26
ꠀꠟ꠆ꠟꠣꠞ ꠊꠞꠞ ꠝꠤꠟꠘ ꠔꠣꠝ꠆ꠛꠥ
1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠖꠡ ꠐꠥꠇꠞꠣ ꠙꠦꠌꠣꠁꠟ ꠡꠥꠔꠣꠞ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠀꠝꠣꠞ ꠊꠞꠞ ꠙꠞ꠆ꠖꠣꠁꠘ ꠛꠣꠘꠣꠁꠅ। ꠀꠞ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠜꠣꠟꠣ ꠃꠡ꠆ꠔꠣꠖꠞꠦꠖꠤ ꠄꠞ ꠝꠣꠎꠦ ꠇꠣꠞꠥꠛꠤ ꠅꠇꠟꠞ ꠍꠛꠤ ꠛꠣꠁꠘ ꠇꠞꠣꠁꠅ।
2 ꠢꠇꠟ ꠐꠥꠇꠞꠣꠁꠘ ꠄꠇ ꠝꠣꠙꠞ ꠅꠁꠛ, ꠟꠣꠝ꠆ꠛꠣꠄ ꠀꠐꠣꠁꠡ ꠀꠔ ꠀꠞ ꠚꠣꠠꠦ ꠌꠣꠁꠞ ꠀꠔ।
3 ꠁ ꠐꠥꠇꠞꠣꠁꠘ꠆ꠔꠞ ꠙꠣꠌꠈꠣꠘ ꠙꠣꠌꠈꠣꠘ ꠇꠞꠤ ꠄꠇꠈꠣꠘꠅ ꠎꠥꠠꠣ ꠖꠤꠀ, ꠖꠥꠈꠣꠘ ꠛꠠ ꠉꠤꠟꠣꠚ ꠛꠣꠘꠣꠁꠔꠦ ꠅꠁꠛ।
4 ꠛꠠ ꠉꠤꠟꠣꠚꠞ ꠙꠄꠟꠣ ꠐꠥꠇꠞꠣꠞ ꠙꠣꠡꠞ ꠄꠇ ꠇꠤꠘꠣꠞꠅ ꠟꠤꠟꠥꠀ ꠡꠥꠔꠣꠖꠤ ꠢꠥꠇꠞ ꠚꠥꠠ ꠛꠣꠘꠣꠁꠔꠦ ꠅꠁꠛ। ꠖꠥꠍꠞꠣ ꠐꠥꠇꠞꠣꠔꠅ ꠅꠃꠟꠣ ꠇꠞꠔꠦ ꠅꠁꠛ।
5 ꠙꠄꠟꠣ ꠉꠤꠟꠣꠚꠞ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠀꠞ ꠖꠥꠍꠞꠣ ꠉꠤꠟꠣꠚꠅ ꠅꠃꠟꠣ ꠙꠁꠘ꠆ꠌꠣꠡꠉꠥ ꠚꠥꠠ ꠖꠤꠔꠦ ꠅꠁꠛ। ꠖꠥꠁꠅ ꠛꠠ ꠉꠤꠟꠣꠚꠞ ꠢꠥꠇꠞ ꠚꠥꠠ ꠄꠉꠥ ꠀꠞꠦꠉꠥꠞ ꠃꠟꠐꠣꠝꠥꠈꠣ ꠕꠣꠇꠛ।
6 ꠛꠣꠖꠦ ꠡꠥꠘꠣꠖꠤ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠚꠥꠠꠞ ꠝꠣꠎꠦꠖꠤ ꠢꠣꠞꠣꠁꠀ, ꠛꠠ ꠖꠥꠁꠅ ꠉꠤꠟꠣꠚꠞꠦ ꠀꠐꠇꠣꠁ ꠖꠤꠅ। ꠔꠦꠃ ꠁ ꠖꠥꠁꠅ ꠐꠥꠇꠞꠣꠖꠤ ꠄꠇꠈꠣꠘ ꠊꠞ ꠔꠤꠀꠞ ꠅꠁꠛ।
7 “ꠀꠝꠣꠞ ꠊꠞꠞ ꠃꠙꠞ ꠉꠥꠞꠣꠞ ꠟꠣꠉꠤ ꠍꠣꠉꠟꠞ ꠞꠥꠝꠣ ꠖꠤꠀ ꠉꠤꠟꠣꠚꠞ ꠟꠣꠈꠣꠘ ꠄꠉꠣꠞꠅꠈꠣꠘ ꠐꠥꠇꠞꠣ ꠛꠣꠘꠣꠘꠤ ꠟꠣꠉꠛ।
8 ꠢꠇꠟ ꠐꠥꠇꠞꠣꠁꠘ ꠄꠇ ꠝꠣꠙꠞ ꠅꠁꠛ, ꠔꠤꠡ ꠀꠔ ꠟꠣꠝ꠆ꠛꠣ ꠀꠞ ꠌꠣꠁꠞ ꠀꠔ ꠚꠣꠠ।
9 ꠅꠘ ꠕꠣꠇꠤ ꠙꠣꠌ ꠐꠥꠇꠞꠣ ꠄꠇꠟꠉꠦ ꠎꠥꠠꠣ ꠖꠤꠀ ꠛꠠ ꠄꠇ ꠉꠤꠟꠣꠚ ꠛꠣꠘꠣꠁꠔꠦ ꠅꠁꠛ। ꠀꠞ ꠛꠣꠇꠤ ꠍꠄ ꠐꠥꠇꠞꠣ ꠎꠥꠠꠣ ꠖꠤꠀ, ꠛꠠ ꠀꠞꠇ ꠉꠤꠟꠣꠚ ꠛꠣꠘꠣꠁꠀ ꠢꠣꠞꠟꠦ, ꠅꠃ ꠖꠥꠍꠞꠣ ꠉꠤꠟꠣꠚꠞ ꠎꠦ ꠐꠥꠇꠞꠣ ꠛꠣꠠꠔꠤ ꠞꠁꠛ, ꠅꠈꠣꠘꠞꠦ ꠔꠣꠝ꠆ꠛꠥꠞ ꠍꠣꠝꠘꠞ ꠛꠣꠄ ꠖꠥꠁ ꠜꠣꠁꠘ꠆ꠎ ꠇꠞꠤ ꠖꠤꠔꠦ ꠅꠁꠛ।
10 ꠙꠄꠟꠣ ꠛꠠ ꠉꠤꠟꠣꠚꠞ ꠙꠣꠡꠞ ꠄꠇ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠛꠣꠘꠣꠁꠔꠦ ꠅꠁꠛ, ꠀꠞ ꠖꠥꠍꠞꠣ ꠉꠤꠟꠣꠚꠅ-ꠅ ꠅꠃꠟꠣ ꠅꠁꠛ।
11 ꠛꠣꠖꠦ ꠙꠤꠔꠟ ꠖꠤꠀ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠢꠥꠇꠞ ꠚꠥꠠꠞ ꠝꠣꠎꠦ ꠢꠣꠞꠣꠁꠀ, ꠅꠃ ꠛꠠ ꠖꠥꠁꠅ ꠉꠤꠟꠣꠚ ꠄꠇꠈꠣꠘꠅ ꠎꠥꠠꠣ ꠖꠤꠔꠦ ꠅꠁꠛ। ꠔꠦꠃ ꠁ ꠖꠥꠁꠅ ꠉꠤꠟꠣꠚ ꠝꠤꠟꠤꠀ ꠄꠇꠈꠣꠘ ꠍꠣꠘꠤ ꠅꠁꠛ।
12 ꠍꠣꠉꠟꠞ ꠞꠥꠝꠣꠞ ꠛꠠ ꠉꠤꠟꠣꠚꠞ ꠎꠦ ꠀꠗꠣ ꠐꠥꠇꠞꠣ ꠛꠣꠠꠔꠤ ꠅꠁꠛ, ꠁꠈꠣꠘ ꠈꠞꠦꠖꠤ ꠟꠐꠇꠣꠁꠟ ꠞꠁꠛ।
13 ꠁ ꠉꠤꠟꠣꠚ ꠈꠣꠘ ꠔꠟꠞ ꠇꠣꠙꠠ ꠕꠣꠇꠤ ꠄꠇ ꠀꠔ ꠛꠠ ꠅꠀꠄ ꠁꠈꠣꠘ ꠖꠥꠁꠅ ꠉꠣꠟꠣꠛꠣꠄ ꠟꠐꠇꠣꠁꠟ ꠞꠁꠀ ꠢꠣꠞꠣ ꠊꠞꠞꠦ ꠉꠥꠞꠤꠟꠤꠛ।
14 ꠄꠞ ꠃꠙꠞ ꠉꠥꠞꠣꠞ ꠟꠣꠉꠤ ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣꠖꠤ ꠀꠞꠅꠈꠣꠘ ꠉꠤꠟꠣꠚ ꠛꠣꠘꠣꠁꠀ ꠉꠥꠞꠤ ꠖꠤꠔꠦ ꠅꠁꠛ। ꠛꠣꠖꠦ ꠄꠞ ꠃꠙꠞꠦ ꠖꠞꠤꠀꠞ ꠚꠥʼ ꠝꠣꠍꠞ ꠌꠣꠝꠠꠣꠖꠤ ꠍꠣꠘꠤ ꠔꠂꠀꠞ ꠇꠞꠤ ꠉꠥꠞꠤ ꠖꠤꠔꠦ ꠅꠁꠛ।”
ꠀꠟ꠆ꠟꠣꠞ ꠊꠞꠞ ꠚ꠆ꠞꠦꠁꠝ ꠛꠣꠘꠣꠘꠤꠞ ꠟꠣꠇꠠꠤ-ꠔꠇ꠆ꠔꠣ
15 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠣꠞ ꠊꠞꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠇʼꠈꠣꠘ ꠚ꠆ꠞꠦꠁꠝ ꠛꠣꠘꠣꠘꠤ ꠟꠣꠉꠛ।
16 ꠙꠞꠔꠦꠇ ꠚ꠆ꠞꠦꠁꠝ ꠛꠣꠘꠣꠁꠛꠣꠄ ꠖꠡ ꠀꠔ ꠟꠣꠝ꠆ꠛꠣ ꠀꠞ ꠖꠦꠠ ꠀꠔ ꠚꠣꠠ।
17 ꠅꠃ ꠚ꠆ꠞꠦꠁꠝꠅ ꠖꠥꠉꠥ ꠇꠞꠤ ꠙꠣꠄꠀ ꠕꠣꠇꠛ। ꠢꠇꠟ ꠚ꠆ꠞꠦꠁꠝ ꠄꠇꠟꠣꠈꠣꠘ ꠛꠣꠘꠣꠁꠔꠦ ꠅꠁꠛ।
18 ꠖꠇ꠆ꠇꠤꠘ ꠉꠣꠟꠣꠞ ꠟꠣꠉꠤ ꠛꠤꠡꠈꠣꠘ ꠚ꠆ꠞꠦꠁꠝ ꠛꠣꠘꠣꠘꠤ ꠟꠣꠉꠛ।
19 ꠁ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠦ ꠖꠦꠅꠀꠞ ꠟꠣꠉꠤ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠛꠣꠘꠣꠘꠤ ꠟꠣꠉꠛ, ꠙꠞꠔꠦꠇ ꠚ꠆ꠞꠦꠁꠝꠞ ꠖꠥꠁ ꠙꠣꠄꠀꠞ ꠟꠣꠉꠤ ꠖꠥꠉꠥ ꠌꠥꠘ꠆ꠉꠤ ꠟꠣꠉꠛ।
20 ꠀꠝꠣꠞ ꠊꠞꠞ ꠃꠔ꠆ꠔꠞ ꠉꠣꠟꠣꠞ ꠟꠣꠉꠤꠀꠅ ꠛꠤꠡꠈꠣꠘ ꠚ꠆ꠞꠦꠁꠝ ꠟꠣꠉꠛ,
21 ꠀꠞ ꠙꠞꠔꠦꠇ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠞ ꠟꠣꠉꠤ ꠖꠥꠉꠥ ꠇꠞꠤ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠛꠣꠘꠣꠘꠤ ꠟꠣꠉꠛ।
22 ꠙꠁꠌꠝꠞ ꠉꠣꠟꠣꠞ ꠟꠣꠉꠤ, ꠝꠣꠘꠤ ꠈꠞ ꠉꠣꠟꠣꠞ ꠟꠣꠉꠤ ꠍꠄꠈꠣꠘ ꠚ꠆ꠞꠦꠁꠝ,
23 ꠀꠞ ꠈꠞꠞ ꠖꠥꠁꠅ ꠇꠥꠘꠣꠞ ꠟꠣꠉꠤ ꠀꠞꠅ ꠖꠥꠈꠣꠘ ꠚ꠆ꠞꠦꠁꠝ ꠟꠣꠉꠛ।
24 ꠁ ꠖꠥꠁ ꠚ꠆ꠞꠦꠁꠝꠞꠦ ꠖꠥꠁ ꠇꠥꠘꠣꠞ ꠖꠥꠁꠅ ꠚ꠆ꠞꠦꠁꠝꠞ ꠟꠉꠦ ꠔꠟꠦ-ꠃꠙꠞꠦ ꠄꠇꠈꠣꠘꠅ ꠎꠥꠠꠣ ꠖꠤꠔꠦ ꠅꠁꠛ। ꠙꠞꠔꠦꠇ ꠇꠥꠘꠣꠞ ꠖꠥꠁ ꠚ꠆ꠞꠦꠁꠝ ꠗꠣꠞꠞ ꠚ꠆ꠞꠦꠁꠝꠞ ꠟꠉꠦ ꠛꠣꠔ꠆ꠔꠤ ꠝꠣꠞꠤꠀ ꠄꠇꠟꠉꠦ ꠎꠥꠠꠣ ꠖꠤꠔꠦ ꠅꠁꠛ। ꠖꠥꠁꠅ ꠇꠥꠘꠣ ꠄꠇꠟꠣꠈꠣꠘ ꠅꠁꠛ।
25 ꠔꠦꠃ ꠈꠞꠦꠖꠤ ꠀꠐꠈꠣꠘ ꠚ꠆ꠞꠦꠁꠝ ꠅꠁꠛ, ꠀꠞ ꠙꠞꠔꠦꠇ ꠚ꠆ꠞꠦꠁꠝꠞ ꠔꠟꠦ ꠖꠦꠅꠀꠞ ꠟꠣꠉꠤ ꠖꠥꠉꠥ ꠇꠞꠤ ꠡꠥꠟꠉꠥ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠛ।
26 “ꠔꠥꠝꠤ ꠚ꠆ꠞꠦꠁꠝꠞꠦ ꠎꠥꠠꠣ ꠖꠤꠛꠣꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠇꠄꠉꠥ ꠟꠣꠝ꠆ꠛꠣ ꠛꠣꠔ꠆ꠔꠤ ꠛꠣꠘꠣꠁꠅ।
27 ꠄꠞ ꠝꠣꠎꠦ ꠙꠣꠌꠉꠥ ꠛꠣꠔ꠆ꠔꠤ ꠊꠞꠞ ꠄꠇ ꠉꠣꠟꠣꠞ ꠟꠣꠉꠤ, ꠀꠞ ꠛꠣꠇꠤ ꠙꠣꠌꠉꠥ ꠀꠞꠇ ꠉꠣꠟꠣꠞ ꠟꠣꠉꠤ, ꠀꠞ ꠙꠣꠌꠉꠥ ꠟꠣꠉꠛ ꠈꠞ ꠉꠣꠟꠣ, ꠝꠣꠘꠤ ꠙꠌꠤꠝ ꠉꠣꠟꠣꠞ ꠚ꠆ꠞꠦꠁꠝꠞ ꠟꠣꠉꠤ।
28 ꠚ꠆ꠞꠦꠁꠝꠞ ꠝꠣꠎꠈꠣꠘꠅ ꠟꠣꠉꠣꠁꠟ ꠅꠃ ꠛꠣꠔ꠆ꠔꠤꠖꠤ ꠢꠇꠟ ꠚ꠆ꠞꠦꠁꠝꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠙꠞ꠆ꠎꠘ꠆ꠔ ꠀꠐꠇꠣꠁꠛꠣꠄ।
29 ꠚ꠆ꠞꠦꠁꠝ ꠈꠣꠘꠣꠁꠘ ꠡꠥꠘꠣꠖꠤ ꠟꠦꠙꠔꠦ ꠅꠁꠛ, ꠀꠞ ꠛꠣꠔ꠆ꠔꠤ ꠢꠣꠞꠣꠘꠤꠞ ꠟꠣꠉꠤ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠚ꠆ꠞꠦꠁꠝꠅ ꠟꠣꠉꠣꠁꠔꠦ ꠅꠁꠛ। ꠁ ꠛꠣꠔ꠆ꠔꠤ ꠅꠇꠟꠅ ꠡꠥꠘꠣꠖꠤ ꠟꠦꠙꠔꠦ ꠅꠁꠛ।
30 ꠀꠝꠣꠞ ꠊꠞꠞ ꠎꠦ ꠘꠇꠡꠣ ꠔꠥꠝꠣꠞꠦ ꠅꠃ ꠔꠥꠞ ꠙꠣꠠꠞ ꠃꠙꠞꠦ ꠖꠦꠈꠣꠁꠟꠣꠝ, ꠔꠥꠝꠤ ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠁꠐꠣ ꠔꠂꠀꠞ ꠇꠞꠣꠁꠅ।”
ꠀꠟ꠆ꠟꠣꠞ ꠊꠞꠞ ꠟꠣꠉꠤ ꠙꠞ꠆ꠖꠣ
31 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠟꠤꠟꠥꠀ, ꠟꠣꠟ, ꠛꠣꠁꠋꠉꠘꠤ ꠡꠥꠔꠣ ꠀꠞ ꠙꠦꠌꠣꠁꠟ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠅ। ꠜꠣꠟꠣ ꠇꠥꠘꠥ ꠃꠡ꠆ꠔꠣꠖꠞꠦꠖꠤ ꠄꠞ ꠃꠙꠞꠦ ꠇꠣꠞꠥꠛꠤ ꠅꠇꠟꠞ ꠍꠛꠤ ꠛꠣꠁꠘ ꠇꠞꠣꠁꠅ।
32 ꠁ ꠙꠞ꠆ꠖꠣꠈꠣꠘ ꠛꠣꠛꠟꠣ ꠟꠣꠇꠠꠤꠖꠤ ꠌꠣꠁꠞꠐꠣ ꠈꠥꠐꠤꠞ ꠟꠉꠦ ꠟꠣꠉꠣꠁꠀ ꠡꠥꠘꠣꠞ ꠇꠠꠣꠖꠤ ꠟꠐꠇꠣꠁ ꠖꠤꠛꠣꠄ, ꠈꠥꠐꠤꠞ ꠝꠣꠕꠣꠔ ꠡꠥꠘꠣꠞ ꠇꠠꠣ ꠟꠣꠉꠣꠁꠛꠣꠄ। ꠀꠞ ꠈꠥꠐꠤꠉꠥꠁꠘ ꠡꠥꠘꠣꠖꠤ ꠟꠦꠙꠣꠁꠛꠣꠄ, ꠈꠥꠐꠤꠞ ꠔꠟꠣꠔ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠣꠁꠛꠣꠄ।
33 ꠙꠞ꠆ꠖꠣꠞ ꠃꠙꠞꠞ ꠡꠥꠔꠤ ꠇꠣꠙꠠꠅ ꠟꠣꠉꠣꠁꠟ ꠢꠥꠇꠞ ꠟꠉꠦ ꠙꠞ꠆ꠖꠣꠈꠣꠘ ꠟꠐꠇꠣꠁꠟ ꠞꠁꠛ। ꠁ ꠙꠞ꠆ꠖꠣꠞ ꠈꠞꠦ ꠡꠣꠢꠣꠖꠔ ꠡꠘ꠆ꠖꠥꠇ ꠕꠁꠛꠣꠄ। ꠙꠞ꠆ꠖꠣꠖꠤ ꠀꠝꠣꠞ ꠊꠞꠞ ꠢꠦꠞꠦꠝ ꠡꠞꠤꠚ, ꠝꠣꠘꠤ ꠈꠣꠍ ꠙꠣꠇ ꠎꠣꠉꠣ ꠀꠞ ꠙꠣꠇ ꠎꠣꠉꠣꠞ ꠝꠣꠎꠈꠣꠘꠅ ꠛꠦꠠꠣ ꠖꠤꠅ।
34 ꠅꠃ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞ ꠃꠙꠞꠦ ꠄꠞ ꠓꠣꠇꠘꠣ ꠟꠣꠉꠣꠁꠅ।
35 ꠁ ꠙꠞ꠆ꠖꠣꠞ ꠛꠣꠞꠦ ꠢꠦꠞꠦꠝ ꠡꠞꠤꠚꠞ ꠃꠔ꠆ꠔꠞ ꠉꠣꠟꠣꠔ ꠙꠛꠤꠔ꠆ꠞ ꠞꠥꠐꠤ ꠞꠣꠈꠣꠞ ꠐꠦꠛꠥꠟꠈꠣꠘ ꠕꠁꠅ, ꠀꠞ ꠄꠞ ꠃꠟꠐꠣꠝꠥꠈꠣ ꠖꠇ꠆ꠇꠤꠘ ꠉꠣꠟꠣꠔ ꠕꠁꠅ ꠌꠦꠞꠣꠉ ꠖꠣꠘꠤ।
36 “ꠀꠝꠣꠞ ꠊꠞꠞ ꠖꠥꠀꠞꠞ ꠟꠣꠉꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠅ, ꠁꠈꠣꠘ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠀ ꠢꠣꠞꠤ, ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣꠖꠤ ꠘꠇꠡꠣ ꠇꠞꠤꠅ।
37 ꠁ ꠙꠞ꠆ꠖꠣꠞ ꠟꠣꠉꠤ ꠡꠥꠘꠣꠞ ꠇꠠꠣ ꠀꠞ ꠛꠣꠛꠟꠣ ꠟꠣꠇꠠꠤꠞ ꠙꠣꠌꠐꠣ ꠈꠥꠐꠤ ꠛꠣꠘꠣꠁꠅ। ꠈꠥꠐꠤꠉꠥꠁꠘ ꠡꠥꠘꠣꠖꠤ ꠟꠦꠙꠣꠁꠅ, ꠈꠥꠐꠤꠞ ꠔꠟꠣꠔ ꠙꠤꠔꠟꠞ ꠙꠣꠌꠉꠥ ꠌꠥꠘ꠆ꠉꠤ ꠟꠣꠉꠣꠁꠅ।”