4
Bonḍo boiragir talim taki hushiar
1 O Timoti, Allai Pak Ruhe forishkar ḳori koira, aḳeri zomanat kisu manush Isayi iman taki horizibo, tara na-hok ruhu ar zin-butor talimor ashik oibo.
2 Zeta beiman oḳlor bibeḳ-buddi oshaṛ oigese, otar bonḍamir dae ola oibo.
3 Itae manshore ḳoṛaḳoṛi hukum dein bia-shadi na ḳorar lagi, ar kunu kunu ḳani kaite-o nished ḳoroin. Oile Allae to i kani foyda-u ḳorsoin, zera iman anche, zera Allar hokre zanilise, tara zate Allar shukria adae ḳoria ita ḳain.
4 Allar foyda ḳora hoḳol zinish-u bala. Haram mono ḳoria kunuta bad deoa ṭik nae, borong Allar shukria adae ḳoria ḳaoa zae.
5 Ḳaron Allar kalam ar i munazator mazdi ita fak-fobitro oizae.
Hozrot Isar ḳaṭi kadim o
6 O Timoti, tumi zudi ou talim oḳol mumin baiainre buzaia deo, te Isayi imanor ze hok ar nirbul talim mania solrae, i befare tumi faḳa-fukto oia al-Mosir eḳzon ufozukto ḳadim oibae.
7 Tumi aze-baze kichcha-ḳahini taki horia roio, ita to dadi-nanir ḳoa banail kichchar laḳan. Erlagi ita bad dia dilor imani beyam ḳorat ro.
8 Shorilor beyam ḳorle kisu fayda oy, oile dilor imani beyame hokkol bae taki fayda oy. Ermaze to ḳali i dunia nae, aḳerator asha-o ase.
9 Ita to furafur hok ar ḳaṭi, shullo-ana kobul ḳorar laḳ.
10 Erlagi-u amra zane-forane imanor menot ḳoriar ar kiali oia ḳam ḳoriar. Ḳaron amra to zinda Allar ufre borosha ḳori. Tain-u hoḳol manshor toraneala, ḳas ḳori zera tan ufre iman ane.
11 Te tumi-o ou befare hukum ar talim deo.
12 Tumi zuan beṭa mono ḳoria ḳeu zanu tumare ela na ḳore, erlagi mat-ḳotae, sal-cholone, mohobbote, imane ar fak-fobitrotae tumi mumin oḳlor gese eḳṭa nishana bonizao.
13 Ar ami aibar ag forzonto tumi mumin oḳolre Pak Kalam tilaot ḳora, shu-foramish deoa, ar talim deoat lagail roio.
14 Mono rakio, zomator murobbi oḳole tumar ufre at rakia, nobir laḳan gaibi buli matia tumare ḳelafoti disoin, te tumi i niamotre elami korio na.
15 Ita befare kiali o, nizore otar maze furafur ḍubaia raḳo, teu hoḳlor sokut foṛbo tumi agedi aguairae.
16 Tumar nizor befare ar tumar talimor befare hushiar roio. Teu tumi nizore basaibae, ar zera tumar boyan hunbo, tarare-o basaitae farbae.