ꠀꠟ꠆ꠟꠣꠞ ꠙꠛꠤꠔ꠆ꠞ ꠊꠞ ꠛꠣꠘꠣꠘꠤ (৩৫:১—৪০:৩৮)
35
ꠎꠥꠝ꠆ꠝꠣꠛꠣꠞꠞ ꠢꠥꠇꠥꠝ-ꠀꠢꠇꠣꠝ
1 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠡ꠆ꠐꠤꠞꠦ ꠖꠟꠣ ꠇꠞꠤꠀ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ, ꠔꠣꠘ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠣꠞ ꠟꠣꠉꠤ।
2 ꠔꠥꠝꠞꠣ ꠢꠣꠙ꠆ꠔꠣꠞ ꠍꠄꠖꠤꠘ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠖꠤꠘ, ꠀꠞꠣꠝꠞ ꠖꠤꠘ, ꠎꠥꠝ꠆ꠝꠣꠛꠣꠞ। ꠁ ꠖꠤꠘ ꠎꠦ ꠝꠣꠘꠡꠦ ꠇꠣꠝ ꠇꠞꠛ, ꠔꠣꠞꠦ ꠝꠣꠞꠤꠟꠤꠛꠣꠄ।
3 ꠎꠥꠝ꠆ꠝꠣꠛꠣꠞꠦ ꠔꠥꠝꠞꠣꠞ ꠇꠦꠃꠞꠞ ꠊꠞꠅ ꠀꠉꠥꠁꠘ ꠎꠣꠟꠣꠁꠅ ꠘꠣ।”
ꠀꠟ꠆ꠟꠣꠞ ꠊꠞꠞ ꠟꠣꠉꠤ ꠟꠤꠟ꠆ꠟꠣ ꠖꠦꠅ
4 ꠢꠎꠞꠔ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ,
5 ꠔꠥꠝꠞꠣ ꠎꠣꠞꠎꠤꠞ ꠖꠤꠟꠞ ꠈꠥꠡꠤ ꠝꠣꠚꠤꠇ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠟꠁꠀ ꠀꠅ। ꠀꠘꠣꠞ ꠡꠝꠄ ꠅꠃꠟꠣ ꠌꠤꠎ ꠅꠇꠟ ꠟꠤꠟ꠆ꠟꠣ ꠀꠘꠤꠅ:
ꠡꠥꠘꠣ, ꠞꠥꠙꠣ, ꠙꠤꠔꠟ;
6 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣ;
ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠍꠣꠉꠟꠞ ꠞꠥꠝꠣ;
7 ꠟꠣꠟ ꠞꠋ ꠟꠣꠉꠣꠁꠟ ꠝꠦꠠꠣꠞ ꠌꠣꠝꠠꠣ, ꠚꠥʼꠞ ꠌꠣꠝꠠꠣ;
ꠛꠣꠛꠟꠣ ꠟꠣꠇꠠꠤ;
8 ꠌꠦꠞꠣꠉ ꠎꠣꠟꠣꠘꠤꠞ ꠟꠣꠉꠤ ꠎꠄꠔꠥꠘꠞ ꠔꠦꠟ;
ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟꠞ ꠝꠡꠟꠣ ꠀꠞ ꠀꠉꠞ-ꠈꠥꠡꠛꠄ ꠛꠣꠘꠣꠘꠤꠞ ꠝꠡꠟꠣ;
9 ꠁꠝꠣꠝꠞ ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠔ ꠟꠣꠉꠣꠘꠤꠞ ꠟꠣꠉꠤ ꠀꠇꠤꠇ ꠝꠘꠤ ꠀꠞ ꠢꠇꠟ ꠘꠝꠥꠘꠣꠞ ꠖꠣꠝꠤ ꠙꠣꠔ꠆ꠔꠞ।
10 “ꠔꠥꠝꠞꠣꠞ ꠝꠣꠎꠦ ꠎꠣꠞꠣ ꠜꠣꠟꠣ ꠃꠡ꠆ꠔꠣꠖ ꠇꠣꠞꠤꠉꠞ, ꠔꠣꠞꠣ ꠀꠁꠀ ꠅꠃ ꠢꠇꠟꠔꠣ ꠛꠣꠘꠣꠁꠛꠣ, ꠎꠦꠟꠣ ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ:
11 ꠀꠟ꠆ꠟꠣꠞ ꠊꠞ, ꠊꠞꠞ ꠌꠣꠟ, ꠢꠥꠇ, ꠚ꠆ꠞꠦꠁꠝ, ꠛꠣꠔ꠆ꠔꠤ, ꠈꠥꠐꠤ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ;
12 ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇꠞ ꠓꠣꠇꠘꠣ, ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ;
ꠡꠘ꠆ꠖꠥꠇꠞꠦ ꠀꠉꠟꠣ ꠖꠤꠛꠣꠞ ꠙꠞ꠆ꠖꠣ;
13 ꠛꠦꠘ꠆ꠖꠣ ꠡꠥꠖ꠆ꠖꠣ ꠐꠦꠛꠥꠟ, ꠐꠦꠛꠥꠟꠞ ꠃꠙꠞꠞ ꠢꠇꠟ ꠌꠤꠎ, ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ;
14 ꠚꠞ ꠖꠤꠛꠣꠞ ꠟꠣꠉꠤ ꠌꠦꠞꠣꠉ ꠖꠣꠘꠤ, ꠄꠞ ꠟꠉꠞ ꠢꠇꠟ ꠌꠤꠎ ꠀꠞ ꠌꠦꠞꠣꠉ ꠅꠇꠟ, ꠌꠦꠞꠣꠉ ꠎꠣꠟꠣꠘꠤꠞ ꠔꠦꠟ;
15 ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠁꠈꠣꠘ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ;
ꠈꠦꠟꠣꠚꠔꠤꠞ ꠔꠦꠟ, ꠈꠥꠡꠛꠄ ꠀꠟꠣ ꠀꠉꠞ, ꠀꠟ꠆ꠟꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ;
16 ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣꠞ ꠇꠥꠞꠛꠣꠘꠤ ꠈꠣꠘꠣ;
ꠄꠞ ꠙꠤꠔꠟꠞ ꠎꠣꠟꠤ ꠀꠞ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ;
ꠇꠥꠞꠛꠣꠘꠤ ꠈꠣꠘꠣꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ;
ꠅꠎꠥꠞ ꠉꠣꠝꠟꠣ ꠀꠞ ꠉꠣꠝꠟꠣ ꠕꠅꠀꠞ ꠌꠇꠤ-ꠈꠣꠐ;
17 ꠃꠑꠣꠘꠞ ꠙꠞ꠆ꠖꠣꠁꠘ, ꠈꠥꠐꠤꠘ ꠀꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ;
ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ;
18 ꠊꠞꠞ ꠙꠦꠞꠦꠉ ꠀꠞ ꠖꠠꠤ, ꠃꠑꠣꠘꠞ ꠙꠦꠞꠦꠉ ꠀꠞ ꠖꠠꠤ;
19 ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠟꠣꠉꠤ, ꠁꠝꠣꠝ ꠢꠣꠞꠥꠘꠞ ꠙꠛꠤꠔ꠆ꠞ ꠟꠦꠛꠣꠍ, ꠀꠞ ꠔꠣꠘ ꠙꠥꠀꠂꠘ꠆ꠔꠞꠅ ꠁꠝꠣꠝꠔꠤꠞ ꠟꠦꠛꠣꠍ।”
20 ꠝꠥꠍꠣ ꠘꠛꠤꠞ ꠛꠄꠀꠘ ꠛꠣꠖꠦ ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠡ꠆ꠐꠤ ꠛꠤꠖꠣꠄ ꠅꠁꠉꠦꠟꠣ।
21 ꠉꠤꠀ ꠔꠣꠞꠣꠞ ꠖꠤꠟꠞ ꠄꠡꠇꠤ ꠝꠣꠚꠤꠇ ꠎꠣꠞꠎꠤꠞ ꠁꠌ꠆ꠍꠣꠄ ꠀꠟ꠆ꠟꠣꠞ ꠝꠤꠟꠘ-ꠔꠣꠝ꠆ꠛꠥ ꠛꠣꠘꠣꠘꠤꠞ ꠟꠣꠉꠤ, ꠁꠝꠣꠝ ꠢꠣꠞꠥꠘꠞ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍꠞ ꠟꠣꠉꠤ ꠀꠞ ꠄꠛꠣꠖꠔ ꠇꠣꠝꠞ ꠟꠣꠉꠤ ꠢꠇꠟ ꠘꠝꠥꠘꠣꠞ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠁꠟꠣ। ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠛꠣꠞ ꠟꠣꠉꠤ ꠅꠔꠣ ꠟꠁꠀ ꠔꠣꠞꠣ ꠀꠎꠤꠞ ꠅꠁꠟꠣ।
22 ꠛꠦꠐꠣꠁꠘ ꠛꠣ ꠛꠦꠐꠤꠘ꠆ꠔꠞ ꠝꠣꠎꠦ ꠎꠣꠞꠣꠞ ꠝꠘꠦ ꠌꠣꠁꠟ, ꠔꠣꠞꠣ ꠁꠔꠣ ꠖꠤꠟꠣ। ꠔꠣꠞꠣ ꠎꠣꠞꠎꠤꠞ ꠇꠣꠙꠠꠞ ꠙꠤꠋ, ꠇꠣꠘꠞ ꠁꠀꠞꠤꠋ, ꠀꠋꠐꠤ, ꠉꠟꠣꠞ ꠢꠣꠞ, ꠀꠞ ꠢꠇꠟ ꠎꠣꠔꠞ ꠡꠥꠘꠣꠞ ꠉꠄꠘꠣ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠟꠣ।
23 ꠀꠞ ꠎꠦꠞꠣꠞ ꠉꠦꠍꠦ ꠟꠤꠟꠥꠀ ꠡꠥꠔꠣ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠍꠣꠉꠟꠞ ꠞꠥꠝꠣ, ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣ, ꠚꠥʼꠞ ꠌꠣꠝꠠꠣ ꠀꠍꠤꠟ, ꠔꠣꠞꠣ ꠁꠔꠣ ꠢꠇꠟꠔꠣ ꠟꠁꠀ ꠀꠁꠟꠣ।
24 ꠎꠦꠞꠣꠞ ꠉꠦꠍꠦ ꠞꠥꠙꠣ ꠀꠞ ꠙꠤꠔꠟ ꠀꠍꠤꠟ, ꠔꠣꠞꠣꠅ ꠁꠔꠣ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣ। ꠀꠟ꠆ꠟꠣꠞ ꠊꠞꠞ ꠇꠣꠝꠅ ꠟꠣꠉꠣꠘꠤꠞ ꠎꠥꠇꠣ ꠛꠣꠛꠟꠣ ꠟꠣꠇꠠꠤ ꠎꠦꠞꠣꠞ ꠉꠦꠍꠦ ꠀꠍꠤꠟ, ꠔꠣꠞꠣꠅ ꠁꠔꠣ ꠟꠁꠀ ꠀꠁꠟꠣ।
25 ꠎꠦꠔꠣ ꠛꠦꠐꠤꠘ꠆ꠔꠦ ꠡꠥꠔꠣ ꠛꠣꠘꠣꠘꠤꠔ ꠃꠡ꠆ꠔꠣꠖ, ꠔꠣꠞꠣ ꠘꠤꠎꠞ ꠀꠔꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ ꠛꠣꠘꠣꠁꠀ ꠀꠘꠟꠣ।
26 ꠀꠞ ꠡꠥꠔꠣ ꠛꠣꠘꠣꠅꠞꠣ ꠎꠦꠔꠣ ꠛꠦꠐꠤꠘ꠆ꠔꠞ ꠖꠤꠟꠞ ꠝꠣꠎꠦ ꠄꠡꠇꠤ ꠙꠄꠖꠣ ꠅꠁꠟ, ꠔꠣꠞꠣ ꠍꠣꠉꠟꠞ ꠞꠥꠝꠣ ꠖꠤꠀ ꠡꠥꠔꠣ ꠛꠣꠘꠣꠁꠟꠣ।
27 ꠝꠥꠞꠛ꠆ꠛꠤ ꠅꠇꠟꠦ ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠔ ꠟꠣꠉꠣꠘꠤꠞ ꠟꠣꠉꠤ, ꠀꠇꠤꠇ ꠝꠘꠤ ꠀꠞ ꠖꠣꠝꠤ ꠖꠣꠝꠤ ꠙꠣꠔ꠆ꠔꠞ ꠟꠁꠀ ꠀꠁꠟꠣ।
28 ꠌꠦꠞꠣꠉ ꠎꠣꠟꠣꠘꠤꠞ ꠔꠦꠟ, ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ, ꠀꠉꠞ-ꠈꠥꠡꠛꠄ ꠛꠣꠘꠣꠘꠤꠞ ꠝꠡꠟꠣ ꠀꠞ ꠎꠄꠔꠥꠘꠞ ꠔꠦꠟꠅ ꠀꠘꠟꠣ।
29 ꠝꠣꠛꠥꠖꠦ ꠝꠥꠍꠣꠞ ꠝꠣꠎꠖꠤ ꠎꠦꠔꠣ ꠎꠦꠔꠣ ꠇꠞꠣꠞ ꠢꠥꠇꠥꠝ ꠖꠤꠍꠟꠣ, ꠁꠔꠣ ꠙꠥꠞꠣ ꠇꠞꠣꠞ ꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠢꠇꠟ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ, ꠎꠣꠞꠎꠤꠞ ꠈꠥꠡꠤ ꠝꠣꠚꠤꠇ ꠟꠤꠟ꠆ꠟꠣ ꠟꠁꠀ ꠀꠎꠤꠞ ꠅꠁꠟ।
ꠛꠣꠔꠍꠦꠟꠟ ꠀꠞ ꠀꠢꠟꠤꠀꠛ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠇꠣꠞꠤꠉꠞ
30 ꠛꠣꠖꠦ ꠝꠥꠍꠣꠄ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠦ ꠄꠢꠥꠖꠣ ꠉꠥꠡ꠆ꠐꠤꠞ ꠢꠥꠞꠞ ꠘꠣꠔꠤ, ꠃꠞꠤꠞ ꠙꠥꠀ ꠛꠣꠔꠍꠦꠟꠟꠞꠦ ꠙꠍꠘ꠆ꠖ ꠇꠞꠍꠂꠘ।
31 ꠔꠣꠁꠘ ꠄꠞꠦ ꠘꠤꠎꠞ ꠞꠥꠢꠥ ꠝꠥꠛꠣꠞꠇ ꠖꠤꠀ ꠇꠣꠝꠤꠟ ꠛꠣꠘꠣꠁꠀ, ꠢꠇꠟ ꠟꠣꠈꠣꠘ ꠇꠣꠞꠤꠉꠞꠤ ꠇꠣꠝꠞ ꠀꠈꠟ-ꠛꠥꠖ꠆ꠖꠤ, ꠛꠤꠖ꠆ꠖꠣꠄ ꠃꠡ꠆ꠔꠣꠖꠤ ꠇꠣꠝꠞ ꠈꠦꠝꠔꠣ ꠖꠤꠍꠂꠘ।
32 ꠄꠞꠟꠣꠉꠤ ꠄꠁꠘ ꠇꠣꠞꠤꠉꠞꠤ ꠇꠣꠝ ꠇꠞꠣꠞ ꠛꠣꠟꠣ ꠘꠤꠎꠞ ꠀꠈꠟ ꠈꠣꠐꠣꠁꠀ ꠡꠥꠘꠣ, ꠞꠥꠙꠣ, ꠙꠤꠔꠟꠞ ꠃꠙꠞꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠘꠇꠡꠣ ꠛꠣꠘꠣꠁꠔꠣ ꠙꠣꠞꠛꠣ।
33 ꠖꠣꠝꠤ ꠖꠣꠝꠤ ꠙꠣꠔ꠆ꠔꠞ ꠇꠣꠐꠣ, ꠟꠣꠇꠠꠤꠞ ꠃꠙꠞꠦ ꠘꠇꠡꠣ, ꠀꠞ ꠢꠇꠟ ꠘꠝꠥꠘꠣꠞ ꠀꠔꠞ ꠇꠣꠝ ꠇꠞꠔꠣ ꠙꠣꠞꠛꠣ।
34 ꠀꠞ ꠅꠁꠘ꠆ꠘ ꠝꠣꠘꠡꠞꠦꠅ ꠁꠔꠣ ꠇꠣꠝ ꠢꠤꠇꠣꠘꠤꠞ ꠟꠣꠉꠤ ꠛꠣꠔꠍꠦꠟꠟ ꠀꠞ ꠖꠣꠘ ꠉꠥꠡ꠆ꠐꠤꠞ ꠅꠢꠤꠍꠣꠝꠣꠇꠞ ꠙꠥꠀ ꠀꠢꠟꠤꠀꠛꠞ ꠖꠤꠟꠅ ꠝꠣꠛꠥꠖꠦ ꠀꠈꠟ ꠖꠤꠍꠂꠘ।
35 ꠔꠣꠁꠘ ꠄꠞꠣꠞꠦ ꠘꠣꠘꠣꠘ ꠎꠣꠔꠞ ꠘꠇꠡꠣꠞ ꠇꠣꠝ, ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠇꠣꠙꠠ ꠛꠣꠁꠘ ꠇꠞꠣ, ꠘꠇꠡꠣ ꠇꠞꠣ, ꠡꠤꠟꠣꠁ ꠇꠞꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ ꠡꠤꠟꠣꠁ ꠇꠞꠣꠞꠅ ꠀꠈꠟ ꠖꠤꠍꠂꠘ। ꠔꠣꠞꠣ ꠢꠇꠟ ꠘꠝꠥꠘꠣꠞ ꠀꠔꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠀꠞ ꠘꠤꠎꠞ ꠝꠘ ꠕꠣꠇꠤ ꠘꠣꠘꠣꠘ ꠘꠝꠥꠘꠣꠞ ꠘꠇꠡꠣ ꠛꠣꠘꠣꠁꠔꠣ ꠙꠣꠞꠛꠣ।”