ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚ ꠖꠥꠍꠞꠣ ꠍꠤꠙꠣꠞꠣ
ꠢꠤꠎꠞꠔ
ꠙꠞꠤꠌꠤꠔꠤ
ꠢꠤꠎꠞꠔ ꠍꠤꠙꠣꠞꠣ ꠅꠁꠟ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠞ ꠖꠥꠁ ꠘꠝ꠆ꠛꠞ ꠍꠤꠙꠣꠞꠣ। ꠀꠟ꠆ꠟꠣ ꠙꠣꠇꠦ ꠅꠃ ꠍꠤꠙꠣꠞꠣꠞ ꠝꠣꠎꠦ ꠔꠣꠘ ꠙꠄꠖꠣ ꠇꠞꠣ ꠀꠡꠞꠣꠚꠥꠟ ꠝꠈꠟꠥꠇꠣꠔꠞ (ꠡ꠆ꠞꠤꠡ꠆ꠐꠤꠞ ꠡꠦꠞꠣ ꠎꠣꠔ) ꠉꠦꠍꠦ ꠘꠤꠎꠞ ꠙꠞꠤꠌꠄ ꠎꠣꠁꠞ ꠇꠞꠍꠂꠘ। ꠀꠟ꠆ꠟꠣꠞ ꠝꠥꠘꠡꠣ-ꠝꠞ꠆ꠎꠤ, ꠇꠥꠘ ꠇꠣꠝ ꠇꠞꠟꠦ ꠔꠣꠁꠘ ꠈꠥꠡꠤ ꠀꠞ ꠇꠥꠘ ꠇꠣꠝꠦ ꠔꠣꠁꠘ ꠛꠦꠎꠣꠞ ꠅꠁꠘ, ꠀꠞ ꠔꠣꠘ ꠛꠘ꠆ꠖꠣ ꠅꠇꠟꠞꠦ ꠔꠣꠁꠘ ꠇꠔ ꠝꠣꠄꠀ ꠇꠞꠂꠘ, ꠘꠣꠚꠞꠝꠣꠘ ꠅꠇꠟꠞꠦ ꠔꠃꠛꠣ ꠇꠞꠣꠞ ꠇꠔ ꠛꠦꠡꠤ ꠡꠥꠎꠥꠉ ꠖꠦꠁꠘ, ꠅꠃ ꠍꠤꠙꠣꠞꠣꠞ ꠝꠣꠎꠦ ꠁꠔꠣ ꠎꠣꠘꠣ ꠎꠣꠄ।
ꠁ ꠍꠤꠙꠣꠞꠣꠞ ꠝꠣꠎꠦ ꠀꠟ꠆ꠟꠣꠞ ꠘꠛꠤ ꠢꠎꠞꠔ ꠝꠥꠍꠣ (ꠀ꠩) ꠅꠞ ꠁꠔꠤꠢꠣꠡ ꠀꠍꠦ। ꠔꠣꠘ ꠎꠘꠝ, ꠔꠣꠁꠘ ꠇꠤꠟꠣ ꠢꠥꠞꠥ ꠕꠣꠇꠤ ꠛꠠ ꠅꠁꠟꠣ, ꠇꠦꠝꠘꠦ ꠖꠦꠡꠣꠘ꠆ꠔꠞꠤ ꠅꠁꠟꠣ, ꠀꠞ ꠇꠥꠘ ꠢꠣꠟꠔꠦ ꠀꠟ꠆ꠟꠣ ꠝꠣꠛꠥꠖꠞ ꠖꠤꠖꠣꠞ-ꠖꠞꠡꠘ ꠙꠣꠁꠟꠣ ꠅꠔꠣ ꠎꠣꠘꠣ ꠎꠣꠄ।
ꠝꠥꠍꠣ (ꠀ꠩) ꠅꠞ ꠎꠝꠣꠘꠣꠞ ৪০০ ꠛꠍꠞ ꠀꠉꠦ, ꠝꠤꠡꠞꠞ ꠛꠣꠖꠡꠣ ꠄꠇ ꠚꠦꠞꠣꠃꠘꠦ ꠢꠎꠞꠔ ꠁꠃꠍꠥꠚ (ꠀ꠩) ꠞꠦ ꠈꠥꠛ ꠝꠣꠄꠀ ꠇꠞꠔꠣ, ꠁꠃꠍꠥꠚꠞ ꠛꠣꠛꠣ ꠢꠎꠞꠔ ꠁꠀꠇꠥꠛ (ꠀ꠩) ꠅꠞ ꠛꠋꠡꠗꠞ ꠛꠘꠤ ꠁꠍꠞꠣꠁꠟꠞꠦꠅ ꠈꠥꠛ ꠝꠣꠄꠀ ꠇꠞꠔꠣ। ꠝꠤꠡꠞꠤ ꠅꠇꠟꠦ ꠄꠞꠣꠞꠦ ꠛꠘꠤ ꠁꠍꠞꠣꠁꠟ ꠘꠣ ꠇꠁꠀ, ꠁꠛꠞꠣꠘꠤ ꠇꠁꠀ ꠒꠣꠇꠤꠔꠣ। ꠁꠛꠞꠣꠘꠤ ꠡꠛ꠆ꠖꠞ ꠝꠣꠘꠤ ꠅꠁꠟ, ꠞꠤꠚꠥꠎꠤ ꠛꠣ ꠛꠂꠔꠟ। ꠁꠃꠍꠥꠚ (ꠀ꠩) ꠅꠞ ꠃꠚꠣꠔꠞ ꠛꠣꠖꠦ, ꠀꠞꠇ ꠚꠦꠞꠣꠃꠘ ꠝꠤꠡꠞꠞ ꠛꠣꠖꠡꠣ ꠅꠁꠀ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠈꠥꠛ ꠎꠥꠞ-ꠎꠥꠟꠥꠝ ꠇꠞꠤꠀ ꠔꠣꠞꠣꠞꠦ ꠉꠥꠟꠣꠝ ꠛꠣꠘꠣꠁꠟ, ꠅꠁꠟꠦ ꠀꠟ꠆ꠟꠣꠄ ꠢꠎꠞꠔ ꠝꠥꠍꠣ (ꠀ꠩) ꠞꠦ ꠙꠣꠑꠣꠁꠀ ꠛꠘꠤ ꠁꠍꠞꠣꠁꠟꠞꠦ ꠚꠦꠞꠣꠃꠘꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠟꠣ।
ꠀꠟ꠆ꠟꠣ ꠙꠣꠇꠦ ꠢꠎꠞꠔ ꠝꠥꠍꠣ (ꠀ꠩) ꠅꠞ ꠉꠦꠍꠦ ꠛꠘꠤ ꠁꠍꠞꠣꠁꠟ ꠀꠞ ꠔꠣꠝꠣꠝ ꠀꠖꠝ ꠎꠣꠔꠤꠞ ꠟꠣꠉꠤ ꠀꠟ꠆ꠟꠣꠞ ꠡꠞꠤꠅꠔꠞ ꠌꠤꠞꠇꠣꠟꠤꠘ ꠖꠡꠐꠣ ꠢꠥꠇꠥꠝ ꠎꠣꠘꠣꠁꠟꠣ। ꠅꠃ ꠢꠥꠇꠥꠝ ꠢꠇ꠆ꠇꠟ ꠘꠛꠤ, ꠞꠍꠥꠟ, ꠙꠦꠉꠣꠝ꠆ꠛꠞꠦ ꠝꠣꠘꠍꠂꠘ। ꠄꠞ ꠇꠥꠘꠥ ꠞꠖ-ꠛꠖꠟ ꠘꠣꠁ।
ꠅꠃ ꠍꠤꠙꠣꠞꠣꠔ ꠖꠦꠈꠣ ꠎꠣꠄ, ꠀꠟ꠆ꠟꠣꠄ ꠢꠎꠞꠔ ꠝꠥꠍꠣꠞꠦ ꠢꠥꠇꠥꠝ ꠖꠤꠟꠣ ꠀꠟ꠆ꠟꠣꠞ ꠟꠣꠉꠤ ꠔꠣꠁꠘ ꠄꠇꠈꠣꠘ ꠙꠛꠤꠔ꠆ꠞ ꠊꠞ ꠛꠣꠘꠣꠁꠔꠣ, ꠅꠃ ꠊꠞꠞ ꠘꠇꠡꠣꠅ ꠀꠟ꠆ꠟꠣꠄ ꠔꠣꠘꠞꠦ ꠖꠦꠈꠣꠁꠟꠣ। ꠅꠃ ꠊꠞꠞ ꠜꠤꠔꠞꠦ ꠀꠍꠤꠟ ꠙꠛꠤꠔ꠆ꠞ ꠢꠦꠞꠦꠝ ꠡꠞꠤꠚ, ꠝꠣꠘꠡꠦ ꠁ ꠊꠞꠞꠦ ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥ ꠇꠁꠀ ꠒꠣꠇꠤꠔꠣ। ꠁꠈꠣꠘ ꠅꠁꠟ ꠢꠃ ꠀꠝꠟꠞ ꠇꠣꠛꠣ ꠡꠞꠤꠚ, ꠀꠡ꠆ꠔꠣ ꠖꠥꠘꠤꠀꠞ ꠢꠇꠟ ꠝꠥꠝꠤꠘꠞ ꠇꠤꠛꠟꠣ। ꠛꠘꠤ ꠁꠍꠞꠣꠁꠟ ꠎꠣꠔꠤ ꠅꠃ ꠡꠝꠄ ꠝꠥꠍꠣꠚꠤꠞꠞ ꠟꠣꠈꠣꠘ ꠎꠣꠉꠣꠄ ꠎꠣꠉꠣꠄ ꠉꠤꠀ ꠞꠁꠔꠣ, ꠄꠞꠟꠣꠉꠤ ꠅꠃ ꠄꠛꠣꠖꠔ ꠈꠣꠘꠣꠞꠦ ꠔꠣꠞꠣꠞ ꠟꠉꠦ ꠇꠞꠤ ꠛꠁꠀ ꠘꠤꠔꠣ। ꠀꠞ ꠁ ꠍꠤꠙꠣꠞꠣꠞ ꠢꠦꠡꠦ ꠀꠍꠦ, ꠢꠎꠞꠔ ꠝꠥꠍꠣ (ꠀ꠩) ꠅꠞ ꠢꠥꠇꠥꠝ ꠝꠣꠚꠤꠇ ꠛꠘꠤ ꠁꠍꠞꠣꠁꠟꠦ ꠅꠃ ꠔꠣꠝ꠆ꠛꠥ ꠊꠞ ꠛꠣꠘꠣꠁꠟꠣ।
ꠄꠞꠝꠣꠎꠦ ꠀꠍꠦ:
(ꠇ) ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠟꠣ ১:১—১৫:২১ ꠀꠄꠀꠔ
(ꠈ) ꠝꠞꠥꠜꠥꠝꠤꠔ ꠛꠘꠤ ꠁꠍꠞꠣꠁꠟꠞ ꠍꠚꠞ ১৫:২২—১৮:২৭ ꠀꠄꠀꠔ
(ꠉ) ꠝꠣꠛꠥꠖꠞ ꠟꠉꠦ ꠔꠣꠘ ꠛꠘ꠆ꠖꠣꠞ ꠝꠤꠟꠘꠞ ꠃꠍꠤꠟ꠆ꠟꠣ ১৯—২৪ ꠞꠥꠇꠥ
(ꠊ) ꠀꠟ꠆ꠟꠣꠞ ꠙꠛꠤꠔ꠆ꠞ ꠊꠞ ꠛꠣꠘꠣꠘꠤꠞ ꠢꠥꠇꠥꠝ ২৫—৩১ ꠞꠥꠇꠥ
(ꠌ) ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠛꠘꠤ ꠁꠍꠞꠣꠁꠟꠞ ꠘꠣꠚꠞꠝꠣꠘꠤ ৩২—৩৪ ꠞꠥꠇꠥ
(ꠍ) ꠀꠟ꠆ꠟꠣꠞ ꠙꠛꠤꠔ꠆ꠞ ꠊꠞ ꠛꠣꠘꠣꠘꠤ ৩৫—৪০ ꠞꠥꠇꠥ
ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠟꠣ (১:১—১৫:২১)
1
ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠥꠟꠥꠝ
1 ꠀꠟ꠆ꠟꠣꠄ ꠢꠎꠞꠔ ꠁꠀꠇꠥꠛꠞ ꠘꠄꠀ ꠘꠣꠝ ꠖꠤꠍꠟꠣ ꠁꠍꠞꠣꠁꠟ, ꠄꠞꠟꠣꠉꠤ ꠔꠣꠘ ꠛꠋꠡꠞ ꠘꠣꠝ ꠅꠁꠟ ꠛꠘꠤ ꠁꠍꠞꠣꠁꠟ। ꠁꠀꠇꠥꠛꠦ ꠔꠣꠘ ꠛꠤꠛꠤꠘ-ꠛꠣꠁꠌ꠆ꠌꠣꠁꠘ ꠀꠞ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ ꠝꠤꠡꠞ ꠖꠦꠡꠅ ꠉꠦꠟꠣꠉꠤ। ꠅꠃ ꠡꠝꠄ ꠔꠣꠘ ꠟꠉꠦ ꠅꠁꠀ ꠎꠦꠞꠣ ꠉꠦꠟꠣ, ꠄꠞꠣꠞ ꠘꠣꠝ ꠅꠁꠟ,
2 ꠞꠥꠛꠦꠘ, ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ,
3 ꠁꠍꠣꠈꠞ, ꠍꠛꠥꠟꠘ, ꠛꠤꠘ-ꠁꠀꠝꠤꠘ,
4 ꠖꠣꠘ, ꠘꠙ꠆ꠔꠣꠟꠤ, ꠍꠣꠖꠥ ꠀꠞ ꠀꠡꠤꠞ।
5 ꠁꠀꠇꠥꠛꠞ ꠛꠋꠡꠞ ꠢꠇ꠆ꠇꠟꠔꠣꠄ ꠝꠤꠟꠤꠀ ꠡꠔ꠆ꠔꠁꠞ ꠎꠘ ꠀꠍꠟꠣ। ꠀꠞ ꠁꠃꠍꠥꠚ ꠀꠉ ꠕꠣꠇꠤꠃ ꠝꠤꠡꠞꠅ ꠕꠣꠇꠔꠣ।
6 ꠛꠣꠖꠦ ꠁꠃꠍꠥꠚ, ꠔꠣꠘ ꠜꠣꠁꠀꠁꠘ, ꠀꠞ ꠢꠤ ꠀꠝꠟꠞ ꠢꠇꠟ ꠝꠣꠞꠣ ꠉꠦꠟꠣ।
7 ꠅꠁꠟꠦ ꠔꠣꠞꠣꠞ ꠛꠣꠖꠞ ꠛꠋꠡꠗꠞ ꠛꠣꠠꠤꠀ ꠈꠥꠛ ꠛꠟꠀꠟꠣ ꠅꠁꠟꠣ। ꠄꠞꠣ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠀ ꠀꠡ꠆ꠔꠣ ꠝꠤꠡꠞ ꠖꠦꠡ ꠜꠞꠤꠉꠦꠟꠣ।
8 ꠄꠞꠝꠣꠎꠦ ꠝꠤꠡꠞꠅ ꠄꠇꠎꠘ ꠘꠄꠀ ꠛꠣꠖꠡꠣ ꠅꠁꠟꠣ, ꠄꠁꠘ ꠁꠃꠍꠥꠚꠞꠦ ꠌꠤꠘꠂꠘ ꠘꠣ।
9 ꠄꠁꠘ ꠘꠤꠎꠞ ꠙ꠆ꠞꠎꠣ ꠅꠇꠟꠞꠦ ꠇꠁꠟꠣ, “ꠌꠣꠁꠀ ꠖꠦꠈꠅ, ꠛꠘꠤ ꠁꠍꠞꠣꠁꠟ ꠀꠝꠞꠣ ꠕꠣꠇꠤ ꠛꠦꠡꠤꠅ ꠀꠞ ꠛꠟꠀꠟꠣꠅ।
10 ꠔꠦ ꠀꠅ, ꠀꠝꠞꠣ ꠄꠇ ꠚꠘ꠆ꠖꠤ ꠇꠞꠤ, ꠁꠔꠣ ꠎꠦꠘꠥ ꠀꠞ ꠘꠣ ꠛꠣꠠꠂꠘ। ꠀꠞꠘꠣꠄ ꠔꠣꠞꠣ ꠛꠣꠠꠤꠀ ꠢꠦꠡꠦ ꠎꠥꠖ꠆ꠖꠞ ꠇꠣꠟꠅ ꠀꠝꠞꠣꠞ ꠖꠥꠡꠝꠘꠞ ꠟꠉꠦ ꠝꠤꠟꠤꠀ ꠀꠝꠞꠣꠞ ꠛꠤꠞꠥꠖ꠆ꠖꠦ ꠎꠥꠖ꠆ꠖ ꠇꠞꠛ, ꠛꠣꠖꠦ ꠀꠝꠞꠣꠞ ꠖꠦꠡ ꠕꠣꠇꠤ ꠎꠣꠁꠛꠉꠤ।”
11 ꠔꠦꠃ ꠔꠣꠞꠣ ꠡꠞ꠆ꠖꠣꠞ ꠟꠣꠉꠣꠁꠟꠣ ꠄꠞꠣꠞꠦ ꠝꠣꠞꠤꠀ-ꠗꠞꠤꠀ ꠎꠥꠞ-ꠎꠥꠟꠥꠝ ꠇꠞꠤꠀ ꠇꠣꠝ ꠇꠞꠣꠘꠤꠞ ꠟꠣꠉꠤ। ꠄꠞꠣ ꠚꠦꠞꠣꠃꠘꠞ ꠚꠡꠟ ꠞꠣꠈꠣꠞ ꠟꠣꠉꠤ ꠙꠤꠕꠥꠝ ꠀꠞ ꠞꠣꠝꠣꠡꠦꠡ ꠘꠣꠝꠞ ꠖꠥꠁꠐꠣ ꠐꠣꠃꠘꠅ ꠛꠣꠘꠣꠁꠟꠣ।
12 ꠅꠁꠟꠦ ꠄꠞꠣꠞ ꠃꠙꠞꠦ ꠎꠔ ꠛꠦꠡꠤ ꠎꠥꠞ-ꠎꠥꠟꠥꠝ ꠇꠞꠣ ꠅꠁꠟ, ꠄꠞꠣꠅ ꠅꠔ ꠛꠦꠡꠤ ꠛꠣꠠꠤꠟꠣ ꠀꠞ ꠍꠤꠔ꠆ꠞꠤꠟꠣ। ꠄꠞꠟꠣꠉꠤ ꠝꠤꠡꠞꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞꠦ ꠈꠥꠛ ꠒꠞꠣꠁꠉꠦꠟꠣ।
13 ꠒꠞꠣꠁꠀ ꠄꠞꠣꠞꠦꠖꠤ ꠀꠞꠅ ꠇꠑꠤꠘ ꠇꠣꠝ ꠇꠞꠣꠁꠟꠣ।
14 ꠝꠣꠐꠤ ꠇꠣꠝ, ꠁꠐꠞ ꠇꠣꠝ ꠀꠞ ꠈꠦꠔꠞ ꠝꠣꠎꠦ ꠇꠡ꠆ꠐꠞ ꠇꠣꠝ ꠇꠞꠣꠁꠀ ꠄꠞꠣꠞ ꠎꠣꠘꠞꠦ ꠔꠤꠔ꠆ꠔꠣ ꠛꠣꠘꠣꠁꠟꠤꠟ। ꠀꠞ ꠔꠣꠞꠣ ꠎꠥꠞ-ꠎꠥꠟꠥꠝ ꠇꠞꠤꠀ ꠘꠤꠡ꠆ꠑꠥꠞ-ꠙꠣꠡꠣꠘꠞ ꠟꠣꠈꠣꠘ ꠇꠣꠝ ꠇꠞꠣꠁꠔ।
15 ꠛꠣꠖꠦ ꠝꠤꠡꠞꠞ ꠛꠣꠖꠡꠣꠄ ꠡꠤꠚ꠆ꠞꠣ ꠀꠞ ꠚꠥꠀ ꠘꠣꠝꠞ ꠖꠥꠁꠎꠘ ꠁꠛꠞꠣꠘꠤ ꠖꠣꠁ ꠛꠦꠐꠤꠞꠦ ꠢꠥꠇꠥꠝ ꠖꠤꠟꠣ,
16 “ꠔꠥꠝꠞꠣ ꠁꠛꠞꠣꠘꠤ ꠛꠦꠐꠤꠘ꠆ꠔꠞ ꠖꠣꠁ ꠉꠤꠞꠤꠔ ꠉꠤꠀ, ꠁꠔꠣꠞ ꠙꠥꠀꠂꠘ ꠙꠄꠖꠣ ꠅꠁꠟꠦꠃ ꠝꠣꠞꠤꠟꠣꠁꠅ, ꠈꠣꠟꠤ ꠙꠥꠠꠤꠘ꠆ꠔꠞꠦ ꠎꠤꠔꠣ ꠞꠣꠈꠤꠅ।”
17 ꠅꠁꠟꠦ ꠢꠤ ꠖꠣꠁ ꠛꠦꠐꠤꠘ꠆ꠔꠦ ꠀꠟ꠆ꠟꠣꠞꠦ ꠒꠞꠣꠁꠔꠣ ꠉꠔꠤꠇꠦ, ꠝꠤꠡꠞꠤ ꠛꠣꠖꠡꠣꠞ ꠢꠥꠇꠥꠝ ꠘꠣ ꠝꠣꠘꠤꠀ ꠙꠥꠀꠂꠘ꠆ꠔꠞꠦꠅ ꠎꠤꠔꠣ ꠞꠣꠈꠔꠣ।
18 ꠔꠦꠃ ꠛꠣꠖꠡꠣꠄ ꠄꠞꠣꠞꠦ ꠘꠤꠀ ꠎꠤꠇꠣꠁꠟꠣ, “ꠁꠔꠣ ꠇꠣꠝ ꠇꠦꠘꠦ ꠇꠞꠟꠣꠄ? ꠙꠥꠀꠂꠘ꠆ꠔꠞꠦ ꠇꠦꠘꠦ ꠎꠤꠔꠣ ꠞꠣꠈꠟꠣꠄ?”
19 ꠔꠣꠞꠣ ꠎꠥꠀꠙ ꠖꠤꠟꠣ, “ꠁꠛꠞꠣꠘꠤ ꠛꠦꠐꠤꠘ ꠝꠤꠡꠞꠤ ꠛꠦꠐꠤꠘ꠆ꠔꠞ ꠟꠣꠈꠣꠘ ꠘꠣꠄ, ꠔꠣꠞꠣ ꠛꠃꠔ ꠛꠟꠀꠟꠣ। ꠖꠣꠁꠛꠦꠐꠤ ꠔꠣꠞꠣꠞ ꠇꠣꠍꠣꠔ ꠎꠣꠁꠛꠣꠞ ꠀꠉꠦꠃ ꠔꠣꠞꠣꠞ ꠢꠥꠞꠥꠔ꠆ꠔꠣ ꠙꠄꠖꠣ ꠅꠁꠎꠣꠄ।”
20-21 ꠅꠃ ꠖꠥꠁꠅ ꠛꠦꠐꠤꠄ ꠀꠟ꠆ꠟꠣꠞꠦ ꠒꠞꠣꠁꠔꠣ ꠇꠞꠤ, ꠀꠟ꠆ꠟꠣꠄ ꠞꠢꠝꠔ ꠇꠞꠤꠀ ꠔꠣꠞꠣꠞꠦꠅ ꠀꠅꠟꠣꠖ ꠖꠤꠟꠣ। ꠀꠞ ꠛꠘꠤ ꠁꠍꠞꠣꠁꠟꠅ ꠀꠞꠅ ꠛꠦꠡꠤ ꠇꠞꠤ ꠛꠣꠠꠤꠀ ꠈꠥꠛ ꠡꠇ꠆ꠔꠤꠝꠣꠘ ꠅꠁꠟꠣ।
22 ꠁꠔꠣ ꠖꠦꠈꠤꠀ ꠚꠦꠞꠣꠃꠘꠦ ꠘꠤꠎꠞ ꠙ꠆ꠞꠎꠣ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, “ꠁꠛꠞꠣꠘꠤ ꠅꠇꠟꠞ ꠇꠥꠘꠥ ꠙꠥꠀꠂꠘ ꠅꠁꠟꠦꠃ ꠔꠥꠝꠞꠣ ꠘꠤꠟ ꠘꠖꠅ ꠚꠣꠟꠣꠁ ꠖꠤꠅ, ꠈꠣꠟꠤ ꠙꠥꠠꠤꠘ꠆ꠔꠞꠦ ꠎꠤꠔꠣ ꠞꠣꠈꠤꠅ।”