5
Hoḳol nafaki bidae ḳoro
1 Mabude Musare ḳoila,
2 “Tumi Boni Israilre ou hukum deo, tara zanu kemp taki hoḳol fosa-kusṭo bemarire bar ḳori dey, ar hoḳol nomunar datu bemari, mora lash soia zera nafak oise tarare-o kemp taki bar ḳori deuk.
3 Beṭa ba beṭi ouk, ogure kemp taki bar ḳori dibae. Boni Israilor kemp zate era nafak na banae, ou niote otare bar ḳori dibae, zano to, shoyong ami Boni Israilor maze boshot ḳori.”
4 Teu Boni Israile ola ḳorla. Mabude Musare zela hukum disla, tara ṭik oula-u ḳorla. Tara nafak hoḳol manshore kemp taki bar ḳori dila.
Ḳeti-furon dibar ain
5 Bade Mabude Musa nobire ḳoila,
6 “Tumi Boni Israilre zanai deo, kunu manshe zudi Mabudor naformani koria dusra manshor ḳeti kore, te he beṭa ba beṭi oile-o nichchoy dushi.
7 He tar gunar shikarukti dite oibo. Ar he ze manshor ḳeti korse, tare shullo-ana ḳeti-furon dite oibo. Ze zinishor ḳeti korse, ḳeti-furon hishabe ou zinishor mul damor loge aro fas baṭor eḳ baṭ beshi dite oibo.
8 Ḳeti-furon neoar zuka manush zudi na roin ar tar kunu afon zon na taḳoin, te ita Mabudor faona oibo. Ou ḳeti-furon ar gunar koforar kurbanir meṛaṭa imam sabe faiba.
9 Boni Israile fak-fobitro zoto zinish imamor gese loia aiba, ita hokkolta-u imame faiba.
10 Forteḳ zonor kurbani deoa zinish imame faiba. Imamor ato ze zinish deoa oibo, ita imamor-u oibo.”
Zinar shondoy ala beṭintor bisar
11 Bade Mabude Musare ḳoila,
12 “Tumi Boni Israilre zanai deo, ḳeuror bou zudi ku-fote zaegi,
13 ar zamaire lukaia aroḳ beṭar loge zina ḳoria oshoti bone, tair zamaie ikan na zane ba itar kunu shakki-o na taḳe, tai kunu dora na-o ḳae.
14 Erbade-o zamaie boure shondoy ḳorilae, tar bitre oshanti korer, kiba boue kunu oshoti kam na ḳorle-o zamaie ḳali taire shondoy ḳore, erlagi tar monor maze oshanti hamaizae,
15 te zamaie tar boure loia imam sabor gese zaite oibo. Zaoar shomoy tar bour torof taki sodga hishabe dui sher barlir moyda nite oibo. Ou moyda oilo shondoyor lagi sodga, Mabudor samne oforad zair ḳorar sodga, erlagi itar maze kunu tel ba kushboydar loban mishani nished.
16 “Imame ou beṭar boure Mabudor samne ḳaṛa ḳoraiba.
17 Ar maṭir ek gamlar maze kisu fobitro fani borba, boria Allar goror bitoror maṭir ufor taki kisu duil tulia ou fanit saṛiba.
18 Beṭire Mabudor samne uba ḳoria harle tain beṭir matar sul kulia diba, ar beṭir oforador hasa-misa zair oar lagi ana sodgar barlir moydare tair ato diba. Dia tan nizor ato loiba hou lannot ḍakia anar titta fani.
19 Fani loia imame ou beṭire ḳosom ḳoraia ḳoiba, ‘Tumar biar bade zudi kunu beṭae tumar loge zina na ḳore, ba ku-fote gia tumi oshoti na o, te ou lannot anar titta fanie zanu tumar kunu ḳeti na oy.
20 Oile biar bade ku-fote gia dusra kunu beṭar loge zina ḳoria zudi oshoti o,’
21 —oḳan ḳoia imame ou beṭire nizor ufre lannot ḍakia anar ḳosom ḳoraia hari hirbar ḳoiba— ‘Te Mabude tumare ou gozob deukka, tumar nari-ongo nistez oizauk, ar tumar feṭ fulia muṭa oizauk. Teu ita dekia tumar shomazor manshe zekunu boddua ar lannoti kosom ḳaoar shomoy tumar nam tara iad ḳorbo.
22 Ar ou lannot anar fani tumar shorilo hamaia zanu ola ḳam ḳore, zate tumar feṭ fulizae ar tumar nari-ongo nistez oizae.’ Teu beṭie ḳoibo, ‘Amin, ola-u ouk.’
23 “Imame ou lannot ana ḳosmor ḳota eḳ samṛar ufre lekia hari, fani ḍalia ou leḳar ḳali titta fanit falaiba.
24 Lannot anar ou titta fani beṭire ḳaoanir bade beṭir feṭo kub zala-zontrona foyda oibo.
25 Imame foyla ou beṭir at taki shondoyor sodgar moyda nia Mabudor samne dulaia kurbani kanat loia zaiba.
26 Bade tain fura sodgar bodla ou moyda taki nishana hishabe eḳ muiṭ foriman nia kurbani kanat zalaiba, ar hou titta fani beṭire ḳaoaiba.
27 Beṭie zudi zamair loge beimani koria oshoti oia taḳe, te i fani kaoar bade-u tair feṭo kub zala-zontrona oibo. Tair feṭ fulia muṭa oibo, ar nari-ongo nistez oia aṭkura bonizibo, manshe lannot dibar niote tair nam loiba.
28 Oile tai zudi oshoti na oia ni-oforadi roy, te tai i lannot taki kalas faibo, ar hurutta zonom deoar ḳemota-o zari roibo.
29 Zamai-bour shondoyor bishoye Allar ain to ola. Kunu bou zudi zamair shongsharo roia ku-fote gia oshoti bone,
30 ba zamaie tar boure bodmaishir shondoy ḳore, te tarar lagi ou ain. Beṭae tar boure Mabudor samne nibo ar imame ita hoḳolta beṭir ufre bortaiba.
31 Teu zamaie tar nalish taki kalas faibo, ar bou hasaror oforadi oile tair shaza boibo.”