3
Bibi Rutor biar lagi Noyomir sinta
1 Ḳoydin bade Bibi Noyomie Rutre ḳoila, “Ami mono ḳorram tumi hirbar shuki-shongshari o.
2 Tumi zar ḳamla beṭintor loge roia lurirae, ou Buaz to emne-u amrar kuṭum. Aiz rait tain ḳolat aia barli maṛa diba.
3 Te tumi ek kam ḳoro, tumi naia-doia, tel-tul makia, hazi-faṛi tan ḳolat zaogi. Oile tain tumare deḳoin na zanu.
4 Raitkur ḳaoa-daoa bade ein zebla hutiba, ou shomoy tumi en bisna sinia rakio. Bade hono gia tan faor ufror ḳeta horaia hono hutiroio. Hutia harle kita oibo, tain emne-u ḳoia diba.”
5 Rute ḳoila, “Ji aichcha, afne zela ḳoira ola-u ḳormune.”
6 Bade shomoy moto tain ḳolat gela, ar hoṛie zela ḳoisla ola-u ḳorla.
7 Ḳaoa-daoa bade Buaz zebla kush mizaze tan ḳolar uṛar tole gia hutila, Ruto lae lae hono gia Buazor faor ufor tone ḳeta horaia faor ḳandat hutiroila.
8-9 Ada raitkur bala Buaze ḳoroṭ firaia enre dekia somkia uṭia ḳoila, “Tumi ke go?” Rute ḳoila, “Sab, ami afnar bandi Rut, afne afnar ḳetar tolḳano bandire eḳzora ṭai deukka. Amrare deḳa-huna ḳorra kuṭum oḳlor maze afne to eḳzon.”
10 Buaze zuaf dila, “Boinre, Allae tumare rohom ḳoroukka, tumi foyla taki-u zela horir bishashi aslae, tair balair lagi aiz aro beshi bishashi zair ḳorlae, tumi to doni-gorib kunu zuan beṭar loge zaoar lagi sinta ḳorso na.
11 Asta gaur hoḳol manshe-u tumare bala fae. Tumi sinta ḳorio na, tumi zela sairae, ami ola-u ḳormu.
12 Oile ama tone aro korib tumatanor eḳzon asoin,
13 ḳail bianku bala ami tan loge matimu, tain zudi tumare shadi korte razi oin te to bala, tain-u shadi korilla. Ar na oile ami Allar ḳosom ḳaia ḳoiar, ami tumare shomzia loimu. Oḳon tumi ono-u rait ḳaṭailao, raitḳal ar zaio na.”
14 Fozoror ag forzonto Rut Buazor faor ḳandat hutiroila. Buaze Rutre ḳoila, “Tumi zen ino aiso, ikan zanu ḳeu na zane.” Teu andair roite-u Rut baṛit zaitagi kori zuit oila.
15 Ar Buaze tanre ḳoila, “Hoṛir samne ḳali ate kila zaitae? Deki, tumar saddorḳan melao.” Rute saddor melia kunat dorla ar Buaze soy feṭu barli ania saddordi bandia tan ḳando tulia dila. Rute ou gaiṭ loia baṛit gelagi.
16 Gia harle tan hoṛie zikaila, “Kita go mai, ḳobor kita?” Teu Buaze zeta zeta ḳoisoin ota tan hoṛir gese kulia ḳoila,
17 loge eoḳan-o ḳoila, “Buaze ḳoisoin tumi hoṛir gese ḳali ate kila zaitae, ḳoia tain amare soy feṭu barli-o bandia disoin.”
18 Ita hunia hoṛie ḳoila, “Te hesh forzonto kita oy deḳo, i manshe aizkur maze-u er ek gala na lagaia dom loita nae.”