ñɨŋeb olap, bilet Mana† apal ak, binɨb yokɨp okok ma nepal ak, nop ñen ñɨŋɨnɨgab agak. Pen nop kab kayɨg olap ñɨnɨgayn agak. Kab ñɨnɨgayn adek anɨb ak, yɨb kɨdeyɨl ak keke tɨk ñenɨgayn, bɨ dɨnɨgab ak nep nɨgɨnɨgab agak.
God binɨb ne pelpel apnan gɨpal taun Tayatayla ak kɨlop takaw agak
18 + Bɨ anɨb ak takaw ogɨnap sek agɨl agak, Pen ensel ne Tayatayla binɨb God yɨl mɨdebal okok kɨlop kod mɨdep ak, takaw agɨnɨgebin ak ensel ak nop kɨl tɨkɨnɨmɨn agak. God Ñɨne, wɨdɨn mab mɨŋɨlaŋ tek mɨdɨl, tob kɨd ne ak, tap kɨles blas apal ak dagɨlel yɨnɨl kɨlɨd dup tek gak ak, takaw nɨm ak agyokeb agak. 19 Okok tap nɨbi gɨpɨm ak, yad nepin agak. Binɨb okok kɨlop mapen yɨbɨl lɨl, wog gɨñɨlɨg yɨbɨl mɨdebɨm agak. Yɨp gos lɨnɨŋɨd, wog kɨles gɨl gɨ dad amɨl pen yɨlɨk ma nepɨm ak, nepin agak. Gɨpɨm anɨb ak, ned sɨkol sɨkol gelɨgɨpɨm ak pen, mɨñɨl tapɨn gɨpɨm agak. 20 + Pen takaw olap mɨdeb agak. Bin Jesebel takaw yepɨs agep ak, yad bin God gos ñek agñeb agek, nɨbi nop taynen kelɨgem nɨb ayɨp mɨdeb agak? Binɨb wog yad gɨñɨbal okok kɨlop takaw yepɨs agñek, tap mɨdup dam tap yokɨp sɨbog ñɨbal okok ñɨbɨlɨg, bin si bɨ si gɨlɨg gɨpal agak. 21 + Ne bɨ si tap tɨmel adek anɨb ak kelɨgɨl, mɨdtep gɨnɨmuŋ akaŋ agɨl, nɨg mɨd mel nɨŋɨd kelɨgɨpin agak. 22 Anɨgup tek pen gen, mɨñak awl gek yul awl dɨnɨgab agak. Binɨb nop kɨdek gɨl bin si bɨ si gɨpal anɨb okok, taynen anɨgɨpun agɨl ma kelɨgel, kɨlop abe gen yul awl yɨbɨl dɨnɨgabal agak. 23 + Ñapay ne okok kɨlop paklen kumnɨgabal. Kumnɨgabal ak nɨm, binɨb yad man keke mɨdebal tek, yɨp nɨgtep gɨl agɨnɨgabal, Ne gos tɨmud nab kɨlop ayaŋ nɨgtep yɨbɨl gɨl nep, binɨb okok bɨlokup agɨnɨgabal agak. Anɨgɨpin tek, nɨbi nɨnokom mɨdupsek gɨpɨm tek nɨŋɨd, anɨb ak tek nɨbop pen ñɨnɨgayn agak.
24 Pen nɨbi Tayatayla binɨb ogɨnap, takaw olap nɨbop agɨnɨgebin agak. Binɨb agebin okok, kɨli bin takaw nop ak kɨdek ma gɨl, tap adek anɨb ak gos nɨŋɨd ma apal, Satan takaw ag we gup apal agak. Nɨbi anɨb tek ma gɨpɨm ak nɨm, takaw mɨŋel nɨbop ogɨnap ma mɨdeb agak. 25 + Pen yɨp chɨgɨpɨm anɨb ak, chɨchɨk dɨl mɨdem mɨdem, kɨdek yad nɨnɨm agak. 26 + Bɨ an kɨles tɨmel yɨbɨl penpen gɨl, wog yad gɨtep gɨnɨgab ak, amɨl amɨl tap okok mɨdupsek kul gɨnɨgab ñɨn anɨb ak, nop agen, binɨb man keke okok kɨlop bɨ kod mɨdep yenɨgab agak.+ 27 + Taynen? Bapi takaw olap yɨp agɨl agup, Binɨb okok kɨlop kɨles gɨl kod yenɨmɨn agup agak. Anɨb ak tek, yad agen, bɨ anɨb ak binɨb man keke okok kɨlop kɨles gɨl kod yenɨgab agak. Yɨl kɨles olap dɨl, kɨlop pak jɨsɨpuk jɨsɨpuk gɨnɨgab, sɨge cheg ak tek agak.
28 + Pen gap pogɨlɨn man tɨkɨnɨg gaknɨŋ nepal tek ak nop ñɨnɨgayn agak. 29 Nɨbi binɨb tɨmud sek ak, God Kawnan ak, ne binɨb pelpel apnan gɨpal man awl keke okok kɨlop takaw agup ak nɨgɨnɨmɨb agak.
+ 2:1 Lep 1.16, 1.20 * 2:1 God ensel agyokek amɨl, binɨb God yɨl mɨdebal okok kɨlop keke kod yelak. Jon takaw agak anɨb ak, ne ensel nokom nokom kɨlop agñak. Pen takaw anɨb ak, binɨb God yɨl mɨdebal okok mɨdupsek nɨŋɨd kɨdek gɨnɨgel agɨl gos nɨgak. Sapta 2 ayɨp 3 ayɨp nɨgɨnɨmɨb. + 2:2 2 Ko 11.13, 2 Pi 2.1, 1 Jo 4.1, Lep 2.9, 2.13, 2.19, 3.1, 3.8, 3.15 + 2:3 Gal 6.9, Hib 12.3-5 + 2:5 Mat 21.41-43, Lep 2.16, 2.22, 3.3, 3.19 + 2:6 Sng 139.21 + 2:7 Stt 2.9, Ese 28.13, 31.8, Mat 11.15, Lep 2.11, 2.17, 2.29, 3.6, 3.13, 3.22, 22.2, 22.14, 22.19 + 2:8 Ais 44.6, 48.12, Lep 1.17, 22.13 + 2:9 Lom 2.17, 2 Ko 11.14-15, 1 Ti 6.18, Jem 2.5, Lep 3.9 + 2:10 Mat 10.22, 10.28, 24.13, 2 Ti 4.8, Jem 1.12, Lep 3.11 + 2:11 Lep 13.9, 20.14, 21.8 + 2:12 Ais 49.2, Lep 1.16 + 2:13 Lep 3.8 + 2:14 Nam 22–24, 25.1-3, 31.16, Lo 23.4, Apo 15.29, 1 Ko 6.13, 8.9, 2 Pi 2.15, Jud 11 + 2:16 Ais 11.4, 2 Te 2.8, Lep 1.16, 3.11, 19.15, 19.21, 22.7, 22.12, 22.20 + 2:17 Kis 16.4, 16.14-15, 16.33-34, Ais 62.2, 65.15, Jon 6.48-50, Lep 2.7, 2.11, 3.12, 19.12 † 2:17 Tap ñɨŋeb olap, bilet Mana apal ak, God ne tap ñɨŋeb anɨb ak bɨlel Yislel binɨb kɨlop ñak. Kɨli man Yijip kelɨgɨl, man nep binɨb ma yelak nab okok ajelɨgɨpal ñɨn ak, God tap ñɨŋeb bilet Mana anɨb ak kɨlop ñolɨgup. Pen Kisim Bek sapta 16 ayɨp Buk Song sapta 78 lain 24 nɨgɨnɨmɨb. + 2:18 Lep 1.14-15 + 2:20 1 Kin 16.31, 2 Kin 9.7, Apo 15.20, 15.29, 1 Ko 10.19, Lep 2.14 + 2:21 Lom 2.4, Lep 9.20 + 2:23 Sng 7.9, 62.12, Jer 11.20, 17.10, Lom 8.27, 2 Ko 5.10, 2 Ti 4.14, Lep 20.12-13 + 2:25 Lep 3.11 + 2:26 Mat 19.28, Jon 6.29, 1 Ko 6.3, 1 Jo 3.23, Lep 20.4 + 2:26 Sng 2.8-9 + 2:27 Dan 7.22, Lep 12.5 + 2:28 Lep 22.16
☰