18
Imam oḳol ar Lebi kandanor ḳam
1 Mabude Harun nobire ḳoila, “Fobitro ebadot ḳanar befare zoto naformani kora oibo, er day-dayitto bortibo tumar ufre, tumar fuain ar tumar gusṭir hoḳlor ufre-o. Ar imamoti kamor bala zoto laḳan naformani kora oibo, itar dayi oibae ḳali tumi ar tumar fuain.
2 Te tumar baf-dadar ḳandan taki aro Lebi oḳolre tumi ano. Tara aia tumare ar tumar fuainre shahadot tambur samnor ebadoti kamo shaijjo ḳorba. Tara tumar zimmae roia shahadot tambur hoḳol ḳam-ḳaz ḳorba.
3 Oile kurbani kana ba Allar goror kunu fobitro zinishor daro zaoa tarar lagi nished. Nished na manle tara ar tumra hoḳol-u morbae.
4 Tara tumar ḳamo shorik oia Milon-tambur ḳadimdari korba, hoḳol zat ḳamor day-dayitto niba. Ta-o ḳali Lebi oḳol saṛa dusra ḳeu tumrar gese zaoa nished.
5 Boni Israilor ufre ami zanu hirbar naraz na oi, erlagi ebadot ḳana ar kurbani kana deḳa-hunar bar tumrar ufre roibo.
6 Ami nize tumrare ufohar hishabe dibar lagi, Boni Israilor mazor Lebi oḳolre fosond ḳorsi. Milon-tambur ḳam ḳorar lagi erare Mabudor name shofi deoa oise.
7 Oile imam hishabe ḳali tumi ar tumar fuainte kurbani kana ar fordar bitoror Herem Shorifo kezmot ḳam ḳorbae. Imamotir fod ḳan ami ufohar hishabe tumrare dilam. Ḳali Lebi oḳol saṛa dusra ḳeu zudi Milon-tambur shimanat ae, te tare zane marilite oibo.”
Imam oḳlor faona beton
8 Erbade Mabude Harunre ḳoila, “Amar name zoto laḳan kurbani deoa oy, itar hoḳol zimmadari ami nize-u tumar ato shomzaisi. Te amar name Boni Israilor kurbani kora hoḳol fak-fobitro zinish, ami tumare ar tumar oarishor faona beton hishabe siroḳalor lagi dilailam.
9 Ḳas fobitro kurbanir ze ongsho aguino zalani lagto nae, ou baṭo tumra niogi. Te dan-gomor sodga, gunar koforar kurbani, ar dush-ḳosurir koforar kurbanir lagi Boni Israile amar gese zotota loia aiba, ita tumi ar tumar oarish oḳlor faona hok.
10 Ita nia hari kas fak-fobitro zinish buzia ijjot ḳoria tumra ḳaio. Tumrar hoḳol beṭainte ita ḳaitae farbae. I kani tumrar lagi fobitro.
11 Ar Boni Israilor deoa hoḳol dulona kurbanir zinish-o tumrar oibo. Ita ami tumare ar tumar oarish oḳolre siroḳalin faona hishabe diram. Tumar foribaror zera pak-pakiza halote roiba, tara ita ḳaita farba.
12 “Boni Israile tarar ḳetor hoḳol taki bala ze tel, noya anguror shorbot ar fosholor ze ongsho Mabudor name sodga diba, ita hokkolta ami tumare dilailam.
13 Mabudor gese ana tarar folail foy-fosholor foyla ongsho tumar oibo. Tumar foribaror mazor zera pak-pakiza halote taḳba, tara ita ḳaiba.
14 “Boni Israile furafur dabi-daoa saṛia mannot hishabe zoto zinish diba, ita-o tumi faibae.
15 Mabudor name shofi deoa forteḳ foyla baichcha tumar oibo, ita manshor aolad ouk ba foshur baichcha ouk. Manshor foyla fuare tumi nichchoy ḳalas ḳoria nite dio, ar nafak foshur foyla meda baichchare-o ola ḳalas ḳori nite dio.
16 Manshor foyla fuar boyosh eḳ mash oile ḳalas ḳoranir zanor bodla babot, ebadot ḳanar mafe fas tola rufa nia azad ḳori dio.
17 Oile gai-goru ba meṛa-sagolor foyla baichchare ḳalas ḳorai nite dio na, iguin to halal. Itare kurbani dia tumi kurbani kanar ufre lou siṭaia dio, ar sorbire agunit deoa kurbani hishabe zalaio. I kurbanir dumar gerane ami Mabud kushi oi.
18 Dulona ḳorail sina ar ḍainor ranor gustor laḳan, oguintor gust-o tumi faibae.
19 Mabudor name Boni Israilor kurbani kora hoḳol fobitro zinish tumar faona babot ami tumare ar tumar aolad oḳolre siroḳalor lagi dilailam. Ita oilo Mabudor loge tumi ar tumar oarishor lagi siroḳalin chukti, er kunu rod-bodol oito nae.”
20 Erbade Mabude Harunre ḳoila, “Boni Israilor desho tumi kunu don-doulotor malikana ba zomi-zomar kunu baṭo faitae nae. Erar maze tumar faona baṭ oilam shoyong ami, ami-u tumar don-doulot.”
Lebi kandanor faona beton
21 Mabude ḳoila, “Boni Israile tarar ruzi-ruzgaror dosh baṭor eḳ baṭ to amare diba, ami-o ita Lebi kandanor faona beton babot dilailam. Milon-tambut ebadoti kamor mozuri hishabe tara ita faiba.
22 Ar aiz taki Boni Israilor dusra kunu gusṭir manush Milon-tambur daro zaoa nished. Gele tarar naformanir dae tara morba.
23 Milon-tambur ḳam-ḳaz ḳali Lebi kandane ḳorba, ou ḳamo zekunu naformani korle tara nize-u dayi oiba. Ita oibo oarishor for oarish dori eḳṭa siroḳalin niom. Boni Israilor oinnainno ḳandanor loge kunu don-doulotor malikana Lebi kandane faito nae.
24 Er bodla Boni Israile tarar ruzi-ruzgaror ze dosh baṭor eḳ baṭ Mabudor dorbaro azir ḳorba, ita ami erar faona hishabe dilailam. Erlagi erar befare ami Mabude ḳoisi, Lebi oḳole Boni Israilor maze kunu zomi-zomar malikana faita nae.”
25 Bade Mabude Musare ḳoila,
26 “Tumi Lebi oḳolre ḳo, oinnainno Boni Israilor ruzi-ruzgaror ze dosh baṭor eḳ baṭ faona hishabe ami tumrare dilam, ita faia harle tumra-o otar dosh baṭor eḳ baṭre, zoḳator zoḳat babot Mabudor name dilaibae.
27 Ou zoḳatre-u tumrar ḳetor fosholor ar nizor banail anguror shorbotor zoḳat hishabe gona oibo.
28 Boni Israilor baki egaro ḳandanor zoḳat babot ze dosh baṭor eḳ baṭ tumra faibae, oḳan taki tumra-o ola dosh baṭor eḳ baṭ Mabudor name zoḳat dibae. Mabudor namor ou ongsho tumra imam Harunor ato dio.
29 Tumrare zotota deoa oibo, tumra-o otar hoḳol taki bala ar fobitro ongsho, Mabudor faona hishabe tanre dio.
30 “Hoḳol taki bala ongsho Mabudre deoar bade zeta baki roibo, otare tumrar nizor ḳetor foshol, ar tumrar nizor banail anguror shorbot hishabe gona oibo.
31 Ou ongsho tumra ar tumrar foribaror manshe zekunu zagat ḳaitae faro, ita to tumrar ḳamor beton, Milon-tambur kezmotor beton.
32 Hoḳol taki bala ongsho Mabudor name dilaile, bakita ḳaite tumrar kunu dush nai. Ar Boni Israilor deoa fak-fobitro malre tumra ofobitro ḳorio na, teu tumra mortae nae.”