al-Zobur 25
Hozrot Daudor mizmor.
1 O Mabud, amar zanre tumar dorbaro dilaisi shofia,
2 ḳali tumar ufre-u borosha ḳori, ogo amar Alla.
Shorminda ḳorio na more dushmonor samne,
bahaduri na ḳorouk tara amar ufre.
3 Tumar ufre ḳore zara asha-borosha,
tarar mazor kunu zon oito nae to shorminda,
shorom faibo tara, ḳamoḳa beimani ḳore zara.
4 O Alla, tumar fot oḳol amare sinao,
tumar shoṭik rasta amare deḳao.
5 Tumar hoke amare salao ar hikao,
amar zan basanir malik to tumi-u,
hor-hamesha tumar ufre asha raki.
6 Ogo Mabud, iad ḳoro tumar doya-maya,
shuru taki to ebo ḳorat aso ota.
7 Amar zuan ḳalor guna-naformani na rakio mono,
O go Mabud, tumar doya-mayae more iad ḳoro,
tumar oṭol meherbanir ḳatire tumi ola ḳoro.
8 Mabud to doyalu, oti hok tain,
erlagi gunagarre-o tan fot sinain.
9 Hok fote salain tain norom dilor manshore,
tan fot deḳai dein tara hoḳolre.
10 Tan oada-chukti hukum-ahkam mania sole zara,
tarar lagi tan fot oḳol hok ar doyae bora.
11 Bout bod ḳam naformani ḳorilisi ami,
tumar namor duai go Mabud, dilao more mafi.
12 Mabudre hasau ḍoraia soler ola adom ḳe?
Kun fot basia nito, Mabude-u deḳain tare.
13 Shuk-shanti arame ḳaṭain tarar zindegani,
tarar aolade-o faiba deshor mirashdari.
14 Mabudor ḍor-ḳofe zara zindegi ḳaṭain,
tarare-u tan dilor gufon ḳota zanain,
tan oada-chuktir befar tarare hikain.
15 Amar souke hor-hamesha Mabudor bae sai roise,
shikarir zal taki tain basain amar faore.
16 Rohom ḳoro tumi more, amar baedi saia,
ami oilam duki-ḳangal, asi boṛo eḳla.
17 Amar dilor duḳ-zontrona dilao horaia,
hokkol bala-mosibot taki raḳo basaia.
18 Deḳo mor duḳ-mosibot behalot dosha,
maf ḳoria dilao mor zindegir guna.
19 Deḳrae ni ḳoto dushmon lagse amar ḳore,
tara sorom ingsha-ginna ḳorer amare.
20 Fana deo amare, basao amar zan ḳan,
asroy loisi tumar gese, raḳo amar man-shomman.
21 Hok-halali shorolota ḳorouk amare rokka,
ami to tumar-u ufre ḳorsi borosha.
22 O go Alla, ḳalas ḳoro Boni Israilre,
tarar hoḳol mosibot taki basao tarare.