11
Halal ar haram zandar
1 Mabude Musa ar Harunre ḳoila,
2 “Tumra Boni Israilre zanai deo, maṭir ufror foshur maze zeta foshu tumrar lagi halal, ota oilo:
3 “Zeta foshur faor kura furafur sira, ar ḳanire fazae, itar gust tumrar lagi halal.
4 Ta-o er mazor kunu kunu foshue ḳali kanire fazae, ar kunu kunu foshur ḳali kura sira, ita to tumrar lagi haram. Uṭe ḳanire fazaileo tar kura sira nae, erlagi uṭ haram.
5 Shafon-undure ḳanire fazaileo, itar kura sira nae, otar lagi ita-o haram.
6 Ḳorgushe-o ḳanire fazae, oile itar kura sira nae, otar lagi haram.
7 Shuoror kura furafur sira, oile itae ḳanire fazae na, erlagi ita tumrar lagi haram.
8 Itar gust tumrar lagi haram, itar mora lashre-o soio na. Ita tumrar lagi nafak.
9 “Fanir maze zeta zandare boshot ḳoroin, itar maze zetar foir ar ḍaḳna ase, ita tumrar lagi halal.
10 Oile zetar foir ar ḍaḳna nai, ita tumrar lagi nazaiz. Ita fanir maze fal bandia gurra zandar ouk ba aro kunu zandar ouk, itare tumra ginnaio.
11 Nazaiz oae itare haram mono ḳorio, ita tumra ḳaio na. Itar mora lashre-o tumra ginnaio.
12 Fanir maze boshot ḳore, oile kunu foir ba ḍaḳna nai, ilaḳan hoḳol zandarre tumra ginnaio.
13 “Ar faki oḳlor mazor ou laḳan fakire tumra ginnaio, ita tumra ḳaio na. Ota oila, boṛo sil, hokun, haf-ḳauri,
14 hoḳol zator sil, hoḳol zat ḳaua,
15 uṭ faki,
16 nim faki, gangsil, hoḳol nomunar baz faki,
17 hoḳol zat fesa, hoḳol zator kuṛa, sola-kak, bolua faki,
18 fani-ḳauri,
19 hoḳol zator zaṭia, hoḳol zator bogla, mon-sura faki ar badur, ita tumrar lagi haram.
20 “Fuk-foring oḳlor maze ou laḳan fuk-foring tumrar lagi nazaiz, zetae faodi aṭe ar uṛal dey, itare tumra ginnaio.
21 Oile itar mazor zetar aṭu ase, ar maṭir ufre falai falai sole, itar mazor kunu kunuṭa tumrar lagi halal.
22 Ita oilo, hoḳol zator fongofal, baga-foring, gash-foring.
23 Oile ita saṛa bad-baki zoto fuk-foringe sair faoe aṭe ar uṛito fare, ita hoḳolta tumra ginnaio.
24 “Tumra ou laḳan ḳam ḳorle nafak oizibae; kunu manshe zudi ou haram foshu, faki, mas, fuk-foring otar mora lash soilae, te he hainja forzonto nafak roibo.
25 Ar ḳeu zudi ota haram zinishor lashor kunu ongshore atdi doria boia ney, te he tar ḳafoṛ-sufoṛ doia dite oibo, ar hainja forzonto nafak roibo.
26 “Ar zeta foshur faor kura furafur sira nae, ba ze foshue ḳanire fazae na, ita to tumrar lagi haram. Ou haram foshure ze zone soibo, he nafak bonizibo.
27 Sair faoe aṭra zanuar oḳlor maze, ze foshue faor talut bor dia aṭe, ita-o tumrar lagi haram. Ḳeu zudi itar mora lash soilae, te hainja forzonto nafak roibo.
28 Ar kunu manshe zudi itar lash atdi doria boia ney, te tar ḳafoṛ-sufoṛ doia dite oibo, ar hainja forzonto he nafak roibo. Ita zanuar oḳol to tumrar lagi haram.
29 “Ar maṭit solra huru-muru zandaror maze neul, undur, hoḳol zator girgiṭi,
30 ṭikṭiki, guil-haf, moi-haf, ainjail ar ḳaklash, tumrar lagi haram.
31 Maṭit solra huru-muru zandaror mazor ou zator zandar to tumrar lagi nazaiz. Itar mora lash ḳeu soile, he hainja forzonto nafak roibo.
32 Otar mazor zekunu egur mora lash zudi oinno zinishor ufre foṛe, zelan laḳṛi, ḳafoṛ-sufoṛ, samṛa ba solar soṭ dia banail zekunu malor ufre foṛle-u ita nafak oizibo. Nafak malre fanit bizaia toibae. Hainja forzonto ita nafak roibo, bade fak-saf oibo.
33 Ar ou nafak zandaror kunuṭar mora lash zudi kunu maṭir bashonor maze foṛe, te igur bitoror hoḳolta nafak oizibo, i bashonre-o bangilibae.
34 Ou bashonor fani ba rosh zudi kunu ḳanir zinishor ufre foṛe, te i kani nafak oizibo. Ikṭar maze zudi fani zatio kunuta toa taḳe, te ita-o nafak oizibo.
35 Ar otar mora lash zudi kunu zinishor ufre foṛe, te ita nafak oizibo. Ita kunu undalo foṛle, i undal bangilibae. I undal to tumrar lagi nafak, itare nafak goinno ḳorio.
36 Oile ita zudi kunu kuar bitre ba indarar maze foṛe, te i kua ba indara nafak oito nae. Ḳali itar mora lash ze zone soibo, he nafak oizibo.
37 Zomino bain dibar niote toa kunuzator bisor ufre zudi otar lash foṛe, te ita nafak oito nae.
38 Oile kunu bisor ufre fani dia bizanir bade zudi ita foṛe, te i bis tumrar lagi nafak.
39 “Tumrar halal kunu foshu morigele, igur lash ze zone soibo, he hainja forzonto nafak roibo.
40 Ḳeu zudi ou mora foshur gust ḳae, te he tar ḳafoṛ-sufoṛ doia dite oibo, ar he hainja forzonto nafak roibo. Ar ḳeu zudi ou foshur lashre at dia tule, te he tar ḳafoṛ-sufoṛ doia dite oibo, he-o hainja forzonto nafak roibo.
41 “Huno, maṭir maze solra hoḳol zator huru-muru zandar ḳaoa tumrar lagi haram, itare tumra ginnaio.
42 Ita buke solra zandar ouk, ba sair faoe aṭra zandar ba bout faoe solra ouk, hoḳol nomunar maṭit solra huru-muru zandar tumra ḳaio na, itare ginnaio.
43 Tumra ita kunutar lagi nizore ginnar zon banaio na, ba otae-o zanu tumrare nafak na banae.
44 Mono rakio, ami Alla-u tumrar Mabud. Amar niote tumra nizore fak-fobitro rakio. Zano to, ami nize-o fobitro. Erlagi maṭit solra kunu huru-muru zandaror lagi tumra nizore nafak banaio na.
45 Ami to Alla, ami tumrar Mabud oar kiale, Mishor desh taki tumrare bar ḳori anchi. Ami nize fobitro, erlagi tumra-o fobitro roio.
46 “Te foshu, faki, fanit boshot ḳorra zandar, ar maṭir maze solra hoḳol nomunar huru-muru zandaror befare tumra amar hukum-ahkam manio.
47 Kunṭa tumrar lagi zaiz ar kunṭa nazaiz, kun foshur gust halal ar kunṭa haram, ita tumra buzia-hunia solio.”