ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚ ꠔꠤꠍꠞꠣ ꠍꠤꠙꠣꠞꠣ
ꠟꠦꠛꠤꠀꠘ
ꠙꠞꠤꠌꠤꠔꠤ
ꠅꠃ ꠍꠤꠙꠣꠞꠣ ꠢꠎꠞꠔ ꠝꠥꠍꠣ (ꠀ꠩) ꠅꠞ ꠃꠙꠞꠦ ꠘꠣꠎꠤꠟ ꠅꠀ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠞ ꠔꠤꠘ ꠘꠝ꠆ꠛꠞ ꠍꠤꠙꠣꠞꠣ। ꠁ ꠍꠤꠙꠣꠞꠣꠞ ꠘꠣꠝ ꠅꠁꠟ ꠟꠦꠛꠤꠀꠘ, ꠝꠣꠘꠤ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝꠔꠤ ꠀꠞ ꠈꠣꠖꠤꠝꠖꠣꠞꠤ ꠇꠣꠝꠞ ꠛꠦꠙꠣꠞꠦ ꠀꠟꠌꠘꠣ।
ꠢꠤꠎꠞꠔ ꠍꠤꠙꠣꠞꠣꠞ ꠡꠦꠡ ꠞꠥꠇꠥꠔ ꠀꠍꠦ, ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠣꠘꠡꠦ ꠔꠥꠞ ꠙꠣꠠꠞ ꠘꠤꠌꠞ ꠢꠝꠣꠘ ꠎꠣꠉꠣꠔ ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥ ꠛꠣꠘꠣꠁꠟꠣ ꠀꠞ ꠉꠣꠠꠤꠟꠣ। ꠁ ꠝꠤꠟꠘ-ꠔꠣꠝ꠆ꠛꠥ ꠀꠍꠤꠟ ꠢꠃ ꠎꠝꠣꠘꠣꠞ ꠙꠛꠤꠔ꠆ꠞ ꠇꠣꠛꠣ ꠊꠞ। ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠣꠘꠡꠦ ꠝꠤꠡꠞ ꠖꠦꠡ ꠍꠣꠠꠤꠀ ꠘꠤꠟ ꠖꠞꠤꠀ ꠙꠣꠠꠤ ꠖꠦꠅꠀꠞ ꠖꠥꠁ ꠛꠍꠞ ꠙꠥꠞꠣ ꠅꠀꠞ ꠖꠤꠘꠅ ꠁ ꠔꠣꠝ꠆ꠛꠥ ꠉꠣꠠꠣ ꠅꠁꠍꠦ।
ꠟꠦꠛꠤꠀꠘ ꠍꠤꠙꠣꠞꠣꠔ ꠀꠝꠞꠣ ꠖꠦꠈꠤ, ꠢꠃ ꠖꠤꠘꠞ ꠛꠣꠖꠦꠃ ꠀꠟ꠆ꠟꠣ ꠙꠣꠇꠦ ꠝꠥꠍꠣ (ꠀ꠩) ꠀꠞ ꠔꠣꠘ ꠀꠙꠘ ꠜꠣꠁ ꠢꠣꠞꠥꠘ (ꠀ꠩) ꠞꠦ ꠅꠃ ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥꠔ ꠉꠤꠀ ꠄꠛꠣꠖꠔ ꠇꠞꠣꠞ ꠛꠦꠙꠣꠞꠦ ꠢꠥꠇꠥꠝ ꠖꠤꠟꠣ। ꠈꠣꠟꠤ ꠢꠎꠞꠔ ꠢꠣꠞꠥꠘ (ꠀ꠩) ꠀꠞ ꠔꠣꠘ ꠀꠅꠟꠣꠖ ꠅꠇꠟꠦ ꠁꠝꠣꠝ ꠢꠤꠡꠣꠛꠦ ꠝꠤꠟꠘ-ꠔꠣꠝ꠆ꠛꠥꠔ ꠄꠛꠣꠖꠔꠤ ꠇꠣꠝ ꠇꠞꠛꠣ। ꠀꠞ ꠟꠦꠛꠤ ꠈꠣꠘ꠆ꠖꠣꠘꠞ ꠛꠣꠖ-ꠛꠣꠇꠤ ꠢꠇꠟꠦ ꠈꠣꠖꠤꠝ ꠢꠤꠡꠣꠛꠦ ꠄꠞꠣꠞꠦ ꠡꠣꠖ ꠖꠤꠛꠣ। ꠁꠝꠣꠝ ꠅꠇꠟꠞ ꠝꠥꠟ ꠇꠣꠝ ꠀꠍꠤꠟ, ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠣꠘꠡꠞ ꠖꠦꠅꠀ ꠘꠣꠘꠣꠘ ꠇꠥꠞꠛꠣꠘꠤ ꠀꠞ ꠍꠖꠉꠣ ꠀꠖꠣꠄ ꠇꠞꠣ।
ꠁ ꠍꠤꠙꠣꠞꠣꠔ ꠀꠝꠞꠣ ꠘꠣꠘꠣꠘ ꠎꠣꠔꠞ ꠇꠥꠞꠛꠣꠘꠤ ꠀꠞ ꠍꠖꠉꠣ ꠅꠇꠟꠞ ꠛꠦꠙꠣꠞꠦ ꠛꠤꠡ꠆ꠔꠣꠞꠤꠔ ꠎꠣꠘꠔꠣꠝ ꠙꠣꠞꠤ। ꠅꠔꠣ ꠀꠖꠣꠄ ꠇꠞꠤꠀ ꠉꠥꠘꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠅꠀꠞ ꠀꠞ ꠘꠣꠙꠣꠇꠤ ꠕꠣꠇꠤ ꠙꠣꠇ-ꠙꠣꠇꠤꠎꠣ ꠛꠘꠣꠞ ꠛꠦꠛꠡ꠆ꠔꠣ ꠀꠍꠦ। ꠀꠞꠅ ꠎꠣꠘꠔꠣꠝ ꠙꠣꠞꠤ, ꠀꠟ꠆ꠟꠣꠄ ꠘꠣꠘꠣꠘ ꠎꠣꠔꠞ ꠁꠖ ꠀꠞ ꠛꠤꠡꠦꠡ ꠙꠛꠤꠔ꠆ꠞ ꠖꠤꠘ ꠅꠇꠟ ꠑꠤꠇ ꠇꠞꠤ ꠖꠤꠍꠂꠘ, ꠀꠞ ꠢꠣꠟꠣꠟ-ꠢꠣꠞꠣꠝ ꠈꠣꠘꠤ, ꠎꠣꠁꠎ-ꠘꠣꠎꠣꠁꠎ ꠛꠤꠀ ꠀꠞ ꠛꠘꠤ ꠁꠍꠞꠣꠁꠟꠞ ꠢꠞ-ꠢꠣꠝꠦꠡꠣ ꠌꠟꠣ-ꠚꠤꠞꠣꠞ ꠛꠦꠙꠣꠞꠦꠅ ꠘꠤꠅꠝ-ꠇꠣꠘꠥꠘ ꠇꠁꠀ ꠖꠤꠍꠂꠘ। ꠅꠔꠣꠞ ꠝꠣꠎꠦ ꠛꠠ ꠁꠖꠞ ꠘꠣꠝ ꠅꠁꠟ ꠇꠚꠞꠣꠞ ꠁꠖ, ꠁ ꠖꠤꠘꠅ ꠀꠟ꠆ꠟꠣꠞ ꠞꠢꠝꠔꠦ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠉꠥꠘꠣ ꠀꠞ ꠘꠣꠙꠣꠇꠤꠞꠦ ꠖꠥꠞ ꠇꠞꠣ ꠅꠁꠔ।
ꠁ ꠍꠤꠙꠣꠞꠣꠞ ꠝꠥꠟ ꠇꠕꠣ ꠅꠁꠟ, ꠀꠟ꠆ꠟꠣꠄ ꠘꠤꠎꠦ ꠙꠣꠇ-ꠙꠛꠤꠔ꠆ꠞ, ꠄꠞꠟꠣꠉꠤ ꠔꠣꠘ ꠛꠘ꠆ꠖꠣ ꠅꠇꠟꠅ ꠙꠣꠇ-ꠙꠛꠤꠔ꠆ꠞ ꠅꠁꠔꠦ ꠅꠁꠛ। ꠇꠦꠃ ꠎꠥꠖꠤ ꠉꠥꠘꠣꠉꠣꠞ ꠛꠘꠤꠀ ꠛꠣ ꠘꠣꠙꠣꠇꠤ ꠢꠣꠟꠔꠦ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠅꠄ, ꠔꠦ ꠢꠦ ꠝꠞꠤꠎꠤꠔ ꠙꠣꠞꠦ। ꠅꠁꠟꠦ ꠀꠟ꠆ꠟꠣ ꠙꠣꠇꠦ ꠝꠣꠄꠀ ꠇꠞꠤꠀ ꠇꠥꠞꠛꠣꠘꠤꠞ ꠞꠇ꠆ꠔꠖꠤ ꠉꠥꠘꠣꠞ ꠡꠣꠎꠣ ꠕꠣꠇꠤ ꠞꠁꠇ꠆ꠇꠣ ꠙꠣꠁꠛꠣꠞ ꠛꠦꠛꠡ꠆ꠔꠣ ꠇꠞꠤ ꠖꠤꠍꠂꠘ, ꠎꠣꠔꠦ ꠇꠞꠤ ꠀꠝꠞꠣ ꠔꠣꠘ ꠍꠣꠝꠘꠦ ꠀꠎꠤꠞ ꠅꠁꠔꠣꠝ ꠙꠣꠞꠤ ꠀꠞ ꠔꠣꠘ ꠄꠛꠣꠖꠔ ꠇꠞꠔꠣꠝ ꠙꠣꠞꠤ।
ꠁ ꠟꠦꠛꠤꠀꠘ ꠍꠤꠙꠣꠞꠣꠞ ꠝꠣꠎꠦ ꠘꠣꠝꠇꠞꠣ ꠄꠇ ꠀꠄꠀꠔ ꠅꠁꠟ, “ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ” (১৯ ꠞꠥꠇꠥ ১৮ ꠀꠄꠀꠔ)। ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠇꠁꠍꠂꠘ, ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠣꠞ ꠛꠣꠖꠦ ꠁ ꠢꠥꠇꠥꠝ ꠅꠁꠟ ꠔꠃꠞꠣꠔ ꠡꠞꠤꠚꠞ ꠝꠥꠟ ꠔꠣꠟꠤꠝ।
ꠄꠞꠝꠣꠎꠦ ꠀꠍꠦ:
(ꠇ) ꠘꠣꠘꠣꠘ ꠍꠖꠉꠣ ꠀꠞ ꠇꠥꠞꠛꠣꠘꠤ ১—৭ ꠞꠥꠇꠥ
(ꠈ) ꠁꠝꠣꠝ ꠅꠇꠟꠞ ꠈꠦꠟꠣꠚꠔꠤ ꠛꠅꠀꠁꠟ ৮—১০ ꠞꠥꠇꠥ
(ꠉ) ꠄꠛꠣꠖꠔꠞ ꠟꠣꠉꠤ ꠙꠣꠇ-ꠙꠣꠇꠤꠎꠣ ꠛꠘꠣ ১১—১৫ ꠞꠥꠇꠥ
(ꠊ) ꠇꠚꠞꠣꠞ ꠁꠖ ১৬—১৭ ꠞꠥꠇꠥ
(ꠌ) ꠌꠣꠟ-ꠌꠟꠘꠞ ꠟꠣꠉꠤ ꠎꠣꠁꠎ-ꠘꠣꠎꠣꠁꠎ ১৮—২২ ꠞꠥꠇꠥ
(ꠍ) ꠘꠣꠘꠣꠘ ꠁꠖ ꠀꠞ ꠖꠥꠍꠞꠣ ꠛꠤꠡꠄ ২৩—২৫ ꠞꠥꠇꠥ
(ꠎ) ꠀꠟ꠆ꠟꠣꠞ ꠢꠥꠇꠥꠝꠦ ꠌꠟꠣꠞ ꠙꠥꠞꠥꠡ꠆ꠇꠣꠞ ২৬ ꠞꠥꠇꠥ
(ꠏ) ꠝꠣꠘ꠆ꠘꠔ ꠀꠖꠣꠄ ꠇꠞꠣ ২৭ ꠞꠥꠇꠥ
1
ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠝ
1 ꠅꠃ ꠙꠛꠤꠔ꠆ꠞ ꠇꠣꠛꠣ ꠊꠞ ꠝꠣꠘꠤ ꠝꠤꠟꠘ-ꠔꠣꠝ꠆ꠛꠥ ꠛꠣꠘꠣꠘꠤꠞ ꠛꠣꠖꠦ, ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠅꠘꠅ ꠀꠘꠣꠁꠀ ꠇꠁꠟꠣ,
2 “ꠔꠥꠝꠤ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃ ꠎꠥꠖꠤ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠖꠞꠛꠣꠞꠅ ꠇꠥꠘꠥ ꠙꠡꠥ ꠖꠤꠔ ꠌꠣꠄ, ꠔꠦ ꠉꠞꠥ ꠛꠣ ꠍꠣꠉꠟ-ꠝꠦꠠꠣꠞ ꠙꠣꠟ ꠕꠣꠇꠤ ꠙꠡꠥ ꠀꠘꠤꠀ ꠇꠥꠞꠛꠣꠘꠤ ꠖꠤꠟꠣꠃꠇ।
3 “ꠇꠥꠞꠛꠣꠘꠤ ꠖꠦꠅꠞꠣꠄ ꠎꠥꠖꠤ ꠉꠞꠥꠞ ꠙꠣꠟ ꠕꠣꠇꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠔ ꠌꠣꠄ, ꠔꠦ ꠙꠥꠞꠣꠙꠥꠞ ꠘꠤꠈꠥꠔ ꠄꠉꠥ ꠛꠤꠍꠣꠟ ꠀꠘꠔꠦ ꠅꠁꠛ। ꠀꠘꠤꠀ ꠝꠣꠛꠥꠖꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠅꠃ ꠛꠤꠍꠣꠟꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠟꠁꠀ ꠀꠁꠛ।
4 ꠀꠁꠀ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠘꠤꠅꠔꠦ ꠀꠘꠣ ꠅꠃ ꠛꠤꠍꠣꠟꠞ ꠇꠟ꠆ꠟꠣꠞ ꠃꠙꠞꠦ ꠀꠔ ꠕꠁꠛ, ꠔꠦꠃ ꠔꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠁꠐꠣꠞꠦ ꠇꠛꠥꠟ ꠇꠞꠣ ꠅꠁꠛ।
5 ꠛꠣꠖꠦ ꠝꠣꠛꠥꠖꠞ ꠍꠣꠝꠘꠦ ꠅꠃ ꠛꠤꠍꠣꠟꠞꠦ ꠢꠦ ꠎꠛ ꠇꠞꠛ। ꠀꠞ ꠁꠝꠣꠝ ꠢꠣꠞꠥꠘꠞ ꠎꠦ ꠙꠥꠀꠂꠘ꠆ꠔꠦ ꠁꠝꠣꠝꠔꠤ ꠇꠞꠂꠘ, ꠔꠣꠞꠣ ꠅꠃ ꠛꠤꠍꠣꠟꠞ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
6 ꠛꠣꠖꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠅꠃ ꠛꠤꠍꠣꠟꠞ ꠈꠣꠟ ꠈꠣꠟꠤꠀ ꠢꠣꠞꠤ, ꠅꠉꠥꠞ ꠉꠥꠡ꠆ꠔ ꠐꠥꠇꠞꠣ ꠐꠥꠇꠞꠣ ꠇꠞꠛꠣ।
7 ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟ ꠀꠋꠞꠣ ꠕꠁꠛꠣ, ꠄꠞ ꠃꠙꠞꠦ ꠖꠣꠞꠥ ꠢꠣꠎꠣꠁꠛꠣ।
8 ꠢꠣꠎꠣꠁꠀ ꠅꠃ ꠖꠣꠞꠥꠞ ꠃꠙꠞꠦ ꠛꠤꠍꠣꠟꠞ ꠇꠟ꠆ꠟꠣ, ꠌꠞ꠆ꠛꠤ, ꠉꠥꠡ꠆ꠔꠞ ꠐꠥꠇꠞꠣꠁꠘ ꠕꠁꠛꠣ।
9 ꠇꠥꠞꠛꠣꠘꠤ ꠖꠦꠅꠞꠣꠄ ꠉꠞꠥꠞ ꠑꠦꠋ ꠀꠞ ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ ꠖꠤꠛꠣ, ꠀꠞ ꠁꠝꠣꠝꠦ ꠅꠔꠣ ꠘꠤꠀ ꠀꠡ꠆ꠔꠣ ꠛꠤꠍꠣꠟꠞ ꠢꠇ꠆ꠇꠟꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠐꠣꠞ ꠘꠣꠝ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
10 “ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠍꠣꠉꠟ-ꠝꠦꠠꠣꠞ ꠙꠣꠟ ꠕꠣꠇꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠈꠤꠀꠟꠤ ꠅꠄ, ꠔꠦ ꠁꠇꠐꠣ ꠙꠥꠞꠣꠙꠥꠞ ꠘꠤꠈꠥꠔ ꠄꠉꠥ ꠙꠣꠑꠣ ꠅꠁꠔꠦ ꠅꠁꠛ।
11 ꠇꠥꠞꠛꠣꠘꠤ ꠖꠦꠅꠞꠣꠄ ꠁꠇꠐꠣꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠔ꠆ꠔꠞ ꠉꠣꠟꠣꠔ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠤꠀ ꠢꠣꠞꠟꠦ, ꠁꠝꠣꠝ ꠢꠣꠞꠥꠘꠞ ꠎꠦ ꠙꠥꠀꠂꠘ꠆ꠔꠦ ꠁꠝꠣꠝꠔꠤ ꠇꠞꠂꠘ, ꠔꠣꠞꠣ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
12 ꠛꠣꠖꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠁꠐꠣꠞ ꠉꠥꠡ꠆ꠔ ꠐꠥꠇꠞꠣ ꠐꠥꠇꠞꠣ ꠇꠞꠤ ꠇꠣꠐꠤꠀ ꠖꠤꠟꠦ, ꠁꠝꠣꠝ ꠍꠣꠛꠦ ꠅꠉꠥꠞ ꠌꠞ꠆ꠛꠤ, ꠇꠟ꠆ꠟꠣ ꠀꠞ ꠉꠥꠡ꠆ꠔꠞ ꠐꠥꠇꠞꠣꠁꠘ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠎꠣꠟꠣꠁꠟ ꠀꠋꠞꠣꠞ ꠃꠙꠞꠞ ꠖꠣꠞꠥꠞ ꠃꠙꠞꠦ ꠢꠣꠎꠣꠁꠛꠣ।
13 ꠇꠥꠞꠛꠣꠘꠤ ꠖꠦꠅꠞꠣꠄ ꠁꠐꠣꠞ ꠑꠦꠋ, ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ ꠖꠤꠛꠣ, ꠀꠞ ꠁꠝꠣꠝ ꠍꠣꠛꠦ ꠁꠔꠣ ꠢꠇ꠆ꠇꠟꠔꠣ ꠡꠝꠦꠔ ꠀꠡ꠆ꠔꠣ ꠙꠡꠥꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠐꠣ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
14 “ꠀꠞ ꠇꠥꠘꠥ ꠙꠣꠈꠤ ꠖꠤꠀ ꠎꠥꠖꠤ ꠝꠣꠛꠥꠖꠞ ꠘꠣꠝꠞ ꠅꠃ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠈꠤꠀꠟ ꠅꠄ, ꠔꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠟꠁꠀ ꠀꠁꠛ।
15 ꠀꠁꠟꠦ, ꠁꠝꠣꠝꠦ ꠇꠥꠞꠛꠣꠘꠤ ꠈꠣꠘꠣꠞ ꠗꠣꠞꠅ ꠉꠤꠀ ꠅꠃ ꠙꠣꠈꠤꠞ ꠇꠟ꠆ꠟꠣ ꠝꠥꠞꠣ ꠝꠣꠞꠤꠀ ꠍꠤꠠꠤꠀ ꠀꠟꠉꠣꠁꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠅꠃ ꠇꠟ꠆ꠟꠣꠞꠦ ꠎꠣꠟꠣꠁꠟꠤꠛꠣ, ꠀꠞ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠄꠇ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
16 ꠁꠝꠣꠝꠦ ꠙꠣꠈꠤꠞ ꠜꠤꠔꠞꠞ ꠉꠤꠟꠣ-ꠕꠟꠤ ꠀꠞ ꠚꠁꠞ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠙꠥꠛ ꠉꠣꠟꠣꠞ ꠍꠣꠟꠤꠞ ꠐꠦꠇꠤꠞ ꠝꠣꠎꠦ ꠚꠣꠟꠣꠁ ꠖꠤꠛꠣ।
17 ꠀꠞ ꠅꠉꠥꠞ ꠒꠣꠈꠘꠣꠔ ꠗꠞꠤꠀ ꠅꠟꠣ ꠛꠣꠐꠦ ꠍꠤꠠꠤꠛꠣ, ꠎꠣꠔꠦ ꠁꠐꠣꠞ ꠖꠥꠁ ꠐꠥꠇꠞꠣ ꠙꠥꠞꠣꠙꠥꠞ ꠀꠟꠉ ꠘꠣ ꠅꠄ। ꠛꠣꠖꠦ ꠁꠝꠣꠝ ꠍꠣꠛꠦ ꠁꠐꠣ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠎꠣꠟꠣꠁꠟ ꠀꠋꠞꠣꠞ ꠃꠙꠞꠞ ꠖꠣꠞꠥꠞ ꠃꠙꠞꠦ ꠕꠁꠀ ꠎꠣꠟꠣꠁꠟꠤꠛꠣ। ꠁꠐꠣꠅ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।