9
Hozrot Harunor imamoti kam shuru
1 Ḳelafoti shomzibar mahfilor aṭ dinor din Musa nobie imam Harunre, tan fuaintore ar Boni Israilor murobbi oḳolre-o anaila.
2 Anaia Harunre ḳoila, “Tumar gunar koforar kurbanir lagi tumi egu bisal ano, ar zalail kurbanir lagi egu meṛar faṭa loia Mabudor dorbaro azir o. Kurbanir foshu guin furafur nikut oito.
3 Ar tumi Boni Israilre ḳo, tara zanu Mabudor namor kurbani loia azir oy. Tara gunar koforar lagi egu sagol, ar zalail kurbanir lagi eḳ bosor boyoshi nikut egu goru-basur, ar egu meṛa-baichcha ane,
4 ar salamoti kurbanir lagi egu bisal ar egu meṛar faṭa loia azir oy. Itar loge tara tel maḳail dan-gomor sodga-o anba. Mabude tarare aiz didar diba, erlagi tara ota loia azir oukka.”
5 Musa nobir hukum mafik tara hokkolta loia Milon-tambur samne aila. Hoḳol Boni Israil Mabudor samne aia ubaila.
6 Ou shomoy Musae tarare ḳoila, “Mabude tumrare ita ḳorar lagi hukum disoin, ita adae ḳorle tumrar samne tan kudroti nur zair oibo.”
7 Bade tain imam Harunre ḳoila, “Tumi gia kurbani kanar ḳandat zao, gia tumar nizor ar manshor gunar koforar lagi, zalail kurbani ar gunar koforar kurbani adae ḳoro. Ar manshor ana kurbani-o adae ḳoro, Mabude amare ola hukum disoin.”
8 Teu imam Harun kurbani kanar ḳandat gia, tan nizor gunar koforar kurbanir basur zobo ḳorla.
9 Zobor bade tan fuainte ogur lou loia tan daro gela. Tain ou lour maze angul ḍubaia tuṛa lou nia kurbani kanar hing oḳol-o maḳaila, ar baki lou kurbani kanar tole ḍalila.
10 Mabude Musare zela hukum disla, imam Harune ṭik ou laḳan gunar koforar kurbanir basuror sorbi, duio kiḍni ar ḳoiljar logor maṭiare kurbani kanar ufre nia zalailila.
11 Kurbanir gust ar samṛa nia tain kempor bare zalaila.
12 Bade imam Harune zalail kurbanir meṛare zobo ḳorla. Tan fuainte ogur lou nia tan ato dila, tain ou loure kurbani kanar sairo galat siṭaila.
13 Tara zalail kurbanir meṛar ḳolla ar gustor ṭukrain eḳ ek kori Harunor ato dila, tain ita kurbani kanar ufre zalailila.
14 Meṛar ṭeng ar feṭor bitoror hoḳolta fani dia doia saf ḳoria, zalail kurbani foshur loge ita hokkolta-o kurbani kanar ufre zalailila.
15 Bade tain shomazor manshor lagi kurbanir foshu oḳol anaila. Tain manshor gunar koforar kurbanir sagol zobo ḳorla, ar agor laḳan kurbani adae ḳorla.
16 Erbade tain tarar zalail kurbanir foshure-o Mabudor hukum mafik kurbani dila.
17 Ar dan-gomor sodgar lagi ana samana taki eḳ muiṭ nia hari kurbani kanar ufre zalaila. Ita saṛa-o tain biani balar hameshakur zalail kurbani adae ḳorla.
18 Tain manshor salamoti kurbanir ou goru ar meṛare zobo ḳorla. Zobor bade tan fuainte ogur lou ania tan ato dila, lou nia tain kurbani kanar sairo galat siṭai dila.
19 Ar imam Harunre hou goru ar meṛar loge lagail hoḳol sorbi, mani sorbi ala lenguṛ, feṭor bitoror hoḳoltar ufror sorbi, duio kiḍni ar otar ufror sorbi, ḳoiljar logor maṭia-o ania dila.
20 Tara ou hoḳol sorbire hou foshur sinar ufre toila. Ar imam Harune ou sorbi nia kurbani kanar ufre zalaila.
21 Musa nobir hukum mafik Harune bade kurbanir foshur sina ar ḍainor ran nia Mabudor samne dulona kurbani hishabe dulaila.
22 Bade imam Harune manshor baedi tan at baṛaia tarare dua dila. Tain gunar koforar kurbani, zalail kurbani ar salamoti kurbani adae ḳoria harle, kurbani kana taki lamia aila.
23 Erbade Musa nobi ar imam Harun gia Milon-tambur bitre hamaila, bade hon taki bar oia aia hoḳol manshore dua dila. Ou shomoy hoḳol manshor samne Mabude tan kudroti nur zair ḳorla.
24 Mabudor ges taki kudroti aguin aia, kurbani kanar ufror zalail kurbanir foshu ar hokkol sorbire zalaia sali korililo. Ita dekia hoḳol manush kushie Subohan Alla ḳoia sik dia soizdat foṛla.