17
ꠛꠘꠤ ꠁꠍꠞꠣꠁꠟꠞ ꠇꠣꠁꠎ꠆ꠎꠣ, ꠙꠣꠔ꠆ꠔꠞ ꠕꠣꠇꠤ ꠇꠥꠖꠞꠔꠤ ꠙꠣꠘꠤ
1 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠍꠤꠘ ꠝꠞꠥꠜꠥꠝꠤ ꠕꠣꠇꠤ ꠞꠅꠀꠘꠣ ꠖꠤꠀ, ꠄꠇ ꠎꠣꠉꠣ ꠕꠣꠇꠤ ꠀꠞꠇ ꠎꠣꠉꠣꠔ ꠉꠤꠀ ꠉꠤꠀ ꠢꠦꠡꠦ ꠞꠚꠤꠖꠤꠝꠅ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ, ꠅꠁꠟꠦ ꠢꠤꠘꠅ ꠝꠣꠘꠡꠞ ꠈꠣꠅꠀꠞ ꠙꠣꠘꠤ ꠀꠍꠤꠟ ꠘꠣ।
2 ꠄꠞꠟꠣꠉꠤ ꠝꠣꠘꠡꠦ ꠝꠥꠍꠣꠞ ꠟꠉꠦ ꠇꠣꠁꠎ꠆ꠎꠣ ꠇꠞꠤ ꠇꠁꠟꠣ, “ꠀꠝꠞꠣꠞꠦ ꠈꠣꠅꠀꠞ ꠙꠣꠘꠤ ꠖꠦꠃꠇ꠆ꠇꠣ।”
ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠇꠦꠘꠦ ꠀꠝꠣꠞ ꠟꠉꠦ ꠇꠣꠁꠎ꠆ꠎꠣ ꠇꠞꠞꠣꠄ? ꠇꠦꠘꠦ ꠝꠣꠛꠥꠖꠞꠦ ꠙꠞꠤꠇ꠆ꠇꠣ ꠇꠞꠞꠣꠄ?”
3 ꠝꠣꠘꠡꠦ ꠙꠣꠘꠤꠞ ꠙꠤꠀꠍꠦ ꠇꠣꠢꠤꠟ ꠅꠁꠀ ꠝꠥꠍꠣꠞ ꠛꠤꠞꠥꠖ꠆ꠖꠦ ꠉꠣꠟꠤ-ꠉꠣꠟꠣꠎ ꠇꠞꠤ ꠇꠁꠟꠣ, “ꠔꠥꠝꠤ ꠀꠝꠞꠣꠞꠦ ꠝꠣꠞꠔꠣꠄ ꠇꠞꠤ ꠝꠤꠡꠞ ꠖꠦꠡ ꠕꠣꠇꠤ ꠀꠘꠍ ꠘꠤ? ꠀꠝꠞꠣꠞꠦ, ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ, ꠀꠝꠞꠣꠞ ꠙꠡꠥꠞ ꠙꠣꠟꠞꠦ ꠀꠘꠣ-ꠙꠣꠘꠤꠄ ꠝꠣꠞꠔꠣꠄ ꠇꠞꠤ ꠅꠘꠅ ꠀꠘꠍ ꠘꠤ?”
4 ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠤ ꠇꠁꠟꠣ, “ꠀꠝꠤ ꠁ ꠝꠣꠘꠡꠞꠦ ꠇꠤꠔꠣ ꠇꠞꠔꠣꠝ? ꠀꠞ ꠕꠥꠠꠣ ꠖꠦꠞꠤ ꠅꠁꠟꠦꠃ ꠔ ꠔꠣꠞꠣ ꠙꠣꠔ꠆ꠔꠞꠖꠤ ꠁꠐꠣꠁꠀ ꠀꠝꠣꠞꠦ ꠝꠣꠞꠤꠟꠤꠛꠣ।”
5 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠔꠥꠝꠤ ꠎꠦ ꠟꠣꠑꠤꠖꠤ ꠘꠤꠟ ꠘꠖꠅ ꠛꠣꠠꠤ ꠝꠣꠞꠍꠟꠣꠄ, ꠢꠃ ꠟꠣꠑꠤ ꠀꠔꠅ ꠟꠅ, ꠀꠞ ꠛꠘꠤ ꠁꠍꠞꠣꠁꠟꠞ ꠇꠄꠎꠘ ꠝꠥꠞꠛ꠆ꠛꠤꠞꠦ ꠟꠉꠦ ꠟꠁꠀ ꠝꠣꠘꠡꠞ ꠀꠉꠦ ꠀꠉꠦ ꠎꠣꠅ।
6 ꠉꠤꠀ ꠢꠣꠞꠟꠦ ꠀꠝꠤ ꠔꠥꠞ ꠙꠣꠠꠞ ꠇꠣꠘ꠆ꠖꠣꠔ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠎꠤꠞ ꠅꠁꠝꠥ, ꠔꠥꠝꠤ ꠅꠃ ꠙꠣꠔ꠆ꠔꠞꠅ ꠛꠣꠠꠤ ꠝꠣꠞꠟꠦ ꠅꠉꠥ ꠕꠣꠇꠤ ꠙꠣꠘꠤ ꠛꠣꠞ ꠅꠁꠛ, ꠔꠦꠃ ꠝꠣꠘꠡꠦ ꠈꠣꠁꠔꠣ ꠙꠣꠞꠛꠣ।” ꠢꠣꠍꠣꠃ ꠝꠥꠍꠣꠄ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞ ꠍꠣꠝꠘꠦ ꠅꠃꠟꠣ ꠇꠞꠟꠣ।
7 ꠅꠃ ꠞꠚꠤꠖꠤꠝꠅ ꠀꠁꠀ ꠝꠣꠘꠡꠦ ꠇꠣꠁꠎ꠆ꠎꠣ ꠇꠞꠤ ꠇꠁꠍꠟꠣ, “ꠝꠣꠛꠥꠖ ꠇꠤꠔꠣ ꠀꠝꠞꠣꠞ ꠟꠉꠦ ꠀꠍꠂꠘ ꠘꠤ, ꠘꠣ ꠢꠞꠤ ꠉꠦꠍꠂꠘ?” ꠅꠃꠟꠣ ꠇꠁꠀ ꠔꠣꠞꠣ ꠝꠣꠛꠥꠖꠞꠦ ꠙꠞꠤꠇ꠆ꠇꠣ ꠇꠞꠍꠟꠣ ꠇꠞꠤ, ꠁ ꠎꠣꠉꠣꠞ ꠘꠣꠝ ꠅꠁꠟ ꠝꠣꠍꠣ [ꠝꠣꠘꠤ, ꠙꠞꠤꠇ꠆ꠇꠣ] ꠀꠞ ꠝꠦꠞꠤꠛꠣ [ꠝꠣꠘꠤ, ꠇꠣꠁꠎ꠆ꠎꠣ]।
ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠛꠘꠤ ꠁꠍꠞꠣꠁꠟꠞ ꠎꠥꠖ꠆ꠖ
8 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠀꠝꠣꠟꠦꠇꠤ ꠍꠤꠙꠣꠁ ꠅꠇꠟ ꠞꠚꠤꠖꠤꠝꠅ ꠀꠁꠟꠣ।
9 ꠔꠦꠃ ꠝꠥꠍꠣꠄ ꠔꠣꠘ ꠈꠣꠖꠤꠝ ꠢꠎꠞꠔ ꠁꠃꠍꠣꠞꠦ ꠇꠁꠟꠣ, “ꠔꠥꠝꠤ ꠀꠝꠞꠣꠞ ꠝꠣꠘꠥꠡ ꠕꠣꠇꠤ ꠟꠣꠠꠣꠁ ꠇꠞꠞꠣ ꠎꠘ ꠛꠣꠍꠤꠀ ꠘꠤꠀ, ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠣꠔ ꠎꠣꠅ। ꠀꠝꠤꠅ ꠇꠣꠁꠟ ꠀꠟ꠆ꠟꠣꠁ ꠇꠥꠖꠞꠔꠤ ꠟꠣꠑꠤ ꠀꠔꠅ ꠟꠁꠀ ꠙꠣꠠꠞ ꠃꠙꠞꠦ ꠃꠛꠣꠁꠝꠥ।”
10 ꠁꠃꠍꠣꠄꠅ ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠟꠣ, ꠝꠥꠍꠣ, ꠢꠣꠞꠥꠘ, ꠀꠞ ꠢꠥꠞ, ꠅꠃ ꠔꠤꠘꠅ ꠎꠘ ꠉꠤꠀ ꠙꠣꠠꠞ ꠐꠤꠟ꠆ꠟꠣꠞ ꠃꠙꠞꠦ ꠃꠑꠟꠣ।
11 ꠛꠣꠖꠦ ꠖꠦꠈꠣ ꠉꠦꠟ, ꠝꠥꠍꠣꠄ ꠎꠔ ꠡꠝꠄ ꠀꠔ ꠃꠌꠣ ꠇꠞꠤ ꠞꠣꠈꠂꠘ, ꠅꠔ ꠡꠝꠄ ꠛꠘꠤ ꠁꠍꠞꠣꠁꠟꠞ ꠖꠟ ꠎꠤꠔꠂꠘ, ꠅꠁꠟꠦ ꠝꠥꠍꠣꠄ ꠀꠔ ꠟꠣꠝꠣꠁꠟꠦꠃ ꠀꠝꠣꠟꠦꠇꠤ ꠖꠟ ꠎꠤꠔꠂꠘ।
12 ꠀꠡ꠆ꠔꠦ ꠀꠡ꠆ꠔꠦ ꠝꠥꠍꠣꠞ ꠀꠔ ꠜꠣꠞ ꠅꠀ ꠗꠞꠟ। ꠅꠃ ꠔꠣꠞꠣ ꠄꠇꠈꠣꠘ ꠙꠣꠔ꠆ꠔꠞ ꠀꠘꠤꠀ ꠝꠥꠍꠣꠞꠦ ꠛꠁꠛꠣꠞ ꠛꠦꠛꠡ꠆ꠔꠣ ꠖꠤꠟꠣ। ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠝꠥꠍꠣ ꠛꠁꠟꠣ, ꠢꠣꠞꠥꠘ ꠀꠞ ꠢꠥꠞ ꠖꠥꠁꠅꠎꠘꠦ ꠝꠥꠍꠣꠞ ꠖꠥꠁ ꠉꠣꠟꠣꠔ ꠃꠛꠣꠁꠀ ꠔꠣꠘ ꠀꠔ ꠃꠌꠣ ꠇꠞꠤ ꠗꠞꠟꠣ। ꠔꠦꠃ ꠡꠥꠞꠥꠎ ꠒꠥꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠣꠘ ꠀꠔ ꠃꠌꠣ ꠞꠁꠟ।
13 ꠄꠞꠟꠣꠉꠤ ꠀꠝꠣꠟꠦꠇꠤ ꠍꠤꠙꠣꠁꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠁꠃꠍꠣ ꠎꠤꠔꠤꠉꠦꠟꠣ।
14 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠁꠔꠣ ꠁꠀꠖ ꠞꠣꠈꠣꠞ ꠟꠣꠉꠤ ꠔꠥꠝꠤ ꠄꠇꠈꠣꠘ ꠇꠤꠔꠣꠛꠞ ꠝꠣꠎꠦ ꠟꠦꠈꠤꠀ ꠕꠅ ꠀꠞ ꠁꠃꠍꠣꠞꠦꠅ ꠎꠣꠘꠣꠅ। ꠝꠘꠅ ꠞꠣꠈꠤꠅ, ꠀꠝꠤ ꠖꠥꠘꠤꠀꠞ ꠛꠥꠇ ꠕꠣꠇꠤ ꠀꠝꠣꠟꠦꠇꠤ ꠅꠇꠟꠞ ꠘꠣꠝ ꠝꠤꠐꠣꠁꠟꠤꠝꠥ।”
15 ꠝꠥꠍꠣꠄ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠄꠞ ꠘꠣꠝ ꠕꠁꠟꠣ, ꠝꠣꠛꠥꠖꠃ ꠀꠝꠣꠞ ꠎꠥꠖ꠆ꠖꠞ ꠏꠣꠘ꠆ꠒꠣ।
16 ꠔꠣꠁꠘ ꠇꠁꠟꠣ, “ꠝꠣꠛꠥꠖꠞ ꠎꠥꠖ꠆ꠖꠞ ꠏꠣꠘ꠆ꠒꠣ ꠀꠝꠞꠣ ꠀꠔꠅ ꠟꠁ, ꠔꠦꠃ ꠝꠣꠛꠥꠖꠦꠅ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠛꠣ।”