Fobitro Injil Shorif 18 nombor sifara
Filimon
Forisiti
Alla Pakor hukume Hozrot Isa al-Mosir ḳas sahabi Hozrot Pauluse (ra:) ou sifara leḳsoin. Hozrot Isae behesto toshrif neoar onuman 27 bosor bade ikan siṭir aḳare leḳa oise.
Hozrot Filimon asla Isa al-Mosir eḳzon namḳora ummot. Tain Kolosi ṭaunor Isayi zomator eḳ zon. Onisim name tan ek korida gulam asil. Hozrot Paulus (ra:) zebla zelo bondi asla, ou shomoy Onisim tar munib Filimonor ges taki bagia kunu surote Paulusor gese aisil. Hozrot Paulusor mazdia-u Onisim Isayi imandar hishabe Paulusor eḳzon bishesh ḳadim oisoin. Tara duiozone foramish ḳorla, Onisim tan munib Filimonor gese firia zaiba, ar tan agor bul shikar ḳoria maf saiba. Hozrot Pauluse Filimonor gese onurud ḳori leḳla, tain zanu tan agor gulamre firot nein ar oḳon ḳali gulam hishabe nae, eḳzon Isayi bai hishabe-o shomzia nein.
Ou sifarat deḳa zae, gulam ar munibor maze kunu bedabed nai, Hozrot Isar ummot oar bade hoḳol-u eḳ shoman. Ar zomator murobbi neta Hozrot Pauluse shadaron mumin oḳlor ufre netagiri, hukumdari na ḳoria borong nizore nisa ḳoria zomat oḳol salaira. Tan maze kunu beṭagiri ba boṛai-bahaduri nai.
Ermaze ase,
(1) Hozrot Paulusor salam 1:1-3 ayat
(2) Hozrot Pauluse Filimonor tarif ḳorla 1:4-7
(3) Onisimre firot neoar lagi onurud 1:8-21
(4) Hozrot Paulusor shesh ḳota 1:22-25
1
Hozrot Paulusor salam
1 Ami Paulus, Isa al-Mosir lagi bondi asi. Ami ar amrar bai Timotie, amrar logor toblig korra mayar dust Filimonor gese leḳram.
2 Boin Afia, amrar loge imanor zudda Arkipas ar tumar baṛir zomator hoḳolre salam zanairam.
3 Amrar gaibi baf Alla Pake ar Hozrot Isa al-Mosie tumrar ufre rohomot ar shanti nazil ḳoroukka.
Hozrot Pauluse Filimonor tarif ḳorla
4 Ami hamesha munazator shomoy tumar ḳota iad ḳoria Allar shukria adae ḳori.
5 Ḳaron Hozrot Isa al-Mosir ufre tumar iman ar pak bonda oḳlor bae tumar mohobbotor ḳota ami hunchi.
6 Ami dua ḳori, mumin oḳlor loge tumar ḳatir-shomporko aro baṛouk. Tumi to zano, al-Mosir ḳatire Allae amrare ḳoto bala bala niamot bilai disoin.
7 Bai, tumar mohobbot dekia ami kub kushi oisi ar utshaho faisi, tumi to Allar pak bonda oḳlor dilo aram diso.
Onisimre firot neoar lagi onurud
8 Tumar i bab dekia ami tumare ekkan ḳota ḳoitam sairam. Ami to al-Mosir name tumare hukum ditam farlam one, tumar ḳam fura ḳorar lagi.
9 Oile mohobbotor ḳatire hukum na dia tumare minot ḳoriar. Ami Paulus ou murobbi boyosho al-Mosir lagi bondi halote tumar gese i minoti korram.
10 Amar aolad Onisimor lagi arzi zanairam, ami zelo bondi taḳa halote he iman ania amar aolad bonigese.
11 Eḳ shomoy tumar gese he beḳama asil, oile oḳon amar ar tumar gese he bout ḳamaora bonigese.
12 Zai ouk, amar zanor taki beshi mayar ou manshore ami tumar gese firot faṭairam.
13 Ami tare amar gese raḳtam saislam, zate kush-ḳobrir dae bondi halote tumar oia he amar kezmot ḳorto fare.
14 Oile tumar izazot saṛa ami kunta ḳorlam na, zate zur ḳoria tumar bala ḳam adae ḳora na lage. Ami sairam, tumi niz taki-u ou ḳam ḳoro.
15 Tumi zate siroḳalor lagi tare firia fao, oito fare ou ḳarone-u he tumar ges taki tuṛa dinor lagi horia asil.
16 Oile tumi oḳon tare ar gulam hishabe faitae nae borong gulam taki boṛo, mani mayar bai hishabe faibae. Ḳas ḳori he amar kub mayar manush, oḳon tumar gese-o he aro mayar, ḳali roḳto-mangshe nae, imandar bai hishabe mayar.
17 Erdae tumi zudi amare eḳoi imanor bagi zano, te amare zela kobul ḳorar ḳota, tare-o ola kobul ḳorio.
18 He zudi tumar kunu ḳeti koria taḳe ar tar gese tumar kunu faona taḳe, te mono ḳorio, i faona tumi amar gese fao.
19 Ami Pauluse nizor ate lekia zanairam, tumar faona ami dilaimu. Ashole ami koitam sairam na ze, tumar nizor zanor lagi-u tumi amar gese rini aso.
20 Bai Filimon, Allar oaste ekkan ḳam ḳoro, eḳzon imandar bai hishabe amar zano aram deo.
21 Tumi amar ḳota raḳbae zania-u, tumar gese ou siṭikan leḳlam. Ami mono ḳori, ami zeta ḳorar lagi koiram, er taki beshi tumi korbae.
Hozrot Paulusor shesh ḳota
22 Huno, aro ekkan ḳota ḳoiram, tumi amar lagi memanor kuṭa ṭik koria rakio. Ḳaron ami asha ḳorram, tumrar duar usillae amare tumrar gese firot deoa oibo.
23 Abu-Farase tumare salam disoin, tain Isa al-Mosir lagi amar loge oia bondi asoin.
24 Ar amar logor tobligkari Markus, Aristakus, Dimas ar Luke-o tumare salam zanaira.
25 Amrar Hozrot Isa al-Mosir rohomot tumrar dilo ḳaim rouk. Amin.